𑄃𑄏 𑄛𑄪𑄢𑄬𑄝𑄧𑄁

𑄇𑄬. 𑄞𑄨. 𑄘𑄬𑄝𑄥𑄩𑄥𑄴 𑄌𑄋𑄴𑄟

𑄃𑄬𑄇𑄴

𑄚𑄨𑄟𑄮𑄚𑄬 𑄃𑄧𑄟𑄧𑄇𑄧𑄘𑄧 𑄉𑄧𑄟𑄴 𑄄𑄥𑄴𑄇𑄪𑄣𑄳𑄠 𑄛𑄮𑅁 𑄛𑄳𑄢𑄭𑄟𑄢𑄨, 𑄇𑄳𑄣𑄥𑄴 𑄆𑄘𑄮𑄖𑄴 𑄑𑄬𑄣𑄬𑄚𑄴𑄜𑄪𑄣𑄬 𑄝𑄨𑄖𑄴𑄖𑄨 𑄛𑄬𑄠𑄳𑄠𑄬𑅁 𑄄𑄥𑄴𑄇𑄪𑄣𑄴–𑄇𑄧𑄣𑄬𑄎𑄧𑄖𑄴 𑄟𑄬𑄑𑄳𑄢𑄨𑄇𑄴 𑄃 𑄃𑄭𑄠𑄬𑄖𑄴 𑄆 𑄛𑄳𑄣𑄥𑄴 𑄛𑄬𑄠𑄳𑄠𑄬𑅁 𑄢𑄫𑄛𑄧𑄇𑄢𑄩 𑄃𑄘𑄟𑄧𑄖𑄴 𑄝𑄬𑄇𑄴𑄪𑄚𑄬 𑄖𑄢𑄬 𑄇𑄮𑄌𑄴𑄛𑄚𑄴𑅁 𑄄𑄥𑄴𑄇𑄪𑄣𑄴, 𑄇𑄧𑄣𑄬𑄎𑄧𑄖𑄴 𑄗𑄉𑄧𑄘𑄬 𑄖 𑄥𑄧𑄟𑄌𑄳𑄠𑄉𑄪𑄚𑄬 𑄚𑄨𑄟𑄮𑄚𑄧𑄢𑄬 𑄚𑄧 𑄘𑄬𑄣𑄬 𑄘𑄨𑄚𑄴 𑄚𑄧 𑄡𑄠𑄴, 𑄈𑄇𑄴𑄧𑄚𑄴 𑄗𑄬𑄭 𑄚𑄧 𑄛𑄢𑄧𑄚𑄴𑅁 𑄚𑄨𑄟𑄮𑄚𑄬 𑄃𑄭𑄆 𑄛𑄥𑄴 𑄉𑄧𑄌𑄳𑄠 𑄇𑄎𑄧𑄣𑄧𑄁 𑄓𑄨𑄉𑄳𑄢𑄨 𑄇𑄧𑄣𑄬𑄎𑄧𑄖𑄴𑄪𑄚𑄴𑅁 𑄆𑄝𑄢𑄴 𑄞𑄧𑄖𑄴𑄖𑄨 𑄦𑄧𑄝𑄧 𑄃𑄧𑄚𑄢𑄴𑄥𑄧𑄖𑄴𑅁 𑄝𑄨𑄆 𑄞𑄧𑄖𑄴𑄖𑄨 𑄦𑄧𑄣𑄬–𑄃𑄮 𑄡𑄨𑄠𑄬𑄚𑄴, 𑄃𑄧𑄚𑄢𑄴𑄥𑄧𑄖𑄴 𑄞𑄧𑄖𑄴𑄖𑄨 𑄦𑄧𑄣𑄬–𑄃𑄮 𑄥𑄨𑄠𑄬𑄚𑄴𑅁 𑄝𑄧𑄏𑄧𑄢𑄪𑄚𑄴 𑄝𑄬𑄌𑄴 𑄦𑄬𑄎𑄴𑄎𑄝𑄧𑄢𑄴 𑄚𑄧𑄠𑄴𑅁 𑄃 𑄄𑄅𑄚𑄨𑄞𑄢𑄴𑄥𑄨𑄑𑄨𑄖𑄴 𑄞𑄧𑄖𑄴𑄖𑄨 𑄦𑄧𑄣𑄬–𑄃𑄮 𑄆𑄇𑄴 𑄝𑄧𑄏𑄧𑄢𑄴 𑄎𑄬𑄢𑄴 𑄛𑄧𑄢𑄨 𑄗 𑄛𑄧𑄢𑄨𑄝𑄮𑅁 𑄆𑄇𑄴 𑄝𑄧𑄏𑄧𑄢𑄴 𑄎𑄬𑄢𑄴 𑄛𑄧𑄢𑄨 𑄗𑄬𑄣𑄬–𑄃𑄮 𑄞𑄧𑄖𑄴𑄖𑄨 𑄦𑄧𑄚 𑄦𑄧𑄣𑄬 𑄘𑄧 𑄦𑄧𑄣𑄧, 𑄚𑄧 𑄦𑄧𑄣𑄬 𑄟𑄉𑄚 𑄟𑄉𑄚 𑄝𑄧𑄏𑄧𑄢𑄪𑄚𑄴 𑄝𑄧𑄢𑄴𑄝𑄘𑄴 𑄘𑄬𑄚 𑄦𑄧𑄝𑄧𑅁 𑄆 𑄥𑄬𑄚𑄖𑄴𑄖𑄬𑄭 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄝𑄢𑄴 𑄒𑄨𑄇𑄴 𑄉𑄧𑄌𑄳𑄠 𑄚𑄨𑄟𑄮𑄚𑄬𑅁 𑄝𑄨𑄆 𑄞𑄧𑄖𑄴𑄖𑄨 𑄦𑄧𑄣𑄬 𑄇𑄎𑄧𑄣𑄧𑄁 𑄓𑄨𑄉𑄳𑄢𑄨 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨𑄦𑄱𑄰 𑄛𑄖𑄴𑄧 𑄚𑄨𑄟𑄮𑄚𑄬𑅁 𑄊𑄧𑄢𑄧𑄖𑄴𑄪𑄚𑄴 𑄦𑄘𑄨 𑄇𑄧𑄣𑄬𑄎𑄴 𑄉𑄧𑄢𑄨 𑄛𑄢𑄨𑄣𑄪𑄚𑄴𑅁 𑄚𑄨𑄟𑄮𑄚𑄬 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄣𑄬 𑄃𑄘𑄟𑄧𑄖𑄴 𑄗𑄬𑄭 𑄚𑄧 𑄛𑄬𑄝𑄧, 𑄗 𑄛𑄧𑄢𑄨𑄝𑄮𑄉𑄱𑄰 𑄢𑄋𑄟𑄖𑄳𑄠𑄖𑄴𑅁 𑄥𑄧𑄁 𑄥𑄧𑄟𑄌𑄳𑄠𑄉𑄪𑄚𑄴 𑄜𑄬𑄣𑄬𑄭 𑄇𑄬𑄚𑄬 𑄗𑄬𑄝𑄧𑄉𑄱𑄰, 𑄉𑄭 𑄉𑄭 𑄞𑄝𑄬𑄢𑄴𑅁 𑄞𑄝𑄧𑄘𑄬 𑄞𑄝𑄧𑄘𑄬 𑄘𑄨𑄚𑄴 𑄊𑄧𑄚𑄬𑄭 𑄆𑄣𑄧𑅁 𑄖𑄨𑄚𑄴 𑄘𑄨𑄚𑄴 𑄛𑄧𑄢𑄬𑄘𑄨 𑄢𑄋𑄟𑄖𑄳𑄠𑄖𑄴 𑄡𑄬𑄝𑄧 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄝𑄖𑄴𑄖𑄬𑄭𑅁 𑄞𑄧𑄖𑄴𑄖𑄨𑄦𑄱𑄰𑄚𑄬 𑄡𑄬𑄚𑄬–𑄥𑄬𑄚𑄬 𑄗𑄬𑄝𑄧 𑄢𑄋𑄟𑄖𑄳𑄠𑄖𑄴𑅁 𑄖𑄨𑄚𑄴 𑄘𑄨𑄚𑄴 𑄝𑄘𑄬 𑄚𑄨𑄟𑄮𑄚𑄧𑄢𑄴 𑄡𑄚𑅁 𑄚𑄪𑄠𑄮 𑄎𑄉, 𑄚𑄪𑄠𑄮 𑄇𑄧𑄣𑄬𑄎𑄴, 𑄚𑄪𑄠𑄮 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄛𑄬𑄝𑄧𑄉𑄱𑄰 𑄄𑄠𑄬𑄚𑄴 𑄞𑄝𑄨 𑄖 𑄟𑄧𑄚𑄚𑄴 𑄥𑄨𑄠𑄬 𑄆𑄇𑄴 𑄝𑄝𑄧𑄖𑄳𑄠𑄦𑄱𑄰𑄠𑄬𑅁 𑄛𑄧𑄢𑄚𑄴 𑄍𑄧𑄑𑄴𑄜𑄧𑄑𑄳𑄠𑄦𑄱𑄰𑄠𑄬 𑄇𑄬𑄚𑄬 𑄗𑄬𑄝𑄧𑄉𑄱𑄰𑅁 𑄞𑄝𑄬 𑄟𑄪𑄭 𑄇𑄪𑄙𑄪 𑄡𑄋𑄧𑄢𑄴! 𑄇𑄧𑄚𑄧 𑄇𑄨𑄌𑄴𑄪 𑄦𑄢𑄋𑄧𑄢𑄴 𑄚𑄇𑄨𑅃 

𑄢𑄋𑄟𑄖𑄳𑄠𑄖𑄴 𑄡𑄬𑄝𑄖𑄴𑄖𑄬𑄭 𑄚𑄨𑄟𑄮𑄚𑄬 𑄖𑄢𑄴 𑄣𑄉𑄬𑄘𑄬 𑄎𑄨𑄚𑄨𑄥𑄴𑄛𑄘𑄨 𑄝𑄬𑄇𑄴𑄇𑄚𑄨 𑄎𑄪𑄇𑄴𑄮𑄣𑄴 𑄉𑄧𑄌𑄳𑄠𑅁 𑄛𑄬𑄚𑄴𑄘𑄧𑄣𑄧𑄁, 𑄥𑄨𑄣𑄪𑄟𑄴 𑄙𑄱𑄰 𑄙𑄭 𑄗𑄱𑄰𑄠𑄬𑅁 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴 𑄡𑄬𑄭𑄚𑄬 𑄓𑄋𑄧𑄢𑄴 𑄆𑄇𑄴𑄮 𑄝𑄬𑄉𑄴 𑄃𑄚𑄳𑄠𑄬𑄉𑄱𑄰𑅁 𑄥𑄬 𑄝𑄬𑄇𑄴𑄮𑄖𑄴 𑄛𑄬𑄚𑄴𑄘𑄧𑄣𑄧𑄁, 𑄥𑄨𑄣𑄪𑄟𑄴, 𑄉𑄚𑄴𑄏𑄇𑄚𑄨, 𑄥𑄬𑄚𑄴𑄓𑄬𑄣𑄴, 𑄎𑄧𑄘 𑄞𑄧𑄢𑄬𑄭 𑄗𑄱𑄰𑄠𑄬𑅁 𑄇𑄧𑄣𑄬𑄎𑄧𑄖𑄴 𑄉𑄬𑄣𑄬 𑄖 𑄟 𑄖𑄢𑄬 𑄖𑄬𑄋 𑄘𑄨𑄘𑄧 𑄡𑄨𑄠𑄬𑄚𑄴 𑄢𑄪𑄎𑄬 𑄥𑄨𑄠𑄬𑄚𑄴 𑄇𑄨𑄚𑄨 𑄈𑄬𑄝𑄖𑄴𑄖𑄬𑄭𑅁 𑄚𑄨𑄟𑄮𑄚𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄇𑄨𑄚𑄨 𑄈𑄠𑄴, 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄧 𑄈𑄠𑄴𑅁 𑄇𑄨𑄌𑄴𑄪 𑄚𑄧 𑄈𑄬𑄣𑄬–𑄃𑄮 𑄖𑄬𑄋𑄉𑄪𑄚𑄴 𑄉𑄮𑄎𑄬𑄭 𑄚𑄧 𑄘𑄬𑄉𑄨 𑄖 𑄟𑄢𑄬𑅁 𑄖𑄬 𑄎𑄧𑄟 𑄉𑄧𑄢𑄨 𑄗𑄧𑄭𑄠𑄨𑅁 𑄆𑄙𑄧𑄇𑄳𑄠 𑄉𑄧𑄢𑄨 𑄖𑄬𑄋 𑄎𑄧𑄟 𑄉𑄧𑄢𑄨 𑄗𑄧𑄘𑄬 𑄗𑄧𑄘𑄬 𑄌𑄠𑄴𑄘𑄬 𑄍𑄧 𑄦𑄎𑄢𑄴 𑄖𑄬𑄋𑄦𑄱𑄰𑄠𑄧𑄚𑄴𑅁 𑄖𑄬𑄋𑄉𑄪𑄚𑄴 𑄉𑄧𑄚𑄨 𑄌𑄬𑄭 𑄍𑄧 𑄦𑄎𑄢𑄴 𑄖𑄬𑄋 𑄛𑄬𑄭 𑄟𑄪 𑄌𑄨𑄟𑄬 𑄌𑄨𑄟𑄬 𑄦𑄎𑄨𑄣𑄮 𑄚𑄨𑄟𑄮𑄚𑄬𑅁 𑄝𑄬𑄇𑄴 𑄖𑄬𑄋𑄉𑄪𑄚𑄴 𑄝𑄬𑄉𑄧 𑄞𑄨𑄘𑄨𑄢𑄬 𑄞𑄮𑄢𑄬𑄭 𑄗𑄧𑄣𑄧 𑄚𑄨𑄟𑄮𑄚𑄬𑅁 𑄢𑄋𑄟𑄖𑄳𑄠𑄖𑄴 𑄡𑄘𑄬 𑄄𑄇𑄴𑄬 𑄖𑄢𑄴 𑄇𑄧𑄚𑄧 𑄇𑄨𑄌𑄴𑄪 𑄅𑄚𑄧 𑄚𑄬𑄭𑅁 𑄇𑄧𑄣𑄬𑄎𑄧𑄖𑄴𑄪𑄚𑄴 𑄖 𑄥𑄑𑄴𑄑𑄨𑄜𑄨𑄇𑄬𑄑𑄴 𑄃 𑄦𑄬𑄓𑄴𑄟𑄬𑄚𑄴, 𑄌𑄬𑄠𑄢𑄴𑄟𑄬𑄚𑄧𑄢𑄴 𑄇𑄉𑄮𑄌𑄴𑄍𑄚𑄨 𑄝𑄬𑄇𑄴𑄇𑄚𑄨 𑄗𑄪𑄝𑄬𑄭 𑄗𑄭𑄪𑄠𑄬 𑄃𑄉𑄬 𑄃𑄉𑄬𑅁 𑄖𑄪𑄠𑄮 𑄇𑄨 𑄚𑄨𑄟𑄮𑄚𑄬 𑄞𑄝𑄬 𑄢𑄋𑄟𑄖𑄳𑄠𑄖𑄴 𑄡 𑄚𑄧 𑄛𑄧𑄢𑄨𑄝𑄮 𑄛𑄢 𑄛𑄁𑅁 𑄇𑄧𑄚𑄴𑄚 𑄆𑄭𑄚𑄬 𑄇𑄧𑄝𑄧𑄄𑄘𑄬 𑄛𑄢 𑄛𑄢𑄴 𑄚𑄨𑄟𑄮𑄚𑄴, 𑄖𑄧𑄖𑄴𑄪𑄚𑄴 𑄢𑄋𑄟𑄖𑄳𑄠𑄖𑄴 𑄡 𑄚𑄧 𑄛𑄧𑄢𑄨𑄝𑄮𑅁

𑄚𑄨𑄟𑄮𑄚𑄧𑄢𑄬 𑄌𑄪𑄙𑄮 𑄟𑄪 𑄘𑄬𑄊𑄨𑄘𑄉𑄠𑄴 𑄖 𑄓𑄋𑄧𑄢𑄴 𑄝𑄮𑄚𑄴𑄮 𑄇𑄧𑄣𑄧, 𑄚𑄨𑄟𑄮𑄚𑄴, 𑄖𑄧𑄢𑄬 𑄘𑄬𑄊𑄨 𑄟𑄧𑄖𑄴𑄪𑄚𑄴 𑄟𑄧𑄚𑄬 𑄇𑄧𑄖𑄴𑄬, 𑄖𑄪𑄭 𑄃𑄢𑄴 𑄎𑄧𑄚𑄧𑄟𑄧𑄖𑄴 𑄊𑄧𑄢𑄧𑄖𑄴 𑄆𑄭 𑄚𑄧 𑄛𑄬𑄝𑄬𑅁 𑄆𑄇𑄴𑄧𑄢𑄬 𑄡𑄧𑄖𑄴𑄬 𑄙𑄧𑄇𑄴𑅁 𑄇𑄪𑄘𑄴𑄫𑄢𑄴 𑄛𑄢 𑄛𑄧𑄗𑄴! 

𑄝𑄬𑄚𑄳𑄠 𑄝𑄮𑄘𑄮𑄖𑄴 𑄅𑄙𑄨𑄣𑄬 𑄝𑄬𑄣𑄳𑄠 𑄣𑄪𑄋𑄬𑄉𑄨𑅁

𑄚𑄨𑄟𑄮𑄚𑄬 𑄇𑄧𑄣𑄧, 𑄥𑄨𑄠𑄬𑄚𑄴 𑄚𑄧𑄠𑄴 𑄝𑄬𑄭, 𑄢𑄋𑄟𑄖𑄳𑄠𑄖𑄴 𑄡𑄬𑄟𑄴, 𑄇 𑄊𑄧𑄢𑄧𑄖𑄴 𑄗𑄬𑄟𑄴𑄝𑄱𑄰! 𑄆𑄝𑄧 𑄇𑄧𑄚𑄧 𑄊𑄧𑄢𑄴 𑄒𑄨𑄇𑄴 𑄚𑄧 𑄦𑄧𑄠𑄴𑅁 

𑄎𑄖𑄳𑄠 𑄞𑄧𑄣 𑄃𑄠𑄴𑅁 𑄊𑄧𑄢𑄴 𑄇𑄨 𑄢𑄖𑄴 𑄛𑄧𑄌𑄴𑄬𑄘𑄬! 𑄊𑄧𑄢𑄴 𑄇𑄨 𑄒𑄨𑄇𑄴 𑄉𑄧𑄢 𑄣𑄉𑄬𑄖𑄴𑄬𑅃 𑄟𑄟𑄪𑄘𑄊𑄨 𑄊𑄧𑄢𑄧𑄖𑄴 𑄇𑄧𑄠𑄬𑄇𑄴𑄮 𑄘𑄨𑄚𑄴 𑄗𑄬𑄝𑄬𑄉𑄱𑄰𑅁 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄚 𑄦𑄧𑄣𑄬 𑄥𑄨𑄖𑄴𑄪𑄚𑄴 𑄃𑄟𑄬𑄚𑄬 𑄊𑄧𑄢𑄴 𑄒𑄨𑄇𑄴 𑄉𑄧𑄢 𑄦𑄧𑄝𑄧𑅁 𑄝𑄝 𑄊𑄧𑄢𑄴 𑄒𑄨𑄇𑄴 𑄉𑄧𑄢𑄨 𑄘𑄨 𑄘𑄭 𑄆𑄝𑄧𑅁 𑄘𑄨𑄚𑄴 𑄇𑄧𑄘𑄧𑄇𑄴 𑄟𑄟𑄪𑄘𑄊𑄨 𑄊𑄧𑄢𑄧𑄖𑄴 𑄗𑄬𑄝𑄬𑅁 𑄖𑄪𑄭 𑄞𑄧𑄖𑄴𑄖𑄨 𑄦𑄧𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄟𑄪𑄭 𑄢𑄋𑄟𑄖𑄳𑄠 𑄆𑄟𑄴𑅁 𑄇𑄨, 𑄚𑄧 𑄛𑄢𑄨𑄝𑄬 𑄟𑄟𑄪𑄘𑄊𑄨 𑄊𑄧𑄢𑄧𑄖𑄴 𑄗𑄬𑄭𑅃

𑄚𑄨𑄟𑄮𑄚𑄬 𑄚𑄨𑄉𑄪𑄢𑄨 𑄇𑄧𑄣𑄧, 𑄛𑄢𑄨𑄟𑄴𑅁

𑄚𑄨𑄟𑄮𑄚𑄧 𑄝𑄮𑄚𑄴𑄮 𑄇𑄧𑄠𑄬𑄇𑄴𑄛𑄧𑄣𑄴𑄣 𑄢𑄋𑄟𑄖𑄳𑄠𑄖𑄴 𑄡𑄨𑄠𑄬𑅁 𑄇𑄧𑄙𑄚𑄴 𑄇𑄧𑄣𑄧𑄘𑄬, 𑄆𑄝𑄴𑄬𑄢𑄬 𑄖𑄬 𑄘𑄨𑄚𑄴 𑄟𑄭𑄚𑄬 𑄢𑄋𑄟𑄖𑄳𑄠𑄖𑄴 𑄡𑄠𑄴𑅁 𑄢𑄋𑄟𑄖𑄳𑄠𑄖𑄴 𑄇𑄪𑄝𑄮𑄖𑄴 𑄇𑄨 𑄃𑄊𑄬, 𑄈𑄧𑄚𑄴𑄘𑄧𑄢𑄬 𑄈𑄧𑄚𑄴𑄘𑄧𑄢𑄬 𑄝𑄬𑄇𑄴𑄇𑄚𑄨 𑄥𑄪𑄇𑄴 𑄛𑄠𑄴𑅁 𑄇𑄱𑄰 𑄛𑄢𑄬𑅁

𑄚𑄨𑄟𑄮𑄚𑄧𑄢𑄴 𑄃𑄘𑄟𑄧 𑄥𑄧𑄟𑄌𑄳𑄠 𑄇𑄧𑄠𑄬𑄇𑄴𑄎𑄧𑄚𑄴 𑄝𑄬𑄣𑄳𑄠 𑄟𑄙𑄚𑄴 𑄘𑄬𑄊 𑄉𑄧𑄢𑄨𑄝𑄖𑄴𑄖𑄬𑄭 𑄆𑄌𑄴𑄍𑄮𑄚𑄴 𑄚𑄨𑄟𑄮𑄚𑄧 𑄄𑄙𑄪𑅁 𑄄𑄖𑄴𑄪𑄚𑄴 𑄆𑄇𑄴𑄎𑄧𑄚𑄴 𑄇𑄎𑄧𑄣𑄧𑄁 𑄓𑄨𑄉𑄳𑄢𑄨 𑄇𑄧𑄣𑄬𑄎𑄧𑄖𑄴, 𑄓𑄨𑄉𑄳𑄢𑄨 𑄞𑄧𑄖𑄴𑄖𑄨𑄦𑄱𑄰𑄠𑄬𑅁 𑄘𑄨𑄎𑄧𑄚𑄴 𑄈𑄉𑄢𑄍𑄧𑄢𑄨 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨𑄦𑄱𑄰𑄠𑄧𑄚𑄴𑅁 𑄛𑄌𑄴𑄎𑄧𑄚𑄴 𑄄𑄅𑄚𑄨𑄞𑄢𑄴𑄥𑄨𑄘𑄨𑄖𑄴, 𑄝𑄪𑄠𑄬𑄘𑄧𑄖𑄴 𑄞𑄧𑄖𑄴𑄖𑄨 𑄦𑄧𑄝𑄖𑄴𑄖𑄬𑄭 𑄝𑄌𑄴𑄬 𑄃𑄊𑄧𑄚𑄴𑅁 𑄝𑄧𑄢𑄪𑄕𑄳𑄠 𑄘𑄩𑄊𑄨𑄚𑄣 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨𑄦𑄱𑄰𑄠𑄬𑅁 𑄖𑄖𑄴𑄪𑄚𑄴 𑄘𑄩𑄊𑄨𑄚𑄣 𑄇𑄧𑄣𑄬𑄌𑄴𑄍𑄚𑄴 𑄞𑄢𑄨 𑄉𑄧𑄟𑄴 𑄣𑄉𑄬𑅁 𑄃 𑄢𑄋𑄟𑄖𑄳𑄠𑄖𑄴 𑄈𑄉𑄢𑄍𑄧𑄢𑄨 𑄑𑄅𑄚𑄧𑄖𑄴 𑄡𑄬𑄭 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨 𑄦𑄧𑄝𑄢𑄴 𑄦𑄃𑄮𑄌𑄴 𑄚𑄬𑄭𑅁 𑄡𑄬𑄚𑄬–𑄥𑄬𑄚𑄬 𑄥𑄑𑄴𑄑𑄨𑄜𑄨𑄇𑄬𑄑𑄴𑄑𑄚𑄴 𑄛𑄬𑄣𑄬 𑄦𑄧𑄠𑄴 𑄖𑄢𑄴𑅁 𑄆𑄚𑄬–𑄃𑄮 𑄣𑄬𑄊 𑄇𑄧𑄟𑄴 𑄛𑄢𑄬𑅁 𑄣𑄬𑄊 𑄇𑄧𑄟𑄴 𑄛𑄣𑄴𑄬–𑄃𑄮 𑄇𑄧𑄣𑄬𑄎𑄴 𑄃 𑄃𑄘𑄟𑄧 𑄥𑄧𑄟𑄌𑄳𑄠𑄅𑄚𑄴𑄘𑄭𑄮 𑄝𑄬𑄇𑄴𑄪𑄚𑄴𑄘𑄱𑄰𑄥𑄧𑄁 𑄛𑄧𑄢𑄬𑅁 𑄥𑄬𑄚𑄧𑄖𑄴𑄖𑄬𑄭 𑄝𑄬𑄇𑄴𑄪𑄚𑄬 𑄝𑄧𑄢𑄪𑄕𑄳𑄠𑄢𑄬 𑄇𑄮𑄌𑄴𑄛𑄚𑄴𑅁 𑄃 𑄟𑄨𑄣𑄬𑄉𑄪𑄚𑄬 𑄘𑄧 𑄖𑄢𑄬 𑄟𑄘𑄬𑄭 𑄚𑄧 𑄛𑄬𑄣𑄬 𑄘𑄨𑄚𑄴 𑄚𑄧 𑄡𑄠𑄴𑅁 𑄇𑄧𑄚𑄧 𑄇𑄧𑄚𑄧 𑄟𑄨𑄣𑄬 𑄣𑄎𑄬 𑄟𑄘𑄬𑄭 𑄚𑄧 𑄛𑄣𑄴𑄬–𑄃𑄮 𑄝𑄧𑄢𑄪𑄕𑄳𑄠 𑄙𑄇𑄴 𑄊𑄎𑄨 𑄦𑄧𑄣𑄬 𑄡𑄚𑄴𑅁 𑄃𑄘𑄟𑄧𑄖𑄴 𑄚𑄧 𑄟𑄘𑄚𑄴𑄘𑄬 𑄏𑄧𑄢𑄨 𑄘𑄬𑄝𑄚𑄨 𑄃 𑄖 𑄥𑄧𑄟𑄌𑄳𑄠 𑄣𑄢𑄨, 𑄇𑄧𑄣𑄬𑄎𑄧𑄖𑄴 𑄛𑄢𑄨 𑄖𑄣𑄪𑄇𑄴𑄘𑄢𑄴, 𑄆𑄝𑄧𑄖𑄬 𑄌𑄋𑄴𑄟, 𑄃𑄟𑄳𑄦𑄧𑄇𑄴 𑄌𑄋𑄴𑄟𑅁 𑄖𑄢 𑄥𑄧𑄟𑄌𑄳𑄠 𑄇𑄧𑄠𑄬𑄇𑄴𑄎𑄧𑄚𑄴𑅁 𑄖𑄢 𑄝𑄨𑄉𑄳𑄠𑄚𑄴 𑄚𑄨𑄚𑄬𑄭 𑄛𑄧𑄢𑄳𑄦𑄧𑄚𑄴, 𑄥𑄬𑄚𑄧𑄖𑄳𑄠 𑄖𑄢 𑄆𑄇𑄴𑄇 𑄘𑄬𑄟𑄇𑄴 𑄘𑄬𑄟𑄇𑄴𑅁 𑄝𑄧𑄢𑄪𑄕𑄳𑄠 𑄣𑄬𑄊 𑄚𑄧 𑄛𑄣𑄴𑄬–𑄃𑄮, 𑄖𑄬 𑄛𑄮𑄝𑄮 𑄃𑄧𑄟𑄧𑄇𑄧𑄘𑄧 𑄘𑄮𑄣𑄴, 𑄟𑄨𑄥𑄪𑄇𑄴𑅁 

𑄝𑄧𑄢𑄪𑄕𑄳𑄠 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭, 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄚𑄧𑄦𑄱𑄰𑄚𑄬 𑄘𑄩𑄊𑄨𑄚𑄣 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨 𑄦𑄧𑄘𑄬 𑄦𑄮𑄣𑄪𑄚𑄴𑅁 𑄆𑄇𑄴 𑄣𑄧𑄊𑄬 𑄆𑄭–𑄡𑄬𑄭 𑄛𑄣𑄴𑄧𑄋𑄪𑄚𑄴𑅁 𑄃 𑄘𑄩𑄊𑄨𑄚𑄣 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨 𑄦𑄧𑄣𑄬 𑄈𑄟𑄇𑄴𑄇𑄭 𑄛𑄥𑄴𑅁 𑄇𑄧𑄣𑄬𑄌𑄴𑄍𑄚𑄧 𑄎𑄉𑄚𑄴–𑄃𑄮 𑄃𑄧𑄟𑄧𑄇𑄧𑄘𑄧 𑄘𑄮𑄣𑄴 𑄣𑄉𑄬 𑄟𑄧𑄖𑄴𑄪𑄚𑄴𑅁 𑄟𑄌𑄴𑄖𑄧𑄢𑄪𑄚𑄴–𑄃𑄮 𑄝𑄬𑄌𑄴𑄞𑄉𑄴 𑄌𑄋𑄴𑄟𑅁 𑄎𑄘𑄧𑄢𑄴 𑄑𑄚𑄴 𑄃𑄊𑄬 𑄞𑄨𑄣𑄨 𑄉𑄧𑄟𑄬𑄘𑄣𑄬 𑄥𑄨𑄊𑄚𑄴𑅁 𑄟𑄉𑄚 𑄟𑄉𑄚 𑄆𑄘𑄴𑄫𑄢𑄴 𑄘𑄫𑄢𑄧𑄖𑄴 𑄡𑄚𑅁

𑄟𑄪𑄭 𑄘𑄧 𑄘𑄫𑄢𑄧𑄖𑄴 𑄡𑄬𑄝𑄖𑄴𑄖𑄬𑄭 𑄌𑄬𑄭𑄠𑄧𑄁𑅁

𑄇𑄨𑄖𑄴𑄖𑄬𑄭𑅃

𑄟𑄧 𑄙𑄧𑄇𑄬, 𑄟𑄪𑄭 𑄗𑄬𑄝𑄖𑄴𑄖𑄬𑄭𑅁

𑄇𑄧𑄚𑄧 𑄥𑄧𑄟𑄌𑄳𑄠 𑄚𑄬𑄭 𑄉𑄧𑄢𑄨 𑄖𑄧 𑄙𑄧𑄉𑄬 𑄖𑄪𑄭 𑄗𑄬𑄭 𑄇𑄨 𑄦𑄧𑄝𑄧𑅁

𑄖𑄪𑄠𑄮 𑄘𑄧𑅁 𑄝𑄬𑄚𑄳𑄠 𑄦𑄧𑄣𑄬 𑄟𑄟 𑄟𑄧𑄢𑄬 𑄚𑄧 𑄇𑄧𑄝𑄧 𑄇𑄧𑄇𑄴𑄬 𑄊𑄪𑄟𑄮𑄖𑄴𑄪𑄚𑄴 𑄅𑄙𑄨𑄝𑄬𑅁 𑄝𑄝 𑄚𑄧 𑄇𑄧𑄝𑄧 𑄆𑄙𑄧𑄇𑄴 𑄇𑄨𑄠𑄬 𑄝𑄬𑄢𑄌𑄴𑅃 𑄇𑄪𑄙𑄪 𑄡𑄌𑄴𑅃 𑄣𑄬𑄊 𑄇𑄧𑄇𑄴𑄬 𑄛𑄧𑄢𑄳𑄦𑄨𑄝𑄬𑅃𑅁 𑄝𑄮𑄚𑄴𑄮 𑄚𑄧 𑄇𑄧𑄝𑄧 𑄛𑄧𑄢𑄩𑄇𑄴𑄈𑄬 𑄆𑄏𑄬𑄢𑄴, 𑄌𑄨𑄘𑄬 𑄉𑄧𑄢𑄨𑄌𑄴𑅁 𑄥𑄨𑄙𑄪 𑄉𑄬𑄣𑄬 𑄇𑄧𑄚𑄧𑄎𑄧𑄚𑄬 𑄇𑄨𑄌𑄴𑄪 𑄚𑄧 𑄇𑄧𑄝𑄇𑄴𑅁 𑄇𑄧𑄚𑄧 𑄚𑄚𑄪–𑄃𑄎𑄪 𑄚𑄧 𑄗𑄬𑄝𑄇𑄴𑅁 𑄟𑄧 𑄙𑄧𑄉𑄬 𑄟𑄪𑄭 𑄗𑄬𑄟𑄴𑅁 𑄡𑄧𑄇𑄴𑄬 𑄟𑄧𑄚𑄬 𑄇𑄧𑄠𑄴, 𑄥𑄧𑄇𑄴𑄬 𑄝𑄱𑄰 𑄛𑄧𑄢𑄳𑄦𑄨𑄟𑄴𑅁 𑄡𑄨𑄙𑄪 𑄟𑄧𑄚𑄬 𑄇𑄧𑄠𑄴 𑄥𑄨𑄙𑄪 𑄡𑄬𑄟𑄴𑅁 𑄌𑄋𑄴𑄟 𑄇𑄧𑄙𑄠𑄴 𑄃𑄝𑄚𑄳𑄠 𑄉𑄪𑄢𑄪𑅁

𑄚𑄨𑄟𑄮𑄚𑄬 𑄆𑄇𑄴 𑄣𑄋𑄬𑄣𑄴 𑄇𑄱𑄰 𑄚𑄨𑄣𑄧𑅁 𑄈𑄣𑄨𑄇𑄴, 𑄖𑄖𑄴𑄪𑄚𑄮 𑄢𑄋𑄟𑄖𑄳𑄠𑄖𑄴 𑄡𑄬𑄝𑄢𑄴 𑄟𑄧𑄚𑄬 𑄚𑄧 𑄇𑄧𑄢𑄴𑅁 𑄢𑄋𑄟𑄖𑄳𑄠𑄖𑄴 𑄡𑄬𑄝𑄢𑄴 𑄟𑄧𑄚𑄬 𑄚𑄧 𑄇𑄧𑄣𑄬–𑄃𑄮, 𑄖𑄪𑄠𑄮 𑄖 𑄟𑄧𑄚𑄧 𑄘𑄪𑄇𑄴𑄈𑄚𑄴 𑄈𑄪𑄣𑄨 𑄚𑄧 𑄘𑄬𑄊𑄬𑄣𑄧𑅁

𑄝𑄧𑄢𑄪𑄕𑄳𑄠 𑄃 𑄇𑄧𑄣𑄧, 𑄘𑄩𑄊𑄨𑄚𑄣 𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨 𑄦𑄧𑄠𑄴 𑄞𑄨𑄣𑄨 𑄜𑄬𑄣 𑄡𑄬𑄝𑄧𑄁 𑄚𑄇𑄨𑅃

𑄥𑄨𑄠𑄬𑄚𑄴 𑄘𑄧 𑄚𑄧𑄠𑄴 𑄞𑄬𑄭, 𑄟𑄧𑄖𑄴𑄪𑄚𑄴 𑄞𑄢𑄨 𑄉𑄧𑄢𑄨 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄝𑄢𑄴 𑄟𑄧𑄚𑄬 𑄇𑄧𑄢𑄴, 𑄆 𑄥𑄬𑄚𑄧𑄖𑄴𑄖𑄬𑄭𑅁

𑄗𑄪𑄟𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄇 𑄥𑄨𑄙𑄪 𑄗𑄬𑄝𑄬𑄉𑄱𑄰 𑄇𑄱𑄰 𑄛𑄙𑄬𑄌𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄃𑄟𑄨 𑄝𑄬𑄢𑄬𑄝𑄧𑄁𑄉𑄨𑅁

𑄡𑄬𑄝 𑄝𑄪𑄏𑄧𑄁𑅃

𑄡𑄬𑄝𑄧𑄁𑅁

𑄃𑄉𑄬 𑄟𑄟𑄪 𑄊𑄧𑄢𑄧𑄖𑄴 𑄗𑄬𑄟𑄴𑄝𑄱𑄰𑅁 𑄥𑄨𑄖𑄴𑄪𑄚𑄴 𑄝𑄝 𑄊𑄧𑄢𑄴 𑄒𑄨𑄇𑄴 𑄉𑄧𑄢𑄨 𑄘𑄨𑄝𑄧𑅁 𑄊𑄧𑄢𑄴 𑄒𑄨𑄇𑄴 𑄦𑄧𑄣𑄬 𑄟𑄪𑄭 𑄃𑄟𑄬𑄚𑄬 𑄇𑄱𑄰 𑄛𑄙𑄬𑄟𑄴𑅁 𑄥𑄬𑄇𑄴𑄬 𑄡𑄬𑄠𑄮𑅁

𑄚𑄨𑄟𑄮𑄚𑄧𑄢𑄴 𑄥𑄧𑄟𑄌𑄳𑄠𑄉𑄪𑄚𑄬 𑄝𑄪𑄏𑄨 𑄚𑄧 𑄛𑄖𑄴𑄧𑄚𑄴, 𑄚𑄨𑄟𑄮𑄚𑄧𑄢𑄴 𑄞𑄨𑄘𑄨𑄢𑄬 𑄞𑄨𑄘𑄨𑄢𑄬 𑄇𑄬𑄙𑄧𑄇𑄳𑄠 𑄟𑄧𑄚𑄧𑄖𑄴 𑄘𑄪𑄈𑄴𑄦𑄱𑄰𑄠𑄬𑅁 𑄖𑄖𑄴𑄪𑄚𑄴 𑄇𑄧𑄝𑄢𑄴 𑄟𑄧𑄚𑄬 𑄇𑄧𑄢𑄴𑄦𑄱𑄰𑄠𑄬 𑄞𑄬𑄭𑄣𑄧𑄇𑄴, 𑄟𑄪𑄭 𑄢𑄋𑄟𑄖𑄳𑄠𑄖𑄴 𑄚𑄧 𑄡𑄬𑄟𑄴𑅁 𑄖𑄧𑄟 𑄣𑄧𑄊𑄬 𑄞𑄧𑄖𑄴𑄖𑄨 𑄦𑄮𑄟𑄴𑅁 𑄥𑄧𑄟𑄌𑄳𑄠𑄅𑄚𑄴𑄘𑄱𑄰𑄇𑄧𑄙 𑄇𑄧𑄙𑄬 𑄇𑄧𑄙𑄬 𑄃𑄝𑄙 𑄉𑄧𑄢𑄨 𑄦𑄨𑄘𑄮𑄖𑄴 𑄅𑄙𑄨𑄣𑄧 𑄚𑄇𑄴𑄧𑄝𑄨𑄢𑄬𑅁 𑄚𑄇𑄴𑄧𑄝𑄨𑄢𑄬 𑄦𑄨𑄘𑄮𑄖𑄴 𑄅𑄙𑄨 𑄚𑄨𑄟𑄮𑄚𑄧𑄖𑄴𑄪𑄚𑄴 𑄟𑄧𑄚𑄬 𑄇𑄧𑄖𑄴𑄬, 𑄖 𑄥𑄧𑄟𑄌𑄳𑄠𑄉𑄪𑄚𑄴 𑄄𑄇𑄴𑄪 𑄡𑄬𑄘𑄇𑄴𑄇𑄱𑄰𑅁 𑄄𑄇𑄴𑄪 𑄉𑄬𑄣𑄬, 𑄖𑄬 𑄈𑄪𑄎𑄨 𑄦𑄧𑄠𑄴𑅁 𑄚𑄧𑄣𑄬 𑄦𑄧𑄣𑄬 𑄛𑄧𑄖𑄴𑄖𑄨 𑄘𑄨𑄚𑄴 𑄥𑄧𑄟𑄌𑄳𑄠𑄅𑄚𑄴𑄘𑄱𑄰𑄘𑄬𑄊 𑄚𑄧 𑄦𑄧𑄣𑄬, 𑄛𑄧𑄙𑄬 𑄛𑄧𑄙𑄬 𑄚𑄧 𑄦𑄘𑄨𑄣𑄬, 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄝𑄧𑄏𑄨 𑄉𑄧𑄛𑄴 𑄘𑄨 𑄚𑄧 𑄛𑄬𑄣𑄬, 𑄆𑄇𑄴 𑄣𑄧𑄊𑄬 𑄇𑄧𑄣𑄬𑄎𑄧𑄖𑄴 𑄚𑄧 𑄉𑄬𑄣𑄬 𑄛𑄧𑄢𑄚𑄴 𑄚𑄧 𑄎𑄪𑄢𑄠𑄴𑅁 𑄛𑄬𑄘𑄧 𑄞𑄖𑄴 𑄈𑄧𑄠𑄴 𑄚𑄧 𑄡𑄚𑄴𑅁 𑄚𑄨𑄟𑄮𑄚𑄮 𑄥𑄧𑄟𑄌𑄳𑄠𑄅𑄚𑄮𑄢𑄴 𑄃𑄏 𑄆𑄌𑄳𑄠 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄝𑄧𑄏𑄨 𑄢𑄬𑄖𑄴 𑄥𑄧𑄟𑄴𑄞𑄉𑄴 𑄦𑄧𑄠𑄴 𑄥𑄧𑄁 𑄉𑄧𑄛𑄴 𑄘𑄨𑄝𑄇𑄴𑅁 𑄎𑄪𑄚𑄮 𑄛𑄧𑄦𑄴𑄢𑄴 𑄃𑄊𑄬𑅁 𑄚𑄨𑄟𑄮𑄚𑄬 𑄃 𑄇𑄧𑄟𑄧𑄣𑄬 𑄆𑄏𑄬𑄉𑄱𑄰! 𑄃𑄟𑄨 𑄇𑄧𑄚𑄬 𑄇𑄪𑄚𑄴𑄘𑄨𑄖𑄴𑄪𑄚𑄴 𑄇𑄪𑄚𑄴𑄘𑄨 𑄡𑄬𑄭𑅁 𑄝𑄬𑄇𑄴𑄪𑄚𑄴 𑄇𑄧𑄟𑄧𑄣𑄬 𑄆𑄉𑄧𑄖𑄴𑄧𑄢𑄴𑄦𑄱𑄰 𑄛𑄢𑄨𑅁 𑄘𑄬𑄊𑄦𑄱𑄰 𑄛𑄢𑄨𑅁 𑄝𑄬𑄇𑄴𑄪𑄚𑄴 𑄆𑄉𑄧𑄖𑄴𑄧𑄢𑄴 𑄦𑄧𑄘𑄬 𑄦𑄧𑄘𑄬 𑄝𑄢𑄨𑄏𑄬 𑄆𑄝𑄧𑅁 𑄎𑄪𑄚𑄮 𑄛𑄧𑄦𑄴𑄢𑄴 𑄚𑄧 𑄗𑄬𑄝𑄧𑅁 𑄌𑄚𑄚𑄧𑄢𑄬 𑄟𑄬𑄊𑄬 𑄔𑄉𑄨 𑄗𑄬𑄝𑄧𑅁 𑄎𑄪𑄚𑄮 𑄛𑄧𑄦𑄴𑄢𑄚𑄴 𑄛𑄨𑄖𑄴𑄗𑄨𑄟𑄨𑄖𑄴 𑄛𑄧𑄢𑄨𑄝𑄖𑄴𑄖𑄬𑄭 𑄚𑄧 𑄘𑄨𑄝𑄧, 𑄃𑄉𑄏𑄧𑄢𑄴 𑄇𑄣 𑄟𑄬𑄇𑄴𑄇𑄚𑄨𑄠𑄬𑅁 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄝𑄧𑄏𑄨 𑄗𑄬𑄝𑄢𑄴 𑄎𑄉 𑄚𑄧 𑄗𑄬𑄝𑄧𑅁 𑄘𑄬𑄝 𑄏𑄧𑄢𑄴 𑄘𑄨𑄣𑄬, 𑄟𑄘𑄨 𑄞𑄨𑄎𑄬 𑄞𑄨𑄎𑄬 𑄦𑄧𑄝𑄧𑅁 𑄜𑄨𑄖𑄴𑄖𑄨 𑄛𑄢𑄬 𑄛𑄢𑄬 𑄈𑄬𑄢𑄴 𑄅𑄙𑄨𑄝𑄮𑅁 𑄎𑄪𑄉𑄬 𑄙𑄧𑄢𑄨𑄝𑄇𑄴𑅁 𑄏𑄧𑄢𑄴 𑄘𑄨𑄣𑄬 𑄝𑄬𑄁 𑄓𑄧𑄉𑄧𑄢𑄨𑄝𑄇𑄴𑅁 𑄜𑄨𑄖𑄴𑄖𑄨 𑄛𑄚𑄨𑄠𑄚𑄴 𑄜𑄪𑄉𑄪𑄖𑄴–𑄜𑄉𑄖𑄴 𑄚𑄧 𑄉𑄧𑄢𑄨𑄝𑄮𑅁 𑄝𑄚𑄳𑄦 𑄎𑄪𑄚𑄨𑄛𑄪𑄉𑄮 𑄏𑄇𑄴 𑄘𑄬𑄊 𑄡𑄬𑄝𑄧𑅁

𑄗𑄪𑄟𑄬 𑄇𑄧𑄣𑄧, 𑄚𑄨𑄟𑄮𑄚𑄬 𑄡𑄧𑄇𑄴𑄬 𑄢𑄋𑄟𑄖𑄳𑄠𑄖𑄴 𑄡𑄬𑄝𑄧, 𑄆𑄌𑄳𑄠 𑄞𑄣𑄧𑄇𑄴𑄧𑄚𑄴 𑄥𑄧𑄁 𑄉𑄧𑄛𑄴 𑄘𑄨𑄝𑄧𑄁 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄝𑄧𑄏𑄨𑅁 

𑄗𑄪𑄟𑄮𑄢𑄴 𑄇𑄧𑄙 𑄥𑄪𑄚𑄨 𑄚𑄨𑄟𑄮𑄚𑄬 𑄇𑄨 𑄉𑄧𑄢𑄨𑄝𑄮 𑄇𑄱𑄰 𑄚𑄧 𑄛𑄢𑄬𑄢𑄴𑅁 𑄖 𑄟𑄧𑄚𑄚𑄴 𑄞𑄨𑄢𑄪𑄁–𑄞𑄨𑄢𑄪𑄁 𑄉𑄧𑄢𑄬𑄢𑄴 𑄥𑄧𑄟𑄌𑄳𑄠𑄉𑄪𑄚𑄴 𑄇𑄧𑄇𑄴𑄬 𑄡𑄬𑄝𑄇𑄴, 𑄇𑄧𑄇𑄴𑄬 𑄡𑄬𑄝𑄇𑄴𑅁 𑄖𑄢 𑄡𑄚 𑄇𑄧𑄙 𑄝𑄘𑄴, 𑄃 𑄞𑄨𑄣𑄬 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄡𑄚𑅁

𑄚𑄨𑄟𑄮𑄚𑄬 𑄇𑄧𑄣𑄧, 𑄝𑄬𑄎𑄢𑄴 𑄚𑄧 𑄦𑄪𑄠𑄮 𑄞𑄬𑄭𑄣𑄧𑄇𑄴𑅁 𑄟𑄧𑄢𑄴 𑄆𑄌𑄳𑄠 𑄡𑄚 𑄚𑄧 𑄦𑄧𑄝𑄧𑅁 𑄟𑄪𑄭 𑄚𑄧 𑄖𑄋𑄧𑄢𑄨𑄟𑄴𑅁 𑄖𑄪𑄟𑄨 𑄡𑄬𑄝𑄘𑄬 𑄃𑄭𑅁

𑄝𑄧𑄢𑄪𑄕𑄳𑄠 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄃𑄭𑄠𑄬𑅃

𑄖𑄪𑄟𑄨 𑄘𑄧 𑄇𑄱𑄰 𑄛𑄢𑄧, 𑄟𑄧 𑄈𑄪𑄖𑄴𑄮–𑄏𑄨 𑄝𑄮𑄚𑄴𑄮 𑄝𑄬𑄢𑄚𑄖𑄴 𑄆𑄌𑄳𑄠𑅁 𑄈𑄇𑄴𑄬 𑄥𑄨𑄙𑄪 𑄈𑄟𑄇𑄴𑄇𑄭 𑄡 𑄛𑄧𑄢𑄨𑄝𑄮𑅁

𑄢𑄬𑄖𑄴𑄦𑄱𑄰𑄚𑄬 𑄡𑄬𑄝𑄬 𑄃𑄭𑅁

𑄏𑄘𑄨 𑄚𑄧 𑄉𑄬𑄣𑄬 𑄈𑄧𑄎 𑄆𑄝𑄇𑄴𑅁 𑄟–𑄃𑄮 𑄥𑄨𑄙𑄪 𑄡𑄬𑄝𑄧𑅁 𑄟𑄬 𑄚𑄧 𑄘𑄬𑄣𑄬 𑄖𑄮𑄉𑄬𑄝𑄧𑅁

𑄝𑄧𑄢𑄪𑄕𑄳𑄠 𑄇𑄧𑄣𑄧, 𑄖𑄮𑄉𑄮𑄇𑄴! 

𑄚𑄧𑄠𑄴 𑄞𑄬𑄭𑅁 𑄥𑄨𑄠𑄬𑄚𑄴 𑄈𑄬𑄟 𑄌𑄁𑅁 𑄞𑄧𑄖𑄴𑄖𑄨 𑄦𑄧𑄣𑄬 𑄘𑄨–𑄆𑄇𑄴 𑄟𑄥𑄴 𑄛𑄧𑄢𑄴 𑄊𑄧𑄢𑄧𑄖𑄴 𑄆𑄟𑄴𑅁 𑄥𑄬𑄇𑄴𑄬 𑄡𑄬𑄝𑄧𑄁𑅁

𑄥𑄬𑄇𑄴𑄬 𑄇𑄨 𑄝𑄬𑄇𑄴𑄪𑄚𑄴 𑄆𑄉𑄧𑄖𑄴𑄧𑄢𑄴𑄦𑄱𑄰 𑄛𑄢𑄨𑄝𑄧𑄁𑅃

𑄥𑄬𑄇𑄴𑄬 𑄆𑄉𑄧𑄖𑄴𑄧𑄢𑄴𑄦𑄱𑄰 𑄚𑄧 𑄛𑄣𑄴𑄬–𑄃𑄮 𑄝𑄨𑄏𑄪 𑄃𑄧𑄇𑄴𑄖𑄧𑄖𑄴 𑄝𑄬𑄇𑄴𑄪𑄚𑄴 𑄆𑄝𑄧𑄁, 𑄥𑄬𑄇𑄴𑄬 𑄦𑄧𑄝𑄧𑄁𑅁

𑄖𑄪𑄭 𑄆𑄇𑄴 𑄇𑄟𑄴 𑄉𑄧𑄢𑄨𑄌𑄴 𑄥𑄣𑄬𑄚𑄴 𑄥𑄨𑄚𑄴𑄘𑄨 𑄡𑄬𑄭 𑄡𑄭, 𑄇𑄟𑄴 𑄍𑄢𑄨 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄡𑄬𑄌𑄴𑅁 𑄃𑄟𑄨 𑄖𑄧𑄢𑄬 𑄝𑄌𑄴𑄍𑄬𑄭 𑄗𑄬𑄝𑄧𑄁𑅁

𑄥𑄨𑄠𑄬𑄚𑄴 𑄇𑄬𑄚𑄬 𑄦𑄧𑄠𑄴𑅁 𑄟𑄪𑄭 𑄇𑄧𑄇𑄴𑄬 𑄍𑄢𑄨 𑄛𑄢𑄧𑄁𑅁 𑄘𑄬𑄢𑄨 𑄦𑄧𑄣𑄬 𑄟 𑄥𑄧𑄟𑄢𑄬 𑄆𑄏 𑄛𑄧𑄢𑄨𑄝𑄮𑅁

𑄃𑄦𑄱𑄰𑄠𑄬 𑄃𑄭𑅁 𑄚𑄧 𑄖𑄋𑄧𑄢𑄧𑄢𑄴 𑄡𑄧𑄇𑄴𑄬𑅁 𑄖𑄪𑄭 𑄥𑄨𑄚𑄴𑄘𑄨 𑄡𑄬𑄝𑄬 𑄡𑄧𑄇𑄴𑄬 𑄃 𑄇𑄧𑄇𑄴𑄧𑄚𑄴 𑄗𑄬𑄘𑄧𑄁𑅁 𑄡𑄬𑄭 𑄥𑄣𑄬𑄚𑄴, 𑄅𑄙𑄮𑅁

𑄡𑄬𑄝𑄘𑄬 𑄥𑄣𑄬𑄚𑄴𑅃

𑄖𑄪𑄭–𑄃𑄮 𑄚𑄧 𑄡𑄬𑄝𑄬 𑄡𑄧𑄇𑄴𑄬 

𑄃 𑄟𑄧 𑄣𑄧𑄊𑄬 𑄡𑄬𑄭 𑄚! 

𑄚𑄧 𑄝𑄮𑄣𑄬𑄭𑄠𑄬 𑄉𑄧𑄢𑄨 𑄇𑄣 𑄙𑄪𑄟𑄮 𑄘𑄬𑄊𑄨 𑄡𑄠𑄴𑄚𑄨 𑄞𑄣! 

𑄥𑄣𑄬𑄚𑄴 𑄘𑄬𑄊 𑄦𑄧𑄝𑄧𑄁𑅁

𑄗𑄪𑄟𑄬 𑄇𑄧𑄣𑄧, 𑄝𑄎𑄨 𑄗𑄬𑄣𑄬𑅁

𑄚𑄨𑄟𑄮𑄚𑄧 𑄟𑄝𑄮 𑄇𑄪𑄖𑄴𑄪𑄚𑄴 𑄆𑄚𑄬𑄭 𑄇𑄧𑄣𑄧, 𑄚𑄨𑄟𑄮𑄚𑄴, 𑄃 𑄇𑄧𑄇𑄴𑄬 𑄡𑄬𑄝𑄬𑅃

𑄘𑄪𑄭

𑄚𑄨𑄟𑄮𑄚𑄬 𑄖 𑄟𑄢𑄴 𑄇𑄧𑄇𑄴𑄬 𑄡𑄬𑄝𑄬 𑄇𑄧𑄙 𑄥𑄪𑄚𑄨 𑄆𑄇𑄴𑄇 𑄟𑄧𑄚𑄴𑄟𑄧𑄢 𑄦𑄧𑄣𑄧𑅁 𑄖 𑄛𑄧𑄢𑄚𑄴 𑄊𑄧𑄢𑄚𑄴 𑄘𑄪𑄟𑄴 𑄘𑄪𑄟𑄴 𑄉𑄧𑄢𑄬𑄢𑄴𑅁 𑄖 𑄟–𑄢𑄬 𑄇𑄨 𑄇𑄧𑄝𑄧 𑄞𑄝𑄨 𑄇𑄪𑄣𑄴 𑄚𑄧 𑄛𑄢𑄴𑅁 𑄟𑄚𑄳𑄠𑄬 𑄟𑄨𑄏𑄬 𑄇𑄧𑄙 𑄇𑄧𑄝𑄖𑄴𑄖𑄬𑄭 𑄌𑄬𑄣𑄬 𑄃 𑄟𑄨𑄏𑄬 𑄇𑄧𑄙 𑄇𑄧𑄣𑄬 𑄆𑄥𑄚𑄳𑄠𑄬 𑄦𑄧𑄚𑄴𑅁 𑄥𑄧𑄟𑄌𑄳𑄠𑄅𑄚𑄮𑄢𑄬 𑄟𑄨𑄏𑄬 𑄇𑄧𑄙 𑄇𑄱𑄰𑄚𑄬 𑄘𑄨 𑄛𑄙𑄬𑄭 𑄛𑄢𑄴𑄣𑄬–𑄃𑄮, 𑄖 𑄟–𑄢𑄬 𑄟𑄨𑄏𑄬 𑄇𑄧𑄙 𑄇𑄱𑄰 𑄚𑄧 𑄛𑄢𑄬𑄢𑄴𑅁 𑄚𑄨𑄟𑄮𑄚𑄬 𑄇𑄧𑄣𑄧, 𑄃 𑄟 𑄚𑄧 𑄉𑄬𑄣𑄬, 𑄚𑄧 𑄦𑄧𑄠𑄴𑅃 

𑄖𑄧 𑄝𑄬𑄭 𑄖𑄧𑄢𑄬 𑄈𑄟𑄇𑄴𑄇𑄭 𑄡𑄬𑄝𑄖𑄴𑄖𑄬𑄭 𑄇𑄱𑄰𑄠𑄬, 𑄇𑄬𑄚𑄬 𑄦𑄧𑄘𑄧! 

𑄟𑄪𑄭 𑄘𑄧 𑄆𑄇𑄴𑄎𑄧𑄚𑄧 𑄥𑄨𑄙𑄪 𑄡𑄬𑄝𑄢𑄴 𑄟𑅁

𑄇 𑄥𑄨𑄙𑄪𑅃

𑄢𑄧𑄚𑄴𑄎𑄧𑄚𑄧 𑄥𑄨𑄙𑄪𑅁 𑄖𑄬–𑄃𑄮 𑄈𑄉𑄢𑄍𑄧𑄢𑄨𑄖𑄴 𑄡𑄬𑄝𑄧𑅁

𑄚𑄨𑄟𑄮𑄚𑄬 𑄟𑄨𑄏𑄬 𑄇𑄧𑄙 𑄇𑄧𑄣𑄧 𑄖 𑄟–𑄢𑄬𑅁 𑄈𑄣𑄨𑄇𑄴 𑄟𑄨𑄏𑄬 𑄇𑄧𑄙 𑄇𑄱𑄰𑄠𑄬 𑄘𑄧 𑄇𑄱𑄰𑄠𑄬𑅁 𑄇𑄬𑄚𑄬 𑄇𑄧𑄣𑄧𑅁 𑄇𑄱𑄰𑄚𑄬 𑄖 𑄛𑄧𑄢𑄚𑄴 𑄊𑄧𑄢𑄚𑄴 𑄇𑄬𑄙𑄧𑄇𑄳𑄠 𑄉𑄧𑄢𑄬𑄢𑄴, 𑄖𑄬 𑄖𑄬 𑄇𑄱𑄰 𑄛𑄢𑄬𑄢𑄴𑅁 

𑄢𑄧𑄚𑄴𑄎𑄧𑄚𑄬 𑄄𑄙𑄪 𑄆𑄌𑄳𑄠𑄘𑄬 𑄚𑄧𑄠𑄴𑅃

𑄆𑄣𑄬–𑄃𑄧𑅁

𑄦𑄱𑄰𑄠𑄬, 𑄡𑅁 𑄏𑄘𑄨–𑄟𑄘𑄨 𑄆𑄝𑄬𑄉𑄱𑄰𑅁 𑄆𑄚𑄬 𑄆𑄚𑄬 𑄖𑄧 𑄇𑄇𑄴𑄨𑄘𑄊𑄨𑄙𑄪 𑄡𑄬𑄝𑄬𑅁

𑄦𑄧𑄘𑄬𑄭 𑄟𑅁

𑄚𑄨𑄟𑄮𑄚𑄬 𑄄𑄠𑄬𑄚𑄴 𑄇𑄱𑄰𑄚𑄬 𑄖 𑄉𑄪𑄙𑄨𑄝𑄮𑄖𑄴 𑄥𑄮𑄟𑄨𑄣𑄧𑅁 𑄝𑄨𑄌𑄴𑄍𑄮𑄚𑄧𑄖𑄴 𑄒𑄬𑄁 𑄑𑄚𑄨 𑄣𑄟𑄴𑄝 𑄉𑄧𑄢𑄨 𑄛𑄧𑄢𑄨, 𑄣𑄟𑄴𑄝 𑄚𑄨𑄏𑄬𑄌𑄴 𑄜𑄬𑄣𑄬𑄭 𑄟𑄧𑄚𑄬 𑄟𑄧𑄚𑄬 𑄇𑄧𑄣𑄧, 𑄍𑄢𑄴𑄣𑄪𑄁𑅁 𑄈𑄣𑄨𑄇𑄴 𑄉𑄪𑄙𑄨𑄝𑄮 𑄌𑄬𑄭 𑄖 𑄟𑄧𑄚𑄚𑄴 𑄈𑄧𑄢𑄛𑄴 𑄦𑄧𑄣𑄧𑅁 𑄘𑄮𑄉𑄮𑄚𑄧𑄖𑄴 𑄇𑄧𑄚𑄧 𑄇𑄝𑄧𑄢𑄴–𑄌𑄪𑄝𑄧𑄢𑄴 𑄚𑄬𑄭𑅁 𑄘𑄮𑄉𑄮𑄚𑄧𑄖𑄴 𑄇𑄝𑄧𑄢𑄴–𑄌𑄪𑄝𑄧𑄢𑄴 𑄚𑄧 𑄗𑄚𑄠𑄴 𑄉𑄪𑄙𑄨𑄝𑄮 𑄣𑄁𑄣𑄋𑄳𑄠 𑄛𑄢𑄴𑅁 𑄚𑄨𑄟𑄮𑄚𑄬 𑄢𑄋𑄟𑄖𑄳𑄠 𑄉𑄬𑄣𑄬 𑄖 𑄌𑄨𑄉𑄮𑄚𑄴 𑄞𑄬𑄭𑄝𑄮 𑄙𑄢𑄮𑄎𑄬 𑄗𑄬𑄝𑄧𑅁 𑄚𑄨𑄟𑄮𑄚𑄬 𑄢𑄋𑄟𑄖𑄳𑄠𑄖𑄴𑄪𑄚𑄴 𑄆𑄣𑄬 𑄙𑄢𑄮𑄎𑄬 𑄖 𑄛𑄪𑄢𑄮𑄚𑄴 𑄉𑄪𑄙𑄨𑄝𑄮𑄖𑄴 𑄗𑄬𑄝𑄧𑄉𑄱𑄰𑅁 𑄉𑄪𑄙𑄨𑄝𑄮 𑄌𑄬𑄢𑄮𑄇𑄨𑄖𑄳𑄠𑄚𑄴𑄘𑄨 𑄌𑄬𑄭 𑄚𑄨𑄟𑄮𑄚𑄬 𑄟𑄧𑄚𑄬 𑄉𑄧𑄢𑄨𑄣𑄧, 𑄖𑄬 𑄃𑄢𑄴 𑄄𑄙𑄪 𑄚𑄧 𑄆𑄝𑄧𑅁 𑄆𑄇𑄴𑄮𑄢𑄬 𑄡𑄢𑄴𑄣𑄱𑄰 𑄄𑄖𑄴𑄪𑄚𑄴𑅁 𑄇𑄨𑄖𑄴𑄖𑄬𑄭 𑄦𑄧𑄣𑄬, 𑄚𑄨𑄟𑄮𑄚𑄬 𑄇𑄧𑄚𑄧 𑄘𑄨𑄚𑄴 𑄃𑄘𑄟𑄧 𑄝𑄢𑄬 𑄚𑄧 𑄡𑄠𑄴 𑄞𑄣𑄧𑄇𑄴 𑄘𑄨𑄚𑄴 𑄗𑄬𑄝𑄖𑄴𑄖𑄬𑄭𑅁 𑄖 𑄎𑄨𑄁𑄇𑄚𑄨𑄖𑄴 𑄃𑄝𑄙 𑄉𑄧𑄢𑄨 𑄞𑄣𑄧𑄇𑄴 𑄘𑄨𑄚𑄴 𑄗𑄬𑄝𑄖𑄴𑄖𑄬𑄭 𑄡𑄬𑄝𑄧, 𑄇𑄬𑄚𑄬 𑄗𑄬𑄝𑄧𑄉𑄱𑄰 𑄞𑄝𑄨 𑄅𑄘𑄮 𑄚𑄧 𑄛𑄢𑄴𑅁 𑄡𑄪𑄚𑄨–𑄃𑄮 𑄖 𑄥𑄧𑄟𑄌𑄳𑄠𑄅𑄚𑄧𑄢𑄬 𑄝𑄪𑄇𑄴 𑄜𑄮𑄣𑄬𑄭 𑄇𑄱𑄰𑄠𑄬 𑄟𑄪𑄭 𑄄𑄇𑄴𑄬 𑄉𑄭 𑄉𑄭 𑄗𑄬𑄘𑄪𑄁 𑄌𑄁𑅁 𑄃𑄏𑄧𑄣𑄬 𑄖𑄖𑄴𑄪𑄚𑄴 𑄃𑄘𑄟𑄧 𑄥𑄧𑄟𑄌𑄳𑄠𑄉𑄪𑄚𑄴 𑄜𑄬𑄣𑄬𑄭 𑄡𑄬𑄝𑄢𑄴 𑄟𑄧𑄚𑄬 𑄚𑄧 𑄇𑄧𑄢𑄴𑅁 𑄎𑄨𑄁𑄇𑄚𑄨𑄉𑄚𑄴 𑄞𑄣𑄬𑄘𑄴 𑄉𑄧𑄢𑄨𑄝𑄖𑄴𑄖𑄬𑄭 𑄃 𑄟–𑄝𑄝𑄧𑄢𑄴 𑄘𑄪𑄈𑄴 𑄈𑄧𑄚𑄴𑄘𑄬 𑄘𑄨𑄝𑄬𑄖𑄴𑄖𑄬𑄭𑅁 𑄟–𑄝𑄝𑄧𑄢𑄴 𑄚𑄇𑄴 𑄃𑄧𑄎𑄧𑄣𑄴 𑄉𑄧𑄢𑄨 𑄈𑄪𑄎𑄨𑄠𑄬 𑄦𑄎𑄨𑄝𑄬𑄖𑄴𑄖𑄬𑄭 𑄖𑄢𑄴 𑄢𑄋𑄟𑄖𑄳𑄠𑄖𑄴 𑄡𑄚𑅁 𑄚𑄨𑄟𑄮𑄚𑄧𑄢𑄴 𑄛𑄪𑄢𑄮 𑄦𑄖𑄴 𑄥𑄨𑄣𑄪𑄟𑄴, 𑄦𑄜𑄴 𑄦𑄖𑄴 𑄥𑄨𑄣𑄪𑄟𑄴 𑄃 𑄉𑄧𑄚𑄴𑄎𑄨 𑄃𑄊𑄧𑄚𑄴𑅁 𑄡𑄨𑄙𑄪 𑄛𑄭 𑄉𑄬𑄣𑄬 𑄦𑄜𑄴 𑄦𑄖𑄴 𑄥𑄨𑄣𑄪𑄟𑄴 𑄝𑄬𑄌𑄴 𑄅𑄢𑄬𑅁 𑄦𑄜𑄴 𑄦𑄖𑄴 𑄥𑄨𑄣𑄪𑄟𑄪𑄚𑄴 𑄞𑄢𑄨 𑄉𑄧𑄢𑄨 𑄡𑄧𑄖𑄴𑄧𑄚𑄴 𑄉𑄧𑄢𑄬𑅁 𑄆𑄇𑄴 𑄛𑄧𑄣𑄴𑄣 𑄅𑄢𑄨𑄣𑄬 𑄣𑄇𑄴𑄥𑄴 𑄥𑄉𑄮𑄚𑄴𑄘𑄱𑄰𑄙𑄧𑄠𑄴𑅁 𑄙𑄧𑄠𑄳𑄠𑄬 𑄥𑄨𑄣𑄪𑄟𑄴𑄟𑄰𑄱 𑄡𑄧𑄇𑄴𑄬 𑄆𑄇𑄴𑄇 𑄆𑄇𑄴𑄇 𑄥𑄪𑄉𑄬𑄭 𑄅𑄙𑄬, 𑄥𑄧𑄇𑄴𑄬 𑄥𑄨𑄣𑄪𑄟𑄴𑄮𑄢𑄬 𑄚𑄉𑄧𑄖𑄴 𑄝𑄏𑄬𑄭 𑄌𑄪𑄟𑄨 𑄌𑄠𑄴𑅁 𑄙𑄧𑄠𑄳𑄠𑄬 𑄥𑄨𑄣𑄪𑄟𑄴 𑄅𑄢𑄨𑄣𑄬, 𑄃𑄚 𑄃𑄚𑄨 𑄙𑄉𑄬–𑄛𑄎𑄢𑄠𑄴 𑄢𑄨𑄚𑄨 𑄌𑄠𑄴 𑄚𑄨𑄟𑄮𑄚𑄬𑅁 𑄆𑄌𑄳𑄠–𑄃𑄮 𑄙𑄧𑄠𑄳𑄠𑄬 𑄦𑄜𑄴 𑄦𑄖𑄴 𑄥𑄨𑄣𑄪𑄟𑄴𑄮 𑄅𑄌𑄳𑄠𑅁 𑄥𑄨𑄣𑄪𑄟𑄴𑄮 𑄅𑄢𑄨, 𑄦𑄘𑄧 𑄃𑄋𑄪𑄣𑄪𑄚𑄴𑄘𑄱𑄰𑄟𑄙 𑄌𑄪𑄣𑄚𑄨 𑄃𑄎𑄪𑄌𑄳𑄠𑅁 𑄖𑄬 𑄃𑄉𑄬𑄚𑄴𑄘𑄨 𑄡𑄨𑄙𑄪 𑄛𑄭 𑄡𑄘𑄬 𑄇𑄧𑄙𑄧, 𑄟, 𑄟𑄪𑄭 𑄄𑄚𑄴𑄘𑄨 𑄡𑄋𑄧𑄢𑄴𑅁 𑄉𑄪𑄙𑄨 𑄞𑄨𑄘𑄨𑄢𑄬𑄖𑄴𑄪𑄚𑄴 𑄚𑄳𑄦𑄨𑄉𑄨𑄣𑄨 𑄥𑄨𑄁𑄉𑄧𑄝𑄖𑄴 𑄆𑄭 𑄟, 𑄟𑄪𑄭 𑄄𑄚𑄴𑄘𑄨 𑄡𑄋𑄧𑄢𑄴 𑄇𑄧𑄝𑄖𑄴𑄖𑄬𑄭 𑄦 𑄉𑄧𑄌𑄳𑄠𑅁 𑄈𑄣𑄨𑄇𑄴 𑄚𑄧 𑄇𑄧𑄣𑄧𑅁 𑄟𑄧𑄚𑄬 𑄟𑄧𑄚𑄬 𑄇𑄧𑄣𑄧, 𑄢𑄋𑄟𑄖𑄳𑄠𑄖𑄴 𑄉𑄬𑄣𑄬 𑄟–𑄢𑄬 𑄘𑄧 𑄚𑄧 𑄛𑄬𑄟𑄴𑅁 𑄥𑄬𑄇𑄴𑄬 𑄇𑄢𑄬 𑄇𑄮𑄟𑄴𑅁 𑄈𑄭𑄪! 𑄚𑄧 𑄇𑄮𑄟𑄴𑅁 𑄆𑄌𑄳𑄠𑄖𑄴𑄪𑄚𑄴 𑄙𑄧𑄢𑄨 𑄃𑄇𑄴𑄇𑄬𑄁 𑄦𑄧𑄁𑅁 𑄚𑄨𑄟𑄮𑄚𑄬 𑄖 𑄟–𑄢𑄬 𑄇𑄨𑄌𑄴𑄪 𑄚𑄧 𑄇𑄱𑄰 𑄌𑄪𑄝𑄬–𑄌𑄝𑄬 𑄊𑄧𑄢𑄧𑄖𑄴𑄪𑄚𑄴 𑄚𑄳𑄦𑄨𑄉𑄨𑄣𑄨 𑄉𑄬𑄣𑄧𑅁 𑄚𑄨𑄟𑄮𑄚𑄬 𑄡𑄘𑄬 𑄡𑄘𑄬 𑄃 𑄟𑄧𑄚𑄬 𑄟𑄧𑄚𑄬 𑄇𑄧𑄣𑄧, 𑄟𑄪𑄭 𑄢𑄋𑄟𑄖𑄳𑄠𑄖𑄴 𑄉𑄬𑄣𑄬 𑄟𑄬 𑄛𑄧𑄢𑄨 𑄜𑄬𑄣𑄬𑄝𑄬𑄉𑄱𑄰𑅃 𑄃𑄢𑄴 𑄞𑄣𑄧𑄘𑄴𑄪𑄢𑄴 𑄡𑄬𑄭𑄚𑄬 𑄇𑄧𑄣𑄧, 𑄇𑄧𑄣𑄬𑄎𑄴 𑄝𑄧𑄚𑄴𑄙𑄧 𑄦𑄧𑄣𑄬 𑄟𑄪𑄭 𑄊𑄧𑄢𑄧𑄖𑄴 𑄆𑄟𑄴𑅁 𑄖𑄪𑄭 𑄟𑄧𑄚𑄧𑄖𑄴 𑄘𑄪𑄈𑄴 𑄚𑄧 𑄃𑄚𑄨𑄌𑄴𑅁 𑄟𑄧𑄢𑄬 𑄚𑄨𑄚𑄬𑄭 𑄌𑄨𑄘𑄬 𑄚𑄧 𑄉𑄧𑄢𑄨𑄌𑄴𑅁 𑄚𑄨𑄟𑄮𑄚𑄬 𑄄𑄠𑄬𑄚𑄴 𑄖 𑄇𑄮𑄌𑄴𑄛𑄚 𑄚𑄇𑄴𑄧𑄝𑄨𑄢𑄬 𑄇𑄧𑄣𑄧𑅁 𑄈𑄇𑄴𑄧𑄚𑄴 𑄝𑄘𑄬 𑄚𑄨𑄟𑄮𑄚𑄬 𑄞𑄝𑄨𑄣𑄧 𑄃 𑄆𑄭 𑄇𑄧𑄙𑄚𑄴 𑄇𑄢𑄬 𑄇𑄧𑄣𑄪𑄁! 𑄡𑄢𑄬 𑄇𑄧𑄣𑄪𑄁, 𑄖𑄬 𑄇𑄠𑄴 𑄚𑄬𑄭𑅁 𑄚𑄨𑄟𑄮𑄚𑄬 𑄟𑄪 𑄌𑄨𑄟𑄬 𑄦𑄎𑄨𑄣𑄮𑅁

𑄚𑄨𑄟𑄮𑄚𑄬 𑄡𑄘𑄬 𑄡𑄘𑄬 𑄘𑄧–𑄛𑄧𑄙 𑄛𑄧𑄙𑄧𑄖𑄴 𑄣𑄪𑄋𑄨 𑄌𑄠𑄴𑄘𑄬 𑄖 𑄟𑄪𑄏𑄨 𑄆𑄏𑄬𑄢𑄴𑅁 𑄖 𑄟𑄪𑄏𑄨𑄢𑄬 𑄘𑄬𑄊𑄨 𑄚𑄨𑄟𑄮𑄚𑄧𑄢𑄴 𑄌𑄨𑄘𑄬 𑄦𑄧𑄣𑄧𑅁 𑄛𑄧𑄙𑄧 𑄛𑄎𑄢𑄖𑄴 𑄣𑄪𑄉𑄨 𑄗𑄬𑄝𑄢𑄧 𑄡𑄪 𑄚𑄬𑄭𑅁 𑄖 𑄟𑄪𑄏𑄨 𑄘𑄬𑄇𑄴𑄈𑄬𑅁 𑄚𑄨𑄟𑄮𑄚𑄬 𑄝𑄧 𑄚𑄨𑄏𑄬𑄌𑄴 𑄜𑄬𑄣𑄬𑄭 𑄖 𑄟𑄪𑄏𑄨 𑄟𑄪𑄇𑄳𑄠 𑄡 𑄙𑄧𑄣𑄴𑄧𑅁 𑄖 𑄟𑄪𑄏𑄨 𑄟𑄪𑄎𑄪𑄋𑄧𑄖𑄴 𑄣𑄪𑄋𑄨 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄪𑄙𑄪 𑄡𑄧𑄢𑄴 𑄚𑄨𑄟𑄮𑄚𑄴𑅃

𑄄𑄚𑄴𑄘𑄨𑅁

𑄝𑄬𑄢𑄚𑄳𑄠𑄬 𑄊𑄧𑄢𑄧𑄖𑄴 𑄚𑄧 𑄡𑄬𑄝𑄬𑅃

𑄡𑄬𑄟𑄴 𑄟𑄪𑄏𑄨𑅁

𑄇𑄧𑄟𑄧𑄣𑄬 𑄢𑄋𑄟𑄖𑄳𑄠𑄖𑄴 𑄡𑄧𑄢𑄴𑅃

𑄛𑄧𑄢𑄴𑄥𑄪 𑄟𑄪𑄏𑄨𑅁

𑄢𑄋𑄟𑄖𑄳𑄠𑄖𑄴 𑄡𑄬𑄝𑄢𑄴 𑄃𑄉𑄬 𑄃𑄟𑄥𑄨𑄙𑄪 𑄚𑄧 𑄉𑄬𑄣𑄬𑄘𑄬! 

𑄚𑄧 𑄘𑄧 𑄉𑄬𑄣𑄪𑄁 𑄟𑄪𑄏𑄨𑅁

𑄢𑄋𑄟𑄖𑄳𑄠𑄖𑄴 𑄉𑄬𑄣𑄬 𑄉𑄧𑄟𑄬 𑄗𑄬𑄌𑄴𑄌𑄰𑄱 𑄥𑄨𑄠𑄬𑅁 𑄥𑄨𑄠𑄬𑄚𑄴 𑄇𑄧𑄚𑄧 𑄃𑄘𑄟𑄴 𑄚𑄧𑄠𑄴𑅁 𑄦𑄎𑄢𑄴 𑄦𑄮𑄇𑄴 𑄑𑄅𑄚𑄴𑅁 𑄉𑄧𑄟𑄴–𑄝𑄧𑄎𑄧𑄁 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄛𑄬𑄝𑄬𑄉𑄱𑄰𑅁 𑄌𑄚𑄴𑄘𑄮 𑄛𑄮𑄝𑄮 𑄙𑄧𑄇𑄴 𑄚𑄧 𑄦𑄧𑄌𑄴 𑄛𑄢𑅁

𑄦𑄧𑄘𑄬𑄭𑅁 𑄟𑄪𑄏𑄨, 𑄝𑄬𑄢𑄚𑄳𑄠 𑄊𑄧𑄢𑄧𑄖𑄴 𑄡𑄧𑄖𑄴𑄬 𑄛𑄢 𑄛𑄁𑅃 𑄚 𑄃𑄟𑄄𑄙𑄪 𑄡𑄧𑄢𑄴𑅃

𑄚𑄘𑄬𑄭𑅁 𑄟𑄇𑄴𑄮𑄛𑄧𑄘𑄨𑄘𑄊𑄨𑄙𑄪 𑄡𑄋𑄧𑄖𑄴𑄬, 𑄈𑄘𑄨 𑄝𑄨𑄠𑄮𑄋𑄚𑄴 𑄈𑄧𑄎𑅁 𑄃𑄟 𑄟𑄨𑄣𑄬𑄝𑄱𑄰 𑄆𑄇𑄴𑄇𑄚𑄴 𑄈𑄘𑄨 𑄝𑄏𑄬𑄠𑄳𑄠𑄬𑅁 𑄝𑄪𑄚𑄨𑄝𑄬𑄢𑄴 𑄝𑄨𑄠𑄮𑄁 𑄚𑄬𑄭𑅁

𑄚𑄨𑄟𑄮𑄚𑄬 𑄖 𑄟𑄪𑄏𑄨 𑄇𑄧𑄙 𑄥𑄪𑄚𑄨 𑄟𑄧𑄚𑄬 𑄟𑄧𑄚𑄬 𑄇𑄧𑄣𑄧, 𑄍𑄢𑄴𑄣𑄪𑄁𑅁 𑄖 𑄟𑄪𑄏𑄨 𑄡𑄪𑄚𑄨 𑄖𑄢 𑄥𑄨𑄙𑄪 𑄡𑄠𑄴, 𑄡𑄪𑄚𑄨 𑄇𑄧𑄠𑄰𑄱 𑄚𑄨𑄟𑄮𑄚𑄧𑄢𑄬 𑄄𑄚𑄴𑄘𑄨 𑄡𑄖𑄴𑄬 𑄣𑄊𑄧𑄖𑄴 𑄛𑄬𑄠𑄮𑄁𑅁 𑄥𑄣𑄬𑄚𑄴 𑄟𑄨𑄏𑄬 𑄇𑄧𑄙𑄖𑄴 𑄛𑄧𑄢𑄨𑄝𑄮𑅁 𑄇𑄨𑄖𑄴𑄖𑄬𑄭 𑄦𑄧𑄣𑄬, 𑄢𑄧𑄚𑄴𑄎𑄧𑄚𑄴𑄘𑄊𑄨 𑄊𑄧𑄢𑄚𑄴 𑄇𑄧𑄚𑄧 𑄥𑄨𑄚𑄴𑄘𑄨 𑄚𑄧𑄠𑄴𑅁 𑄚𑄨𑄟𑄮𑄚𑄬 𑄖 𑄟–𑄢𑄬 𑄇𑄧𑄠𑄳𑄠𑄬𑄘𑄬 𑄢𑄧𑄚𑄴𑄎𑄧𑄚𑄧 𑄥𑄨𑄙𑄪 𑄡𑄬𑄟𑄴𑅁 𑄃𑄏𑄧𑄘𑄬 𑄚𑄨𑄟𑄮𑄚𑄬 𑄢𑄧𑄚𑄴𑄎𑄧𑄚𑄧 𑄥𑄨𑄙𑄪 𑄚𑄧 𑄡𑄢𑄴𑅁 𑄡𑄖𑄴𑄬 𑄚𑄇𑄴𑄧𑄝𑄨 𑄥𑄨𑄙𑄪𑅁 𑄚𑄨𑄟𑄮𑄚𑄧 𑄟𑄪𑄏𑄨 𑄖 𑄇𑄧𑄙 𑄇𑄱𑄰 𑄦𑄘 𑄙𑄧𑄌𑄳𑄠𑅁 𑄚𑄨𑄟𑄮𑄚𑄬 𑄄𑄇𑄴𑄬 𑄊𑄧𑄚𑄧 𑄊𑄧𑄚𑄧 𑄣𑄜𑄴 𑄝𑄢𑄳𑄦 𑄙𑄧𑄌𑄳𑄠𑅁 𑄝𑄬𑄣𑄚𑄴 𑄓𑄪𑄝𑄬𑄢𑄴𑄣𑄱𑄰𑅁 𑄛𑄧𑄏𑄨𑄟𑄧 𑄟𑄮𑄚𑄮 𑄍𑄝𑄝𑄮 𑄖𑄧𑄣𑄬𑄘𑄨 𑄟𑄢𑄨𑄥𑄳𑄠 𑄍𑄧𑄢𑄖𑄴𑄪𑄚𑄴 𑄙𑄧𑄢𑄨 𑄅𑄉𑄪𑄢𑄬𑄘𑄨 𑄃𑄉𑄣𑄍𑄧𑄢 𑄥𑄧𑄁 𑄍𑄝 𑄛𑄧𑄌𑄳𑄠𑅁 𑄢𑄫𑄛𑄧𑄇𑄢𑄩 𑄞𑄪𑄭–𑄃𑄮 𑄟𑄙𑄧𑄖𑄴 𑄉𑄪𑄢𑄪, 𑄍𑄉𑄧𑄣𑄴 𑄌𑄧𑄢𑄧𑄘𑄧𑄚𑄴𑅁 𑄉𑄪𑄢𑄪 𑄛𑄨𑄙𑄨𑄖𑄴 𑄛𑄧𑄢𑄨 𑄛𑄧𑄢𑄨 𑄟𑄧𑄚–𑄌𑄧𑄚𑄉𑄪𑄚𑄬 𑄛𑄪𑄇𑄴 𑄈𑄘𑄧𑄚𑄴𑅁 𑄇𑄎𑄧𑄣𑄧𑄋𑄧 𑄥𑄨𑄚𑄴𑄘𑄨 𑄇𑄚𑄴 𑄛𑄘𑄨𑄣𑄬 𑄝𑄮𑄘𑄮 𑄢𑄧 𑄥𑄪𑄚 𑄡𑄠𑄴𑅁 𑄃𑄘𑄟𑄧𑄖𑄴 𑄥𑄮𑄟𑄬𑄣𑄬 𑄔𑄬𑄋𑄨 𑄢𑄧 𑄥𑄪𑄚 𑄡𑄠𑄴𑅁 𑄝𑄢𑄳𑄦 𑄝𑄚𑄧𑄘𑄬 𑄘𑄬𑄊𑄬𑅁 𑄆𑄙𑄧𑄇𑄴 𑄘𑄮𑄣𑄴 𑄃𑄘𑄟𑄴, 𑄢𑄋𑄟𑄖𑄳𑄠𑄖𑄴 𑄉𑄬𑄣𑄬 𑄄𑄠𑄬𑄚𑄨 𑄚𑄧 𑄘𑄬𑄝𑄧𑅁 𑄚𑄨𑄟𑄮𑄚𑄬 𑄌𑄪𑄢𑄪𑄖𑄴 𑄌𑄪𑄢𑄪𑄖𑄴 𑄦𑄘𑄬𑄢𑄴𑅁 𑄦𑄖𑄴𑄬 𑄥𑄧𑄣𑄖𑄴 𑄟𑄚𑄳𑄠𑄬 𑄛𑄪𑄏𑄮𑄢𑄴 𑄉𑄧𑄢𑄧𑄚𑄴 𑄇𑄪𑄙𑄪 𑄡𑄧𑄢𑄴𑅃 𑄟𑄳𑄦𑄧𑄦𑄱𑄰𑄚𑄬 𑄇𑄱𑄰 𑄛𑄠𑄴, 𑄄𑄚𑄴𑄘𑄨 𑄡𑄋𑄧𑄢𑄴𑅁 𑄈𑄨𑄎𑄬𑄈𑄨𑄌𑄳𑄠 𑄉𑄧𑄢𑄨 𑄡𑄘𑄬 𑄡𑄘𑄬 𑄚𑄨𑄟𑄮𑄚𑄬 𑄣𑄪𑄋𑄨𑄣𑄮𑄉𑄱𑄰 𑄇𑄎𑄧𑄣𑄧𑄋𑄧 𑄛𑄢𑄧𑄖𑄴𑅁 𑄄𑄚𑄴𑄘𑄨–𑄅𑄚𑄴𑄘𑄨 𑄞𑄨𑄣𑄴–𑄞𑄨𑄣𑄢𑄴, 𑄇𑄪𑄚𑄴𑄘𑄨 𑄃𑄊𑄬 𑄚𑄇𑄴𑄧𑄝𑄨𑅁 𑄚𑄨𑄟𑄮𑄚𑄧𑄢𑄬 𑄘𑄬𑄊𑄨 𑄚𑄇𑄴𑄧𑄝𑄨 𑄆𑄇𑄴𑄮 𑄜𑄬𑄏 𑄏𑄪𑄝𑄪𑄢𑄮 𑄍𑄬𑄢𑄬 𑄗𑄬𑄭 𑄦𑄎𑄬𑄢𑄴𑅁 𑄚𑄇𑄴𑄧𑄝𑄨𑄢𑄬 𑄖𑄮𑄉𑄬𑄣𑄬–𑄃𑄮 𑄚𑄨𑄟𑄮𑄚𑄬 𑄓𑄉𑄨 𑄚𑄧 𑄛𑄢𑄬𑄢𑄴𑅁 𑄓𑄉𑄨𑄣𑄬 𑄟𑄚𑄳𑄠𑄬 𑄥𑄪𑄚𑄨𑄝𑄇𑄴𑅁 𑄚𑄨𑄟𑄮𑄚𑄬 𑄖𑄮𑄉𑄘𑄬 𑄝𑄬𑄌𑄴 𑄘𑄪𑄈𑄴 𑄛𑄢𑄴 𑄘𑄬𑄊𑄨, 𑄖𑄢𑄬 𑄃𑄢𑄴 𑄘𑄪𑄈𑄴 𑄚𑄧 𑄘𑄨 𑄚𑄇𑄴𑄧𑄝𑄨 𑄜𑄬𑄎 𑄏𑄪𑄝𑄪𑄢𑄮 𑄍𑄬𑄢𑄬𑄖𑄴𑄪𑄚𑄴 𑄚𑄳𑄦𑄨𑄉𑄨𑄣𑄨 𑄇𑄧𑄣𑄧, 𑄃 𑄇𑄢𑄬 𑄖𑄧𑄉𑄧𑄢𑄴𑅃

𑄃𑄘𑄨𑄇𑄴𑄬 𑄉𑄧𑄢𑄨 𑄟𑄨𑄣𑄬 𑄢𑄧 𑄥𑄪𑄚𑄨 𑄚𑄨𑄟𑄮𑄚𑄬 𑄗𑄨𑄝𑄪𑄢𑄪𑄇𑄴 𑄉𑄧𑄢𑄨 𑄅𑄉𑄪𑄢𑄨 𑄅𑄖𑄳𑄠𑄬𑅁 𑄇𑄨𑄌𑄴𑄪 𑄚𑄧 𑄇𑄱𑄰 𑄆𑄇𑄴𑄢𑄨𑄚𑄨 𑄉𑄧𑄢𑄨 𑄌𑄬𑄭 𑄃𑄊𑄬 𑄚𑄇𑄴𑄧𑄝𑄨𑄢𑄬𑅁 𑄚𑄇𑄴𑄧𑄝𑄨𑄢𑄬 𑄘𑄬𑄊𑄨 𑄇𑄨 𑄆𑄇𑄴𑄇𑄚𑄴 𑄞𑄝𑄧𑄚 𑄅𑄙𑄨𑄣𑄧 𑄖 𑄟𑄧𑄚𑄧𑄖𑄴𑅁 𑄃𑄘𑄬𑄇𑄎𑄬 𑄉𑄏𑄧 𑄛𑄘𑄚𑄨, 𑄉𑄏𑄧 𑄙𑄬𑄣𑄖𑄴 𑄛𑄧𑄢𑄨 𑄗𑄬𑄠𑄳𑄠𑄬 𑄛𑄬𑄇𑄴𑄈𑄪𑄚𑄴 𑄃 𑄇𑄎𑄧𑄣𑄧𑄋𑄧 𑄉𑄧𑄋𑄢𑄴 𑄛𑄚𑄨𑄚𑄣𑄮𑄴 𑄥𑄪𑄟𑄪𑄖𑄴𑄮 𑄚𑄨𑄟𑄮𑄚𑄧 𑄣𑄧𑄊𑄬 𑄣𑄧𑄊𑄬 𑄝𑄬𑄇𑄴𑄇𑄚𑄨 𑄌𑄪𑄛𑄴𑄦𑄱𑄰𑄠𑄬𑅁 𑄥𑄬 𑄣𑄧𑄊𑄬 𑄚𑄇𑄴𑄧𑄝𑄨–𑄃𑄮 𑄇𑄧𑄚𑄧 𑄇𑄨𑄌𑄴𑄪 𑄚𑄧 𑄇𑄱𑄰 𑄌𑄪𑄛𑄴 𑄉𑄧𑄢𑄨 𑄒𑄨𑄠𑄬 𑄃𑄊𑄬𑅁 𑄘𑄨𑄎𑄧𑄚𑄬 𑄌–𑄌𑄨 𑄉𑄧𑄢𑄨 𑄃𑄊𑄧𑄚𑄴𑅁 𑄈𑄇𑄴𑄧𑄚𑄴 𑄆𑄙𑄧𑄇𑄳𑄠 𑄉𑄧𑄢𑄨 𑄗𑄬𑄭 𑄚𑄇𑄴𑄧𑄝𑄨 𑄇𑄧𑄣𑄧, 𑄟𑄧 𑄢𑄧𑄝𑄮 𑄥𑄪𑄚𑄨 𑄘𑄧𑄢𑄬𑄣𑄬 𑄘𑄬𑅃

𑄚𑄨𑄟𑄮𑄚𑄬 𑄦𑄎𑄨 𑄦𑄎𑄨 𑄇𑄧𑄣𑄧, 𑄚𑄘𑄬𑄭𑅁 𑄃 𑄇𑄧𑄇𑄴𑄬 𑄆𑄌𑄴𑄮𑄌𑄴𑅃

𑄞𑄣𑄧𑄇𑄴𑄧𑄚𑄴𑄦𑄱𑄰𑄠𑄬𑅁

𑄟𑄪𑄭 𑄘𑄧 𑄎𑄬𑄢𑄴 𑄛𑄧𑄣𑄪𑄁𑅁

𑄃𑄦𑄱𑄰𑄠𑄬 𑄃𑄭𑅁 𑄈𑄣𑄨𑄇𑄴 𑄖𑄧𑄢𑄴 𑄚𑄧 𑄆𑄏𑄚𑄠𑄴, 𑄆𑄇𑄴 𑄟𑄨𑄚𑄨𑄘𑄧𑄢𑄬 𑄆𑄇𑄴 𑄊𑄧𑄚𑄴𑄑𑄦𑄱𑄰𑄠𑄬 𑄛𑄢 𑄛𑄬𑄠𑄮𑄁𑅁 𑄟𑄧𑄚𑄬 𑄟𑄧𑄚𑄬 𑄞𑄛𑄴𑄛𑄮𑄁, 𑄖𑄪𑄭 𑄚𑄧 𑄆𑄝𑄬 𑄛𑄢 𑄛𑄁𑅁 𑄝𑄧𑄌𑄴 𑄚𑅁

𑄚𑄨𑄟𑄮𑄚𑄬 𑄃 𑄚𑄇𑄴𑄧𑄝𑄨 𑄘𑄊𑄘𑄇𑄳𑄠 𑄉𑄧𑄢𑄨 𑄝𑄧𑄏𑄨𑄣𑄬𑄇𑄴𑅁 𑄝𑄧𑄏𑄧𑄘𑄬 𑄝𑄧𑄏𑄧𑄘𑄬 𑄚𑄇𑄴𑄧𑄝𑄨 𑄦𑄎𑄨𑄣𑄮𑅁 𑄖 𑄦𑄎𑄨 𑄘𑄬𑄊𑄨 𑄚𑄨𑄟𑄮𑄚𑄬–𑄃𑄮 𑄦𑄌𑄴𑄬𑅁 𑄚𑄇𑄴𑄧𑄝𑄨 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄦𑄭𑄠𑄬 𑄘𑄬𑄢𑄨 𑄦𑄧𑄣𑄬𑅃

𑄆𑄖𑄴𑄬 𑄛𑄧𑄙𑄧𑄖𑄴 𑄟𑄪𑄏𑄨𑄢𑄬 𑄣𑄊𑄧𑄖𑄴 𑄛𑄬𑄠𑄮𑄁𑅁 𑄟𑄬 𑄣𑄊𑄧𑄖𑄴 𑄛𑄬𑄭𑄚𑄬 𑄙𑄢𑄘𑄨𑄊𑄮𑄣𑄨 𑄦𑄪𑄌𑄴 𑄘𑄨𑄠𑄬 𑄙𑄧𑄣𑄳𑄠𑄧𑅁 𑄟𑄧𑄚𑄬 𑄟𑄧𑄚𑄬 𑄘𑄧𑄢𑄬𑄠𑄮𑄁–𑄃𑄮 𑄇𑄧𑄟𑄴 𑄚𑄧𑄠𑄴𑅁

𑄇𑄨𑄠𑅃

𑄟𑄪𑄏𑄨 𑄡𑄪𑄚𑄨 𑄃𑄟𑄥𑄨𑄙𑄪 𑄡𑄠𑄴𑅁

𑄃 𑄡𑄮𑄇𑄴 𑄚𑅁

𑄟–𑄢𑄬 𑄡𑄪𑄚𑄨 𑄇𑄧𑄠𑄰𑄱, 𑄟𑄪𑄭 𑄄𑄚𑄴𑄘𑄨 𑄆𑄏𑄧𑄋𑄧𑄢𑄴𑅁

𑄃 𑄇𑄧𑄣𑄬 𑄇𑄨 𑄘𑄬𑅃

𑄟𑄪𑄭 𑄇𑄧𑄚𑄴 𑄛𑄇𑄴 𑄟𑄢𑄨 𑄆𑄌𑄴𑄍𑄮𑄁𑅁

𑄇𑄨𑄖𑄴𑄖𑄬𑄭, 𑄃 𑄇𑄬𑄚𑄬𑅃

𑄇𑄇𑄴𑄇 𑄏𑄨𑄝𑄮 𑄝𑄬𑄢𑄚𑄖𑄴 𑄆𑄌𑄳𑄠𑅁 𑄝𑄬𑄣𑄳𑄠 𑄥𑄨𑄙𑄪 𑄡 𑄛𑄧𑄢𑄨𑄝𑄮𑅁 𑄚𑄧 𑄉𑄬𑄣𑄬 𑄚𑄧 𑄦𑄧𑄠𑄴𑅁 𑄟–𑄃𑄮 𑄘𑄨𑄛𑄙𑄬 𑄘𑄬𑅁 𑄟𑄪𑄭 𑄈𑄇𑄴𑄬 𑄆𑄟𑄴, 𑄟𑄪𑄭 𑄆𑄇𑄴𑄇 𑄢𑄧𑄚𑄴𑄎𑄧𑄚𑄧 𑄥𑄨𑄙𑄪 𑄡𑄬𑄭 𑄛𑄬𑄟𑄴𑅁 𑄢𑄧𑄚𑄴𑄎𑄧𑄚𑄬 𑄇𑄬𑄣𑄳𑄠 𑄦𑄧𑄣𑄬 𑄈𑄉𑄢𑄍𑄧𑄢𑄨𑄖𑄴 𑄡𑄬𑄝𑄧 𑄄𑄠𑄬𑄚𑄴 𑄇𑄱𑄰𑄚𑄬 𑄛𑄇𑄴 𑄟𑄢𑄨 𑄆𑄌𑄴𑄍𑄮𑄁𑄉𑄬𑅁 𑄝𑄚𑄳𑄦 𑄟–𑄢𑄬 𑄚𑄧𑄠𑄴 𑄝𑄧𑄢𑄪𑄕𑄳𑄠 𑄥𑄪𑄟𑄪𑄖𑄴𑄮 𑄆𑄇𑄴 𑄏𑄇𑄴 𑄥𑄧𑄟𑄌𑄳𑄠 𑄃𑄟𑄥𑄨𑄙𑄪 𑄡𑄬𑄠𑄧𑄚𑄴𑅁 𑄖𑄢𑄢𑄬–𑄃𑄮 𑄟𑄨𑄏𑄬 𑄇𑄧𑄙 𑄇𑄱𑄰𑄚𑄬 𑄛𑄙𑄬𑄠𑄮𑄁𑅁

𑄝𑄧𑄢𑄪𑄕𑄳𑄠𑄘𑄊𑄨𑄢𑄬 𑄇𑄨 𑄇𑄧𑄣𑄬𑅃

𑄇𑄇𑄴𑄨𑄘𑄊𑄨𑄙𑄪 𑄡 𑄛𑄧𑄢𑄨𑄝𑄮 𑄇𑄧𑄠𑄮𑄁𑄉𑄬𑅁 𑄚𑄧𑄣𑄬 𑄖𑄢 𑄄𑄢𑄨 𑄘𑄨𑄘𑄬𑄇𑄴 𑄚𑄧 𑄌𑄚𑄴𑅁 𑄆𑄌𑄳𑄠 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄡𑄬𑄭𑄚𑄬 𑄉𑄧𑄛𑄴 𑄘𑄨𑄝𑄖𑄴𑄖𑄬𑄭 𑄇𑄧𑄚𑄴𑅁 𑄃 𑄇𑄧𑄟𑄧𑄣𑄬 𑄆𑄉𑄧𑄖𑄴𑄧𑄢𑄴𑄦𑄱𑄰 𑄛𑄢𑄨 𑄥𑄬𑄚𑄧𑄖𑄴𑄖𑄬𑄭𑅁

𑄖𑄬 𑄖𑄧 𑄟𑄪𑄏𑄨𑄢𑄬 𑄇𑄨 𑄇𑄧𑄣𑄬𑅃

𑄄𑄚𑄴𑄘𑄨 𑄡𑄋𑄧𑄢𑄴 𑄇𑄧𑄠𑄮𑄁𑄉𑄬𑅁

𑄖𑄬 𑄝𑄬𑄇𑄴 𑄝𑄪𑄌𑄴𑄍𑄬 𑄦𑄧𑄝𑄧𑅁

𑄝𑄪𑄏𑄨𑄣𑄬–𑄃𑄮 𑄇𑄨𑅃

𑄖𑄧𑄢𑄧 𑄘𑄧 𑄥𑄣𑄬𑄚𑄴 𑄞𑄢𑄨 𑄘𑄪𑄈𑄴𑄦𑄱𑄰𑄠𑄬𑅁 𑄟𑄨𑄏𑄬 𑄇𑄧𑄙 𑄇𑄱𑄰 𑄛𑄬𑄠𑄮𑄌𑄴𑅁 𑄆𑄇𑄴 𑄝𑄪𑄇𑄴 𑄌𑄨𑄘𑄬𑄣𑄱𑄰 𑄆𑄌𑄴𑄍𑄮𑄌𑄴𑅁

𑄦𑄮𑄇𑄴! 𑄛𑄧𑄢𑄴𑄥𑄪 𑄦𑄧𑄣𑄬 𑄢𑄋𑄟𑄖𑄳𑄠𑄖𑄴 𑄡𑄬𑄟𑄴𑅁

𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄆𑄝𑄬𑅁

𑄄𑄇𑄴𑄬 𑄇𑄬𑄚𑄬 𑄇𑄮𑄟𑄴! 𑄚𑄪𑄠𑄮 𑄚𑄪𑄠𑄮 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄮𑄟𑄴𑄟𑄰𑄱𑅁 𑄛𑄧𑄢𑄳𑄦𑄣𑄬𑄊 𑄇𑄬𑄎𑄚𑄴 𑄦𑄧𑄠𑄴𑅁 

𑄄𑄠𑄬𑄚𑄴–𑄃𑄮𑄝𑄧𑄚𑄴 𑄇𑄱𑄰 𑄚𑄧 𑄝𑄪𑄏𑄨𑄟𑄴, 𑄖𑄧𑄖𑄴𑄪𑄚𑄴 𑄆𑄏 𑄛𑄧𑄢𑄨𑄝𑄱𑄰! 𑄇𑄧𑄙 𑄘𑄬, 𑄆𑄝𑄬 𑄞𑄨𑄣𑄨𑅁

𑄚𑄨𑄟𑄮𑄚𑄬 𑄇𑄧𑄚𑄧 𑄇𑄨𑄌𑄴𑄪 𑄚𑄧 𑄞𑄝𑄨 𑄇𑄧𑄣𑄧, 𑄇𑄧𑄙 𑄘𑄨𑄣𑄪𑄁 𑄆𑄟𑄴𑅁

𑄚𑄨𑄟𑄮𑄚𑄧𑄢𑄴 𑄇𑄧𑄙 𑄛𑄬𑄭 𑄚𑄇𑄴𑄧𑄝𑄨 𑄦𑄎𑄨 𑄦𑄎𑄨 𑄇𑄧𑄣𑄧, 𑄄𑄝𑄬 𑄚 𑄟𑄧 𑄇𑄮𑄌𑄴𑄛𑄚𑅁 𑄎𑄧𑄘𑄬𑄝𑄧𑄘𑄬 𑄟𑄬 𑄇𑄮𑄌𑄴𑄛𑄌𑄴𑄍𑄬 𑄦𑄧𑄠𑄴𑅁 𑄡𑄬𑄭 𑄆𑄇𑄴𑄇 𑄖𑄧𑄣𑄬𑄘𑄨𑅁

𑄡𑄬𑄭𑅁

𑄘𑄨𑄎𑄧𑄚𑄬 𑄇𑄧𑄙 𑄇𑄱𑄰 𑄇𑄱𑄰 𑄖𑄧𑄣𑄬𑄘𑄨 𑄡𑄘𑄧𑄚𑄴𑅁 𑄖𑄢 𑄝𑄧𑄌𑄴𑄧𑄚𑄴𑄘𑄬 𑄅𑄉𑄪𑄢𑄬𑄘𑄨 𑄇𑄧𑄢𑄬𑄋𑄖𑄪𑄣𑄨 𑄝𑄎𑄢𑄧 𑄛𑄧𑄖𑄴𑄗𑄚𑄴𑅁 𑄛𑄧𑄙𑄬𑄘𑄨 𑄟𑄚𑄪𑄌𑄴 𑄅𑄎𑄮𑄚𑄨–𑄣𑄟𑄮𑄚𑄨 𑄉𑄧𑄖𑄴𑄧𑄚𑄴𑅁 𑄇𑄧𑄢𑄬𑄋𑄖𑄪𑄣𑄨 𑄝𑄎𑄢𑄧𑄖𑄴 𑄡𑄬𑄠𑄳𑄠𑄬 𑄝𑄎𑄢𑄴𑄛𑄮𑄉𑄪𑄚𑄬 𑄊𑄧𑄢𑄧𑄖𑄴 𑄜𑄨𑄢𑄨 𑄆𑄖𑄴𑄧𑄚𑄴𑅁 𑄇𑄢𑄧 𑄦𑄘𑄧𑄖𑄴 𑄇𑄬𑄢𑄚𑄨 𑄖𑄬𑄣𑄧 𑄍𑄨𑄎𑄨𑄢𑄨, 𑄇𑄢𑄧 𑄦𑄘𑄧𑄖𑄴 𑄙𑄪𑄚𑄴𑄘𑄮 𑄟𑄨𑄙𑄬 𑄖𑄧𑄝𑅁 𑄣𑄬𑄭 𑄇𑄚𑄳𑄦𑄖𑄴 𑄉𑄧𑄢𑄨𑅁 𑄡𑄘𑄬 𑄡𑄘𑄬 𑄅𑄇𑄴𑄮 𑄟𑄧𑄢 𑄉𑄍𑄴 𑄣𑄊𑄧𑄖𑄴 𑄛𑄬𑄣𑄇𑄴𑅁 𑄟𑄧𑄢 𑄉𑄌𑄴𑄍𑄱𑄰 𑄃𑄉𑄢𑄬𑄖𑄴𑄪𑄚𑄴 𑄞𑄎𑄨 𑄆𑄌𑄳𑄠 𑄉𑄬𑄣𑄴𑄬 𑄝𑄧𑄏𑄧𑄢𑄴 𑄛𑄚𑄨 𑄝𑄚𑄴𑄦𑄱𑄰𑄚𑄬𑅁 𑄇𑄧𑄚𑄴 𑄍𑄧𑄢 𑄗𑄪𑄟𑄧𑄖𑄴𑄪𑄚𑄴, 𑄃 𑄇𑄧𑄚𑄴 𑄟𑄪𑄢𑄮 𑄟𑄙𑄖𑄴𑄪𑄚𑄴 𑄞𑄎𑄨 𑄆𑄌𑄳𑄠 𑄇𑄧𑄚𑄴𑄚 𑄇𑄱𑄰 𑄛𑄢𑄬𑅁 𑄇𑄧𑄢𑄬𑄋𑄖𑄪𑄣𑄨 𑄝𑄎𑄢𑄧𑄖𑄴 𑄝𑄋𑄣𑄴 𑄃𑄊𑄧𑄚𑄴𑅁 𑄇𑄎𑄧𑄣𑄧𑄋𑄚𑄴 𑄛𑄚𑄨 𑄝𑄢𑄨𑄣𑄬 𑄃𑄉𑄢𑄬𑄖𑄴𑄪𑄚𑄴 𑄉𑄍𑄴 𑄇𑄧𑄖𑄴𑄖, 𑄝𑄏𑄧 𑄇𑄧𑄖𑄴𑄖, 𑄉𑄍𑄴 𑄌𑄣𑄨, 𑄝𑄏𑄧 𑄌𑄣𑄨 𑄞𑄎𑄨 𑄆𑄏𑄬𑅁 𑄉𑄍𑄴 𑄇𑄧𑄖𑄴𑄖, 𑄝𑄌𑄴 𑄇𑄧𑄖𑄴𑄖 𑄞𑄎𑄨 𑄆𑄣𑄬 𑄝𑄋𑄣𑄪𑄚𑄬 𑄙𑄧𑄢𑄧𑄚𑄴𑅁 𑄄𑄝𑄬 𑄇𑄬𑄚𑄬 𑄙𑄧𑄢𑄨 𑄚𑄳𑄦𑄧 𑄛𑄢𑄧𑄚𑄴 𑄇𑄨𑄎𑄬𑄚𑄨𑅁 𑄚𑄇𑄨 𑄛𑄚𑄨 𑄓𑄋𑄧𑄢𑄴 𑄆𑄣𑄧 𑄇𑄨𑄚𑄬𑄖𑄴𑄖𑄬𑄭 𑄝𑄧𑄣𑄬 𑄚𑄧 𑄇𑄪𑄣𑄬𑄭 𑄥𑄬𑄚𑄧𑄖𑄴𑄖𑄬𑄭 𑄢𑄊𑄬𑄭 𑄚𑄧 𑄛𑄢𑄧𑄚𑄴𑅁 𑄚 𑄌𑄮𑄊𑄮𑄖𑄴 𑄚𑄧 𑄛𑄧𑄢𑄬𑅁 𑄟𑄧𑄢 𑄉𑄌𑄴𑄍𑄮𑄢𑄴 𑄆𑄇𑄴 𑄇𑄧𑄖𑄴𑄖 𑄌𑄧𑄢𑄧 𑄟𑄘𑄨𑄖𑄴 𑄏𑄝 𑄛𑄧𑄌𑄳𑄠𑅁 𑄆𑄇𑄴 𑄇𑄧𑄖𑄴𑄖 𑄘𑄢𑄴𑄝𑄮 𑄃𑄋𑄬𑄠𑄳𑄠𑄬 𑄟𑄨𑄣𑄬𑄉𑄪𑄚𑄬 𑄈𑄪𑄢𑄮𑄣𑄴𑄣𑄭𑄮 𑄘𑄢𑄴𑄝𑄮 𑄜𑄢𑄨 𑄚𑄬𑄡𑄬𑄠𑄧𑄚𑄴𑅁 𑄌𑄧𑄢𑄴 𑄟𑄘𑄨 𑄏𑄝 𑄛𑄧𑄌𑄳𑄠𑄘𑄬 𑄉𑄍𑄴 𑄇𑄧𑄖𑄴𑄖𑄚𑄴 𑄆𑄇𑄴𑄇 𑄆𑄇𑄴𑄇 𑄛𑄧𑄎𑄨 𑄡𑄢𑄴𑅁 𑄉𑄌𑄴𑄍𑄮 𑄛𑄧𑄎 𑄛𑄧𑄎𑄚𑄨𑄖𑄴 𑄘𑄨𑄝𑄬–𑄅𑄇𑄴𑄮 𑄌𑄬𑄢–𑄉𑄬𑄢 𑄝𑄬𑄢𑄘𑄧𑄚𑄴𑅁 𑄌𑄘𑄴–𑄥𑄟𑄪𑄇𑄴𑄪𑄚𑄬 𑄥𑄪𑄢𑄴 𑄚𑄳𑄦𑄨𑄉𑄨𑄣𑄬𑄭 𑄚𑄳𑄦𑄉𑄨𑄣𑄬𑄭 𑄝𑄬𑄢𑄘𑄧𑄚𑄴𑅁 𑄌𑄘𑄴–𑄥𑄟𑄪𑄇𑄴𑄪𑄚𑄴 𑄡𑄨𑄚𑄴𑄘𑄨 𑄡𑄚𑄴, 𑄥𑄨𑄚𑄴𑄘𑄨 𑄙𑄪𑄛𑄴 𑄉𑄧𑄢𑄨 𑄃𑄙 𑄉𑄧𑄢𑄨 𑄣𑄬𑄝𑄬𑄘𑄬 𑄗𑄠𑄴𑅁 𑄉𑄌𑄴𑄍𑄮 𑄘𑄬𑄊𑄨 𑄚𑄇𑄴𑄧𑄝𑄨 𑄇𑄧𑄣𑄧, 𑄄𑄠𑄮𑄖𑄴 𑄝𑄧𑄏𑄨𑅁

𑄄𑄠𑄮𑄖𑄴 𑄝𑄧𑄏𑄨 𑄇𑄱𑄰 𑄚𑄇𑄴𑄧𑄝𑄨 𑄝𑄧𑄏𑄬𑄢𑄴𑅁 𑄚𑄨𑄟𑄮𑄚𑄬 𑄟𑄚 𑄉𑄧𑄢𑄨 𑄇𑄧𑄣𑄧, 𑄗𑄇𑄴, 𑄗𑄇𑄴𑅁 𑄄𑄇𑄴𑄬 𑄚𑄧 𑄝𑄧𑄏𑄨𑄌𑄴𑅁

𑄇𑄨𑄠𑅃

𑄟𑄧𑄢 𑄉𑄏𑄧𑄖𑄴 𑄌𑄬𑄢–𑄖𑄬𑄢 𑄝𑄬𑄢𑄘𑄧𑄚𑄴𑅁

𑄝𑄬𑄢𑄘𑄮𑄇𑄴! 𑄄𑄚𑄴𑄘𑄨 𑄚𑄧 𑄆𑄝𑄇𑄴𑅁 𑄉𑄌𑄴𑄍𑄮 𑄝𑄨𑄢𑄴𑄝𑄨𑄌𑄳𑄠 𑄃𑄊𑄬𑅁

𑄇𑄬𑄚𑄬 𑄇𑄧𑄣𑄬! 

𑄆𑄥𑄚𑄳𑄠 𑄘𑄮𑄣𑄴 𑄉𑄏𑄧𑄖𑄴 𑄌𑄬𑄢 𑄆𑄏𑄬𑄘𑄬! 𑄆𑄣𑄬–𑄃𑄮 𑄇𑄨, 𑄖𑄪𑄭 𑄃𑄊𑄧𑄌𑄴𑅁

𑄟𑄪𑄭 𑄘𑄧 𑄝𑄬𑄌𑄴 𑄗𑄬𑄭 𑄚𑄧 𑄛𑄢𑄨𑄟𑄴𑅁

𑄖𑄪𑄭 𑄆𑄖𑄴𑄬 𑄚𑄧 𑄆𑄖𑄴𑄬 𑄡𑄬𑄟𑄴 𑄡𑄬𑄟𑄴 𑄇𑄧𑄌𑄴𑅁 𑄛𑄧𑄢𑄴𑄥𑄪 𑄦𑄧𑄣𑄬 𑄢𑄋𑄟𑄖𑄳𑄠𑄖𑄴 𑄡𑄬𑄝𑄬𑅁 𑄆𑄌𑄳𑄠 𑄦𑄧𑄣𑄬 𑄆𑄇𑄴𑄇 𑄅𑄇𑄴𑄮 𑄄𑄢𑄨 𑄚𑄧 𑄘𑄨𑄟𑄴𑅁

𑄚𑄉𑄧𑄢𑄨, 𑄛𑄧𑄢𑄚𑄨 𑄏𑄘𑄨 𑄡 𑄛𑄧𑄢𑄨𑄝𑄮𑅁 𑄝𑄬𑄢𑄚𑄳𑄠 𑄊𑄧𑄢𑄧𑄖𑄴 𑄡𑄬𑄭 𑄛𑄬𑄟𑄴𑅁 𑄆𑄚𑄬–𑄃𑄮 𑄟–𑄖𑄴𑄪𑄚𑄴 𑄛𑄇𑄴 𑄟𑄢𑄨 𑄆𑄌𑄴𑄍𑄮𑄁 𑄢𑄧𑄚𑄴𑄎𑄧𑄚𑄧 𑄥𑄨𑄙𑄪 𑄡𑄬𑄟𑄴 𑄉𑄧𑄢𑄨𑅁 𑄃 𑄟𑄪𑄏𑄨 𑄡𑄪𑄚𑄨 𑄃𑄟𑄥𑄨𑄙𑄪 𑄡𑄠𑄴 𑄥𑄣𑄬𑄚𑄴 𑄝𑄬𑄌𑄴 𑄟𑄨𑄏𑄬 𑄇𑄧𑄙𑄖𑄴 𑄛𑄧𑄢𑄨𑄟𑄴𑅁

𑄢𑄋𑄟𑄖𑄳𑄠𑄖𑄴 𑄡𑄬𑄝𑄬 𑄡𑄧𑄇𑄴𑄬 𑄘𑄬𑄢𑄨 𑄦𑄧𑄣𑄬–𑄃𑄮 𑄇𑄨𑄌𑄴𑄪 𑄚𑄧 𑄇𑄧𑄝𑄇𑄴𑅁

𑄇𑄬𑄚𑄬 𑄇𑄧𑄣𑄬𑅃

𑄖𑄧 𑄟 𑄈𑄧𑄝𑄧𑄢𑄴 𑄇𑄨 𑄟𑄪𑄭 𑄚𑄧 𑄛𑄁𑄉𑄬! 𑄖𑄧 𑄟 𑄞𑄢𑄨 𑄉𑄧𑄟𑄴𑅁

𑄃 𑄖𑄧 𑄟𑅃

𑄟𑄧 𑄟 𑄉𑄧𑄟𑄴 𑄦𑄧𑄣𑄬–𑄃𑄮 𑄟𑄪𑄭 𑄟𑄨𑄣𑄬𑅁 𑄟–𑄝𑄝𑄧𑄢𑄴 𑄡𑄬𑄙𑄧𑄇𑄳𑄠 𑄉𑄧𑄟𑄴 𑄦𑄧𑄘𑄧𑄥𑄖𑄴 𑄡𑄬𑄭 𑄌𑄨𑄘𑄬 𑄛𑄧𑄢𑄨 𑄗𑄠𑄴𑅁 𑄡𑄬𑄚𑄴 𑄌𑄨𑄘𑄬 𑄉𑄧𑄢𑄨 𑄗𑄚𑄴 𑄖𑄧𑄢𑄬 𑄚𑄨𑄚𑄬𑄭𑅁 𑄖𑄪𑄭 𑄢𑄋𑄟𑄖𑄳𑄠𑄖𑄴 𑄡𑄬𑄝𑄬𑅁 𑄥𑄧𑄠𑄴–𑄥𑄉𑄧𑄌𑄳𑄠 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄛𑄬𑄝𑄬𑄉𑄱𑄰𑅁 𑄦𑄧𑄣𑄬 𑄟𑄬–𑄃𑄮 

𑄚𑄇𑄴𑄧𑄝𑄨 𑄄𑄠𑄬𑄚𑄴 𑄇𑄱𑄰𑄚𑄬 𑄚𑄨𑄟𑄮𑄚𑄧 𑄦𑄖𑄴𑄖𑄚𑄴 𑄙𑄧𑄢𑄨𑄣𑄮𑅁 𑄚𑄨𑄟𑄮𑄚𑄬 𑄟𑄪–𑄃𑄮 𑄇𑄨𑄖𑄳𑄠𑄚𑄴𑄘𑄨 𑄌𑄬𑄭 𑄗𑄬𑄣𑄧 𑄆𑄇𑄴 𑄢𑄨𑄚𑄨 𑄉𑄧𑄢𑄨𑅁

𑄚𑄨𑄟𑄮𑄚𑄬 𑄟𑄪 𑄇𑄣 𑄉𑄧𑄢𑄨 𑄇𑄧𑄣𑄧, 𑄟𑄪𑄭 𑄢𑄋𑄟𑄖𑄳𑄠𑄖𑄴 𑄡𑄬𑄟𑄴 𑄇𑄨𑄚𑄬𑄖𑄴𑄖𑄬𑄭 𑄖𑄧𑄢𑄴 𑄟𑄧𑄚𑄧𑄖𑄴 𑄘𑄪𑄈𑄴𑄦𑄱𑄰𑄠𑄬𑅃

𑄃𑄧𑅁

𑄦𑄱𑄰𑄠𑄬, 𑄟𑄧𑄚𑄧𑄖𑄴 𑄘𑄪𑄈𑄴 𑄚𑄧 𑄉𑄧𑄢𑄨𑄌𑄴𑅁 𑄌𑄘𑄬 𑄌𑄘𑄬 𑄝𑄧𑄏𑄧𑄢𑄪𑄚𑄴 𑄇𑄧𑄇𑄴𑄬 𑄡𑄚𑄴 𑄍𑄧𑄝𑄭 𑄒𑄢𑄴 𑄉𑄧𑄢𑄨 𑄚𑄧 𑄛𑄢𑄨𑄝𑄬𑅁 𑄇𑄧𑄙 𑄘𑄨𑄣𑄪𑄋𑄳𑄠 𑄚𑄧𑄠𑄴, 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄆𑄟𑄴𑅁

𑄆𑄝𑄬 𑄝𑄪𑄏𑄧𑄁𑅃

𑄆 𑄛𑄢𑄨𑄟𑄴 𑄇𑄨𑄚 𑄇𑄱𑄰 𑄚𑄧 𑄛𑄢𑄧𑄋𑄧𑄢𑄴𑅁 𑄆𑄝𑄢𑄴 𑄌𑄬𑄌𑄴𑄑 𑄉𑄧𑄢𑄨𑄟𑄴𑅁

𑄚𑄨𑄟𑄮𑄚𑄬 𑄄𑄠𑄬𑄚𑄴 𑄇𑄱𑄰𑄚𑄬 𑄚𑄇𑄴𑄧𑄝𑄨 𑄦𑄖𑄴𑄖𑄚𑄴 𑄄𑄢𑄨 𑄘𑄨𑄣𑄧𑅁 𑄚𑄨𑄟𑄮𑄚𑄬 𑄚𑄇𑄴𑄧𑄝𑄨 𑄦𑄖𑄴𑄖𑄚𑄴 𑄙𑄧𑄢𑄨 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄟𑄧𑄢𑄬 𑄌𑄨𑄙𑄨 𑄣𑄬𑄊𑄨𑄝𑄬𑅃

𑄖𑄪𑄭𑅃

𑄣𑄬𑄊𑄨𑄟𑄴𑅁 𑄇𑄧𑄚𑄧 𑄦𑄧𑄘𑄬𑅃 𑄇𑄧𑄢𑄬𑄋𑄖𑄪𑄣𑄨, 𑄚 𑄟𑄢𑄨𑄥𑄳𑄠𑅃

𑄘𑄪𑄠𑄮𑄉𑄚𑄧𑄖𑄴 𑄛𑄢𑄨𑄝𑄬𑅁 𑄟𑄪𑄭 𑄘𑄧 𑄇𑄧𑄣𑄬𑄎𑄧𑄖𑄴 𑄡𑄬𑄟𑄴𑅁 𑄟𑄢𑄨𑄥𑄳𑄠 𑄦𑄧𑄘𑄬 𑄣𑄬𑄊𑄨𑄣𑄬–𑄃𑄮 𑄛𑄬𑄟𑄴𑅁 𑄈𑄣𑄨𑄇𑄴 𑄥𑄨𑄠𑄬𑄚𑄴 𑄟𑄨𑄣𑄬 𑄚𑄁 𑄘𑄨 𑄛𑄬𑄝𑄬𑅁 𑄚𑄧 𑄦𑄧𑄣𑄬 𑄥𑄧𑄟𑄌𑄳𑄠𑄉𑄪𑄚𑄬 𑄛𑄧𑄢𑄚𑄴 𑄢𑄊𑄬 𑄚𑄧 𑄘𑄨𑄝𑄬𑄇𑄴𑅁 

𑄖𑄪𑄭 𑄣𑄬𑄊𑄨𑄣𑄬–𑄃𑄮 𑄟𑄧𑄢𑄧𑄖𑄴 𑄚𑄁 𑄘𑄨𑄌𑄴𑅁

𑄦𑄧𑄘𑄬𑄭𑅁 𑄚𑄨𑄟𑄮𑄚𑄴𑅃

𑄇𑄨𑅃

𑄖𑄧𑄢𑄬 𑄦𑄜𑄴 𑄦𑄘𑄧 𑄥𑄨𑄣𑄪𑄟𑄴 𑄅𑄢𑄨𑄣𑄬 𑄞𑄢𑄨 𑄟𑄚𑄠𑄴𑅁

𑄚𑄨𑄟𑄮𑄚𑄬 𑄟𑄪 𑄌𑄨𑄟𑄬 𑄌𑄨𑄟𑄬 𑄦𑄎𑄨 𑄇𑄧𑄣𑄧, 𑄖𑄧𑄢𑄬–𑄃𑄮 𑄛𑄨𑄚𑄮𑄚𑄴, 𑄈𑄘𑄨 𑄛𑄬𑄚𑄨𑄣𑄬 𑄃𑄧𑄟𑄧𑄇𑄧𑄘𑄧 𑄞𑄧𑄢𑄧𑄚𑄴–𑄞𑄨𑄢𑄮𑄚𑄴 𑄘𑄬𑄊𑄬𑅁 𑄘𑄮𑄣𑄴 𑄣𑄉𑄬𑅁 𑄟𑄧𑄚𑄧𑄖𑄴 𑄃𑄊𑄬, 𑄝𑄬𑄭 𑄟𑄬𑄣𑄖𑄴 𑄢𑄋 𑄛𑄨𑄚𑄮𑄚𑄴, 𑄢𑄋 𑄈𑄘𑄨 𑄛𑄨𑄚𑄳𑄠𑄧𑄌𑄳𑄠𑅁 𑄥𑄬𑄘𑄨𑄚𑄳𑄠 𑄇𑄧𑄘𑄧 𑄟𑄧𑄢𑄧𑄘𑄬 𑄖𑄧𑄢𑄬 𑄘𑄮𑄣𑄴 𑄘𑄬𑄊𑄨 𑄇𑄨 𑄇𑄱𑄰𑄠𑄧𑄚𑄴𑅁 𑄥𑄬𑄘𑄨𑄚𑄳𑄠 𑄇𑄧𑄙 𑄦𑄨𑄘𑄮𑄖𑄴 𑄅𑄙𑄨𑄣𑄬 𑄆𑄝𑄧 𑄛𑄨𑄏𑄪𑄟𑄴 𑄅𑄙𑄬𑅁

𑄆𑄙𑄧𑄇𑄴 𑄘𑄨𑄚𑄧 𑄇𑄧𑄙 𑄖𑄧𑄢𑄴 𑄆𑄝𑄧 𑄟𑄧𑄚𑄧𑄖𑄴 𑄃𑄊𑄬𑅃

𑄃𑄧𑅁

𑄥𑄬𑄇𑄴𑄬 𑄟𑄪𑄭 𑄘𑄮𑄣𑄬𑄘𑄣𑄬 𑄛𑄨𑄚𑄮𑄚𑄴, 𑄈𑄘𑄨 𑄛𑄨𑄚𑄨 𑄚𑄧 𑄎𑄚𑄧𑄁𑅁 𑄟𑄧𑄚𑄬 𑄟𑄧𑄚𑄬 𑄌𑄨𑄘𑄬 𑄗𑄬𑄘𑄧 𑄇𑄧𑄇𑄴𑄬 𑄇𑄧𑄟𑄧𑄢𑄧𑄖𑄴𑄪𑄚𑄴 𑄏𑄧𑄢𑄨 𑄛𑄧𑄢𑄬 𑄛𑄨𑄚𑄮𑄚𑄚𑄴𑅁

𑄆𑄚𑄴 𑄇𑄱𑄰 𑄛𑄢𑄬 𑄛𑄨𑄚𑄮𑄚𑄚𑄴 𑄙𑄧𑄢𑄧𑄁 𑄙𑄧𑄢𑄧𑄁 𑄉𑄧𑄢𑄬𑅁

𑄚𑄨𑄟𑄮𑄚𑄬 𑄜𑄎𑄣𑄟𑄨 𑄉𑄧𑄢𑄨 𑄇𑄧𑄙𑄚𑄴 𑄇𑄧𑄣𑄧𑅁

𑄃 𑄉𑄧𑄖𑄴𑄬 𑄟𑄧𑄎 𑄘𑄬𑄊𑄬𑄣𑄪𑄁 𑄃𑄭𑅁

𑄉𑄧𑄚𑄴𑄘𑄧𑄉𑄮𑄣𑄴 𑄦𑄧𑄣𑄬 𑄇𑄧𑄣𑄬𑄎𑄧𑄖𑄴 𑄚𑄧 𑄡𑄬𑄌𑄴 𑄥𑄨𑄠𑄬𑅁

𑄖𑄧𑄢𑄴 𑄇𑄮 𑄚𑄧 𑄛𑄧𑄢𑄨𑄝𑄮𑅁

𑄖𑄪𑄭 𑄢𑄋𑄟𑄖𑄳𑄠𑄖𑄴 𑄉𑄬𑄣𑄬 𑄍𑄖𑄳𑄢𑄧 𑄛𑄧𑄢𑄨𑄥𑄧𑄘𑄧 𑄇𑄟𑄴 𑄚𑄧 𑄉𑄧𑄢𑄨𑄝𑄬𑅁 𑄎𑄬𑄆𑄥𑄴𑄆𑄥𑄴, 𑄄𑄅𑄛𑄨𑄓𑄨𑄆𑄜𑄴 𑄚𑄧 𑄉𑄧𑄢𑄨𑄝𑄬𑅁 𑄦𑄬𑄢𑄮𑄄𑄚𑄴 𑄈𑄬𑄠𑄳𑄠𑄬 𑄛𑄮 𑄣𑄧𑄊𑄬 𑄚𑄧 𑄝𑄬𑄢𑄬𑄝𑄬𑅁 𑄥𑄨𑄠𑄬𑄚𑄨 𑄉𑄧𑄣𑄴𑄬 𑄥𑄣𑄬𑄚𑄴 𑄝𑄧𑄢𑄴𑄝𑄘𑄴 𑄡𑄨𑄠𑄮𑄌𑄴𑅁

𑄟𑄪𑄭 𑄇𑄨 𑄥𑄨𑄠𑄬𑄚𑄨 𑄉𑄧𑄢𑄧𑄁𑄉𑄬𑅃

𑄖𑄪𑄠𑄮 𑄇𑄧𑄣𑄪𑄁𑅁

𑄟𑄪𑄭 𑄘𑄧 𑄝𑄚𑄳𑄦 𑄖𑄧𑄢𑄴𑅁

𑄟𑄪𑄭𑅃

𑄖𑄪𑄭–𑄃𑄮 𑄟𑄧𑄢𑄴𑅁

𑄖𑄧 𑄥𑄧𑄟𑄌𑄳𑄠𑄉𑄪𑄚𑄬 𑄄𑄅𑄚𑄨𑄞𑄢𑄴𑄥𑄨𑄑𑄨𑄖𑄴 𑄡𑄬𑄝𑄇𑄴𑅁 𑄖𑄪𑄭–𑄃𑄮 𑄡𑄬𑄭 𑄛𑄖𑄴𑄬𑅁

𑄞𑄢𑄴𑄥𑄨𑄑𑄨𑄖𑄴 𑄞𑄧𑄖𑄴𑄖𑄨 𑄦𑄧𑄣𑄬 𑄃 𑄆𑄇𑄴 𑄝𑄧𑄏𑄧𑄢𑄴 𑄛𑄨𑄏𑄬 𑄛𑄧𑄢𑄨 𑄗 𑄛𑄧𑄢𑄨𑄝𑄮𑅁

𑄇𑄧𑄣𑄬𑄎𑄧𑄖𑄴 𑄘𑄮𑄣𑄴 𑄘𑄮𑄣𑄴 𑄟𑄨𑄣𑄬 𑄘𑄬𑄊𑄨𑄣𑄬 𑄟𑄬 𑄛𑄪𑄢𑄨 𑄜𑄬𑄣𑄬𑄝𑄮𑄉𑄱𑄰𑅃

𑄚𑄨𑄟𑄮𑄚𑄬 𑄟𑄙 𑄚𑄨𑄉𑄪𑄢𑄨 𑄣𑄟𑄴𑄝 𑄚𑄨𑄏𑄬𑄌𑄴 𑄑𑄚𑄨, 𑄚𑄇𑄴𑄧𑄝𑄨 𑄟𑄪𑄠𑄮𑄚𑄧𑄖𑄴 𑄌𑄬𑄭 𑄇𑄧𑄣𑄧, 𑄛𑄪𑄢𑄨 𑄜𑄬𑄣𑄬𑄟𑄴𑅁 𑄎𑄧𑄘𑄬𑄝𑄧𑄘𑄬 𑄛𑄪𑄢𑄨 𑄜𑄬𑄣𑄬𑄟𑄴𑅁 𑄇𑄧𑄚𑄧𑄘𑄨𑄚𑄴 𑄖𑄧𑄢𑄬 𑄟𑄧𑄚𑄧𑄖𑄴 𑄚𑄧 𑄢𑄊𑄬𑄟𑄴𑅁 𑄖𑄪𑄭 𑄡𑄨𑄙𑄪 𑄟𑄧𑄚𑄬 𑄇𑄧𑄠𑄴, 𑄥𑄨𑄙𑄪 𑄡𑄬𑄭 𑄛𑄢𑄨𑄝𑄬𑅁 𑄇𑄨, 𑄈𑄪𑄎𑄨 𑄦𑄧𑄣𑄬𑅃

𑄌𑄮𑄇𑄴𑄈𑄪𑄚𑄴 𑄌𑄨𑄉𑄮𑄚𑄴 𑄉𑄧𑄢𑄨, 𑄌𑄮𑄊𑄮 𑄛𑄘𑄚𑄨 𑄗𑄬𑄝𑄧𑄖𑄴 𑄗𑄬𑄝𑄧𑄖𑄴 𑄉𑄧𑄢𑄨 𑄇𑄧𑄣𑄧, 𑄡𑄬𑄘𑄨𑄚𑄳𑄠 𑄖𑄪𑄭 𑄟𑄧𑄢𑄬 𑄛𑄪𑄢𑄨 𑄜𑄬𑄣𑄬𑄝𑄬𑄉𑄱𑄰, 𑄥𑄬𑄘𑄨𑄚𑄳𑄠 𑄟𑄪𑄭 𑄆 𑄛𑄨𑄖𑄴𑄗𑄨𑄟𑄨𑄖𑄴 𑄚𑄬𑄭𑅁 𑄌𑄬𑄭𑄌𑄴 𑄥𑄣𑄬𑄚𑄴, 𑄥𑄬𑄘𑄨𑄚𑄳𑄠 𑄈𑄟𑄇𑄴𑄇𑄭 𑄟𑄧 𑄟𑄧𑄢𑄝𑄮 𑄘𑄬𑄊𑄨𑄝𑄬 𑄥𑄧𑄢𑄧𑄣𑄴 𑄉𑄧𑄢𑄨 𑄛𑄧𑄢𑄨 𑄃𑄊𑄬𑅁 𑄙𑄪𑄛𑄴 𑄇𑄝𑄧𑄢𑄴 𑄆𑄇𑄴𑄇𑄚𑄴 𑄟𑄪𑄉𑄮𑄢𑄬𑄭 𑄘𑄨𑅁

𑄟𑄪𑄭 𑄛𑄪𑄢𑄨 𑄚𑄧 𑄜𑄬𑄣𑄬𑄣𑄬𑄉𑄱𑄰 𑄖𑄪𑄭 𑄇𑄨 𑄃𑄮𑄟𑄮𑄢𑄴 𑄝𑄚𑄨 𑄗𑄬𑄝𑄬𑅃

𑄗𑄬𑄟𑄴! 

𑄟𑄪𑄭–𑄃𑄮 𑄖𑄧𑄢𑄬 𑄃𑄮𑄟𑄮𑄢𑄴 𑄝𑄚𑄨 𑄢𑄊𑄬𑄟𑄴𑅁

𑄖𑄨𑄚𑄴

𑄖𑄢 𑄘𑄨𑄎𑄧𑄚𑄬 𑄚𑄨𑄎𑄧 𑄛𑄧𑄢𑄚𑄧𑄖𑄴𑄪𑄚𑄴 𑄝𑄬𑄌𑄴 𑄇𑄮𑄌𑄴𑄛–𑄛𑄨𑅁 𑄇𑄮𑄌𑄴𑄛–𑄛𑄨 𑄦𑄧𑄣𑄬 𑄆𑄙𑄧𑄇𑄳𑄠 𑄇𑄧𑄙 𑄝𑄬𑄇𑄴𑄪𑄚𑄬 𑄇𑄧𑄚𑄴𑅁 𑄇𑄮𑄌𑄴𑄛𑄚 𑄃𑄊𑄬 𑄞𑄨𑄣𑄨 𑄛𑄨𑄖𑄴𑄗𑄨𑄟𑄨𑄠𑄚𑄴 𑄃𑄧𑄟𑄧𑄇𑄧𑄘𑄧 𑄘𑄮𑄣𑄴𑅁 𑄇𑄮𑄌𑄴𑄛𑄚 𑄃𑄊𑄬 𑄇𑄨𑄚𑄬𑄖𑄴𑄖𑄬𑄭 𑄛𑄨𑄖𑄴𑄗𑄨𑄟𑄨𑄖𑄴 𑄆𑄙𑄧𑄇𑄴𑄇𑄚𑄨 𑄑𑄨𑄉𑄨 𑄃𑄊𑄬𑅁 𑄈𑄣𑄨𑄇𑄴 𑄞𑄢𑄨 𑄉𑄧𑄢𑄨 𑄇𑄮𑄌𑄴𑄛𑄬𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄘𑄪𑄌𑄴 𑄦𑄧𑄠𑄴𑅁 𑄘𑄬𑄟𑄇𑄴 𑄗𑄠𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄆𑄇𑄴𑄇𑄚 𑄇𑄧𑄙𑄣𑄱𑄰 𑄡𑄧𑄘𑄬𑄝𑄧𑄘𑄬 𑄟𑄧𑄚𑄧𑄖𑄴 𑄘𑄪𑄈𑄴 𑄛–𑄛𑄨 𑄦𑄧𑄠𑄴𑅁 𑄆𑄇𑄴𑄇𑄚 𑄇𑄧𑄙𑄣𑄱𑄰 𑄈𑄪𑄎𑄨 𑄦𑄧𑄠𑄴𑅁 𑄟𑄧𑄚𑄧𑄖𑄴 𑄘𑄪𑄇𑄴𑄈𑄚𑄴 𑄝𑄬𑄌𑄴 𑄚𑄧 𑄗𑄠𑄴𑅁 𑄈𑄣𑄨𑄇𑄴 𑄇𑄮𑄌𑄴𑄛𑄠𑄴 𑄞𑄨𑄣𑄨 𑄉𑄮𑄘 𑄎𑄨𑄁𑄇𑄚𑄨𑄢𑄴 𑄥𑄧𑄟𑄢𑄨𑄦𑄱𑄰 𑄛𑄬𑄝𑄧 𑄥𑄨𑄠𑄬𑄚𑄴 𑄘𑄧 𑄚𑄧𑄠𑄴𑅁 𑄇𑄨𑄖𑄴𑄖𑄬𑄭 𑄦𑄧𑄣𑄬, 𑄇𑄮𑄌𑄴𑄛𑄚𑄖𑄴 𑄟𑄚𑄪𑄌𑄴 𑄝𑄪𑄘𑄴𑄙𑄨𑄦𑄢 𑄦𑄧𑄚𑄴𑅁 𑄇𑄮𑄌𑄴𑄛𑄚 𑄚𑄨𑄚𑄬𑄭 𑄇𑄧𑄙𑄧𑄇𑄴 𑄢𑄎𑄭 𑄢𑄬𑄎𑄳𑄠𑄧 𑄦𑄢𑄬𑄠𑄧𑄚𑄴𑅁 𑄇𑄧𑄙𑄧𑄇𑄴 𑄥𑄙𑄧𑄇𑄴 𑄙𑄳𑄠𑄚𑄴 𑄦𑄢𑄬𑄭 𑄜𑄬𑄣𑄳𑄠𑄧𑄚𑄴𑅁 𑄟𑄳𑄦𑄎𑄧𑄚𑄬 𑄟𑄳𑄦𑄎𑄧𑄚𑄴 𑄦𑄢𑄬𑄭 𑄜𑄬𑄣𑄳𑄠𑄧𑄚𑄴𑅁 𑄌𑄣𑄇𑄴 𑄌𑄣𑄇𑄴 𑄟𑄚𑄪𑄌𑄴 𑄦𑄧𑄘𑄧𑄟𑄴–𑄝𑄪𑄘𑄴𑄙𑄨𑄚𑄌𑄴𑄦𑄱𑄰𑄠𑄧𑄚𑄴𑅁 𑄌𑄨𑄉𑄮𑄚𑄴 𑄉𑄪𑄢𑄮 𑄙𑄧𑄇𑄳𑄠𑄬𑄚𑄴𑄦𑄱𑄰𑄠𑄧𑄚𑄴𑅁 𑄡𑄨𑄠𑄬𑄚𑄴 𑄛𑄠𑄴 𑄇𑄧𑄚𑄴𑅁 𑄛𑄨𑄖𑄴𑄗𑄨𑄟𑄨𑄖𑄴 𑄇𑄢𑄧𑄢𑄴 𑄇𑄮𑄌𑄴𑄛𑄚 𑄑𑄨𑄉𑄨 𑄗𑄠𑄴, 𑄇𑄢𑄧𑄢𑄴 𑄇𑄮𑄌𑄴𑄛𑄚 𑄑𑄨𑄉𑄨 𑄚𑄧 𑄗𑄠𑄴𑅁 𑄇𑄮𑄌𑄴𑄛𑄚 𑄞𑄋𑄨 𑄡𑄠𑄴𑅁 𑄇𑄮𑄌𑄴𑄛𑄚 𑄞𑄋𑄨 𑄉𑄬𑄣𑄬–𑄃𑄮, 𑄇𑄮𑄌𑄴𑄛𑄚 𑄑𑄨𑄉𑄨 𑄚𑄧 𑄗𑄬𑄣𑄬–𑄃𑄮 𑄇𑄨𑄠𑄮𑄎𑄧𑄚𑄬 𑄇𑄮𑄌𑄴𑄛𑄚 𑄍𑄢 𑄚𑄧 𑄗𑄚𑄴𑅁 𑄚𑄪𑄠𑄮 𑄉𑄧𑄢𑄨 𑄇𑄮𑄌𑄴𑄛𑄚 𑄚𑄨𑄚𑄬𑄭 𑄥𑄧𑄝𑄧𑄚𑄴 𑄘𑄬𑄊𑄧𑄚𑄴𑅁 𑄇𑄧𑄚𑄧 𑄆𑄇𑄴𑄎𑄧𑄚𑄧𑄢𑄬 𑄝𑄨𑄥𑄬𑄴𑄥𑄴 𑄡𑄬𑄭, 𑄟𑄧𑄚𑄧𑄖𑄴 𑄛𑄧𑄢𑄨, 𑄚𑄪𑄠𑄮 𑄉𑄧𑄢𑄨 𑄃𑄢𑄧 𑄇𑄮𑄌𑄴𑄛𑄚𑄴𑅁 𑄟𑄧𑄚𑄬 𑄉𑄧𑄢𑄧𑄚𑄴, 𑄄𑄝𑄬 𑄟𑄧 𑄥𑄪𑄈𑄴–𑄘𑄪𑄈𑄴 𑄝𑄪𑄏𑄨𑄝𑄮𑅁 𑄃𑄛𑄧𑄖𑄴–𑄝𑄨𑄛𑄧𑄘𑄧𑄖𑄴 𑄅𑄎𑄬𑄭 𑄆𑄝𑄧𑅁 𑄄𑄠𑄬𑄚𑄴 𑄞𑄝𑄨 𑄓𑄪𑄝𑄨 𑄡𑄚𑄴 𑄇𑄮𑄌𑄴𑄛𑄚𑄢𑄴 𑄥𑄉𑄧𑄢𑄧𑄖𑄴𑅁 𑄡𑄬 𑄟𑄚𑄴𑄎𑄳𑄠𑄧𑄢𑄴 𑄟𑄧𑄚𑄧𑄖𑄴 𑄇𑄮𑄌𑄴𑄛𑄚 𑄝𑄬𑄌𑄴 𑄃𑄊𑄬, 𑄥𑄬 𑄟𑄚𑄳𑄠 𑄇𑄧𑄚𑄧𑄘𑄨𑄚𑄴 𑄇𑄢𑄧𑄢𑄬 𑄘𑄪𑄈𑄴 𑄚𑄧 𑄘𑄨𑄝𑄧𑅁 𑄖𑄬 𑄇𑄧𑄚𑄧 𑄛𑄧𑄢𑄚𑄴𑄝𑄧𑄣𑄢𑄬 𑄟𑄢𑄬𑄭 𑄚𑄧 𑄜𑄬𑄣𑄬𑄝𑄧𑅁 𑄇𑄢𑄧𑄢𑄬 𑄛𑄨𑄏𑄪𑄟𑄧 𑄚𑄧 𑄉𑄧𑄢𑄨𑄝𑄮𑅁 𑄇𑄢𑄧𑄢𑄬 𑄉𑄬𑄣𑄴 𑄘𑄨 𑄚𑄧 𑄛𑄢𑄨𑄝𑄮𑅁 𑄃𑄧𑄎𑄧𑄝 𑄚𑄧 𑄇𑄱𑄰𑄚𑄬 𑄟𑄨𑄙𑄬 𑄟𑄨𑄙𑄬 𑄇𑄧𑄙 𑄇𑄧𑄝𑄧𑅁 𑄉𑄮𑄎𑄬𑄚𑄧 𑄟𑄧𑄚𑄧𑄖𑄴 𑄝𑄬𑄌𑄴 𑄉𑄧𑄢𑄨 𑄇𑄮𑄌𑄴𑄛𑄚 𑄆𑄣𑄧 𑄞𑄨𑄣𑄨 𑄖𑄬 𑄇𑄢𑄧𑄢𑄬 𑄟𑄧𑄚𑄧𑄖𑄴 𑄘𑄪𑄈𑄴 𑄛𑄠𑄴 𑄛𑄢 𑄇𑄧𑄙 𑄚𑄧 𑄇𑄧𑄠𑄴𑅁 𑄖𑄬 𑄇𑄱𑄰 𑄡𑄨𑄠𑄬, 𑄝𑄬𑄇𑄴 𑄛𑄧𑄢𑄚𑄴𑄝𑄧𑄣𑄉𑄪𑄚𑄴 𑄥𑄪𑄊𑄨 𑄦𑄮𑄘𑄮𑄇𑄴𑅁 𑄥𑄪𑄊𑄬 𑄗𑄇𑄮𑄇𑄴𑅁 

𑄚𑄨𑄟𑄮𑄚𑄬 𑄦𑄎𑄬𑄢𑄴𑅁

𑄇𑄨 𑄦𑄎𑄧𑄢𑄴𑅃

𑄖𑄧 𑄌𑄪𑄣𑄚𑄴𑅁

𑄟𑄧 𑄌𑄪𑄣𑄚𑄴 𑄇𑄨 𑄘𑄬𑅃

𑄈𑄘𑄨 𑄞𑄨𑄢𑄬𑄎𑄧 𑄘𑄧𑄞 𑄙𑄧𑄇𑄴 𑄖𑄧 𑄌𑄪𑄣𑄚𑄴 𑄣𑄟𑄴𑄝𑅁

𑄥𑄨𑄠𑄬𑄚𑄴𑄘𑄱𑄰𑄦𑄎𑄨 𑄛𑄠𑄴𑅃

𑄚𑄨𑄟𑄮𑄚𑄬 𑄥𑄨𑄠𑄬𑄝𑄬𑄌𑄴 𑄊𑄧𑄚𑄧 𑄊𑄧𑄚𑄧 𑄢𑄨𑄚𑄨 𑄌𑄠𑄴 𑄚𑄇𑄴𑄧𑄝𑄨 𑄌𑄪𑄣𑄚𑄨𑅁 𑄃 𑄦𑄎𑄬𑅁 𑄚𑄨𑄟𑄮𑄚𑄬 𑄇𑄧𑄣𑄧, 𑄟𑄧𑄚𑄧𑄖𑄴 𑄚𑄬𑄭 𑄖𑄧𑄢𑄴, 𑄛𑄳𑄢𑄭𑄟𑄢𑄨 𑄄𑄥𑄴𑄇𑄪𑄣𑄧𑄖𑄴 𑄗𑄉𑄧𑄘𑄬 𑄆𑄇𑄴 𑄛𑄧𑄣𑄴𑄣 𑄖𑄧 𑄌𑄪𑄣𑄚𑄨 𑄙𑄧𑄢𑄨 𑄉𑄪𑄢𑄪𑄣𑄬𑄎𑄴 𑄇𑄱𑄰𑄠𑄧𑄁𑄉𑄬𑅁

𑄚𑄇𑄴𑄧𑄝𑄨𑄖𑄴𑄪𑄚𑄴 𑄥𑄨𑄠𑄬𑄚𑄴 𑄦𑄨𑄘𑄮𑄖𑄴 𑄅𑄙𑄨 𑄇𑄨𑄘𑄨𑄇𑄴 𑄇𑄨𑄘𑄨𑄇𑄴 𑄦𑄎𑄨𑄣𑄮𑅁 𑄦𑄎𑄧𑄘𑄬 𑄦𑄎𑄧𑄘𑄬 𑄇𑄧𑄣𑄧, 𑄥𑄬𑄘𑄨𑄚𑄳𑄠𑄬 𑄖𑄧𑄢𑄬 𑄡𑄬𑄟𑄴𑄝 𑄢𑄉𑄴 𑄅𑄖𑄳𑄠𑄬! 𑄥𑄬𑄘𑄨𑄚𑄳𑄠 𑄇𑄧𑄙 𑄦𑄨𑄘𑄮𑄖𑄴 𑄅𑄙𑄨𑄣𑄬 𑄆𑄝𑄧 𑄖𑄧𑄢𑄬 𑄝𑄨𑄌𑄴 𑄘𑄬𑄊𑄧𑄁𑅁

𑄎𑄧𑄘𑄬𑄝𑄧𑄘𑄬𑅃

𑄚𑄧𑄠𑄴 𑄘𑄧 𑄛𑄧𑄢𑄚𑄴𑅁 𑄖𑄪𑄭 𑄇𑄧 𑄚, 𑄟𑄪𑄭 𑄇𑄨 𑄖𑄧𑄢𑄬 𑄝𑄨𑄌𑄴 𑄘𑄬𑄊𑄨 𑄛𑄢𑄧𑄁𑅃

𑄚𑄘𑄬𑄭𑅁

𑄃 𑄥𑄣𑄬𑄚𑄴 𑄝𑄨𑄉𑄨𑄙𑄨 𑄉𑄧𑄣𑄳𑄠–𑄃𑄮 𑄝𑄨𑄥𑄬𑄴𑄥𑄴 𑄉𑄧𑄢𑄧𑄌𑄳𑄠𑅁𑄦𑄱𑄰𑄠𑄬 𑄥𑄬 𑄇𑄧𑄙 𑄗𑄧𑅁 𑄟𑄪𑄭 𑄖𑄧𑄢𑄬 𑄣𑄟𑄴𑄝 𑄆𑄇𑄴𑄇𑄚𑄴 𑄛𑄧𑄌𑄴𑄍𑄧𑄚𑄴 𑄇𑄱𑄰 𑄘𑄮𑄁𑅁

𑄣𑄟𑄴𑄝 𑄛𑄧𑄌𑄴𑄍𑄧𑄚𑄴𑅃

𑄃𑄧𑅁 𑄇𑄨, 𑄚𑄧 𑄥𑄪𑄚𑄨𑄝𑄬𑅃

𑄥𑄪𑄚𑄨𑄝𑄬𑄢𑄴 𑄘𑄧 𑄟𑄧𑄚𑄬 𑄇𑄧𑄢𑄴𑅁 𑄈𑄣𑄨𑄇𑄴 𑄝𑄬𑄣𑄴 𑄓𑄪𑄝𑄬𑄣𑄴𑄣𑄭𑄮𑅁 𑄝𑄬𑄢𑄚𑄳𑄠 𑄊𑄧𑄢𑄧𑄖𑄴 𑄡 𑄛𑄧𑄢𑄨𑄝𑄮𑅁 𑄖𑄧 𑄛𑄧𑄌𑄴𑄍𑄧𑄚𑄚𑄴 𑄥𑄪𑄚𑄨𑄣𑄬 𑄥𑄎𑄴 𑄦𑄧𑄝𑄧𑅁 𑄘𑄬𑄢𑄨 𑄦𑄮𑄟𑄴𑅁

𑄇𑄨𑄖𑄴𑄖𑄬𑄭 𑄘𑄬𑄢𑄨 𑄦𑄧𑄣𑄬 𑄛𑄪𑄏𑄮𑄢𑄴 𑄉𑄧𑄢𑄴𑄣𑄬 𑄇𑄧𑄝𑄬, 𑄢𑄧𑄚𑄴𑄎𑄧𑄚𑄧𑄢𑄬 𑄣𑄊𑄧𑄖𑄴 𑄛𑄘𑄬 𑄘𑄬𑄢𑄨𑄦𑄱𑄰𑄠𑄬𑅁

𑄆𑄌𑄳𑄠 𑄇𑄨 𑄝𑄚𑄳𑄦 𑄟𑄨𑄏𑄬 𑄇𑄧𑄙 𑄇𑄮𑄟𑄴! 

𑄟𑄧𑄖𑄳𑄠𑄬 𑄖𑄪𑄭 𑄟𑄨𑄏𑄬 𑄇𑄧𑄙 𑄇𑄱𑄰 𑄛𑄧𑄢𑄴𑅁

𑄚𑄨𑄟𑄮𑄚𑄬 𑄥𑄨𑄠𑄬𑄚𑄴 𑄚𑄧 𑄇𑄱𑄰𑄚𑄬, 𑄇𑄧𑄣𑄧, 𑄝𑄚𑄳𑄦 𑄟𑄪𑄭 𑄘𑄬𑄢𑄨 𑄦𑄮𑄟𑄴𑅃 𑄖𑄪𑄭 𑄇𑄨 𑄘𑄬𑄢𑄨 𑄚𑄧 𑄦𑄧𑄝𑄬𑅃

𑄦𑄮𑄇𑄴! 

𑄦𑄱𑄰𑄠𑄬 𑄥𑄣𑄬𑄚𑄴, 𑄆𑄌𑄳𑄠 𑄢𑄬𑄖𑄴𑄮 𑄆𑄥𑄚𑄳𑄠𑄬 𑄉𑄧𑄢𑄨 𑄇𑄧𑄙 𑄇𑄱𑄰𑄚𑄬 𑄇𑄘𑄬𑄝𑄧𑄁𑅁

𑄆𑄇𑄴𑄬 𑄛𑄢𑄨𑄝𑄬𑄘𑄬 𑄃𑄠𑄴, 𑄚𑄇𑄴 𑄘𑄋𑄧𑄢𑄴 𑄉𑄧𑄢𑄨 𑄇𑄧𑄖𑄴𑄬𑅁

𑄚𑄨𑄟𑄮𑄚𑄬 𑄥𑄬 𑄇𑄧𑄙 𑄚𑄧 𑄇𑄱𑄰, 𑄇𑄧𑄣𑄧, 𑄚𑄧 𑄘𑄨𑄝𑄬𑅃

𑄄𑄇𑄴𑄬 𑄚𑄇𑄴𑄧𑄝𑄨𑄢𑄴 𑄟𑄪𑄠𑄚𑄴 𑄢𑄋𑄦𑄱𑄰𑄠𑄬 𑄣𑄎𑄬𑅁 𑄟𑄚𑄪𑄌𑄴 𑄣𑄎𑄧𑄖𑄴 𑄛𑄧𑄣𑄬, 𑄢𑄉𑄴 𑄅𑄙𑄨𑄣𑄬 𑄟𑄪 𑄢𑄋 𑄦𑄧𑄚𑄴𑅁 𑄇𑄚𑄴 𑄢𑄋 𑄦𑄧𑄚𑄴𑅁 𑄈𑄪𑄎𑄨 𑄦𑄧𑄣𑄬 𑄍𑄧𑄑𑄴𑄜𑄧𑄑𑄳𑄠𑄬 𑄦𑄧𑄚𑄴𑅁 𑄦𑄎𑄧𑄚𑄴𑅁 𑄚𑄇𑄴𑄧𑄝𑄨 𑄟𑄙 𑄚𑄨𑄉𑄪𑄢𑄨 𑄣𑄎𑄬 𑄣𑄎𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄨𑅃

𑄃 𑄇𑄨𑅃

𑄚𑄧 𑄘𑄨𑄟𑄴𑅁

𑄇𑄨𑄖𑄴𑄖𑄬𑄭𑅃

𑄣𑄎𑄁𑅁

𑄖𑄧𑄢𑄴 𑄣𑄎𑄴! 𑄘𑄬 𑄚𑅁

𑄚𑄨𑄟𑄮𑄚𑄬 𑄇𑄪𑄎𑄮𑄣𑄨 𑄉𑄧𑄣𑄳𑄠𑄧𑅁

𑄇𑄧𑄣𑄪𑄁 𑄘𑄧 𑄚𑄧 𑄘𑄨𑄟𑄴𑅁

𑄚𑄨𑄟𑄮𑄚𑄬 𑄝𑄱𑄰𑄘𑄬𑄖𑄴𑄪𑄚𑄴 𑄅𑄙𑄨 𑄚𑄇𑄴𑄮 𑄘𑄬𑄖𑄴𑄬 𑄥𑄬𑄚𑄧𑄖𑄴 𑄈𑄘𑄨 𑄛𑄬𑄌𑄴𑄮 𑄟𑄧𑄎 𑄉𑄧𑄌𑄳𑄠 𑄘𑄬𑄇𑄴𑄈𑄬𑅁 𑄌𑄁 𑄌𑄁, 𑄈𑄘𑄨 𑄛𑄬𑄌𑄴𑄮𑄖𑄴 𑄇𑄨 𑄃𑄊𑄬𑅁

𑄗𑄮𑄇𑄴, 𑄚𑄧 𑄌𑄬𑄌𑄴𑅁

𑄚𑄇𑄴𑄮 𑄚𑄧 𑄘𑄨𑄝𑄬𑅁 𑄈𑄘𑄨 𑄛𑄬𑄌𑄴𑄮 𑄌𑄬𑄝𑄢𑄴 𑄚𑄧 𑄘𑄨𑄝𑄬𑅁 𑄚𑄧 𑄘𑄬𑄊𑄬𑄝𑄬𑅁 𑄄𑄠𑄬𑄚𑄴 𑄇𑄬𑄚𑄬 𑄦𑄧𑄠𑄴𑅁

𑄟𑄚𑄳𑄠𑄬 𑄘𑄬𑄊𑄨𑄝𑄬𑄇𑄴𑅁

𑄈𑄘𑄨 𑄛𑄬𑄌𑄴𑄪 𑄌𑄘𑄬 𑄟𑄚𑄳𑄠𑄬 𑄘𑄬𑄊𑄨𑄣𑄬 𑄇𑄨 𑄦𑄧𑄖𑄴𑄬𑅁 𑄈𑄪𑄎𑄨𑄠𑄬 𑄘𑄬𑄊𑅁 𑄚𑄧 𑄦𑄧𑄣𑄬 𑄝𑄧𑄣𑄬 𑄝𑄧𑄣𑄬 𑄌𑄬𑄟𑄴𑅁 𑄥𑄬𑄇𑄴𑄬 𑄡𑄨𑄠𑄬𑄚𑄴 𑄛𑄁, 𑄥𑄨𑄠𑄬𑄚𑄴 𑄇𑄢𑄨 𑄣𑄮𑄟𑄴𑅁

𑄚𑄇𑄴𑄧𑄝𑄨 𑄈𑄘𑄨 𑄛𑄬𑄌𑄴𑄮 𑄛𑄨𑄏𑄬𑄘𑄨 𑄗𑄮𑄠𑄴 𑄃 𑄈𑄘𑄨𑄠𑄚𑄴 𑄖 𑄉𑄧𑄖𑄴𑄧𑄚𑄝𑄮𑄖𑄴 𑄝𑄬𑄢𑄳𑄦𑄬𑄣𑄧𑅁 𑄚𑄇𑄴𑄧𑄝𑄨 𑄟𑄧𑄚𑄧 𑄈𑄪𑄎𑄨𑄠𑄬 𑄚𑄧 𑄘𑄬𑄊𑄢𑄴 𑄇𑄨𑄚𑄬𑄖𑄴𑄖𑄬𑄭 𑄝𑄧𑄣𑄬 𑄝𑄧𑄣𑄬 𑄇𑄢𑄨 𑄣𑄱𑄰𑄚𑄬 𑄈𑄘𑄨 𑄛𑄬𑄌𑄴𑄮 𑄈𑄪𑄣𑄳𑄠 𑄚𑄨𑄟𑄮𑄚𑄬𑅁 𑄈𑄪𑄣𑄨–𑄈𑄣𑄭 𑄌𑄠𑄴𑄘𑄬 𑄅𑄇𑄴𑄮 𑄜𑄧𑄑𑄮𑅁 𑄇𑄎𑄧𑄣𑄧𑄁 𑄛𑄢𑄧𑄖𑄴 𑄝𑄧𑄏𑄨 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄅𑄗𑄳𑄠𑄬𑅁 𑄛𑄨𑄚𑄮𑄚𑄴–𑄈𑄘𑄨 𑄏𑄨𑄉𑄬 𑄜𑄪𑄣𑄮 𑄢𑄧𑄁𑅁 𑄌𑄪𑄣𑄚𑄴 𑄟𑄪𑄎𑄪𑄋𑄬𑄘𑄨 𑄜𑄬𑄣𑄬𑄭 𑄘𑄨𑄠𑄬𑅁 𑄡𑄬𑄚𑄴 𑄚𑄇𑄴𑄧𑄝𑄨 𑄥𑄬𑄚𑄴 𑄖 𑄜𑄧𑄑𑄮𑄝𑄮𑅁 𑄇𑄨 𑄃𑄧𑄟𑄧𑄇𑄧𑄘𑄧 𑄘𑄮𑄣𑄴! 𑄞𑄢𑄨 𑄉𑄧𑄢𑄨 𑄟𑄚𑄬𑄠𑄳𑄠𑄬𑅁 𑄚𑄇𑄴𑄧𑄝𑄨 𑄖 𑄜𑄧𑄑𑄮𑄝𑄮 𑄚𑄧 𑄘𑄬𑄊𑄬𑄣𑄬–𑄃𑄮 𑄟𑄧𑄚𑄬 𑄟𑄧𑄚𑄬 𑄜𑄧𑄑𑄮𑄝𑄮 𑄃𑄚𑄨 𑄘𑄨𑄠𑄬𑄘𑄬 𑄚𑄨𑄟𑄮𑄚𑄧𑄢𑄬𑅁

𑄜𑄧𑄑𑄮𑄝𑄮 𑄇𑄢𑄨 𑄣𑄱𑄰 𑄚𑄨𑄟𑄮𑄚𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄧𑄟𑄧𑄣𑄬 𑄅𑄖𑄴𑄗𑄮𑄌𑄴𑅃

𑄞𑄣𑄧𑄇𑄴 𑄞𑄨𑄣𑄧𑄚𑄴𑄦𑄱𑄰𑄠𑄬𑅁 𑄇𑄧𑄚𑄴 𑄘𑄘 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴𑄪𑄚𑄴 𑄇𑄳𑄠𑄟𑄬𑄢 𑄃𑄚𑄳𑄠𑄬𑄘𑄬 𑄣𑄧𑄇𑄴𑄬 𑄅𑄗𑄳𑄁𑄠𑄧𑄉𑄬𑅁

𑄞𑄢𑄨 𑄘𑄧 𑄘𑄮𑄣𑄴𑄦𑄱𑄰𑄠𑄬𑅁

𑄞𑄢𑄨 𑄘𑄮𑄣𑄴 𑄘𑄬𑄊𑄨𑄣𑄮𑅁

𑄇𑄧𑄚𑄴𑄚 𑄖𑄪𑄣𑄳𑄠𑄬𑅃

𑄚𑄇𑄴𑄧𑄝𑄨 𑄣𑄎𑄁 𑄣𑄎𑄁 𑄉𑄧𑄢𑄨 𑄇𑄧𑄣𑄧, 𑄘𑄘 𑄃𑄭𑅁

𑄟𑄪𑄭 𑄄𑄝𑄬 𑄚𑄧 𑄘𑄨𑄟𑄴 𑄃𑄢𑄴𑅁

𑄦𑄠𑄳𑄠𑄬𑅃

𑄟𑄧 𑄣𑄧𑄊𑄬 𑄢𑄊𑄬𑄟𑄴𑅁

𑄡𑄨𑄠𑄬𑄚𑄴 𑄛𑄭 𑄚𑄨𑄣𑄬 𑄃𑄉𑄬 𑄉𑄨𑄢𑄮𑄌𑄴𑄮𑄖𑄴𑄪𑄚𑄴 𑄟𑄊 𑄛𑄧𑄢𑄬𑄘𑄬 𑄇𑄱𑄰 𑄚𑄧 𑄛𑄢𑄧𑄌𑄴𑅃 𑄉𑄨𑄢𑄮𑄌𑄴𑄮𑄢𑄬 𑄇𑄮–𑄃𑄮 𑄛𑄧𑄢𑄬, 𑄟𑄬 𑄄𑄠𑄬𑄚𑄴 𑄘𑄨𑄝𑄬𑄚𑄨𑅃

𑄦𑄱𑄰𑄠𑄬 𑄟𑄊𑄨𑄣𑄪𑄁 𑄉𑄨𑄢𑄮𑄍𑄴, 𑄟𑄬 𑄜𑄧𑄑𑄮𑄝𑄮 𑄘𑄬𑅁

𑄘𑄬 𑄃 𑄘𑄨𑄝𑄬𑄚𑄨, 𑄇𑄧𑄙𑄚𑄴 𑄇𑄪𑄚𑄴𑄘𑄨 𑄉𑄬𑄣𑄧𑅃

𑄡𑄬𑄭 𑄆𑄇𑄴𑄇𑄚𑄴 𑄇𑄧𑄙𑅁

𑄇𑄬𑄚𑄬 𑄆𑄇𑄴𑄇𑄚𑄴 𑄇𑄧𑄙 𑄦𑄧𑄝𑄧𑅁 𑄘𑄬 𑄦𑄧𑄣𑄧𑄘𑄬 𑄟𑄧𑄚𑄬 𑄚𑄧 𑄇𑄧𑄣𑄬–𑄃𑄮 𑄝𑄧𑄣𑄬 𑄙𑄧𑄢𑄨 𑄚𑄬𑄡𑄠𑄴 𑄛𑄢 𑄦𑄧𑄠𑄴𑅁 𑄘𑄨𑄝𑄬𑄚𑄨 𑄦𑄧𑄣𑄧𑄘𑄬 𑄇𑄪𑄎𑄮𑄣𑄨 𑄉𑄧𑄢𑄚𑅁 𑄖𑄪𑄭 𑄘𑄧 𑄆𑄇𑄴𑄬 𑄝𑄧𑄣𑄬 𑄙𑄧𑄢𑄨 𑄚𑄨𑄘𑄬 𑄌𑄌𑄴 𑄛𑄢 𑄛𑄁𑅁

𑄦𑄱𑄰𑄠𑄬 𑄇𑄧𑄣𑄪𑄁 𑄜𑄧𑄑𑄮𑄝𑄮 𑄘𑄨𑄝𑄬𑄚𑄨𑅁 𑄇𑄨, 𑄦𑄧𑄣𑄧𑅃 𑄚 𑄦𑄖𑄴 𑄎𑄪𑄢𑄴 𑄉𑄧𑄢 𑄛𑄧𑄢𑄨𑄝𑄮𑅁

𑄖𑄧𑄢𑄴 𑄦𑄧𑄣𑄬! 

𑄄𑄠𑄬𑄚𑄴 𑄇𑄱𑄰 𑄚𑄇𑄴𑄧𑄝𑄨 𑄦𑄎 𑄙𑄧𑄣𑄳𑄠𑄧𑅁 𑄦𑄎𑄧𑄘𑄬 𑄦𑄎𑄧𑄘𑄬 𑄇𑄧𑄣𑄧, 𑄃𑄌𑄴𑄍 𑄘𑄨𑄣𑄪𑄁𑅁 𑄈𑄣𑄨𑄇𑄴 𑄟𑄚𑄴𑄎𑄳𑄠𑄧𑄢𑄬 𑄘𑄬𑄊𑄬𑄭 𑄚𑄧 𑄛𑄬𑄝𑄬𑅁 𑄇𑄢𑄧𑄢𑄬 𑄚𑄧 𑄘𑄬𑄊𑄬𑄝𑄬 𑄞𑄨𑄣𑄨 𑄇𑄧𑅁 𑄖𑄧 𑄥𑄧𑄟𑄌𑄳𑄠𑄢𑄬–𑄃𑄮𑅁

𑄚𑄇𑄴𑄧𑄝𑄨 𑄃𑄎𑄧𑄘𑄬 𑄜𑄧𑄑𑄮 𑄃𑄚𑄨 𑄘𑄨𑄠𑄬 𑄚𑄨𑄟𑄮𑄚𑄧𑄖𑄳𑄠𑄠𑄴𑅁 𑄚𑄨𑄟𑄮𑄚𑄬 𑄢𑄋𑄟𑄖𑄳𑄠𑄖𑄴 𑄡𑄬𑄝𑄧𑅁 𑄟𑄧𑄚𑄬 𑄇𑄧𑄣𑄬 𑄚𑄇𑄴𑄧𑄝𑄨𑄢𑄬 𑄚𑄧 𑄘𑄬𑄊𑄨𑄝𑄮𑅁 𑄇𑄧𑄙 𑄇𑄱𑄰 𑄚𑄧 𑄛𑄬𑄝𑄧𑅁 𑄆𑄭 𑄥𑄬𑄚𑄧𑄖𑄴𑄖𑄬𑄭 𑄜𑄧𑄑𑄮𑄝𑄮 𑄃𑄚𑄨 𑄘𑄨𑄠𑄬𑅁 𑄜𑄧𑄑𑄮𑄝𑄮 𑄘𑄬𑄣𑄬 𑄖𑄢𑄴 𑄌𑄨𑄖𑄴 𑄎𑄪𑄢𑄬𑄝𑄧𑅁

𑄦𑄱𑄰𑄠𑄬, 𑄚𑄧 𑄘𑄬𑄊𑄬𑄟𑄴𑅁 𑄈𑄪𑄎𑄨𑄠𑄬 𑄘𑄨𑄣𑄬, 𑄚 𑄝𑄬𑄎𑄢𑄬 𑄘𑄨𑄣𑄬𑅃

𑄈𑄪𑄎𑄨𑄠𑄬𑅁

𑄜𑄧𑄑𑄮𑄝𑄮 𑄈𑄪𑄎𑄨𑄠𑄬 𑄘𑄨𑄣𑄬, 𑄚𑄇𑄴𑄮–𑄃𑄮 𑄈𑄪𑄎𑄨𑄠𑄬 𑄘𑄬𑅁

𑄖𑄧𑄢𑄴 𑄣𑄎𑄴 𑄚𑄬𑄭 𑄚𑄬𑅃

𑄘𑄬 𑄚 𑄛𑄧𑄢𑄚𑄴𑅁

𑄃𑄱𑄰–𑄃𑄮–𑄝𑄮 𑄎𑄣𑄳𑄠𑄉𑄪𑄚𑄬 𑄎𑄣𑄴 𑄝𑄙𑄧𑄚𑄴𑅁

𑄖𑄧𑄖𑄴𑄪𑄚𑄴 𑄌𑄨𑄖𑄴 𑄚𑄬𑄭𑅁

𑄟𑄚𑄳𑄠𑄬 𑄘𑄬𑄊𑄨𑄣𑄬 𑄇𑄨 𑄇𑄧𑄝𑄇𑄴 𑄛𑄢 𑄛𑄌𑄴! 𑄦𑄱𑄰𑄠𑄬 𑄛𑄧𑄢𑄚𑄴, 𑄖𑄪𑄭 𑄣𑄧𑄇𑄴𑄈𑄨, 𑄖𑄪𑄭 𑄉𑄧𑄟𑄴, 𑄖𑄪𑄭 𑄘𑄮𑄣𑄴𑅁 𑄖𑄪𑄭 𑄝𑄬𑄇𑄴𑄇𑄚𑄨 𑄝𑄪𑄏𑄮𑄌𑄴𑅁 𑄥𑄬𑄚𑄧𑄖𑄴𑄖𑄬𑄭 𑄟𑄪𑄭 𑄖𑄧𑄢𑄬 𑄇𑄮𑄌𑄴𑄛𑄁𑅁

𑄦𑄱𑄰𑄠𑄬 𑄃𑄭𑅁 𑄡𑄬𑄭, 𑄄𑄠𑄮𑄖𑄴 𑄇𑄧𑄘𑄧𑄇𑄴𑄧𑄚𑄴 𑄗𑄬𑄘𑄧𑄁𑅁

𑄚𑄨𑄟𑄮𑄚𑄬 𑄆𑄇𑄴𑄇 𑄘𑄬𑄟𑄇𑄴 𑄉𑄧𑄢𑄨 𑄇𑄧𑄣𑄧𑅁

𑄡𑄬𑄘𑄧𑄁 𑄥𑄣𑄬𑄚𑄴𑅁

𑄡𑄬𑄭𑅁

𑄢𑄉𑄴 𑄉𑄧𑄣𑄳𑄠𑄬 𑄘𑄬𑅃

𑄇𑄨 𑄢𑄉𑄴 𑄉𑄧𑄖𑄴𑄧! 

𑄢𑄉𑄴 𑄉𑄧𑄢𑄨 𑄇𑄧𑄣𑄬𑄘𑄬𑅁

𑄟𑄪𑄭 𑄖𑄧𑄢𑄬 𑄢𑄉𑄴 𑄎𑄧𑄣𑄨 𑄛𑄢𑄧𑄁𑅁

𑄦𑄱𑄰𑄠𑄬 𑄢𑄉𑄴 𑄚𑄧 𑄉𑄧𑄢𑄨𑄣𑄬 𑄦𑄘𑄨𑄌𑄴𑅁

𑄖𑄪𑄭 𑄃𑄇𑄴𑄪–𑄃𑄮𑅁

𑄚𑄇𑄴𑄧𑄝𑄨 𑄃𑄇𑄴𑄧𑄣𑄴 𑄃𑄇𑄴𑄧𑄣𑄴 𑄦𑄘𑄬𑄢𑄴𑅁 𑄚𑄨𑄟𑄮𑄚𑄬 𑄛𑄨𑄏𑄬 𑄛𑄨𑄏𑄬 𑄦𑄘𑄬𑄢𑄴𑅁 𑄇𑄪𑄘𑄫𑄴𑄢𑄴 𑄡𑄬𑄭 𑄚𑄨𑄟𑄮𑄚𑄧𑄖𑄴𑄪𑄚𑄴 𑄙𑄬𑄁 𑄅𑄙𑄨𑄣𑄧𑅁 𑄛𑄨𑄏𑄬𑄘𑄨 𑄚𑄇𑄴𑄧𑄝𑄨 𑄇𑄠𑄴 𑄡𑄬𑄭 𑄇𑄧𑄣𑄧, 𑄄𑄚𑄴𑄘𑄨 𑄌𑄘𑄬𑄭𑅁 

𑄄𑄠𑄬𑄚𑄴 𑄇𑄱𑄰𑄠𑄬–𑄃𑄮 𑄚𑄨𑄟𑄮𑄚𑄬 𑄃𑄧𑄢𑄧𑄁–𑄇𑄧𑄢𑄧𑄁 𑄉𑄧𑄢𑄨 𑄒𑄨𑄠𑄬 𑄢𑄧𑄠𑄬𑅁 𑄚𑄇𑄴𑄧𑄝𑄨 𑄛𑄨𑄏𑄬𑄘𑄨 𑄜𑄨𑄢𑄨 𑄌𑄖𑄴𑄬, 𑄎𑄧𑄉𑄢𑄴 𑄚𑄨𑄟𑄮𑄚𑄧 𑄚𑄇𑄴𑄮𑄖𑄴 𑄚𑄇𑄴𑄧𑄝𑄨 𑄚𑄇𑄴𑄮 𑄝𑄌𑄴𑄍𑄬𑅁 𑄚𑄨𑄟𑄮𑄚𑄬 𑄦𑄎𑄨 𑄦𑄎𑄨 𑄇𑄧𑄣𑄧, 𑄆𑄝𑄢𑄴 𑄘𑄧 𑄘𑄨 𑄛𑄬𑄣𑄬𑅁

𑄇𑄨𑄖𑄴𑄖𑄬𑄭 𑄆𑄙𑄧𑄇𑄳𑄠 𑄉𑄧𑄣𑄳𑄠𑄬𑅃

𑄇𑄨𑄠𑅃 𑄢𑄉𑄴 𑄉𑄧𑄢𑄨𑄣𑄬 𑄘𑄬𑅃

𑄟𑄧 𑄚𑄇𑄴𑄮 𑄇𑄝𑄨 𑄜𑄬𑄣𑄬𑄝𑄢𑄴 𑄟𑄧𑄚𑄬 𑄇𑄧𑄢𑄴𑅁

𑄖𑄪𑄭 𑄘𑄧 𑄟𑄧𑄢𑄴𑅁 𑄇𑄧 𑄥𑄣𑄬𑄚𑄴 𑄖𑄪𑄭 𑄟𑄧𑄢𑄴 𑄚𑄧𑄠𑄴𑅁

𑄚𑄇𑄴𑄧𑄝𑄨 𑄚𑄧 𑄟𑄘𑄨 𑄒𑄨𑄠𑄬 𑄃𑄊𑄬𑅁

𑄇𑄧 𑄚, 𑄖𑄪𑄭 𑄟𑄧𑄢𑄴 𑄚𑄧𑄠𑄴𑅁

𑄦𑄧𑄠𑄴𑅁 𑄟𑄪𑄭 𑄖𑄧𑄢𑄴𑅁

𑄃 𑄚𑄇𑄴𑄮 𑄇𑄝𑄨 𑄜𑄬𑄣𑄬𑄝𑄢𑄴 𑄇𑄧𑄖𑄴𑄬𑅁 𑄟𑄪𑄭 𑄇𑄨 𑄟𑄧 𑄟𑄧𑄚𑄧 𑄟𑄧𑄚𑄴𑄎𑄧𑄇𑄴𑄈 𑄆𑄇𑄴𑄇–𑄃𑄮 𑄃𑄣𑄳𑄠𑄁 𑄉𑄧𑄢𑄨 𑄚𑄧 𑄛𑄢𑄨𑄟𑄴! 𑄃𑄣𑄳𑄠𑄁 𑄉𑄧𑄣𑄴𑄬, 𑄇𑄨𑄢𑄴𑄝𑄬 𑄉𑄧𑄣𑄴𑄬, 𑄖𑄪𑄭 𑄢𑄉𑄴 𑄎𑄧𑄣𑄨𑄣𑄬 𑄇𑄨 𑄦𑄧𑄝𑄧𑄘𑄬𑅁

𑄚𑄇𑄴𑄧𑄝𑄨 𑄆𑄇𑄴 𑄈𑄪𑄌𑄴 𑄝𑄢𑄬𑄭 𑄇𑄧𑄣𑄧, 𑄆𑄙𑄧𑄇𑄳𑄠 𑄘𑄧 𑄚𑄧𑄠𑄴𑅁 𑄟𑄚𑄳𑄠𑄬 𑄘𑄬𑄣𑄬 𑄝 𑄇𑄨 𑄇𑄧𑄝𑄇𑄴𑅁 𑄡𑄨𑄠𑄬𑄚𑄴 𑄛𑄠𑄴 𑄇𑄧𑄣𑄬, 𑄣𑄎𑄬 𑄟𑄪𑄭 𑄚𑄇𑄴 𑄘𑄬𑄊𑄬𑄭 𑄚𑄧 𑄛𑄢𑄨𑄟𑄴, 𑄥𑄬𑄇𑄴𑄬 𑄟𑄧𑄢𑄴 𑄣𑄎𑄴 𑄡𑄬𑄝𑄧𑅁 𑄖𑄪𑄭 𑄇𑄨 𑄌𑄌𑄴, 𑄟𑄚𑄳𑄠𑄬 𑄟𑄧𑄢𑄬 𑄝𑄧𑄚𑄴𑄚𑄁 𑄉𑄧𑄖𑄴𑄮𑄇𑄴! 𑄖𑄪𑄭 𑄇𑄨 𑄌𑄌𑄴, 𑄣𑄎𑄬 𑄟𑄪𑄭 𑄊𑄧𑄢𑄧 𑄞𑄨𑄘𑄨𑄢𑄬𑄖𑄴𑄪𑄚𑄴 𑄚𑄳𑄦𑄨𑄉𑄨𑄣𑄨 𑄚𑄧 𑄛𑄢𑄨 𑄊𑄧𑄢𑄧𑄖𑄴 𑄥𑄧𑄟𑄨 𑄗𑄁𑅁

𑄚𑄇𑄴𑄧𑄝𑄨 𑄚𑄮𑄚𑄬𑄠𑄳𑄠𑄬 𑄇𑄧𑄙𑄠𑄴 𑄚𑄨𑄟𑄮𑄚𑄧𑄢𑄴 𑄌𑄨𑄖𑄴 𑄛𑄧𑄢𑄨 𑄅𑄙𑄨 𑄇𑄧𑄣𑄧, 𑄇𑄧𑄙 𑄘𑄨𑄣𑄪𑄁, 𑄆𑄙𑄧𑄇𑄳𑄠 𑄃𑄢𑄴 𑄇𑄧𑄚𑄧𑄘𑄨𑄚𑄴 𑄚𑄧 𑄉𑄧𑄢𑄨𑄟𑄴𑅁 𑄟𑄧𑄖𑄴𑄖𑄬𑄭 𑄖𑄪𑄭 𑄟𑄙 𑄚𑄨𑄎𑄮 𑄉𑄧𑄢𑄨 𑄗𑄬𑄭 𑄚𑄧 𑄛𑄬𑄝𑄬𑅁 𑄡𑄬𑄭 𑄦𑄬𑄝𑄬𑄣𑄴𑅁

𑄌𑄬𑄢𑄴

𑄚𑄨𑄟𑄮𑄚𑄧𑄢𑄬 𑄖 𑄝𑄝𑄬 𑄉𑄭 𑄉𑄭 𑄢𑄋𑄟𑄖𑄳𑄠𑄖𑄴 𑄡𑄬𑄝𑄖𑄴𑄖𑄬𑄭 𑄇𑄧𑄠𑄴𑅁 𑄚𑄨𑄟𑄮𑄚𑄬 𑄉𑄭 𑄉𑄭 𑄡𑄬𑄝𑄖𑄴𑄖𑄬𑄭 𑄚𑄧 𑄌𑄠𑄴𑅁 𑄃𑄝𑄙 𑄉𑄧𑄢𑄨 𑄡𑄬𑄝𑄧, 𑄇𑄪𑄘𑄪𑄟𑄴𑄮 𑄊𑄧𑄢𑄧𑄖𑄴 𑄡𑄠𑄴 𑄞𑄨𑄣𑄨 𑄖 𑄝𑄝𑄬 𑄣𑄧𑄊𑄬 𑄉𑄬𑄣𑄬 𑄉𑄧𑄟𑄴 𑄦𑄧𑄠𑄴𑅁 𑄚𑄨𑄟𑄮𑄚𑄧𑄖𑄴𑄪𑄚𑄴 𑄇𑄨𑄌𑄴𑄪 𑄇𑄮–𑄃𑄮 𑄛𑄧𑄖𑄴𑄧 𑄚𑄧𑄠𑄴𑅁 𑄆𑄚𑄬 𑄘𑄧 𑄢𑄋𑄟𑄖𑄳𑄠𑄖𑄴 𑄣𑄪𑄋𑄨𑄣𑄬𑄉𑄱𑄰 𑄝𑄬𑄇𑄴𑄇𑄚𑄨 𑄘𑄨𑄝𑄬𑄇𑄴 𑄖 𑄟𑄟𑄪𑄘𑄊𑄨𑅁 𑄡𑄬𑄙𑄧𑄇𑄴 𑄘𑄨𑄚𑄴 𑄟𑄚𑄴𑄎𑄳𑄠𑄧 𑄊𑄧𑄢𑄴 𑄚𑄧 𑄛𑄠𑄴 𑄥𑄬𑄙𑄧𑄇𑄴 𑄘𑄨𑄚𑄴 𑄥𑄧𑄁 𑄖 𑄟𑄟𑄪 𑄊𑄧𑄢𑄧𑄖𑄴 𑄗𑄬𑄭 𑄛𑄢𑄨𑄝𑄮𑅁 𑄚𑄨𑄟𑄮𑄚𑄧 𑄝𑄝𑄬 𑄡𑄬𑄘𑄧 𑄚𑄧 𑄌𑄠𑄴 𑄃 𑄚𑄨𑄟𑄮𑄚𑄬–𑄃𑄮 𑄉𑄭 𑄉𑄭 𑄡𑄬𑄘𑄧 𑄚𑄧 𑄌𑄠𑄴 𑄄𑄠𑄬𑄚𑄴 𑄘𑄬𑄊𑄨 𑄚𑄨𑄟𑄮𑄚𑄧 𑄝𑄧𑄢𑄴 𑄝𑄮𑄚𑄴𑄮 𑄇𑄱𑄰𑄠𑄬 𑄚𑄨𑄟𑄮𑄚𑄴, 𑄖𑄪𑄭 𑄅𑄇𑄴𑄮 𑄊𑄧𑄢𑄴𑄇𑄧𑄚 𑄟𑄚𑄪𑄌𑄴𑅁 𑄃𑄭𑄠𑄬 𑄛𑄥𑄴 𑄉𑄧𑄌𑄳𑄠𑄧𑄌𑄴𑅁 𑄆𑄟𑄴𑄝 𑄇𑄬𑄚𑄬 𑄥𑄬𑄘𑄟𑄴–𑄛𑄚𑄴𑄏 𑄦𑄧𑄣𑄬𑅁 𑄊𑄧𑄢𑄴𑄛𑄪𑄥𑄳𑄠𑄧 𑄦𑄧𑄣𑄬𑅁 𑄡𑄬 𑄡𑄬𑄭 𑄇𑄧𑄙𑄧𑄥𑄖𑄴 𑄚𑄨𑄟𑄮𑄚𑄬 𑄉𑄭 𑄉𑄭 𑄚𑄧 𑄡𑄬𑄝𑄱𑄰 𑄚𑄧 𑄡𑄬𑄝𑄧𑅁 𑄖 𑄝𑄝𑄬 𑄣𑄧𑄊𑄬 𑄚𑄧 𑄉𑄬𑄣𑄬, 𑄖 𑄟𑄖𑄴𑄪𑄚𑄴 𑄡 𑄛𑄧𑄢𑄨𑄝𑄱𑄰 𑄛𑄧𑄢𑄨𑄝𑄮𑅁 𑄥𑄬𑄌𑄴–𑄟𑄬𑄌𑄴 𑄖 𑄝𑄝𑄬 𑄚𑄧 𑄡𑄬𑄭 𑄖 𑄟 𑄡𑄬𑄝𑄧 𑄒𑄨𑄇𑄴 𑄦𑄧𑄣𑄧𑅁 𑄖 𑄟 𑄉𑄬𑄣𑄬–𑄃𑄮 𑄍𑄢𑄨𑄝𑄮𑅁 𑄚𑄨𑄟𑄮𑄚𑄧𑄖𑄴𑄪𑄚𑄴 𑄇𑄨𑄌𑄴𑄪 𑄇𑄮 𑄚𑄧 𑄛𑄧𑄢𑄨𑄝𑄮𑅁

𑄢𑄋𑄟𑄖𑄳𑄠𑄖𑄴 𑄡𑄬𑄝𑄢𑄴𑄦𑄱𑄰𑄚𑄬 𑄝𑄬𑄚𑄳𑄠 𑄛𑄮𑄖𑄳𑄠 𑄚𑄨𑄟𑄮𑄚𑄧 𑄝𑄮𑄚𑄴𑄮 𑄞𑄖𑄴 𑄢𑄚𑄨 𑄘𑄨𑄣𑄮𑅁 𑄚𑄨𑄟𑄮𑄚𑄧 𑄟𑄝𑄮 𑄏𑄘𑄨𑄟𑄘𑄨 𑄊𑄪𑄟𑄮𑄖𑄴𑄪𑄚𑄴 𑄅𑄙𑄨, 𑄟𑄙𑄖𑄴 𑄖𑄬𑄣𑄴 𑄘𑄨, 𑄟𑄙𑄌𑄪𑄣𑄴 𑄃𑄎𑄪𑄢𑄨𑄣𑄮𑅁 𑄛𑄨𑄚𑄮𑄚𑄴, 𑄈𑄘𑄨, 𑄣𑄉𑄬𑄘𑄬 𑄛𑄧𑄏𑄚𑄨 𑄝𑄬𑄇𑄴𑄇𑄚𑄨 𑄝𑄬𑄉𑄧𑄖𑄴 𑄞𑄮𑄢𑄬𑄣𑄧𑅁 𑄉𑄪𑄣𑄬𑄇𑄴 𑄉𑄪𑄣𑄬𑄇𑄴 𑄞𑄖𑄴 𑄈𑄬𑄣𑄇𑄴𑅁 𑄚𑄨𑄟𑄮𑄚𑄧 𑄝𑄛𑄴𑄮 𑄚𑄧 𑄡𑄬𑄝𑄢𑄴 𑄇𑄧𑄙, 𑄢𑄬𑄘𑄮𑄖𑄴 𑄘𑄨 𑄚𑄬𑄇𑄴–𑄟𑄮𑄉𑄬 𑄖𑄬𑄟𑄴𑄟𑄁 𑄉𑄧𑄢𑄨𑄣𑄬𑄇𑄴, 𑄘𑄮–𑄎𑄧𑄚𑄴 𑄡𑄬𑄝𑄇𑄴𑅁 𑄥𑄬𑄚𑄧𑄖𑄴𑄖𑄬𑄭 𑄚𑄨𑄟𑄮𑄚𑄧 𑄝𑄝𑄬–𑄃𑄮 𑄢𑄋𑄟𑄖𑄳𑄠𑄖𑄴 𑄡𑄬𑄝𑄧𑅁 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴𑄪𑄚𑄴 𑄝𑄨𑄢𑄧𑄖𑄨𑄦𑄩𑄚𑄴 𑄝𑄮𑄑𑄴 𑄙𑄧𑄢 𑄛𑄧𑄢𑄨𑄝𑄮𑄉𑄱𑄰𑅁 𑄚𑄨𑄟𑄮𑄚𑄧 𑄟 𑄢𑄋𑄟𑄖𑄳𑄠𑄖𑄴 𑄡𑄢𑄴 𑄇𑄨𑄚𑄬𑄖𑄴𑄖𑄬𑄭 𑄇𑄨𑄏𑄪–𑄇𑄏𑄪 𑄖𑄮𑄚𑄴–𑄛𑄖𑄴 𑄣𑄱𑄰 𑄘𑄨𑄣𑄮 𑄖 𑄞𑄬𑄭𑄝𑄮𑄢𑄬𑅁 𑄢𑄋𑄟𑄖𑄳𑄠𑄖𑄴 𑄝𑄨𑄢𑄧𑄖𑄨𑄦𑄩𑄚𑄴 𑄝𑄮𑄑𑄴 𑄙𑄧𑄢𑄨𑄝𑄬𑄖𑄴𑄖𑄬𑄭 𑄛𑄮𑄖𑄳𑄠𑄬 𑄆𑄇𑄴𑄇𑄚𑄴 𑄑𑄬𑄟𑄴𑄛𑄮 𑄆𑄏𑄬 𑄇𑄧𑄢𑄬𑄋𑄖𑄪𑄣𑄨 𑄝𑄎𑄢𑄧𑄖𑄴𑄪𑄚𑄴𑅁 𑄥𑄬 𑄑𑄬𑄟𑄴𑄛𑄮𑄠𑄚𑄴 𑄦𑄢𑄬𑄣𑄬 𑄢𑄋𑄟𑄖𑄳𑄠 𑄝𑄨𑄢𑄧𑄖𑄨𑄦𑄩𑄚𑄴 𑄝𑄮𑄑𑄴 𑄖𑄇𑄴 𑄚𑄧 𑄛𑄠𑄴𑅁 𑄣𑄮𑄇𑄣𑄴 𑄝𑄮𑄘𑄬 𑄡 𑄛𑄧𑄢𑄬𑅁 𑄣𑄮𑄇𑄣𑄴 𑄝𑄮𑄘𑄬 𑄉𑄬𑄣𑄬 𑄢𑄋𑄟𑄖𑄳𑄠𑄖𑄴 𑄣𑄧𑄋𑄧𑄘𑄬𑄉𑄱𑄰 𑄘𑄬𑄢𑄨 𑄦𑄧𑄠𑄴𑅁 𑄄𑄠𑄮𑄖𑄴 𑄞𑄨𑄢𑄠𑄴, 𑄦𑄪𑄝𑄮𑄖𑄴 𑄞𑄨𑄢𑄠𑄴𑅁 𑄛𑄮𑄏𑄝𑄨𑄢𑄬 𑄝𑄬𑄇𑄴𑄇𑄚𑄨 𑄝𑄬𑄉𑄧𑄖𑄴 𑄞𑄧𑄢𑄬 𑄢𑄊𑄬𑄭𑄠𑄬 𑄃𑄉𑄬𑄞𑄉𑄬𑅁 𑄞𑄖𑄴 𑄈𑄬𑄭–𑄈𑄭 𑄚𑄨𑄟𑄮𑄚𑄧 𑄖 𑄟𑄣𑄱𑄰, 𑄝𑄛𑄴𑄛𑄱𑄰 𑄚𑄬𑄉𑄬–𑄟𑄮𑄉𑄬 𑄦𑄘 𑄙𑄧𑄣𑄳𑄠𑄇𑄴𑅁 𑄚𑄨𑄟𑄮𑄚𑄬 𑄛𑄨𑄎𑄬 𑄛𑄧𑄢𑄨 𑄃𑄊𑄬𑅁 𑄚𑄨𑄟𑄮𑄚𑄧𑄢𑄴 𑄝𑄬𑄉𑄴 𑄃 𑄖𑄮𑄚𑄴–𑄛𑄖𑄴𑄖𑄚𑄨 𑄚𑄨𑄟𑄮𑄚𑄧 𑄝𑄝𑄬 𑄣𑄱𑄰𑄠𑄬𑅁 𑄚𑄨𑄟𑄮𑄚𑄧𑄖𑄴𑄪𑄚𑄴 𑄝𑄚𑄳𑄦 𑄅𑄇𑄴𑄮 𑄌𑄨𑄉𑄮𑄚𑄴 𑄝𑄬𑄉𑄴𑅁 𑄚𑄨𑄟𑄮𑄚𑄬 𑄊𑄧𑄢𑄧𑄖𑄴𑄪𑄚𑄴 𑄚𑄳𑄦𑄨𑄉𑄧𑄣𑄧𑄘𑄬 𑄟𑄧𑄚𑄬 𑄟𑄧𑄚𑄬 𑄞𑄝𑄨 𑄌𑄬𑄭 𑄇𑄧𑄣𑄧, 𑄄𑄙𑄪 𑄃 𑄇𑄧𑄟𑄧𑄣𑄬 𑄆𑄭 𑄛𑄢𑄧𑄁! 𑄚𑄇𑄴𑄧𑄝𑄨 𑄇𑄨 𑄟𑄬 𑄝𑄌𑄴𑄍𑄬 𑄗𑄬𑄝𑄧𑅃 𑄢𑄋𑄟𑄖𑄳𑄠𑄖𑄴 𑄡𑄬𑄝𑄢𑄴 𑄟𑄧𑄚𑄬 𑄚𑄧 𑄇𑄧𑄢𑄴 𑄖𑄖𑄴𑄪𑄚𑄴𑅁 𑄖 𑄟𑄣𑄱𑄰 𑄖 𑄝𑄝𑄬 𑄆𑄘𑄧𑄇𑄴𑄈𑄧𑄚𑄴 𑄞𑄪𑄭–𑄃𑄮 𑄟𑄖𑄴𑄮 𑄜𑄬𑄣𑄬𑄭 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄣𑄪𑄋𑄴𑄧𑄚𑄴𑄘𑄱𑄰𑄛𑄢 𑄛𑄁𑅁 𑄇𑄨 𑄃𑄢𑄴 𑄉𑄧𑄢𑄨𑄝𑄧! 𑄡 𑄘𑄧 𑄛𑄧𑄢𑄨𑄝𑄮𑅁 𑄄𑄠𑄬𑄚𑄴 𑄞𑄝𑄨 𑄚𑄨𑄟𑄮𑄚𑄬 𑄟𑄧𑄚𑄴𑄟𑄌𑄳𑄠 𑄉𑄧𑄢𑄨 𑄦𑄘 𑄙𑄧𑄣𑄳𑄠𑄧𑅁 𑄡𑄘𑄬 𑄡𑄘𑄬 𑄖𑄬–𑄃𑄮 𑄜𑄨𑄖𑄴𑄖𑄨𑄛𑄢𑄧𑄖𑄴 𑄣𑄪𑄋𑄳𑄠𑄬𑄉𑄱𑄰𑅁 𑄜𑄨𑄖𑄴𑄖𑄨𑄛𑄢𑄴 𑄣𑄪𑄋𑄨 𑄖𑄢 𑄝𑄧𑄏𑄧𑄚𑄴𑄘𑄬 𑄎𑄉𑄚𑄨 𑄘𑄬𑄊𑄨 𑄌𑄮𑄊𑄮𑄖𑄴 𑄞𑄎𑄨 𑄅𑄙𑄬𑄢𑄴 𑄖 𑄥𑄧𑄟𑄌𑄳𑄠𑄉𑄪𑄚𑄧𑄢𑄬𑅁 𑄞𑄝𑄬𑄢𑄴 𑄆𑄭 𑄜𑄨𑄖𑄴𑄖𑄨𑄛𑄢𑄧𑄖𑄴 𑄃 𑄇𑄧𑄟𑄧𑄣𑄬 𑄝𑄧𑄏𑄨 𑄉𑄧𑄛𑄴 𑄘𑄨 𑄛𑄢𑄨𑅁 𑄜𑄨𑄖𑄴𑄖𑄨𑄛𑄢𑄚𑄨 𑄢𑄨𑄚𑄨 𑄌𑄠𑄴 𑄃 𑄈𑄪𑄌𑄴 𑄝𑄢𑄠𑄴 𑄚𑄨𑄟𑄮𑄚𑄬𑅁 𑄜𑄨𑄖𑄴𑄖𑄨 𑄛𑄢𑄬 𑄛𑄢𑄬 𑄝𑄢𑄧𑄝𑄨𑄚𑄴𑄘𑄪 𑄊𑄘𑄧 𑄛𑄧𑄖𑄴𑄗𑄚𑄴 𑄡𑄨𑄠𑄬𑅁 𑄃𑄉𑄬 𑄄𑄚𑄴𑄘𑄨 𑄛𑄧𑄗𑄴 𑄆𑄣𑄧 𑄚𑄬, 𑄚𑄧 𑄆𑄣𑄧 𑄇𑄨𑄎𑄬𑄚𑄨𑅁 𑄇𑄨𑄖𑄴𑄖𑄬𑄭 𑄇𑄧𑄣𑄬 𑄞𑄣𑄧𑄇𑄴 𑄝𑄧𑄏𑄧𑄢𑄴 𑄃𑄉𑄬 𑄆 𑄛𑄨𑄖𑄴𑄖𑄨𑄝𑄮 𑄚𑄧 𑄆𑄣𑄧𑅁 𑄄𑄚𑄴𑄘𑄨 𑄆𑄣𑄧𑄘𑄬 𑄇𑄎𑄧𑄣𑄧𑄋𑄚𑄴𑅁 𑄈𑄣𑄨𑄇𑄴 𑄇𑄎𑄧𑄣𑄧𑄋𑄚𑄴 𑄛𑄢𑄴 𑄞𑄋𑄧𑄘𑄬 𑄞𑄋𑄧𑄘𑄬 𑄚𑄣𑄴𑄮 𑄚𑄘 𑄡𑄬𑄭 𑄄𑄝𑄬 𑄜𑄨𑄖𑄴𑄖𑄨𑄦𑄱𑄰𑄠𑄬𑅁 𑄚𑄨𑄟𑄮𑄚𑄧 𑄟𑄣𑄱𑄰 𑄖 𑄝𑄝𑄬 𑄝𑄢𑄧𑄝𑄨𑄚𑄴𑄘𑄪 𑄊𑄘𑄧𑄖𑄴 𑄣𑄪𑄋𑄨 𑄝𑄧𑄏𑄨 𑄃𑄊𑄧𑄚𑄴𑅁 𑄝𑄬𑄇𑄴𑄪𑄚𑄴 𑄆𑄇𑄴 𑄇𑄨𑄖𑄴𑄖𑄬𑄭 𑄗𑄱𑄰𑄠𑄮𑄚𑄴𑅁 𑄚𑄨𑄟𑄮𑄚𑄧 𑄝𑄝𑄬 𑄇𑄧𑄣𑄧, 𑄚𑄨𑄟𑄮𑄚𑄬 𑄇𑄧𑄇𑄴𑄬 𑄆𑄝𑄧𑅁 𑄝𑄮𑄖𑄴𑄑𑄚𑄴 𑄜𑄬𑄣𑄬𑄭 𑄉𑄬𑄣𑄬 𑄖𑄬𑅁

𑄚𑄨𑄟𑄮𑄚𑄧 𑄟 𑄇𑄧𑄣𑄧, 𑄈𑄇𑄴𑄬 𑄣𑄪𑄋𑄨𑄝𑄮𑄉𑄨𑅁

𑄚𑄬𑄉𑄧–𑄟𑄮𑄉𑄧𑄢𑄴 𑄇𑄧𑄙 𑄗𑄪𑄟𑄴 𑄦𑄧𑄘𑄬 𑄚𑄧 𑄦𑄧𑄘𑄬 𑄚𑄨𑄟𑄮𑄚𑄬 𑄣𑄪𑄋𑄨𑄣𑄮𑄉𑄨𑅁 𑄚𑄨𑄟𑄮𑄚𑄧 𑄟 𑄇𑄧𑄣𑄧, 𑄃𑄱𑄰 𑄘𑄧 𑄣𑄪𑄋𑄳𑄠𑄬𑄉𑄨𑅁

𑄅𑄉𑄪𑄢𑄬𑄘𑄨 𑄑𑄬𑄟𑄴𑄛𑄮 𑄢𑄧 𑄥𑄪𑄚𑄨 𑄚𑄨𑄟𑄮𑄚𑄬 𑄇𑄧𑄣𑄧, 𑄝𑄮𑄖𑄴𑄑𑄚𑄴 𑄆𑄏𑄬𑄢𑄴 𑄛𑄢 𑄛𑄁𑅁 𑄢𑄧 𑄥𑄪𑄚𑄧𑄋𑄧𑄢𑄴𑅁

𑄝𑄢𑄧𑄝𑄨𑄚𑄴𑄘𑄪 𑄊𑄘𑄧 𑄅𑄉𑄪𑄢𑄬𑄘𑄨 𑄙𑄪𑄣𑄳𑄠𑄌𑄧𑄢𑄧𑄖𑄴 𑄅𑄇𑄴𑄮 𑄥𑄬𑄟𑄬𑄭𑄜𑄪𑄣𑄧 𑄉𑄍𑄴 𑄃𑄊𑄬𑅁 𑄞𑄣𑄧𑄇𑄴 𑄝𑄧𑄏𑄧𑄢𑄴 𑄃𑄉𑄬𑄘𑄨 𑄥𑄬𑄟𑄬𑄭 𑄉𑄌𑄴𑄍𑄪 𑄏𑄪𑄝𑄪𑄢𑄴 𑄆𑄣𑄧𑅁 𑄥𑄬𑄟𑄬𑄭𑄜𑄪𑄣𑄴 𑄜𑄪𑄘𑄨𑄣𑄬 𑄘𑄫𑄢𑄧𑄖𑄴𑄪𑄚𑄴 𑄢𑄋 𑄉𑄧𑄢𑄨 𑄘𑄬𑄊 𑄡𑄬𑄘𑄧𑅁 𑄃 𑄟𑄧𑄚, 𑄌𑄧𑄚, 𑄝𑄪𑄢𑄮𑄚𑄨, 𑄎𑄮𑄢𑄴𑄝𑄮 𑄛𑄬𑄈𑄴 𑄥𑄪𑄟𑄪𑄖𑄴𑄮 𑄥𑄧𑄠𑄴–𑄥𑄉𑄧𑄌𑄳𑄠 𑄛𑄬𑄈𑄴 𑄆𑄇𑄴𑄪𑄎𑄚𑄴 𑄗𑄬𑄘𑄇𑄴𑅁 𑄥𑄬𑄟𑄬𑄭𑄉𑄪𑄣𑄧 𑄙𑄧𑄢𑄨 𑄡𑄧𑄇𑄴𑄬 𑄛𑄉𑄨 𑄛𑄉𑄨 𑄖𑄪𑄣𑄮 𑄜𑄪𑄘𑄨 𑄡𑄬𑄝𑄧 𑄥𑄧𑄇𑄴𑄬 𑄜𑄪𑄖𑄳𑄠 𑄖𑄪𑄣𑄮𑄚𑄨 𑄙𑄪𑄛𑄴 𑄟𑄬𑄊𑄧 𑄣𑄧𑄊𑄬 𑄅𑄢𑄨 𑄡𑄬𑄘𑄧𑅁 𑄌𑄘𑄬 𑄉𑄧𑄟𑄴 𑄣𑄇𑄴𑄴𑄧𑅁 𑄉𑄬𑄁𑄈𑄪𑄣𑄨𑄉𑄪𑄚𑄬 𑄉𑄬𑄭𑄠𑄮𑄚𑄴, 𑄝𑄪𑄠𑄬𑄢𑄬 𑄅𑄢𑄬 𑄚𑄨𑄣𑄧 𑄥𑄬𑄟𑄬𑄭𑄜𑄪𑄣𑄴, 𑄞𑄧𑄋𑄨 𑄛𑄧𑄢𑄨𑄟𑄴𑄝𑄱𑄰 𑄟𑄪𑄭 𑄌𑄬𑄋𑄬 𑄇𑄪𑄣𑄴𑅁 𑄜𑄪𑄖𑄳𑄠 𑄥𑄬𑄟𑄬𑄭𑄖𑄪𑄣𑄮𑄚𑄨 𑄌𑄬𑄋𑄬 𑄇𑄪𑄣𑄧𑄖𑄴 𑄡𑄠𑄴 𑄚𑄬, 𑄇𑄪𑄙𑄪 𑄡𑄠𑄴 𑄇𑄧𑄚𑄴𑄚 𑄇𑄱𑄰 𑄛𑄢𑄬𑅁 𑄈𑄣𑄨𑄇𑄴 𑄄𑄇𑄴𑄬 𑄥𑄬𑄟𑄬𑄭 𑄉𑄌𑄴𑄍𑄮 𑄃𑄉𑄧 𑄙𑄧𑄇𑄳𑄠𑄬𑄚𑄴 𑄏𑄪𑄝𑄪𑄢𑄴 𑄚𑄬𑄭𑅁 𑄝𑄧𑄢𑄴 𑄝𑄪𑄠𑄬𑄢𑄬 𑄥𑄬𑄟𑄬𑄭 𑄉𑄏𑄧 𑄙𑄬𑄣𑄉𑄪𑄚𑄴 𑄞𑄋𑄨 𑄚𑄬𑄡𑄬𑄠𑄳𑄠𑄬𑅁 𑄘𑄧𑄣 𑄉𑄧𑄢𑄨 𑄥𑄬𑄟𑄬𑄭𑄜𑄪𑄣𑄴 𑄚𑄧 𑄜𑄪𑄘𑄧𑄚𑄴𑅁 𑄛𑄬𑄈𑄴 𑄚𑄧 𑄛𑄧𑄢𑄧𑄚𑄴 𑄃𑄉𑄧 𑄙𑄧𑄇𑄳𑄠𑄬𑄚𑄴𑅁 𑄝𑄚𑄳𑄦 𑄘𑄨𑄝𑄬–𑄅𑄇𑄴𑄮 𑄥𑄬𑄘𑄴𑄙𑄧𑄝, 𑄚𑄙𑄨𑄁𑄇𑄪𑄖𑄴𑄖𑄨 𑄃 𑄟𑄳𑄦𑄢𑄋 𑄛𑄧𑄢𑄧𑄚𑄴𑅁 𑄦𑄧𑄣𑄬 𑄥𑄬𑄟𑄬𑄭 𑄉𑄌𑄴𑄍𑄱𑄰 𑄚𑄧 𑄗𑄬𑄝𑄧𑅁 𑄇𑄧𑄚𑄧 𑄆𑄇𑄴𑄇𑄣𑄬 𑄇𑄎𑄧𑄣𑄧𑄁 𑄛𑄚𑄨𑄠𑄚𑄬 𑄟𑄳𑄦𑄬𑄢𑄬 𑄚𑄨𑄄 𑄞𑄎𑄬𑄭 𑄚𑄨𑄝𑄧𑅁 𑄝𑄚𑄳𑄦 𑄗𑄬𑄝𑄧 𑄙𑄪𑄣𑄳𑄠𑄌𑄧𑄢𑄴 𑄃 𑄛𑄚𑄨𑄚𑄣𑄴𑅁 

𑄑𑄬𑄟𑄴𑄛𑄮𑄠𑄚𑄴 𑄆𑄭 𑄞𑄨𑄢𑄬𑄣𑄧𑅁 𑄚𑄨𑄟𑄮𑄚𑄴𑄘𑄊𑄨 𑄑𑄬𑄟𑄴𑄛𑄮𑄖𑄴 𑄅𑄙𑄨𑄣𑄬𑄇𑄴𑅁 𑄖𑄢 𑄥𑄧𑄟𑄢𑄬 𑄃 𑄇𑄧𑄠𑄬𑄇𑄴𑄎𑄧𑄚𑄴 𑄅𑄙𑄨𑄣𑄬𑄇𑄴𑅁 𑄚𑄨𑄟𑄮𑄚𑄬 𑄞𑄨𑄘𑄨𑄢𑄬 𑄚𑄧 𑄝𑄧𑄏𑄨 𑄑𑄬𑄟𑄴𑄛𑄮𑄖𑄴 𑄇𑄏𑄖𑄴 𑄝𑄧𑄌𑄳𑄠𑅁 𑄛𑄧𑄖𑄴𑄖𑄨𑄝𑄢𑄧𑄖𑄴 𑄇𑄧𑄣𑄬𑄎𑄧𑄖𑄴 𑄉𑄬𑄣𑄬 𑄑𑄬𑄟𑄴𑄛𑄮 𑄇𑄎𑄖𑄴 𑄝𑄧𑄏𑄬𑅁 𑄃 𑄚𑄧 𑄦𑄧𑄣𑄬 𑄑𑄬𑄟𑄴𑄛𑄮 𑄌𑄣𑄧𑄖𑄴 𑄅𑄙𑄬𑅁 𑄃𑄘𑄟𑄳𑄠 𑄟𑄚𑄪𑄌𑄴 𑄇𑄧𑄠𑄬𑄇𑄴𑄎𑄧𑄚𑄴 𑄣𑄊𑄧𑄖𑄴 𑄛𑄬𑄣𑄬–𑄃𑄮 𑄖 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄚𑄧 𑄛𑄬𑄣𑄧 𑄚𑄨𑄟𑄮𑄚𑄬𑅁 𑄚𑄨𑄟𑄮𑄚𑄬 𑄇𑄧𑄙 𑄚𑄧 𑄇𑄱𑄰𑄠𑄬 𑄝𑄘𑄬 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴 𑄣𑄪𑄋𑄨𑄣𑄮𑄉𑄱𑄰𑅁 𑄝𑄨𑄢𑄧𑄖𑄨𑄦𑄩𑄚𑄴 𑄝𑄮𑄘𑄮𑄖𑄴 𑄅𑄙𑄨 𑄆𑄇𑄴 𑄇𑄨𑄖𑄳𑄠𑄬𑄚𑄴𑄘𑄨 𑄝𑄧𑄣𑄇𑄴𑅁 𑄚𑄨𑄟𑄮𑄚𑄧 𑄝𑄝𑄬 𑄇𑄮 𑄙𑄧𑄣𑄳𑄠𑄧 𑄚𑄨𑄟𑄮𑄚𑄴, 𑄖𑄧 𑄟𑄟𑄪𑄘𑄊𑄨𑄙𑄪 𑄡𑄬𑄙𑄧𑄇𑄴 𑄘𑄨𑄚𑄴 𑄗𑄌𑄴, 𑄚𑄧 𑄇𑄱𑄰𑄠𑄬 𑄝𑄘𑄬 𑄇𑄧𑄚𑄧 𑄇𑄨𑄖𑄳𑄠𑄬𑄖𑄴 𑄚𑄧 𑄡𑄬𑄝𑄬𑅁 𑄖𑄢 𑄇𑄧𑄙 𑄙𑄧𑄢𑄨𑄝𑄬𑅁 𑄚𑄨𑄟𑄮𑄚𑄬 𑄝𑄚𑄳𑄦 𑄖 𑄝𑄝𑄧 𑄟𑄪–𑄃𑄮 𑄇𑄨𑄖𑄳𑄠𑄬𑄚𑄴𑄘𑄨 𑄌𑄬𑄣𑄧𑅁 𑄖 𑄝𑄝𑄬 𑄃𑄢𑄧 𑄇𑄧𑄣𑄧, 𑄆𑄇𑄴𑄪𑄎𑄚𑄴 𑄦𑄨𑄘𑄮𑄖𑄴 𑄢𑄊𑄬𑄝𑄬, 𑄖𑄧𑄖𑄴𑄪𑄚𑄴 𑄉𑄧𑄟𑄴 𑄢𑄬𑄎𑄣𑄴𑄑𑄴 𑄉𑄧𑄢 𑄛𑄧𑄢𑄨𑄝𑄮𑅁 𑄃𑄧𑄚𑄢𑄴𑄥𑄴 𑄛𑄥𑄴 𑄉𑄧𑄢 𑄛𑄧𑄢𑄨𑄝𑄮𑅁 𑄌𑄨𑄉𑄮𑄚𑄧𑄖𑄴𑄪𑄚𑄴 𑄙𑄧𑄢𑄨 𑄖𑄪𑄭 𑄉𑄧𑄟𑄴 𑄢𑄬𑄎𑄣𑄴𑄑𑄴 𑄉𑄧𑄢𑄨 𑄆𑄏𑄧𑄢𑄴𑅁 𑄥𑄨𑄠𑄬𑄚𑄴 𑄖𑄧𑄖𑄴𑄪𑄚𑄴 𑄙𑄧𑄢𑄨 𑄢𑄊 𑄛𑄧𑄢𑄨𑄝𑄮𑅁 𑄖𑄬𑄋 𑄛𑄧𑄠𑄴𑄎𑄬 𑄣𑄉𑄨𑄣𑄬 𑄌𑄨𑄙𑄨 𑄛𑄙𑄬𑄝𑄬𑅁 𑄖𑄬𑄋 𑄌𑄨𑄘𑄬 𑄚𑄧 𑄉𑄧𑄢𑄨𑄌𑄴𑅁 𑄟𑄪𑄭 𑄡𑄬𑄭 𑄚𑄧 𑄛𑄣𑄴𑄬–𑄃𑄮 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄖𑄧 𑄟𑄠𑄴 𑄡𑄬𑄝𑄧𑅁 𑄖𑄧 𑄝𑄬𑄭𑄢𑄬 𑄛𑄙𑄬𑄭 𑄘𑄨𑄟𑄴𑅁

𑄚𑄨𑄟𑄮𑄚𑄧𑄘𑄊𑄨 𑄞𑄢𑄨 𑄟𑄳𑄦𑄎𑄧𑄚𑄴 𑄚𑄧𑄠𑄴𑅁 𑄞𑄪𑄭 𑄇𑄧𑄟𑄴𑅁 𑄚𑄨𑄟𑄮𑄚𑄧 𑄝𑄝𑄬 𑄞𑄪𑄭 𑄞𑄉𑄧𑄖𑄴 𑄇𑄧𑄟𑄴 𑄛𑄬𑄠𑄳𑄠𑄬𑅁 𑄚𑄨𑄟𑄮𑄚𑄧 𑄃𑄎𑄪 𑄇𑄛𑄴𑄖𑄬 𑄉𑄧𑄙𑄦𑄱𑄰 𑄢𑄫𑄛𑄧𑄇𑄢𑄩 𑄆𑄭𑄚𑄬 𑄡𑄬𑄖𑄴𑄧𑄟𑄚𑄴 𑄞𑄪𑄭 𑄛𑄬𑄠𑄳𑄠𑄬, 𑄥𑄬 𑄞𑄪𑄭𑄠𑄚𑄴 𑄍𑄧 𑄞𑄬𑄭𑄠𑄮𑄢𑄬 𑄞𑄉𑄴 𑄉𑄧𑄢𑄨 𑄘𑄬𑄘𑄬 𑄚𑄨𑄟𑄮𑄚𑄧 𑄝𑄝𑄧𑄢𑄴 𑄞𑄉𑄧𑄖𑄴 𑄇𑄧𑄟𑄴 𑄛𑄧𑄌𑄳𑄠𑅁 𑄝𑄉 𑄞𑄪𑄭 𑄉𑄧𑄢𑄬 𑄚𑄨𑄟𑄮𑄚𑄧 𑄝𑄝𑄬𑅁 𑄝𑄉 𑄞𑄪𑄭 𑄉𑄧𑄢𑄧𑄚𑄴 𑄇𑄨𑄚𑄬𑄖𑄴𑄖𑄬𑄭 𑄖𑄪𑄠𑄮 𑄖𑄢 𑄆 𑄝𑄘𑄬–𑄃𑄮 𑄞𑄘𑄬 𑄣𑄊𑄧𑄖𑄴 𑄛𑄚𑄴𑄘𑄰𑄱𑅁 𑄝𑄎𑄢𑄴 𑄈𑄬𑄝𑄢𑄴 𑄖𑄬𑄋 𑄇𑄟𑄠𑄴 𑄚𑄨𑄟𑄮𑄚𑄧 𑄝𑄝𑄬𑅁 𑄙𑄚𑄴–𑄌𑄮𑄣𑄴 𑄝𑄬𑄎 𑄚𑄧 𑄛𑄧𑄢𑄬𑅁 𑄙𑄚𑄴–𑄌𑄮𑄣𑄴 𑄝𑄬𑄎𑄨 𑄛𑄬𑄙𑄧 𑄦𑄧𑄣𑄬 𑄝𑄧𑄏𑄧𑄢𑄧 𑄞𑄘𑄬 𑄚𑄧 𑄛𑄢𑄨𑄣𑄇𑄴𑄪𑄚𑄴𑄘𑄱𑄰𑄛𑄢 𑄛𑄁𑅁 𑄚𑄨𑄟𑄮𑄚𑄧 𑄝𑄝𑄬 𑄦𑄝𑄨𑄣𑄬𑄌𑄴 𑄉𑄧𑄢𑄨 𑄇𑄧𑄣𑄧, 𑄟𑄧𑄢𑄴–𑄃𑄮 𑄞𑄢𑄨 𑄃𑄏 𑄆𑄣𑄧, 𑄇𑄧𑄣𑄬𑄎𑄧𑄖𑄴 𑄛𑄧𑄢𑄳𑄦𑄨𑄝𑄬𑄢𑄴𑅁 𑄛𑄧𑄢𑄳𑄦𑄨 𑄚𑄧 𑄛𑄬𑄣𑄪𑄁𑅁 𑄥𑄧𑄇𑄴𑄬 𑄄𑄙𑄪 𑄇𑄧𑄣𑄬𑄎𑄴 𑄚𑄧 𑄆𑄣𑄧𑅁 𑄝𑄚𑄳𑄦 𑄆𑄣𑄧 𑄢𑄋𑄟𑄖𑄳𑄠 𑄇𑄧𑄣𑄬𑄌𑄴𑄍𑄚𑄴𑅁 𑄃𑄢𑄴𑄟𑄨 𑄇𑄬𑄟𑄴𑄛𑄴 𑄚𑄧 𑄆𑄣𑄧𑅁 𑄃𑄢𑄴𑄟𑄨 𑄆𑄣𑄬 𑄘𑄨𑄚𑄴 𑄗𑄨𑄉𑄬 𑄉𑄪𑄛𑄴–𑄉𑄪𑄛𑄳𑄠𑄬 𑄏𑄢𑄧𑄖𑄴 𑄙𑄬𑄭 𑄡𑄬𑄭 𑄗𑄬𑄭 𑄛𑄬𑄭𑄠𑄰𑄱𑅁 𑄇𑄪𑄙𑄪 𑄃𑄢𑄴 𑄣𑄬𑄊𑄛𑄧𑄢𑄳𑄦! 𑄖𑄧 𑄝𑄬𑄭 𑄘𑄧 𑄟𑄬𑄑𑄳𑄢𑄨𑄇𑄴 𑄛𑄥𑄴 𑄉𑄧𑄢𑄨 𑄣𑄬𑄊 𑄥𑄨𑄊 𑄦𑄬𑄝 𑄘𑄨𑄠𑄬𑅁 𑄖𑄬 𑄡𑄪𑄚𑄨 𑄛𑄧𑄖𑄴𑄴𑄗𑄧, 𑄖𑄢𑄬–𑄃𑄮 𑄛𑄧𑄢𑄳𑄦𑄬𑄣𑄪𑄋𑄪𑄚𑄴𑅁

𑄚𑄨𑄟𑄮𑄚𑄬 𑄇𑄨𑄌𑄴𑄪 𑄚𑄧 𑄇𑄱𑄰 𑄖 𑄝𑄝𑄧 𑄇𑄧𑄙 𑄌𑄪𑄛𑄴 𑄉𑄧𑄢𑄨 𑄥𑄪𑄚𑄨 𑄃𑄊𑄬𑅁 𑄖 𑄟 𑄄𑄚𑄴𑄘𑄨–𑄅𑄚𑄴𑄘𑄨 𑄢𑄨𑄚𑄨 𑄌𑄢𑄴𑅁 𑄚𑄨𑄟𑄮𑄚𑄬 𑄟𑄧𑄚𑄬 𑄟𑄧𑄚𑄬 𑄇𑄧𑄣𑄧, 𑄝, 𑄖𑄧 𑄃𑄏 𑄟𑄪𑄭 𑄛𑄪𑄢𑄬 𑄚𑄧 𑄘𑄨𑄣𑄬 𑄇𑄧𑄚𑄴𑄚 𑄘𑄨𑄘𑄮𑅁

𑄚𑄨𑄟𑄮𑄚𑄧 𑄝𑄝𑄬 𑄃 𑄇𑄧𑄣𑄧, 𑄑𑄅𑄚𑄧𑄖𑄴 𑄥𑄨𑄠𑄬 𑄥𑄧𑄠𑄴–𑄥𑄉𑄧𑄌𑄳𑄠 𑄉𑄧𑄟𑄴–𑄝𑄧𑄎𑄧𑄁 𑄟𑄚𑄪𑄌𑄴 𑄗𑄚𑄴𑅁 𑄇𑄨𑄠𑄬 𑄇𑄨𑄠𑄬 𑄇𑄧𑄣𑄬𑄎𑄴 𑄛𑄇𑄴 𑄟𑄢𑄨 𑄝𑄎𑄢𑄧𑄖𑄴 𑄝𑄬𑄢𑄚𑄴𑄘𑄰𑄱𑅁 𑄝𑄬𑄢𑄬𑄭 𑄝𑄬𑄢𑄬𑄭 𑄗𑄚𑄴𑅁 𑄦𑄬𑄢𑄮𑄄𑄚𑄴 𑄈𑄚𑄴𑅁 𑄝𑄧𑄎𑄧𑄁 𑄥𑄧𑄟𑄌𑄳𑄠𑄉𑄪𑄚𑄧 𑄣𑄧𑄊𑄬 𑄚𑄧 𑄟𑄨𑄏𑄨𑄝𑄬𑅁 𑄉𑄧𑄟𑄴 𑄛𑄮 𑄃𑄊𑄧𑄚𑄴𑅁 𑄡𑄨𑄉𑄪𑄚𑄴 𑄚𑄨𑄎𑄧𑄢𑄬 𑄚𑄨𑄚𑄬𑄭 𑄞𑄝𑄧𑄚𑄴, 𑄞𑄝𑄧𑄚𑄴 𑄟–𑄝𑄛𑄴 𑄚𑄨𑄚𑄬𑄭𑅁 𑄉𑄧𑄟𑄴 𑄛𑄮 𑄣𑄧𑄊𑄬 𑄟𑄨𑄏𑄨𑄝𑄬𑅁 𑄈𑄬𑄝𑄢𑄴 𑄃𑄧𑄇𑄴𑄖𑄧𑄖𑄴 𑄈𑄬𑄝𑄬𑄉𑄨𑅁 𑄇𑄧𑄣𑄬𑄎𑄧 𑄃𑄧𑄇𑄴𑄖𑄧𑄖𑄴 𑄇𑄧𑄣𑄬𑄎𑄧𑄖𑄴 𑄡𑄬𑄝𑄬𑅁 𑄊𑄪𑄟𑄮 𑄃𑄧𑄇𑄴𑄖𑄧𑄖𑄴 𑄊𑄪𑄟𑄴 𑄡𑄬𑄝𑄬𑅁 𑄚𑄨𑄟𑄮𑄚𑄧 𑄝𑄝𑄬 𑄇𑄧𑄙 𑄇𑄧𑄙𑄬 𑄥𑄧𑄣𑄖𑄴 𑄅𑄇𑄴𑄮 𑄉𑄝𑄪𑄌𑄳𑄠𑄬 𑄛𑄮 𑄝𑄮𑄘𑄮𑄖𑄴 𑄅𑄙𑄨𑄣𑄮𑄉𑄨𑅁 𑄌𑄮𑄈𑄴𑄥𑄧𑄟 𑄣𑄉𑄬𑄠𑄳𑄠𑄬𑅁 𑄎𑄪𑄘–𑄟𑄪𑄉𑄪𑄎𑄰𑄱 𑄜𑄨𑄖𑄴–𑄜𑄖𑄴𑅁 𑄟𑄧𑄚𑄬 𑄇𑄧𑄠𑄴 𑄖𑄬–𑄃𑄮 𑄇𑄧𑄣𑄬𑄎𑄧𑄖𑄴 𑄛𑄧𑄢𑄳𑄦𑄬𑅁 𑄝𑄮𑄑𑄴 𑄞𑄧𑄢𑄧𑄚𑄴 𑄟𑄚𑄪𑄌𑄴𑅁 𑄖𑄬 𑄝𑄧𑄏𑄨𑄝𑄢𑄴 𑄎𑄉 𑄚𑄧 𑄛𑄢𑄴𑅁 𑄆𑄚𑄬–𑄃𑄮 𑄥𑄢𑄋𑄬 𑄦𑄧𑄢𑄴𑄚𑄴 𑄝𑄎𑄬𑄣𑄧 𑄛𑄧𑄋𑄧𑄖𑄴 𑄛𑄧𑄑𑄴𑄛𑄧𑄑𑄴𑅁 𑄚𑄨𑄟𑄮𑄚𑄧 𑄝𑄝𑄧 𑄙𑄉𑄬𑄘𑄨 𑄆𑄇𑄴𑄇 𑄈𑄮𑄌𑄳𑄠𑄬 𑄆𑄣𑄧𑅁 𑄌𑄮𑄈𑄴𑄥𑄧𑄟 𑄘𑄨𑄠𑄬 𑄛𑄮𑄝𑄱𑄰 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄄𑄠𑄮𑄖𑄴 𑄟𑄚𑄪𑄌𑄴 𑄃𑄊𑄧𑄚𑄴 𑄚𑄇𑄨𑅃

𑄚𑄨𑄟𑄮𑄚𑄬 𑄇𑄧𑄣𑄧, 𑄚𑄬𑄭 𑄘𑄧𑅁 𑄝𑄧𑄏𑄨 𑄛𑄢𑄨𑄝𑄬𑅁

𑄖𑄬 𑄝𑄧𑄏𑄨𑄣𑄧𑅁

𑄚𑄨𑄟𑄮𑄚𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄪𑄙𑄪 𑄡𑄬𑄝𑄬𑅃

𑄢𑄋𑄟𑄖𑄳𑄠𑄖𑄴𑅁 𑄖𑄪𑄭𑅃

𑄟𑄪𑄭–𑄃𑄮 𑄢𑄋𑄟𑄖𑄳𑄠𑄖𑄴𑅁

𑄇𑄨𑄖𑄴𑄖𑄬𑄭𑅃

𑄇𑄧𑄣𑄬𑄎𑄧𑄖𑄴 𑄞𑄧𑄖𑄴𑄖𑄨 𑄦𑄧𑄝𑄖𑄴𑄖𑄬𑄭𑅁

𑄇𑄨, 𑄄𑄚𑄴𑄑𑄢𑄴, 𑄚 𑄝𑄨𑄆 𑅃

𑄚𑄙𑄬𑄭, 𑄃𑄧𑄚𑄢𑄴𑄥𑄴𑅁

𑄟𑄪𑄭 𑄝𑄨𑄆 𑄛𑄧𑄢𑄧𑄁𑅁

𑄃𑄧, 𑄥𑄣𑄬𑄚𑄴 𑄝𑄧𑄢𑄴 𑄞𑄬𑄭𑅁 𑄖𑄬 𑄇𑄪𑄖𑄴𑄪𑄚𑄴 𑄘𑅃

𑄟𑄧𑄙𑄳𑄠𑄧𑄟𑄴 𑄝𑄊𑄬𑄭𑄍𑄧𑄢𑄨𑄖𑄴𑄪𑄚𑄴𑅁 𑄄𑄝𑄬 𑄇𑄧𑄚𑄴𑄚𑅃

𑄟𑄧 𑄝𑄝𑅁 𑄄𑄝𑄬 𑄟𑄧 𑄟𑅁

𑄚𑄧𑄟𑄧𑄌𑄴𑄇𑄢𑄴 𑄟𑄭𑄮𑄏𑄬–𑄟𑄪𑄏𑄨𑅁 𑄖𑄪𑄟𑄨 𑄛𑄢 𑄛𑄁 𑄞𑄬𑄭𑄝𑄮𑄢𑄬 𑄝𑄢𑄬𑄭 𑄘𑄳𑄠 𑄡𑄧𑄖𑄴𑄬𑅃

𑄦𑄧𑄘𑄬𑄭𑅁 𑄟𑄪𑄏𑄨 𑄓𑄉𑄨𑄣𑄬, 𑄉𑄧𑄟𑄬𑄘𑄣𑄬 𑄚𑄧 𑄘𑄧 𑄌𑄨𑄚𑄧𑄋𑄧𑄢𑄴𑅁

𑄟𑄖𑄴𑄪𑄚𑄴 𑄇𑄧𑄚𑄬𑄖𑄴 𑄦𑄧𑄝𑄬 𑄟𑄧𑄚𑄬 𑄉𑄧𑄢𑄨 𑄓𑄉𑄨𑄣𑄪𑄁𑅁

𑄃 𑄖𑄬 𑄞𑄉𑄬𑄚𑄴, 𑄖𑄪𑄭 𑄇𑄪𑄙𑄪 𑄗𑄌𑄴𑅃

𑄟𑄪𑄏𑄨, 𑄟𑄪𑄭 𑄗𑄁𑄉𑄬 𑄘𑄬𑄝𑄥𑄩𑄥𑄴 𑄚𑄧𑄉𑄧𑄢𑄴𑅁

𑄖𑄧 𑄟𑄖𑄴𑄪𑄚𑄴 𑄇𑄧𑄚𑄬𑄖𑄴 𑄦𑄮𑄟𑄴𑄝𑄬 𑄥𑄨𑄠𑄬𑄚𑄴𑄘𑄱𑄰𑄟𑄪𑄏𑄨 𑄓𑄉𑄨𑄣𑄬𑅁 𑄇𑄨 𑄇𑄪𑄘𑄪𑄟𑄴𑄮 𑄦𑄧𑄝𑄧𑄁–𑄃𑄮 𑄅𑄘𑄮 𑄚𑄬𑄭𑅁 

𑄇𑄪𑄘𑄪𑄟𑄚𑄴 𑄒𑄨𑄇𑄴 𑄃𑄊𑄬, 𑄒𑄨𑄇𑄴 𑄃𑄊𑄬𑅁 𑄖𑄧𑄟 𑄢𑄫𑄛𑄧𑄇𑄢𑄩𑄖𑄴𑄪𑄚𑄴 𑄃𑄟 𑄇𑄇𑄴𑄨𑄢𑄬 𑄝𑄮 𑄃𑄚𑄳𑄠𑄬𑄭𑅁

𑄇 𑄏𑄨𑅃

𑄝𑄬𑄣 𑄝𑄝𑄧 𑄏𑄨 𑄟𑄏𑄳𑄠𑄁–𑄃𑄮𑅁

𑄃𑄧𑅁 𑄆𑄚𑄬 𑄞𑄢𑄨 𑄇𑄪𑄘𑄪𑄟𑄴𑄮 𑄚𑄧𑄠𑄴𑅁 𑄃𑄘𑄟𑄳𑄠 𑄇𑄪𑄘𑄪𑄟𑄴𑄮𑅁 𑄆𑄚𑄬 𑄝𑄮𑄚𑄴 𑄣𑄉𑄬𑅁

𑄖𑄬 𑄟𑄪𑄏𑄨 𑄇𑄧𑄟𑄧𑄣𑄬 𑄆𑄝𑄉𑄱𑄰𑅃

𑄘𑄨–𑄆𑄇𑄴 𑄘𑄨𑄚𑄴 𑄗𑄬𑄭–𑄗𑄠𑄴 𑄦𑄧𑄝𑄧𑄘𑄬 𑄃𑄭𑅁

𑄞𑄬𑄭𑄝𑄮 𑄚𑄋𑄚𑄴 𑄇𑄨 𑄦𑄧𑄝𑄧𑄘𑄬𑅃

𑄚𑄨𑄟𑄮𑄚𑄴 𑄌𑄋𑄴𑄟𑅁

𑄆𑄝𑄴𑄬𑄢𑄬 𑄛𑄨𑄅𑄢𑄴 𑄌𑄋𑄴𑄟 𑄚𑄁𑅁 𑄆𑄟𑄴𑄝 𑄘𑄮𑄣𑄴 𑄚𑄁 𑄇𑄬𑄚𑄬 𑄛𑄬𑄣 𑄟𑄪𑄏𑄨𑅃

𑄚𑄨𑄟𑄮𑄚𑄧 𑄟𑄝𑄮 𑄦𑄎𑄨 𑄦𑄎𑄨 𑄇𑄧𑄣𑄧, 𑄖 𑄚𑄚𑄪 𑄗𑄱𑄰 𑄘𑄨𑄠𑄬 𑄃𑄭𑅁

𑄖𑄬 𑄞𑄉𑄬𑄚𑄴, 𑄖𑄧𑄢𑄬 𑄇𑄨 𑄚𑄁 𑄓𑄉𑄧𑄚𑄴𑅃

𑄟𑄧 𑄚𑄋𑄚𑄴 𑄃𑄣𑄮𑄝𑄨𑄇𑄥𑄴 𑄈𑄨𑄥𑄬𑅁

𑄚𑄨𑄟𑄮𑄚𑄧 𑄟 𑄃𑄢𑄧 𑄇𑄧𑄣𑄧, 𑄃 𑄞𑄉𑄬𑄚𑄴, 𑄖𑄪𑄭 𑄡𑄧𑄇𑄴𑄬 𑄥𑄨𑄙𑄪 𑄗𑄌𑄴, 𑄃𑄟 𑄚𑄨𑄟𑄮𑄚𑄧𑄢𑄬 𑄆𑄇𑄴𑄇 𑄌𑄬𑄝𑄬𑄘𑄬 𑄃𑄭𑅁 𑄉𑄧𑄟𑄴–𑄝𑄧𑄎𑄧𑄁 𑄆𑄇𑄴𑄇 𑄌𑄮𑄈𑄴 𑄘𑄨𑄌𑄴𑅁 

𑄥𑄨𑄠𑄬𑄚𑄧𑄖𑄳𑄠𑄠𑄴 𑄚𑄧 𑄗𑄬𑄝𑄧 𑄟𑄪𑄏𑄨𑅁 𑄆𑄚𑄬–𑄃𑄮 𑄆𑄇𑄴 𑄎𑄉 𑄟𑄚𑄪𑄌𑄴𑅁

𑄚𑄨𑄟𑄮𑄚𑄧 𑄝𑄝𑄬–𑄃𑄮 𑄇𑄧𑄣𑄧, 𑄚𑄨𑄟𑄮𑄚𑄧𑄢𑄬 𑄌𑄬𑄝𑄖𑄴𑄖𑄬𑄭𑅁 𑄃𑄣𑄮 𑄝𑄨𑄇𑄥𑄴 𑄈𑄨𑄥𑄬𑄣𑄱𑄰 𑄚𑄨𑄟𑄮𑄚𑄬 𑄇𑄧𑄙 𑄇𑄧𑄙𑄬 𑄚𑄨𑄟𑄮𑄚𑄧 𑄝𑄝𑄬 𑄝𑄬𑄌𑄴 𑄇𑄧𑄙 𑄚𑄧 𑄇𑄧𑄠𑄴𑅁

𑄛𑄌𑄴

𑄚𑄨𑄟𑄮𑄚𑄴𑄘𑄱𑄰𑄃𑄣𑄮 𑄝𑄨𑄇𑄥𑄬 𑄇𑄬𑄝𑄨𑄚𑄧𑄖𑄴𑄪𑄚𑄴 𑄝𑄢𑄬𑄚𑄴𑄘𑄨 𑄡𑄬𑄭 𑄇𑄧𑄙 𑄇𑄮 𑄙𑄧𑄣𑄳𑄠𑄇𑄴𑅁 𑄘𑄨𑄎𑄧𑄚𑄬 𑄥𑄧𑄟𑄌𑄳𑄠 𑄦𑄧𑄣𑄇𑄴𑅁 𑄖𑄢 𑄉𑄧𑄛𑄴 𑄘𑄬𑄘𑄬 𑄥𑄧𑄣𑄖𑄴 𑄙𑄇𑄴𑄴 𑄊𑄎𑄨 𑄝𑄮𑄑𑄴𑄑𑄚𑄨 𑄆𑄏𑄬–𑄡𑄠𑄴𑅁 𑄖𑄪𑄝𑄮𑄣𑄴 𑄅𑄙𑄬, 𑄛𑄧𑄢𑄬𑅁 𑄖𑄪𑄝𑄮𑄣𑄚𑄨 𑄇𑄪𑄣𑄧𑄖𑄴 𑄃𑄝𑄧𑄢𑄴 𑄈𑄬𑄭 𑄚𑄨𑄟𑄬𑄭 𑄡𑄠𑄴𑅁 𑄚𑄨𑄟𑄮𑄚𑄬 𑄝𑄧𑄏𑄧𑄢𑄬 𑄇𑄧𑄠𑄬𑄇𑄴𑄝𑄢𑄴 𑄢𑄋𑄟𑄖𑄳𑄠𑄖𑄴 𑄉𑄬𑄣𑄬–𑄃𑄮, 𑄡𑄬𑄙𑄧𑄇𑄴𑄝𑄢𑄴 𑄡𑄬𑄠𑄳𑄠𑄬 𑄥𑄬𑄙𑄧𑄇𑄴𑄝𑄢𑄴 𑄚𑄪𑄠𑄮 𑄣𑄇𑄴𑄈𑄬 𑄎𑄉𑄚𑄨𑅁 𑄘𑄫𑄢𑄴𑄍𑄧𑄢𑄨 𑄝𑄎𑄢𑄴, 𑄟𑄬𑄠𑄮𑄚𑄨 𑄘𑄮𑄢𑄴 𑄝𑄎𑄢𑄴, 𑄣𑄪𑄋𑄪𑄘𑄪 𑄝𑄎𑄢𑄴, 𑄇𑄖𑄴𑄮𑄣𑄨 𑄝𑄎𑄢𑄴, 𑄥𑄪𑄝𑄧𑄣𑄧𑄁 𑄝𑄎𑄢𑄴 𑄃 𑄢𑄋𑄟𑄖𑄳𑄠, 𑄝𑄬𑄇𑄴𑄇𑄚𑄨 𑄃𑄟𑄧𑄣𑄴 𑄘𑄨 𑄌𑄠𑄴𑅁 𑄚𑄨𑄟𑄮𑄚𑄬 𑄢𑄋𑄟𑄖𑄳𑄠𑄖𑄴 𑄡𑄠𑄴𑄘𑄬 𑄞𑄨𑄘𑄨𑄢𑄬𑄘𑄨 𑄆 𑄎𑄉𑄚𑄨, 𑄇𑄎𑄧𑄣𑄧𑄋𑄚𑄴, 𑄝𑄧𑄢𑄴𑄉𑄋𑄚𑄧 𑄙𑄧𑄇𑄴 𑄣𑄧𑄢𑄨 𑄡𑄠𑄴𑅁 𑄇𑄎𑄧𑄣𑄧𑄋𑄚𑄴 𑄆𑄇𑄴 𑄃𑄧𑄇𑄴𑄖𑄧𑄖𑄴 𑄑𑄨𑄛𑄴𑄑𑄨𑄛𑄳𑄠 𑄛𑄚𑄨 𑄦𑄧𑄠𑄴𑅁 𑄃 𑄆𑄇𑄴 𑄃𑄧𑄇𑄴𑄖𑄧𑄖𑄴 𑄛𑄚𑄨 𑄥𑄪𑄉𑄬𑄭 𑄡𑄬𑄭 𑄢𑄋 𑄉𑄧𑄢𑄨 𑄞𑄬𑄘 𑄘𑄮𑄚𑄴 𑄛𑄚𑄨𑄖𑄴 𑄝𑄪𑄢𑄨 𑄗𑄬𑄭𑄠𑄬 𑄟𑄪𑄢𑄮𑄅𑄚𑄴𑅁 𑄢𑄋 𑄟𑄪𑄢𑄮𑄉𑄪𑄚𑄴 𑄃 𑄆𑄇𑄴 𑄃𑄧𑄇𑄴𑄖𑄧𑄖𑄴 𑄦𑄬𑄣𑄴 𑄦𑄬𑄣𑄴 𑄦𑄧𑄚𑄴𑅁 𑄟𑄨𑄣𑄬–𑄟𑄧𑄢𑄧𑄘𑄬 𑄎𑄣 𑄣𑄉𑄚𑄴𑅁 𑄣𑄉𑄬𑄭𑄠𑄬 𑄎𑄣𑄚𑄨 𑄡𑄧𑄇𑄴𑄬 𑄛𑄘 𑄟𑄬𑄣𑄨𑄝𑄮, 𑄙𑄚𑄧𑄉𑄧𑄎 𑄦𑄧𑄝𑄧, 𑄥𑄬𑄇𑄴𑄬 𑄙𑄚𑄧 𑄦𑄬𑄣𑄴 𑄦𑄬𑄣𑄴 𑄛𑄘𑄚𑄨 𑄘𑄧𑄉𑄨𑄚𑄧 𑄝𑄪𑄠𑄬𑄢𑄬 𑄏𑄧𑄛𑄴𑄛𑄖𑄴 𑄏𑄧𑄛𑄴𑄛𑄖𑄴 𑄚𑄎𑄬𑅁 𑄃𑄢𑄧 𑄆𑄛𑄳𑄢𑄨𑄣𑄴 𑄟𑄬 𑄟𑄥𑄴 𑄆𑄣𑄬 𑄙𑄚𑄴 𑄛𑄉𑄨𑄣𑄬 𑄇𑄎𑄧𑄣𑄧𑄁 𑄃 𑄝𑄧𑄢𑄴 𑄉𑄋𑄚𑄴 𑄆𑄙𑄇𑄴–𑄅𑄙𑄇𑄴 𑄞𑄧𑄢𑄨 𑄅𑄙𑄬 𑄥𑄮𑄚 𑄢𑄧𑄋𑄬𑅁 𑄙𑄚𑄚𑄨 𑄛𑄊𑄬 𑄥𑄮𑄚 𑄙𑄧𑄇𑄳𑄠𑄬𑄚𑄴 𑄢𑄧𑄁 𑄉𑄧𑄢𑄨𑅁 𑄆𑄇𑄴 𑄝𑄧𑄏𑄧𑄢𑄬 𑄖𑄨𑄚𑄴–𑄌𑄬𑄢𑄴 𑄛𑄧𑄣𑄴𑄣 𑄙𑄧𑄇𑄴 𑄣𑄧𑄢𑄬 𑄇𑄎𑄧𑄣𑄧𑄁 𑄃 𑄝𑄧𑄢𑄴𑄉𑄋𑄚𑄴𑅁 𑄥𑄬𑄚𑄧𑄖𑄴𑄖𑄬𑄭 𑄚𑄨𑄟𑄮𑄚𑄬 𑄡𑄬𑄙𑄧𑄇𑄴𑄝𑄢𑄴 𑄢𑄋𑄟𑄖𑄳𑄠𑄖𑄴 𑄡𑄠𑄴 𑄥𑄬𑄙𑄧𑄇𑄴𑄝𑄢𑄴 𑄚𑄪𑄠𑄮 𑄛𑄠𑄴 𑄎𑄉𑄚𑄨𑅁 𑄃𑄣𑄮 𑄝𑄨𑄇𑄥𑄬 𑄚𑄨𑄖𑄳𑄠𑄧–𑄛𑄧𑄖𑄴𑄖𑄨 𑄢𑄋𑄟𑄖𑄳𑄠𑄖𑄴𑄪𑄚𑄴 𑄝𑄊𑄬𑄭𑄍𑄧𑄢𑄨 𑄅𑄎𑄮𑄚𑄨–𑄣𑄟𑄮𑄚𑄨 𑄉𑄧𑄢𑄬𑅁 𑄖𑄖𑄴𑄪𑄚𑄴 𑄆 𑄎𑄉𑄚𑄨 𑄚𑄪𑄠𑄮 𑄚𑄧 𑄣𑄉𑄬𑅁 𑄚𑄨𑄖𑄳𑄠𑄧 𑄘𑄬𑄊𑄬 𑄛𑄢 𑄦𑄧𑄠𑄴𑅁 𑄃𑄣𑄮 𑄝𑄨𑄇𑄥𑄬 𑄇𑄧𑄙 𑄇𑄧𑄙𑄬 𑄣𑄧𑄇𑄴𑄬 𑄚𑄨𑄟𑄮𑄚𑄬 𑄇𑄎𑄧𑄣𑄧𑄋𑄧 𑄘𑄨 𑄇𑄪𑄣𑄬𑄘𑄨 𑄢𑄨𑄚𑄨 𑄌𑄠𑄴𑅁 𑄇𑄎𑄧𑄣𑄧𑄋𑄧 𑄛𑄢𑄬 𑄛𑄢𑄬 𑄥𑄧𑄠𑄴–𑄥𑄉𑄧𑄌𑄳𑄠 𑄝𑄧𑄏𑄬𑄘𑄬 𑄎𑄉 𑄌𑄮𑄊𑄮𑄖𑄴 𑄛𑄧𑄣𑄬 𑄚𑄇𑄴𑄧𑄝𑄨𑄢𑄬 𑄦𑄨𑄘𑄮𑄖𑄴 𑄅𑄙𑄬𑅁 𑄃𑄢𑄴 𑄃𑄣𑄮 𑄝𑄨𑄇𑄥𑄬 𑄇𑄧𑄙 𑄇𑄧𑄣𑄬 𑄚𑄇𑄴𑄧𑄝𑄨 𑄓𑄪𑄝𑄨 𑄗𑄠𑄴 𑄚𑄨𑄟𑄮𑄚𑄧 𑄟𑄧𑄚𑄧 𑄞𑄨𑄘𑄨𑄢𑄬𑅁 𑄚𑄨𑄟𑄮𑄚𑄬 𑄖𑄉𑄧𑄖𑄴 𑄉𑄧𑄢𑄨 𑄝𑄮𑄘𑄮 𑄙𑄪𑄟𑄮 𑄚𑄧𑄣𑄴𑄮 𑄥𑄨𑄚𑄴𑄘𑄨 𑄌𑄬𑄣𑄧𑅁 𑄌𑄬𑄭 𑄘𑄬𑄣𑄧 𑄙𑄪𑄟𑄮 𑄚𑄧𑄣𑄴𑄮𑄘𑄨 𑄇𑄣 𑄙𑄪𑄟𑄮𑄚𑄨 𑄝𑄧𑄚 𑄝𑄪𑄘𑄨 𑄝𑄪𑄘𑄨 𑄇𑄪𑄘𑄴𑄫𑄢𑄧𑄖𑄴 𑄅𑄢𑄨 𑄡𑄬𑄭 𑄟𑄨𑄣𑄬 𑄡𑄠𑄴𑅁 𑄖𑄮𑄉𑄬𑄣𑄬 𑄙𑄪𑄟𑄮𑄢𑄴 𑄟𑄎𑄢–𑄃𑄮 𑄘𑄬𑄊 𑄚𑄧 𑄡𑄠𑄴𑅁

𑄃𑄣𑄮 𑄝𑄨𑄇𑄥𑄬 𑄇𑄧𑄣𑄧, 𑄟𑄪𑄭 𑄡𑄬𑄇𑄴𑄬 𑄝𑄨𑄆 𑄞𑄧𑄖𑄴𑄖𑄨 𑄦𑄪𑄠𑄧𑄁, 𑄥𑄬𑄇𑄴𑄬 𑄃𑄧𑄚𑄢𑄴𑄥𑄴 𑄚𑄧 𑄆𑄣𑄧𑅁 𑄥𑄬𑄇𑄴𑄬 𑄃𑄧𑄚𑄢𑄴𑄥𑄴 𑄗𑄬𑄘𑄧 𑄟𑄪𑄭–𑄃𑄮 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄣𑄪𑄋𑄪𑄚𑄴𑅁

𑄃𑄧𑅁

𑄄𑄇𑄴𑄬 𑄌𑄋𑄧𑄖𑄴𑄬 𑄝𑄨𑄆 𑄃𑄧𑄚𑄢𑄴𑄥𑄴 𑄡𑄬𑄭 𑄆𑄇𑄴𑄇𑄭𑄪𑅁 𑄡𑄬𑄭 𑄥𑄬 𑄝𑄧𑄏𑄧𑄢𑄪𑄚𑄴𑅁

𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄣𑄬 𑄇𑄬𑄎𑄚𑄴 𑄦𑄧𑄝𑄧 𑄇𑄨𑄎𑄬𑄚𑄨𑅁

𑄉𑄧𑄟𑄴 𑄘𑄬 𑄦𑄧𑄝𑄧𑄘𑄬 𑄉𑄧𑄟𑄴𑅁 𑄃 𑄄𑄇𑄴𑄬 𑄝𑄬𑄇𑄴𑄪𑄚𑄬 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄘𑄧𑄚𑄴 𑄘𑄬𑅁 𑄖𑄬 𑄖𑄧 𑄥𑄧𑄟𑄌𑄳𑄠𑄉𑄪𑄚𑄬𑅃

𑄇𑄨𑄠𑄬 𑄄𑄙𑄪 𑄞𑄧𑄖𑄴𑄖𑄨𑄦𑄱𑄰𑄠𑄧𑄚𑄴𑅁 𑄇𑄨𑄠𑄬 𑄈𑄉𑄢𑄍𑄧𑄢𑄨, 𑄘𑄩𑄊𑄨𑄚𑄣 𑄞𑄧𑄖𑄴𑄖𑄨𑄦𑄱𑄰𑄠𑄧𑄚𑄴𑅁 𑄆𑄇𑄴𑄘𑄊𑄨𑄠𑄬 𑄄𑄅𑄚𑄨𑄞𑄢𑄴𑄥𑄨𑄑𑄨 𑄖𑄇𑄴 𑄌𑄬𑄝𑄇𑄴𑅁

𑄖𑄪𑄭 𑄆𑄇𑄴𑄬 𑄉𑄧𑄟𑄴 𑄉𑄧𑄌𑄴𑄍𑄮𑄌𑄳𑄠𑄬 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄖𑄴𑄬𑅁 𑄄𑄅𑄚𑄨𑄞𑄢𑄴𑄥𑄨𑄑𑄨𑄖𑄴 𑄉𑄬𑄣𑄬, 𑄇𑄨 𑄞𑄨𑄣𑄬 𑄛𑄦𑄢𑄨 𑄇𑄮𑄑, 𑄅𑄛𑄧𑄎𑄖𑄨 𑄇𑄮𑄑, 𑄌𑄮𑄘𑄳𑄠𑄧 𑄃𑄘𑄢𑄧 𑄇𑄪𑄢𑄨 𑄞𑄬𑄎𑄣𑄴𑅁 𑄄𑄠𑄬𑄚𑄴 𑄝𑄬𑄌𑄴 𑄉𑄧𑄟𑄴 𑄚𑄧 𑄣𑄉𑄬𑄘𑄬, 𑄛𑄦𑄢𑄨 𑄇𑄮𑄑𑅁 𑄌𑄋𑄴𑄟𑄉𑄪𑄚𑄴 𑄇𑄨 𑄝𑄚𑄳𑄦 𑄟𑄪𑄢𑄮𑄖𑄴 𑄗𑄚𑄴𑄘𑄬𑅃 𑄌𑄋𑄴𑄟𑄉𑄪𑄚𑄴 𑄇𑄨 𑄗𑄧𑄣𑄧𑄖𑄴 𑄚𑄧 𑄗𑄚𑄴𑅃 𑄇𑄨𑄖𑄴𑄖𑄬𑄭 𑄛𑄦𑄢𑄨 𑄇𑄮𑄑 𑄦𑄧𑄝𑄧𑅃 𑄚 𑄌𑄋𑄴𑄟𑄉𑄪𑄚𑄴 𑄅𑄛𑄧𑄎𑄖𑄨 𑄘𑄬! 𑄅𑄛𑄧𑄎𑄖𑄨 𑄇𑄮𑄑 𑄇𑄨𑄖𑄴𑄖𑄬𑄭 𑄦𑄧𑄝𑄧𑅃 𑄌𑄋𑄴𑄟𑄉𑄪𑄚𑄴 𑄘𑄧 𑄎𑄖𑄴𑅁 𑄌𑄋𑄴𑄟𑄉𑄪𑄚𑄮𑄢𑄴 𑄣𑄬𑄊 𑄃𑄊𑄬, 𑄇𑄧𑄙 𑄃𑄊𑄬, 𑄇𑄝𑄧𑄢𑄴–𑄌𑄪𑄝𑄧𑄢𑄴 𑄃𑄊𑄬, 𑄇𑄨𑄖𑄴𑄮 𑄃𑄊𑄬𑅁 𑄅𑄇𑄴𑄮 𑄎𑄘𑄧𑄢𑄴 𑄡𑄨𑄠𑄬𑄚𑄨 𑄃𑄊𑄬, 𑄥𑄨𑄠𑄬𑄚𑄨 𑄝𑄬𑄇𑄴𑄇𑄚𑄨 𑄌𑄋𑄴𑄟𑄉𑄪𑄚𑄧𑄖𑄴𑄪𑄚𑄴 𑄃𑄊𑄬𑅁 𑄃 𑄇𑄨 𑄅𑄛𑄧𑄎𑄖𑄨𑅃 𑄇𑄬𑄚 𑄚𑄧 𑄡𑄬𑄠𑄳𑄠𑄬 𑄇𑄧𑄙𑅁 𑄃𑄟 𑄆𑄟𑄴𑄆𑄚𑄴 𑄣𑄢𑄴𑄟–𑄃𑄮 𑄝𑄧𑄉𑄧𑄁𑄝𑄧𑄚𑄴𑄙𑄪 𑄥𑄬𑄈𑄴 𑄟𑄪𑄎𑄨𑄝𑄧 𑄥𑄨𑄙𑄪 𑄝𑄪𑄇𑄴 𑄜𑄪𑄣𑄬𑄭 𑄇𑄮𑄠𑄬𑄉𑄱𑄰 𑄃𑄟𑄨 𑄅𑄛𑄧𑄎𑄖𑄨𑅁 𑄡𑄬𑄙𑄧𑄇𑄴𑄝𑄢𑄴 𑄝𑄱𑄰𑄒𑄧𑄇𑄴𑄦𑄱𑄰𑄠𑄬, 𑄥𑄬𑄙𑄧𑄇𑄴𑄝𑄢𑄴 𑄅𑄛𑄧𑄎𑄖𑄨 𑄦𑄨𑄎𑄬𑄝𑄬 𑄚𑄁 𑄘𑄨 𑄆𑄌𑄴𑄍𑄮𑄚𑄴𑅁 𑄅𑄛𑄧𑄎𑄖𑄨 𑄇𑄢𑄬 𑄇𑄧𑄠𑄴, 𑄃𑄟 𑄌𑄬𑄣𑄉𑄪𑄚𑄬 𑄇𑄱𑄰 𑄚𑄧 𑄛𑄢𑄧𑄚𑄴, 𑄥𑄨𑄉𑄪𑄚𑄴 𑄇𑄨 𑄌𑄬𑄣𑅃 𑄥𑄬𑄈𑄴 𑄟𑄪𑄎𑄨𑄝𑄬 𑄆𑄟𑄴𑄆𑄚𑄴 𑄣𑄢𑄴𑄟𑄢𑄴 𑄟𑄉𑄚 𑄅𑄛𑄧𑄎𑄖𑄨 𑄚𑄋𑄚𑄴 𑄘𑄨𑄝𑄬𑄢𑄴 𑄚𑄧 𑄌𑄠𑄴𑅁 𑄥𑄬𑄈𑄴 𑄟𑄪𑄎𑄨𑄝𑄬 𑄌𑄬𑄭𑄠𑄬, 𑄝𑄁𑄣𑄘𑄬𑄏𑄧𑄖𑄴 𑄡𑄨𑄉𑄪𑄚𑄴 𑄗𑄚𑄴, 𑄥𑄨𑄉𑄪𑄚𑄴 𑄝𑄬𑄇𑄴𑄪𑄚𑄴 𑄝𑄋𑄣𑄴 𑄦𑄮𑄘𑄮𑄇𑄴𑅁 𑄥𑄬𑄚𑄧𑄖𑄴𑄖𑄬𑄭 𑄆𑄟𑄴𑄆𑄚𑄴 𑄣𑄢𑄴𑄟𑄢𑄬 𑄥𑄬𑄈𑄴 𑄟𑄪𑄎𑄨𑄝𑄬 𑄇𑄱𑄰𑄠𑄬 𑄖𑄪𑄟𑄨 𑄝𑄬𑄇𑄴𑄪𑄚𑄴 𑄝𑄋𑄣𑄴 𑄦𑄧𑅁 𑄆𑄭–𑄥𑄬𑄭 𑄉𑄧𑄖𑄴𑄬 𑄉𑄧𑄖𑄴𑄬 𑄇𑄧𑄇𑄴𑄬 𑄝𑄧𑄏𑄧𑄢𑄪𑄚𑄴 𑄡𑄚𑄴, 𑄅𑄘𑄧 𑄉𑄧𑄢𑄨 𑄚𑄧 𑄛𑄢𑄬𑅁 𑄞𑄧𑄖𑄴𑄖𑄨𑄦𑄱𑄰 𑄛𑄣𑄴𑄬–𑄃𑄮 𑄝𑄧𑄏𑄧𑄢𑄴 𑄉𑄳𑄠𑄛𑄴 𑄡𑄠𑄴𑅁 𑄆𑄇𑄴𑄬 𑄉𑄧𑄟𑄴𑄦𑄱𑄰𑄠𑄬𑄘𑄬 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄖𑄴𑄬𑅁 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄚 𑄇𑄢𑄴 𑄝𑄬𑄌𑄴 𑄦𑄃𑄮𑄌𑄴𑅃 𑄖𑄧𑄢𑄴, 𑄚 𑄖𑄧 𑄝𑄝𑄧𑄢𑄴, 𑄚 𑄖𑄧 𑄟–𑄢𑄴𑅃

𑄟𑄧𑄢𑄴 𑄘𑄧 𑄦𑄃𑄮𑄌𑄴 𑄃𑄊𑄬𑄭 𑄃𑄊𑄬𑅁 𑄝𑄝𑄢𑄴 𑄝𑄬𑄌𑄴𑅁 𑄟 𑄌𑄠𑄴𑄘𑄬, 𑄉𑄧𑄟𑄬𑄘𑄣𑄬 𑄣𑄬𑄊 𑄥𑄨𑄊𑄨𑄣𑄬 𑄦𑄧𑄠𑄴𑅁 𑄝𑄨𑄆 𑄦𑄮𑄇𑄴, 𑄃𑄧𑄚𑄢𑄴𑄥𑄴 𑄦𑄮𑄇𑄴𑅁

𑄖𑄬 𑄇𑄧𑄠𑄴 𑄞𑄬𑄭–𑄝𑄮𑄚𑄴𑅃

𑄘𑄨 𑄞𑄬𑄭, 𑄘𑄨 𑄝𑄮𑄚𑄴𑅁

𑄝𑄬𑄉𑄧 𑄘𑄋𑄧𑄢𑄴𑄝𑄮 𑄖𑄪𑄭𑅃

𑄚𑄙𑄬𑄭𑅁 𑄟𑄧 𑄅𑄉𑄧𑄢𑄬𑄘𑄨 𑄅𑄇𑄴𑄮 𑄝𑄮𑄚𑄴 𑄃𑄊𑄬𑅁 𑄟𑄧 𑄖𑄧𑄣𑄬𑄘𑄨 𑄞𑄬𑄭𑄝𑄮 𑄆 𑄝𑄧𑄏𑄧𑄢𑄴 𑄟𑄬𑄖𑄴𑄑𑄳𑄢𑄨𑄇𑄴 𑄛𑄧𑄢𑄨𑄇𑄴𑄈𑄬 𑄘𑄨𑄝𑄮𑅁 𑄌𑄨𑄉𑄮𑄚𑄴 𑄝𑄮𑄚𑄴𑄮 𑄆𑄝𑄧 𑄖𑄬 𑄥𑄖𑄴 𑄛𑄧𑄠𑄴𑄙𑄬 𑄅𑄗𑄳𑄠𑄬 𑄘𑄬𑅁

𑄚𑄨𑄟𑄮𑄚𑄧 𑄘𑄋𑄧𑄢𑄴 𑄝𑄮𑄚𑄴𑄮 𑄇𑄨 𑄉𑄧𑄢𑄬 𑄥𑄨𑄠𑄬𑄚𑄴 𑄛𑄪𑄏𑄮𑄢𑄴 𑄚𑄧 𑄉𑄧𑄣𑄳𑄠𑄧 𑄃𑄣𑄮 𑄝𑄨𑄇𑄥𑄬𑅁 𑄥𑄨𑄠𑄬𑄚𑄨 𑄛𑄪𑄏𑄮𑄢𑄴 𑄉𑄧𑄣𑄳𑄠𑄬 𑄚𑄨𑄟𑄮𑄚𑄬 𑄉𑄧𑄟𑄴 𑄚𑄧 𑄛𑄬𑄝𑄧𑅁 𑄆𑄚𑄬 𑄞𑄢𑄨 𑄉𑄧𑄢𑄨 𑄛𑄪𑄏𑄮𑄢𑄴 𑄉𑄧𑄢𑄨𑄝𑄬𑄢𑄴 𑄟𑄧𑄚𑄬 𑄇𑄱𑄰𑄠𑄬𑅁 𑄃𑄣𑄮 𑄝𑄨𑄇𑄥𑄬 𑄡𑄧𑄝𑄧𑄢𑄴 𑄟𑄨𑄣𑄬 𑄛𑄬𑄢𑄬𑄖𑄴𑅁 𑄟𑄨𑄣𑄬𑄣𑄱𑄰 𑄇𑄧𑄙 𑄇𑄧𑄠𑄴𑅁 𑄢𑄮𑄘𑄴 𑄖𑄘𑄨 𑄅𑄙𑄨𑄚𑄬𑄭 𑄚𑄨𑄟𑄮𑄚𑄴𑄘𑄱𑄰𑄃𑄣𑄮 𑄝𑄨𑄇𑄥𑄬 𑄞𑄨𑄘𑄨𑄢𑄬 𑄥𑄮𑄟𑄨𑄣𑄇𑄴𑄇𑄨𑅁 𑄇𑄧𑄙 𑄝𑄖𑄴𑄖𑄠𑄴 𑄡𑄘𑄬 𑄡𑄘𑄬 𑄢𑄋𑄟𑄖𑄳𑄠𑄖𑄴 𑄣𑄪𑄋𑄨𑄣𑄇𑄴𑄇𑄱𑄰𑅁 𑄆𑄇𑄴𑄇𑄚𑄴 𑄑𑄬𑄇𑄴𑄥𑄨𑄣𑄱𑄰 𑄖𑄨𑄚𑄴𑄎𑄧𑄚𑄬 𑄆𑄇𑄴 𑄥𑄧𑄟𑄢𑄬 𑄉𑄬𑄣𑄇𑄴𑅁 𑄃𑄣𑄮 𑄝𑄨𑄇𑄥𑄬 𑄉𑄭 𑄉𑄬𑄣𑄧𑅁

𑄚𑄨𑄟𑄮𑄚𑄧 𑄟 𑄖 𑄞𑄬𑄭𑄝𑄮 𑄊𑄧𑄢𑄧𑄖𑄴 𑄣𑄪𑄋𑄨 𑄝𑄬𑄇𑄴𑄇𑄚𑄨 𑄇𑄧𑄣𑄧𑅁 𑄚𑄨𑄟𑄮𑄚𑄧 𑄟𑄟𑄪𑄢𑄴 𑄊𑄧𑄢𑄴 𑄇𑄘𑄇𑄴–𑄇𑄘𑄨𑄇𑄴𑄬 𑄇𑄱𑄰 𑄛𑄢𑄬 𑄚𑄨𑄟𑄮𑄚𑄧 𑄟𑅁 𑄚𑄨𑄟𑄮𑄚𑄬–𑄃𑄮 𑄢𑄋𑄟𑄖𑄳𑄠𑄖𑄴 𑄚𑄧 𑄆𑄖𑄴𑄬 𑄃𑄉𑄬–𑄞𑄉𑄬 𑄇𑄱𑄰 𑄛𑄢𑄬, 𑄖 𑄟𑄟𑄪 𑄊𑄧𑄢𑄚𑄴 𑄌𑄨𑄉𑄮𑄚𑄴𑄘𑄬𑅁 𑄖𑄮 𑄟𑄟𑄪 𑄊𑄧𑄢𑄴 𑄞𑄨𑄣𑄨 𑄇𑄧𑄙𑅁 𑄇𑄧𑄠𑄬𑄇𑄴 𑄘𑄨𑄚𑄧𑄖𑄴𑄖𑄬𑄭 𑄦𑄧𑄣𑄬 𑄎𑄉 𑄘𑄨 𑄛𑄬𑄝𑄧𑅁 𑄚𑄨𑄟𑄮𑄚𑄧 𑄟–𑄝𑄝𑄬 𑄆𑄇𑄴 𑄥𑄛𑄴𑄖 𑄗𑄬𑄭 𑄚𑄨𑄟𑄮𑄚𑄧𑄢𑄬 𑄟𑄚𑄴𑄎𑄳𑄠𑄧 𑄊𑄧𑄢𑄴 𑄒𑄨𑄇𑄴 𑄉𑄧𑄢𑄨 𑄘𑄨𑄣𑄬𑄇𑄴𑅁 𑄚𑄨𑄟𑄮𑄚𑄧 𑄟 𑄊𑄧𑄢𑄴 𑄌𑄪𑄢𑄨–𑄛𑄪𑄏𑄨 𑄘𑄨, 𑄛𑄨𑄣𑄬𑄦𑄢𑄨 𑄒𑄨𑄇𑄴 𑄉𑄧𑄢𑄨 𑄘𑄨𑄣𑄧𑅁 𑄉𑄬𑄏𑄧 𑄌𑄪𑄣𑄮 𑄅𑄇𑄴𑄮 𑄇𑄨𑄚𑄨 𑄘𑄨𑄣𑄬𑄇𑄴𑅁 𑄝𑄬𑄇𑄴𑄇𑄚𑄨 𑄒𑄨𑄇𑄴–𑄒𑄇𑄴 𑄉𑄧𑄢𑄨 𑄘𑄨 𑄊𑄧𑄢𑄧𑄖𑄴 𑄜𑄨𑄢𑄨 𑄆𑄣𑄇𑄴𑅁 𑄚𑄨𑄟𑄮𑄚𑄧 𑄟–𑄝𑄝𑄬 𑄊𑄧𑄢𑄧𑄖𑄴 𑄆𑄝𑄢𑄴 𑄃𑄉𑄬𑄘𑄨 𑄚𑄨𑄟𑄮𑄚𑄧 𑄟𑄟𑄪 𑄞𑄢𑄨 𑄉𑄧𑄢𑄨 𑄦𑄝𑄨𑄣𑄬𑄌𑄴 𑄈𑄬𑄭𑄠𑄬, 𑄖 𑄞𑄉𑄨𑄚𑄬𑄝𑄮𑄢𑄬 𑄎𑄉 𑄘𑄨 𑄚𑄧 𑄛𑄢𑄨𑅁 𑄚𑄨𑄟𑄮𑄚𑄧 𑄟 𑄇𑄱𑄰𑄠𑄬, 𑄥𑄨𑄠𑄬𑄚𑄴𑄘𑄱𑄰𑄇𑄨𑅁 𑄃𑄊𑄬 𑄡𑄧𑄇𑄴𑄬 𑄚𑄨𑄟𑄮𑄚𑄬, 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄦𑄪𑄌𑄴–𑄉𑄪𑄌𑄴 𑄘𑄨 𑄘𑄨𑄣𑄬 𑄦𑄧𑄝𑄧𑅁

𑄚𑄨𑄟𑄮𑄚𑄬 𑄄𑄇𑄴𑄬 𑄢𑄋𑄟𑄖𑄳𑄠𑄖𑄴 𑄉𑄭 𑄉𑄭 𑄗𑄠𑄴𑅁 𑄟𑄚𑄪𑄌𑄴𑄎𑄧𑄚𑄴 𑄚𑄧 𑄌𑄨𑄚𑄬𑅁 𑄝𑄚𑄳𑄦 𑄖 𑄟𑄟𑄪𑄘𑄊𑄨𑄢𑄬 𑄌𑄨𑄚𑄬𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄝𑄱𑄰𑄭 𑄗𑄬𑄝𑄢𑄴 𑄃𑄣𑄴𑄥𑄨 𑄉𑄧𑄣𑄳𑄠𑄬, 𑄖 𑄟𑄟𑄪𑄘𑄊𑄨𑄙𑄪 𑄑𑄨𑄞𑄨 𑄌𑄠𑄰𑄱𑅁 𑄃𑄘𑄬–𑄇𑄎𑄬 𑄘𑄨 𑄆𑄇𑄴𑄎𑄧𑄚𑄴 𑄥𑄧𑄟𑄌𑄳𑄠𑄣𑄱𑄰 𑄇𑄧𑄙 𑄇𑄧𑄠𑄴𑅁 𑄃𑄘𑄟𑄧𑄖𑄴 𑄗𑄉𑄧𑄘𑄬 𑄇𑄧𑄘𑄧 𑄥𑄧𑄟𑄌𑄳𑄠! 𑄝𑄬𑄢𑄘𑄬 𑄝𑄬𑄢𑄘𑄬 𑄘𑄨𑄚𑄬 𑄚𑄧 𑄇𑄪𑄣𑄠𑄴𑅁 𑄟𑄚𑄪𑄌𑄴–𑄎𑄧𑄚𑄴 𑄚𑄧 𑄌𑄨𑄚𑄬 𑄇𑄨𑄚𑄬𑄖𑄴𑄖𑄬𑄭, 𑄥𑄧𑄟𑄌𑄳𑄠 𑄚𑄬𑄭 𑄇𑄨𑄚𑄬𑄖𑄴𑄖𑄬𑄭 𑄘𑄨𑄚𑄴 𑄣𑄟𑄴𑄝 𑄣𑄉𑄬 𑄚𑄨𑄟𑄮𑄚𑄧𑄢𑄴𑅁 𑄇𑄧𑄣𑄬𑄎𑄧𑄖𑄴 𑄆𑄝𑄧 𑄚𑄧 𑄡𑄠𑄴𑅁 𑄇𑄧𑄣𑄬𑄎𑄧𑄖𑄴 𑄉𑄬𑄣𑄬 𑄦𑄧𑄣𑄬 𑄃𑄣𑄮 𑄝𑄨𑄇𑄥𑄧𑄢𑄬 𑄣𑄊𑄧𑄖𑄴 𑄛𑄬𑄣𑄪𑄚𑄴𑄘𑄰𑄱𑅁 𑄖𑄬–𑄃𑄮 𑄇𑄨 𑄆𑄝𑄴𑄬𑄢𑄬 𑄎𑄪𑄢𑄮𑄦𑄱𑄰𑄠𑄬𑅁 𑄚𑄧 𑄆𑄏𑄬𑅁 𑄖𑄬 𑄘𑄧 𑄢𑄋𑄟𑄖𑄳𑄠𑄠𑄚𑄴 𑄈𑄧𑄚𑄴𑄘𑄧𑄢𑄬 𑄈𑄧𑄚𑄴𑄘𑄧𑄢𑄬 𑄥𑄪𑄇𑄴 𑄛𑄠𑄴𑅁 𑄃𑄣𑄮 𑄝𑄨𑄇𑄥𑄬 𑄇𑄪𑄝𑄮𑄖𑄴 𑄗𑄠𑄴 𑄇𑄱𑄰 𑄛𑄖𑄴𑄧 𑄝𑄬𑄢 𑄡𑄬𑄘𑄧𑅁

𑄆𑄌𑄳𑄠 𑄥𑄧𑄚𑄨𑄝𑄢𑄴𑅁 𑄝𑄬𑄣𑄚𑄴 𑄎𑄪𑄢𑄮 𑄛𑄧𑄢𑄬𑄣𑄴𑄣𑄭𑄮𑅁 𑄆𑄚𑄴 𑄃𑄧𑄇𑄴𑄖𑄧𑄖𑄴 𑄃𑄘𑄟𑄚𑄴 𑄦𑄧𑄣𑄬 𑄆𑄇𑄴𑄇 𑄆𑄇𑄴𑄇 𑄍𑄝 𑄛𑄧𑄢𑄬𑅁 𑄛𑄧𑄏𑄨𑄟𑄬𑄘𑄨 𑄟𑄪𑄢𑄮𑄝𑄮𑄖𑄴 𑄝𑄬𑄣𑄚𑄴 𑄃𑄚𑄴𑄘𑄧𑄣𑄴𑄦𑄱𑄰 𑄍𑄝 𑄛𑄧𑄢𑄬𑅁 𑄞𑄪𑄭–𑄃𑄮 𑄟𑄙𑄧𑄖𑄴 𑄉𑄪𑄢𑄪 𑄌𑄧𑄢𑄧𑄚𑄴𑅁 𑄉𑄪𑄢𑄪 𑄊𑄧𑄚𑄴𑄘𑄨 𑄢𑄧 𑄥𑄪𑄚𑄮 𑄡𑄠𑄴𑅁 𑄉𑄪𑄢𑄪 𑄛𑄨𑄙𑄨𑄖𑄴 𑄛𑄧𑄢𑄨 𑄗𑄚𑄴 𑄟𑄧𑄚, 𑄌𑄧𑄚𑅁 𑄇𑄧𑄢𑄬𑄋𑄖𑄪𑄣𑄨 𑄝𑄎𑄢𑄧𑄖𑄴𑄪𑄚𑄴 𑄝𑄎𑄢𑄴–𑄛𑄮 𑄣𑄬𑄭 𑄝𑄢𑄳𑄦𑄖𑄴 𑄉𑄧𑄢𑄨, 𑄖𑄬𑄣𑄴–𑄍𑄨𑄎𑄪𑄢𑄨 𑄦𑄘𑄧𑄖𑄴 𑄦𑄘𑄧𑄖𑄴 𑄉𑄧𑄢𑄨 𑄆𑄏𑄧𑄚𑄴𑄘𑄰𑄱𑅁 𑄖𑄧𑄣𑄬𑄘𑄨 𑄉𑄮𑄣𑄍𑄧𑄢𑄨, 𑄘𑄮𑄈𑄬𑄠𑄳𑄠𑄬, 𑄝𑄧𑄢𑄴 𑄃𑄘𑄟𑄴, 𑄛𑄪𑄉𑄬𑄘𑄨 𑄌𑄮𑄈𑄴 𑄎𑄪𑄢𑄠𑄴 𑄥𑄧𑄁 𑄞𑄪𑄭–𑄃𑄮 𑄟𑄒𑄴𑅁 𑄜𑄨𑄖𑄴𑄖𑄨𑄝𑄮𑅁 𑄜𑄨𑄖𑄴𑄖𑄨 𑄛𑄢𑄬 𑄛𑄢𑄬 𑄄𑄑𑄴 𑄝𑄨𑄎𑄬𑄭𑄠𑄬 𑄛𑄧𑄖𑄴𑄗𑄚𑄴𑅁 𑄅𑄉𑄪𑄢𑄬𑄘𑄨 𑄏𑄧𑄉𑄧𑄢𑄝𑄨𑄣𑄴, 𑄟𑄮𑄚𑄮𑄊𑄮𑄚, 𑄛𑄧𑄏𑄨𑄟𑄴 𑄝𑄣𑄪𑄈𑄣𑄨, 𑄛𑄪𑄉𑄮𑄘𑄨 𑄝𑄣𑄪𑄈𑄣𑄨, 𑄇𑄖𑄴𑄮𑄣𑄨𑅁 𑄇𑄪𑄟𑄴 𑄇𑄧𑄢𑄧𑄖𑄴 𑄉𑄧𑄢𑄨 𑄟𑄨𑄣𑄬𑄉𑄪𑄚𑄬 𑄛𑄚𑄨 𑄈𑄧𑄎 𑄡𑄚𑄴𑅁 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄛𑄬𑄣𑄬 𑄞𑄧𑄢𑄧𑄚𑄴 𑄇𑄪𑄟𑄴 𑄇𑄧𑄢𑄧𑄖𑄴 𑄉𑄧𑄢𑄨, 𑄙𑄇𑄴 𑄝𑄬𑄋 𑄉𑄧𑄢𑄨 𑄇𑄧𑄙 𑄇𑄧𑄚𑄴𑅁 𑄦𑄎𑄧𑄚𑄴𑅁 𑄇𑄮𑄌𑄴𑄛𑄬𑄠𑄬 𑄟𑄚𑄪𑄌𑄴 𑄣𑄊𑄧𑄖𑄴 𑄛𑄬𑄣𑄬, 𑄇𑄪𑄟𑄴𑄮 𑄛𑄧𑄙𑄧 𑄛𑄎𑄢𑄖𑄴 𑄗𑄱𑄰𑄚𑄬, 𑄇𑄧𑄙 𑄇𑄧𑄙𑄬 𑄇𑄧𑄙𑄬 𑄇𑄧𑄇𑄴𑄬 𑄝𑄬𑄣𑄴 𑄓𑄪𑄝𑄬𑄉𑄱𑄰, 𑄅𑄘𑄮 𑄉𑄧𑄢𑄨 𑄚𑄧 𑄛𑄢𑄧𑄚𑄴𑅁 𑄞𑄪𑄠𑄮𑄖𑄴 𑄌𑄧𑄢𑄧𑄚𑄴𑄘𑄬 𑄉𑄪𑄢𑄪𑄉𑄪𑄚𑄧 𑄣𑄧𑄊𑄬 𑄌𑄨𑄉𑄮𑄚𑄴 𑄉𑄪𑄢𑄮𑄉𑄪𑄚𑄬 𑄉𑄪𑄘𑄪 𑄈𑄢, 𑄘𑄁 𑄈𑄢, 𑄛𑄮𑄢𑄴 𑄈𑄢, 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄊𑄨𑄣𑄬 𑄈𑄢 𑄦𑄧𑄚𑄴𑅁 𑄉𑄪𑄑𑄨 𑄅𑄢𑄚𑄴𑅁 𑄌𑄨𑄉𑄮𑄚𑄧 𑄃𑄧𑄇𑄴𑄖𑄧𑄖𑄴 𑄇𑄧𑄙𑄧𑄇𑄴 𑄘𑄨𑄝𑄪𑄌𑄳𑄠𑄬 𑄢𑄮𑄘𑄬 𑄢𑄮𑄘𑄬 𑄉𑄪𑄑𑄨 𑄅𑄢𑄬𑄠𑄳𑄠𑄬 𑄚𑄨𑄟𑄮𑄚𑄬𑅁 𑄚𑄨𑄟𑄮𑄚𑄬 𑄄𑄇𑄴𑄬 𑄉𑄭 𑄉𑄭 𑄝𑄧𑄏𑄨 𑄃𑄊𑄬 𑄅𑄇𑄴𑄮 𑄝𑄱𑄰 𑄙𑄧𑄢𑄨𑅁 𑄃𑄘𑄟𑄧 𑄇𑄧𑄙 𑄟𑄧𑄚𑄧𑄖𑄴 𑄅𑄗𑄳𑄠𑄬𑅁 𑄇𑄧𑄝𑄨𑄖𑄬𑄉𑄪𑄚𑄴 𑄛𑄧𑄢𑄳𑄦𑄬𑅁 𑄇𑄧𑄝𑄨𑄖𑄬 𑄝𑄱𑄰𑄝𑄮 𑄦𑄧𑄣𑄧𑄘𑄬 𑄇𑄧𑄝𑄨 𑄟𑄳𑄢𑄨𑄖𑄴𑄖𑄨𑄇𑄘𑄊𑄨𑄢𑄴 𑄣𑄬𑄊 𑄟𑄧𑄚𑄴 𑄛𑄧𑄢𑄚𑄩𑅁 𑄚𑄨𑄟𑄮𑄚𑄬 𑄇𑄎𑄧𑄣𑄁𑄧 𑄇𑄧𑄣𑄬𑄎𑄧𑄖𑄴 𑄗𑄉𑄧𑄘𑄬 𑄇𑄧𑄝𑄨𑄖𑄬 𑄣𑄬𑄊𑄨𑄘𑄮𑅁 𑄖 𑄇𑄧𑄝𑄨𑄖𑄬 𑄥𑄪𑄚𑄨 𑄌𑄋𑄴𑄟 𑄟𑄌𑄴𑄖𑄧𑄢𑄪𑄚𑄬 𑄈𑄪𑄎𑄨 𑄦𑄧𑄘𑄇𑄴𑅁 𑄝𑄋𑄣𑄴, 𑄦𑄨𑄚𑄴𑄘𑄪 𑄟𑄌𑄴𑄖𑄧𑄢𑄪𑄚𑄬 𑄌𑄋𑄴𑄟 𑄞𑄌𑄴 𑄚𑄧 𑄝𑄪𑄏𑄨 𑄟𑄙 𑄖𑄨𑄉𑄪𑄖𑄴 𑄖𑄨𑄉𑄪𑄖𑄴 𑄉𑄧𑄖𑄴𑄗𑄇𑄴𑅁 𑄚𑄨𑄟𑄮𑄚𑄬 𑄌𑄋𑄴𑄟 𑄇𑄧𑄙𑄠𑄴 𑄇𑄧𑄝𑄨𑄖𑄬 𑄣𑄬𑄊𑄨𑄘𑄮𑅁 𑄡𑄬𑄚𑄴 𑄣𑄬𑄊𑄧𑄚𑄴 𑄇𑄧𑄝𑄨 𑄟𑄳𑄢𑄨𑄖𑄴𑄖𑄨𑄇𑄘𑄊𑄨𑅁 𑄟𑄳𑄢𑄨𑄖𑄴𑄖𑄨𑄇𑄘𑄊𑄨𑄢𑄴 𑄣𑄬𑄇𑄴𑄈𑄬 𑄇𑄧𑄝𑄨𑄖𑄬𑄉𑄪𑄚𑄴 𑄃𑄟𑄧𑄣𑄴 𑄘𑄳𑄠 𑄛𑄧𑄢𑄬 𑄚𑄨𑄟𑄮𑄚𑄧𑄢𑄴𑅁 𑄟𑄳𑄢𑄨𑄖𑄴𑄖𑄨𑄇𑄘𑄊𑄨 𑄇𑄧𑄝𑄨𑄖𑄬𑄉𑄪𑄚𑄴 𑄛𑄧𑄣𑄴𑄬 𑄘𑄬𑄌𑄴–𑄎𑄘𑄧 𑄇𑄧𑄙, 𑄌𑄋𑄴𑄟𑄉𑄪𑄚𑄮𑄢𑄴 𑄝𑄨𑄘𑄨 𑄡𑄬𑄠𑄳𑄠𑄬 𑄇𑄨𑄖𑄴𑄮 𑄥𑄪𑄟𑄪𑄖𑄴𑄮 𑄝𑄬𑄇𑄴𑄇𑄚𑄨 𑄛𑄠𑄴𑅁 𑄚𑄨𑄟𑄮𑄚𑄬 𑄇𑄧𑄝𑄨𑄖𑄬 𑄝𑄱𑄰𑄝𑄮 𑄛𑄧𑄢𑄳𑄦𑄨 𑄛𑄧𑄢𑄳𑄦𑄨 𑄃𑄊𑄬𑅁 𑄆𑄚𑄴 𑄃𑄧𑄇𑄴𑄖𑄧𑄖𑄴 𑄍𑄧–𑄥𑄖𑄴𑄎𑄧𑄚𑄴 𑄛𑄮 𑄣𑄪𑄋𑄨𑄣𑄇𑄴𑄇𑄨 𑄖 𑄥𑄨𑄙𑄪𑅁 𑄛𑄮𑄉𑄪𑄚𑄧𑄢𑄬 𑄘𑄬𑄊𑄨 𑄝𑄱𑄰𑄘𑄬𑄖𑄴𑄪𑄚𑄴 𑄅𑄙𑄨 𑄚𑄨𑄟𑄮𑄚𑄬 𑄇𑄧𑄣𑄧, 𑄆𑄏𑄧 𑄆𑄏𑄧 𑄞𑄬𑄭𑄣𑄧𑄇𑄴, 𑄝𑄧𑄏𑄧𑄉𑄨𑅁 𑄟𑄧𑄚𑄬 𑄟𑄧𑄚𑄬 𑄈𑄪𑄎𑄨𑄦𑄱𑄰𑄠𑄬𑅁 𑄞𑄝𑄬𑄢𑄴 𑄆𑄌𑄳𑄠 𑄅𑄇𑄴𑄮, 𑄇𑄬𑄣𑄳𑄠 𑄅𑄇𑄴𑄮 𑄉𑄧𑄢𑄨 𑄃𑄟𑄬𑄚𑄬 𑄥𑄧𑄟𑄌𑄳𑄠 𑄦𑄧𑄝𑄇𑄴𑅁 𑄚𑄨𑄟𑄮𑄚𑄬 𑄃𑄘𑄟𑄧𑄖𑄴 𑄗𑄉𑄧𑄘𑄬 𑄅𑄇𑄴𑄮 𑄉𑄧𑄢𑄴𑄝 𑄆𑄣𑄬 𑄡𑄬𑄚𑄴 𑄣𑄮𑄝𑄨𑄠𑄮𑄖𑄴 𑄉𑄧𑄢𑄬, 𑄥𑄬𑄙𑄧𑄇𑄳𑄠𑄬 𑄉𑄧𑄢𑄨 𑄣𑄮𑄝𑄨𑄠𑄮𑄖𑄴 𑄉𑄧𑄢𑄨𑄝𑄬𑄢𑄴 𑄦𑄃𑄮𑄌𑄴 𑄘𑄬𑄊𑄬𑄣𑄧𑅁 𑄆𑄣𑄇𑄴𑄬 𑄛𑄮𑄉𑄪𑄚𑄬 𑄝𑄧𑄣𑄇𑄴𑅁

𑄆𑄇𑄴𑄎𑄧𑄚𑄬 𑄇𑄧𑄣𑄧, 𑄖𑄧𑄢𑄬 𑄘𑄧 𑄃𑄉𑄬𑄘𑄨 𑄚𑄧 𑄘𑄬𑄊𑄧𑄁𑅁 𑄚𑄪𑄠𑄮 𑄆𑄣𑄬𑄘𑄬 𑄛𑄢 𑄛𑄁𑅃

𑄦𑄧𑄘𑄬𑄭𑅁

𑄃 𑄆𑄇𑄴𑄎𑄧𑄚𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄧𑄟𑄧𑄣𑄬 𑄆𑄣𑄬𑄘𑄬𑅃

𑄆𑄇𑄴 𑄥𑄛𑄴𑄖 𑄦𑄧𑄋𑄧𑄖𑄴𑄬𑅁

𑄃𑄧𑅁 𑄖𑄬 𑄇𑄪𑄖𑄴𑄪𑄚𑄴𑅃

𑄟𑄢𑄨𑄥𑄳𑄠𑄖𑄴𑄪𑄚𑄴𑅁

𑄥𑄣𑄬𑄚𑄴 𑄆𑄇𑄴 𑄃𑄘𑄟𑄳𑄠𑅁

𑄆𑄇𑄴 𑄃𑄘𑄟𑄳𑄠! 𑄖𑄧𑄟 𑄊𑄧𑄢𑄚𑄴 𑄇𑄪𑄝𑄮𑄖𑄴𑅃

𑄟𑄪𑄭 𑄛𑄚𑄴𑄍𑄧𑄢𑄨𑄖𑄴𑄪𑄚𑄴𑅁

𑄃 𑄆𑄇𑄴 𑄃𑄘𑄟𑄳𑄠 𑄇𑄧𑄣𑄬 𑄘𑄬𑅁

𑄖𑄪𑄭–𑄃𑄮 𑄃𑄘𑄟𑄳𑄠 𑄛𑄮, 𑄟𑄪𑄭–𑄃𑄮 𑄃𑄘𑄟𑄳𑄠 𑄛𑄮 𑄆 𑄥𑄬𑄚𑄧𑄖𑄴𑄖𑄬𑄭 𑄇𑄧𑄣𑄪𑄁𑄉𑄬𑅁

𑄃𑄧𑅁

𑄖𑄢 𑄃𑄘𑄟𑄳𑄠 𑄛𑄮 𑄇𑄱𑄰 𑄛𑄢𑄨 𑄚𑄨𑄟𑄮𑄚𑄬 𑄞𑄢𑄨 𑄉𑄧𑄢𑄨 𑄈𑄪𑄎𑄨 𑄦𑄧𑄣𑄧𑅁 𑄥𑄧𑄁 𑄥𑄧𑄁 𑄃𑄘𑄟𑄳𑄠 𑄛𑄮 𑄡𑄧𑄇𑄴𑄬, 𑄃𑄛𑄧𑄘𑄬–𑄝𑄨𑄛𑄧𑄘𑄬 𑄌𑄬𑄝𑄇𑄴𑄨 𑄟𑄧𑄚𑄬 𑄉𑄧𑄣𑄳𑄠𑄧𑅁

𑄟𑄪𑄭 𑄛𑄚𑄴𑄍𑄧𑄢𑄨𑄖𑄴𑄪𑄚𑄴𑅁 𑄟𑄪𑄭 𑄝𑄧𑄢𑄴𑄇𑄧𑄣𑄧𑄖𑄴𑄪𑄚𑄴𑅁 𑄟𑄪𑄭 𑄎𑄪𑄢𑄮 𑄍𑄧𑄢𑄨𑄖𑄴𑄪𑄚𑄴𑅁 𑄟𑄪𑄭 𑄟𑄳𑄦𑄣𑄴𑄍𑄧𑄢𑄨𑄖𑄴𑄪𑄚𑄴𑅁 𑄆𑄇𑄴 𑄆𑄇𑄴 𑄉𑄧𑄢𑄨 𑄌𑄬𑄢𑄴𑄎𑄧𑄚𑄬 𑄖𑄢 𑄎𑄉 𑄚𑄁 𑄘𑄨𑄣𑄬𑄇𑄴𑅁 𑄘𑄨𑄎𑄧𑄚𑄬 𑄇𑄧𑄣𑄇𑄴, 𑄃𑄟𑄨 𑄄𑄙𑄪𑄉𑄮 𑄛𑄮𑅁 𑄥𑄖𑄴𑄎𑄧𑄚𑄧 𑄣𑄧𑄊𑄬 𑄅𑄇𑄴𑄮 𑄦𑄨𑄚𑄴𑄘𑄪 𑄝𑄋𑄣𑄴𑅁 𑄖𑄬 𑄖 𑄌𑄨𑄚𑄴𑄛𑄧𑄢𑄨𑄌𑄧𑄠𑄴 𑄚𑄧 𑄘𑄨𑄣𑄮𑅁 𑄖𑄬 𑄇𑄨𑄌𑄴𑄪 𑄚𑄧 𑄇𑄧𑄣𑄧𑅁 𑄖 𑄥𑄧𑄟𑄌𑄳𑄠𑄉𑄪𑄚𑄧 𑄣𑄧𑄊𑄬 𑄗𑄧𑄘𑄬𑄭 𑄗𑄧𑄘𑄬𑄭 𑄌𑄋𑄴𑄟 𑄇𑄧𑄙 𑄇𑄧𑄠𑄴𑅁 𑄝𑄧𑄢𑄴𑄇𑄧𑄣𑄧𑄖𑄴𑄪𑄚𑄴 𑄆𑄌𑄳𑄠𑄘𑄬 𑄥𑄨𑄝𑄬 𑄇𑄧𑄣𑄧, 𑄞𑄬𑄭, 𑄃𑄟𑄨 𑄖𑄧 𑄥𑄧𑄟𑄌𑄳𑄠𑅁 𑄖𑄧𑄢𑄴 𑄇𑄧𑄚𑄧 𑄌𑄨𑄘𑄬 𑄚𑄬𑄭𑅁 𑄃𑄛𑄧𑄖𑄴–𑄝𑄨𑄛𑄧𑄖𑄴 𑄦𑄧𑄣𑄬 𑄃𑄟𑄢𑄬 𑄇𑄧𑄝𑄬𑅁 𑄃𑄟𑄨 𑄝𑄧𑄣𑄴 𑄘𑄨𑄝𑄧𑄁𑄉𑄨𑅁 𑄄𑄙𑄪 𑄄𑄠𑄬 𑄥𑄖𑄴 𑄝𑄬𑄘𑄟𑄳𑄠 𑄟𑄚𑄪𑄌𑄴 𑄃𑄊𑄧𑄚𑄴𑅁 𑄃𑄟𑄨 𑄇𑄱𑄰 𑄛𑄢𑄨𑅁 𑄚𑄧 𑄘𑄧𑄢𑄬𑄝𑄬𑅁 𑄝𑄪𑄇𑄴 𑄜𑄮𑄣𑄬𑄭 𑄇𑄧𑄙 𑄇𑄧𑄝𑄬𑅁

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄝𑄮 𑄇𑄧𑄣𑄧, 𑄟𑄪𑄭 𑄡𑄧𑄇𑄴𑄬 𑄄𑄙𑄪 𑄆𑄌𑄴𑄍𑄮𑄁 𑄥𑄬𑄇𑄴𑄬 𑄟𑄧𑄢𑄴–𑄃𑄮 𑄇𑄧𑄚𑄧 𑄥𑄧𑄟𑄌𑄳𑄠 𑄚𑄧 𑄆𑄣𑄇𑄴𑅁 𑄌𑄨𑄖𑄴 𑄚𑄧 𑄞𑄨𑄎𑄨𑄘𑄧𑅁 𑄉𑄭 𑄉𑄭 𑄌𑄪𑄙𑄮 𑄟𑄪 𑄉𑄧𑄢𑄨 𑄗𑄬𑄘𑄪𑄁𑅁 𑄄𑄇𑄴𑄬 𑄇𑄧𑄚𑄧 𑄥𑄧𑄟𑄌𑄳𑄠𑄢𑄴 𑄢𑄖𑄴 𑄚𑄬𑄭𑅁 

𑄢𑄋𑄟𑄖𑄳𑄠 𑄛𑄮𑄝𑄮 𑄇𑄧𑄣𑄧, 𑄖𑄧𑄢𑄴 𑄇𑄧𑄝𑄣𑄴 𑄉𑄧𑄟𑄴 𑄘𑄬, 𑄆 𑄖𑄋𑄧𑄢𑄧𑄁, 𑄚𑄧 𑄖𑄋𑄧𑄢𑄧𑄁 𑄥𑄧𑄟𑄌𑄳𑄠 𑄛𑄬𑄣𑄬𑅁

𑄚𑄨𑄟𑄮𑄚𑄬 𑄦𑄎𑄨𑄣𑄮𑅁

𑄎𑄪𑄢𑄮𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄖𑄧 𑄚𑄋𑄚𑄴 𑄇𑄨 𑄘𑄬 𑄞𑄬𑄭𑅃

𑄚𑄨𑄟𑄮𑄚𑄴 𑄌𑄋𑄴𑄟𑅁

𑄚𑄨𑄟𑄮𑄚𑄴 𑄚𑄁 𑄥𑄪𑄚𑄨 𑄝𑄬𑄇𑄴𑄪𑄚𑄬 𑄇 𑄇 𑄉𑄧𑄢𑄨 𑄦𑄎𑄨𑄣𑄬𑄇𑄴𑅁 𑄖𑄢 𑄦𑄎𑄚𑄠𑄴 𑄚𑄨𑄟𑄮𑄚𑄬 𑄆𑄇𑄴𑄇 𑄌𑄪𑄚𑄳𑄠𑄬–𑄟𑄪𑄚𑄳𑄠𑄬 𑄟𑄪 𑄦𑄧𑄣𑄧𑅁 𑄢𑄋𑄟𑄖𑄳𑄠 𑄛𑄮𑄝𑄮 𑄇𑄧𑄣𑄧, 𑄇𑄎𑄌𑄇𑄳𑄢𑄬 𑄌𑄋𑄴𑄟 𑄚𑄁𑅁

𑄛𑄚𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄗𑄇𑄴 𑄃𑄠𑄴 𑄃𑄧𑅁 𑄃𑄟𑄨 𑄡𑄬𑄝𑄧𑄁𑄉𑄬𑅁

𑄞𑄖𑄴 𑄈𑄬𑄭 𑄈𑄠𑄴 𑄡𑄬𑄠𑄮 𑄚𑅁

𑄚𑄧 𑄈𑄬𑄝𑄧𑄁𑅁 𑄃𑄟𑄨 𑄃 𑄆𑄝𑄧𑄁𑅁 𑄥𑄬𑄇𑄴𑄬 𑄃𑄟𑄧𑄚𑄬 𑄈𑄬𑄝𑄧𑄁𑅁 𑄚, 𑄡𑄬𑄝𑄬 𑄃𑄟 𑄣𑄧𑄊𑄬𑅃

𑄚𑄧 𑄡𑄬𑄟𑄴 𑄞𑄬𑄭𑄣𑄧𑄇𑄴𑅁 𑄖𑄪𑄟𑄨 𑄡𑄧𑅁 𑄃𑄢𑄧 𑄆𑄌𑄴𑄍𑄮𑅁

𑄆𑄝𑄧𑄁 𑄆𑄝𑄧𑄁 𑄞𑄬𑄭𑅁

𑄖𑄢 𑄡𑄚𑄠𑄴 𑄚𑄨𑄟𑄮𑄚𑄬 𑄞𑄝𑄬𑄢𑄴 𑄄𑄉𑄪𑄚𑄴 𑄥𑄢𑄨𑄝𑄬𑄇𑄴 𑄛𑄢 𑄛𑄁𑅁 𑄖𑄢–𑄃𑄮 𑄟𑄧 𑄙𑄧𑄇𑄳𑄠𑄬𑄚𑄴 𑄃𑄘𑄟𑄳𑄠 𑄛𑄮𑅁 𑄈𑄣𑄨𑄇𑄴 𑄖𑄢 𑄙𑄧𑄇𑄴𑄇𑄚𑄨 𑄇𑄨 𑄡𑄪𑄘𑄧 𑄡𑄪𑄘𑄧𑅁 𑄣𑄟𑄴𑄝 𑄌𑄪𑄣𑄴𑅁 𑄃𑄙𑄪 𑄥𑄧𑄁 𑄥𑄧𑄁 𑄜𑄘 𑄜𑄘 𑄛𑄬𑄚𑄴𑄘𑄧𑄣𑄧𑄁𑅁 𑄏𑄪𑄉𑄪𑄣𑄪𑄇𑄴 𑄏𑄪𑄉𑄪𑄣𑄪𑄇𑄴 𑄛𑄬𑄚𑄴𑄘𑄧𑄣𑄧𑄁𑅁 𑄇𑄚𑄴 𑄜𑄪𑄢𑄬𑄭𑄠𑄬𑅁 𑄈𑄬𑄋𑄬𑄘 𑄈𑄬𑄋𑄬𑄘𑅁 𑄖𑄢 𑄦𑄬𑄢𑄮𑄄𑄚𑄴 𑄈𑄚𑄴𑄘𑄬 𑄚𑄨𑄟𑄮𑄚𑄬 𑄝𑄪𑄏𑄨 𑄚𑄧 𑄛𑄣𑄳𑄠𑄧𑅁 𑄃𑄝𑄘 𑄉𑄧𑄢𑄨 𑄢𑄋𑄟𑄖𑄳𑄠𑄖𑄴 𑄆𑄌𑄳𑄠𑅁 𑄇𑄧𑄚𑄴𑄚 𑄇𑄨 𑄈𑄠𑄴, 𑄇𑄨 𑄉𑄧𑄢𑄬 𑄇𑄬𑄚𑄬 𑄝𑄪𑄏𑄨𑄝𑄮𑅁 𑄃 𑄦𑄬𑄢𑄮𑄄𑄚𑄴 𑄚𑄁 𑄥𑄪𑄚𑄳𑄠𑄬𑄘𑄬 𑄦𑄬𑄢𑄮𑄄𑄚𑄴 𑄢𑄋 𑄚𑄬 𑄇𑄣, 𑄇𑄬𑄚𑄬 𑄈𑄠𑄴; 𑄦𑄬𑄢𑄮𑄄𑄚𑄴 𑄈𑄬𑄭𑄠𑄬 𑄟𑄚𑄪𑄌𑄴 𑄇𑄬𑄙𑄧𑄇𑄳𑄠𑄬 𑄇𑄱𑄰 𑄚𑄧 𑄛𑄢𑄬𑅁 𑄖 𑄎𑄩𑄝𑄧𑄚𑄧𑄖𑄴 𑄦𑄬𑄢𑄮𑄄𑄚𑄴 𑄈𑄬𑄭𑄠𑄬 𑄚𑄧 𑄘𑄬𑄊𑄬𑅁 𑄃𑄘𑄟𑄧𑄖𑄴 𑄇𑄧𑄚𑄧 𑄦𑄬𑄢𑄮𑄄𑄚𑄴 𑄚𑄧 𑄈𑄚𑄴𑅁

𑄇𑄪𑄘𑄴𑄫𑄢𑄧𑄖𑄴 𑄡𑄬𑄭 𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄅𑄇𑄴𑄮 𑄛𑄬𑄣𑄧𑄁𑅁 𑄄𑄝𑄬𑄣𑄱𑄰 𑄘𑄨𑄚𑄴 𑄇𑄧𑄘𑄧𑄇𑄴 𑄛𑄢𑄨𑄝𑄧𑄁𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄇𑄧𑄠𑄬𑄇𑄴𑄘𑄨𑄚𑄴 𑄊𑄧𑄢𑄧𑄖𑄴𑄪𑄚𑄴 𑄖𑄬𑄋 𑄟𑄉 𑄚𑄧 𑄛𑄧𑄢𑄨𑄝𑄮𑅁 𑄌𑄪𑄢𑄴–𑄃𑄮 𑄉𑄧𑄢 𑄛𑄧𑄖𑄴𑄧 𑄚𑄧𑄠𑄴𑅁

𑄍𑄧𑄠𑄴

𑄖𑄢 𑄖𑄬𑄟𑄴𑄟𑄁 𑄉𑄧𑄢𑄨 𑄡𑄘𑄧𑄚𑄴 𑄇𑄬𑄚𑄬 𑄛𑄉𑄧𑄖𑄴 𑄜𑄬𑄣𑄬𑄝𑄇𑄴 𑄚𑄨𑄟𑄮𑄚𑄧𑄢𑄬𑅁 𑄖𑄢 𑄥𑄧𑄟𑄌𑄳𑄠 𑄝𑄚𑄬𑄭 𑄛𑄣𑄳𑄠𑄬 𑄥𑄣𑄬𑄚𑄴 𑄇𑄧𑄙 𑄚𑄬𑄭𑅁 𑄛𑄉𑄧𑄖𑄴 𑄜𑄬𑄣𑄬𑄭 𑄚𑄧 𑄛𑄢𑄴𑄣𑄬 𑄖𑄖𑄴𑄪𑄚𑄴 𑄇𑄬𑄚𑄬 𑄖𑄬𑄋 𑄈𑄪𑄠𑄬𑄝𑄇𑄴 𑄝𑄪𑄘𑄴𑄙𑄨 𑄈𑄘𑄘𑄧𑄚𑄴𑅁 𑄖𑄢 𑄛𑄭𑄮𑄣𑄬 𑄖𑄬𑄋 𑄇𑄧𑄙 𑄚𑄧 𑄇𑄧𑄝𑄇𑄴, 𑄝𑄚𑄳𑄦 𑄝𑄬𑄢 𑄡𑄬𑄝𑄇𑄴, 𑄒𑄨𑄇𑄴 𑄉𑄧𑄢𑄨𑄣𑄬𑄇𑄴𑅁 𑄆𑄌𑄳𑄠 𑄡𑄘𑄬, 𑄇𑄬𑄣𑄳𑄠 𑄡𑄘𑄬 𑄆𑄇𑄴𑄇 𑄥𑄧𑄘𑄧𑄢𑄴𑄦𑄱𑄰 𑄛𑄢𑄴𑄣𑄬 𑄇𑄟𑄴𑄦𑄱𑄰𑄠𑄬𑅁 𑄡𑄪𑄚𑄨 𑄘𑄧𑄣𑄧𑄖𑄴 𑄞𑄨𑄢𑄬𑄭 𑄚𑄧 𑄛𑄢𑄧𑄚𑄴 𑄥𑄣𑄬𑄚𑄴 𑄃𑄚𑄴𑄘𑄎𑄴 𑄝𑄪𑄏𑄨 𑄇𑄟𑄴 𑄉𑄧𑄢𑄨𑄝𑄬𑄇𑄴𑅁 𑄡𑄬𑄚𑄬 𑄛𑄢𑄨 𑄖𑄢𑄬 𑄃𑄟 𑄘𑄧𑄣𑄧𑄖𑄴 𑄞𑄨𑄢 𑄛𑄧𑄢𑄨𑄝𑄮𑅁

𑄎𑄪𑄢𑄮𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄚𑄨𑄟𑄮𑄚𑄴 𑄚𑄋𑄚𑄴 𑄛𑄪𑄢𑄨 𑄜𑄬𑄣𑄬𑄭 𑄇𑄧𑄣𑄧, 𑄇𑄨 𑄚𑄁 𑄇𑄧𑄣𑄧𑄘𑄬𑅃

𑄝𑄧𑄢𑄴𑄇𑄧𑄣𑄴 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄚𑄨𑄢𑄴𑄟𑄧𑄣𑄴 𑄚𑄧𑄠𑄴 𑄚𑄬𑅁

𑄛𑄚𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄖𑄧𑄢𑄴 𑄟𑄙 𑄚𑄨𑄢𑄴𑄟𑄧𑄣𑄴𑅁 𑄚𑄨𑄢𑄧𑄚𑄴𑄎𑄧𑄚𑄴𑅁

𑄦𑄨𑄚𑄴𑄘𑄪 𑄝𑄋𑄣𑄳𑄠 𑄇𑄧𑄣𑄧, 𑄚𑄨𑄢𑄴𑄟𑄧𑄣𑄴–𑄃𑄮 𑄚𑄧𑄠𑄴, 𑄚𑄨𑄢𑄧𑄚𑄴𑄎𑄧𑄚𑄴–𑄃𑄮 𑄚𑄧𑄠𑄴𑅁 𑄖𑄢𑄴 𑄚𑄁 𑄚𑄨𑄟𑄮𑄚𑄴𑅁

𑄍𑄧𑄎𑄧𑄚𑄬 𑄖𑄢𑄬 𑄖𑄬 𑄘𑄪𑄌𑄴 𑄘𑄬–𑄘𑄨 𑄉𑄧𑄖𑄴𑄗𑄧𑄚𑄴𑅁 𑄆𑄇𑄴𑄇𑄚 𑄇𑄨 𑄃𑄝𑄘 𑄉𑄧𑄢𑄨 𑄎𑄘𑄧𑄢𑄴 𑄑𑄚𑄴 𑄆𑄣𑄧𑅁 𑄇𑄧𑄣𑄇𑄴, 𑄃𑄟𑄨 𑄞𑄨𑄣𑄬 𑄌𑄋𑄴𑄟𑅁 𑄌𑄋𑄴𑄟𑄦𑄱𑄰𑄚𑄬 𑄌𑄋𑄴𑄟 𑄚𑄋𑄚𑄨 𑄦𑄨𑄘𑄮𑄖𑄴 𑄚𑄧 𑄗𑄠𑄴𑅁 𑄇𑄨𑄝𑄧𑄠𑄴 𑄖𑄖𑄴𑄪𑄚𑄴 𑄟𑄧𑄚𑄧𑄖𑄴 𑄃𑄊𑄬𑅁

𑄦𑄨𑄚𑄴𑄘𑄪 𑄝𑄋𑄣𑄳𑄠 𑄆𑄇𑄴𑄇 𑄛𑄧𑄚𑄴𑄓𑄨𑄖𑄴 𑄌𑄬𑄘𑄬𑄭 𑄇𑄧𑄣𑄧, 𑄖𑄧𑄟 𑄌𑄋𑄴𑄟 𑄚𑄋𑄚𑄨 𑄃𑄟𑄢𑄴 𑄡𑄧𑄗𑄬𑄥𑄴𑄑𑄧 𑄙𑄢𑄧𑄕 𑄃𑄊𑄬𑅁

𑄇𑄧𑄙𑄚𑄴 𑄌𑄋𑄴𑄟𑄠𑄴 𑄝𑄁𑄣𑄠𑄴 𑄇𑄧𑄣𑄧𑅁

𑄚𑄨𑄟𑄮𑄚𑄬 𑄗𑄠𑄴𑄘𑄬 𑄊𑄧𑄢𑄚𑄴 𑄌𑄨𑄉𑄮𑄚𑄴𑅁 𑄊𑄧𑄢𑄚𑄴 𑄝𑄬𑄢𑄴𑄌𑄉 𑄝𑄬𑄌𑄴𑄍𑄬 𑄃 𑄑𑄮𑄚𑄮𑄥𑄨𑄚𑄨𑅁 𑄆𑄇𑄴𑄬 𑄇𑄪𑄌𑄴𑄬–𑄟𑄪𑄌𑄴𑄬𑅁 𑄗𑄘𑄬 𑄞𑄢𑄨 𑄉𑄧𑄟𑄴 𑄛𑄢𑄴 𑄚𑄨𑄟𑄮𑄚𑄬𑅁 𑄖 𑄞𑄖𑄴 𑄖𑄬 𑄚𑄨𑄎𑄬𑄭 𑄢𑄚𑄨 𑄈𑄠𑄴𑅁 𑄖𑄬 𑄃𑄘𑄟𑄳𑄠 𑄛𑄮𑅁 𑄞𑄖𑄴 𑄢𑄚 𑄖𑄢𑄴 𑄃𑄧𑄞𑄳𑄠𑄥𑄴 𑄃𑄊𑄬𑅁 𑄚𑄨𑄟𑄮𑄚𑄬 𑄟𑄬𑄑𑄳𑄢𑄨𑄇𑄴 𑄛𑄥𑄴 𑄉𑄧𑄢𑄨 𑄥𑄧𑄟𑄌𑄳𑄠 𑄛𑄉𑄧𑄖𑄴 𑄛𑄧𑄢𑄨 𑄆𑄇𑄴𑄛𑄧𑄣𑄴𑄣 𑄇𑄖𑄴𑄮𑄚𑄧𑄖𑄴 𑄡𑄬𑄠𑄳𑄠𑄬𑅁 𑄆𑄇𑄴 𑄟𑄥𑄴 𑄥𑄧𑄁 𑄢𑄧𑄠𑄬𑄉𑄱𑄰𑅁 𑄇𑄖𑄴𑄮𑄚𑄧𑄖𑄴 𑄡𑄬𑄭𑄚𑄬 𑄆𑄇𑄴 𑄟𑄥𑄴 𑄥𑄧𑄁 𑄖 𑄞𑄖𑄴 𑄖𑄬 𑄢𑄚𑄬, 𑄃 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄥𑄧𑄟𑄌𑄳𑄠 𑄞𑄖𑄴 𑄢𑄚𑄨 𑄘𑄨 𑄛𑄠𑄴𑅁 𑄊𑄧𑄢𑄧𑄖𑄴 𑄗𑄉𑄧𑄘𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄞𑄖𑄴 𑄢𑄚𑄬𑅁 𑄥𑄬 𑄃𑄧𑄞𑄳𑄠𑄥𑄴𑄥𑄚𑄴 𑄆𑄝𑄧 𑄃𑄊𑄬𑅁 𑄄𑄇𑄴𑄬 𑄞𑄖𑄴 𑄢𑄚𑄧𑄘𑄬 𑄃 𑄝𑄬𑄌𑄴 𑄉𑄧𑄟𑄴 𑄘𑄢𑄧𑄝𑄮 𑄖𑄮𑄉 𑄚𑄧 𑄛𑄧𑄢𑄬𑅁 𑄇𑄣𑄨𑄦𑄱𑄰 𑄚𑄧 𑄛𑄠𑄴𑅁 𑄉𑄳𑄠𑄥𑄧 𑄌𑄪𑄣𑄮𑄝𑄮𑄖𑄴 𑄛𑄨𑄣𑄬𑄝𑄮 𑄖𑄪𑄣𑄨 𑄘𑄨𑄣𑄬 𑄦𑄧𑄠𑄴𑅁 𑄉𑄭 𑄉𑄭 𑄞𑄖𑄴 𑄢𑄚𑄨 𑄈𑄚 𑄌𑄨𑄉𑄮𑄚𑄴 𑄛𑄨𑄣𑄬𑄣𑄱𑄰 𑄞𑄢𑄨 𑄙𑄛𑄴 𑄚𑄨𑄟𑄮𑄚𑄧𑄢𑄴𑅁 𑄡𑄬𑄚𑄴 𑄙𑄛𑄴 𑄥𑄬𑄚𑄴 𑄈𑄬𑄭 𑄛𑄢𑄴 𑄄𑄇𑄴𑄬𑅁 𑄝𑄚𑄳𑄦 𑄖𑄮𑄚𑄴 𑄢𑄚𑄧𑄘𑄬 𑄃𑄣𑄴𑄥𑄨 𑄉𑄧𑄢𑄬𑄘𑄬𑅁 𑄥𑄨𑄠𑄬𑄚𑄴 𑄦𑄧𑄣𑄧𑄘𑄬 𑄟𑄧𑄢𑄨𑄌𑄴 𑄝𑄘𑄚𑅁 𑄟𑄧𑄢𑄨𑄌𑄴𑄪𑄚𑄴 𑄏𑄉𑄖𑄴𑄪𑄚𑄴 𑄃𑄚𑄨 𑄇𑄧𑄘𑄧𑄢𑄖𑄴 𑄗𑄱𑄰 𑄝𑄧𑄙𑄪𑄚𑄨 𑄏𑄧𑄢𑄬𑄭 𑄛𑄚𑄨 𑄃𑄚𑄨 𑄟𑄧𑄢𑄨𑄌𑄴𑄪𑄚𑄴 𑄙𑄧𑄚𑅁 𑄇𑄪𑄌𑄴𑄍𑄬𑄝𑄮 𑄃𑄚𑄨 𑄇𑄪𑄌𑄴𑄍𑄬𑄝𑄮 𑄙𑄧𑄚𑅁 𑄟𑄧𑄢𑄨𑄌𑄴𑄪𑄚𑄴 𑄇𑄪𑄌𑄴𑄍𑄬𑄝𑄮𑄖𑄴 𑄘𑄬𑄚, 𑄘𑄣𑄴𑄉𑄌𑄴𑄍𑄮 𑄘𑄧𑄞𑄇𑄙𑄨 𑄝𑄌𑄴𑄍𑄪𑄖𑄴𑄪𑄚𑄴 𑄃𑄚𑄨 𑄙𑄧𑄚𑅁 𑄖𑄬 𑄝𑄧𑄏𑄚𑅁 𑄖𑄬 𑄟𑄧𑄢𑄨𑄌𑄴 𑄝𑄘𑄚𑅁 𑄟𑄧𑄢𑄨𑄌𑄴 𑄝𑄘 𑄦𑄧𑄣𑄬 𑄌𑄟𑄬𑄌𑄴𑄌𑄚𑄨 𑄟𑄧𑄢𑄨𑄌𑄴𑄌𑄚𑄴 𑄇𑄪𑄌𑄴𑄍𑄬𑄝𑄮𑄖𑄴𑄪𑄚𑄴 𑄌𑄟𑄬𑄌𑄴𑄌𑄰𑄱 𑄇𑄧𑄘𑄧𑄢𑄖𑄴 𑄗𑄧𑄚𑅁 𑄖𑄬 𑄘𑄣𑄴𑄉𑄌𑄴𑄍𑄮 𑄃 𑄇𑄪𑄌𑄴𑄍𑄬𑄝𑄮 𑄙𑄱𑄰𑄚𑄬, 𑄘𑄣𑄴𑄉𑄌𑄴𑄍𑄮 𑄗𑄧𑄚, 𑄘𑄧𑄞𑄇𑄙𑄨 𑄝𑄌𑄴𑄍𑄪𑄖𑄴𑅁 𑄇𑄪𑄌𑄴𑄍𑄬𑄝𑄮 𑄗𑄧𑄚 𑄃𑄢𑄳𑄦𑄧𑄖𑄴𑅁 𑄌𑄧𑄢𑄮𑄚𑄴𑄙𑄧𑄢𑄝𑄮 𑄃𑄚𑄨 𑄟𑄧𑄢𑄨𑄎𑄧 𑄝𑄧𑄙𑄪𑄚𑄨 𑄌𑄪𑄢𑄨 𑄜𑄬𑄣𑄚𑅁 𑄅𑄂! 𑄇𑄨 𑄃𑄣𑄴𑄥𑄨 𑄉𑄧𑄢𑄬 𑄛𑄢𑅁 𑄆𑄙𑄧𑄇𑄴𑄇𑄚𑄨 𑄇𑄬𑄚𑄬 𑄉𑄧𑄖𑄴𑄧! 𑄞𑄝𑄬 𑄚𑄨𑄟𑄮𑄚𑄬𑅁

𑄊𑄧𑄢𑄧 𑄟𑄪𑄎𑄪𑄋𑄬𑄘𑄨 𑄌𑄨𑄉𑄮𑄚𑄴 𑄅𑄙𑄮𑄚𑄚𑄴𑅁 𑄘𑄬𑄝𑄝𑄮 𑄏𑄧𑄢𑄴 𑄚𑄧 𑄘𑄨𑄣𑄬, 𑄥𑄁𑄥𑄋𑄳𑄠 𑄦𑄧𑄣𑄬 𑄅𑄙𑄮𑄚𑄧𑄖𑄴 𑄝𑄧𑄏𑄨 𑄗𑄬𑄭 𑄛𑄢𑄬𑅁 𑄏𑄧𑄢𑄴 𑄘𑄨𑄣𑄬 𑄊𑄧𑄢𑄧 𑄥𑄏𑄨 𑄘𑄬𑄭𑄣𑄝𑄮𑄖𑄴 𑄝𑄱𑄰–𑄃𑄮 𑄗𑄬𑄭 𑄛𑄢𑄬𑅁 𑄅𑄙𑄮𑄚𑄧𑄖𑄴 𑄅𑄇𑄴𑄮 𑄥𑄨𑄅𑄣𑄩 𑄜𑄪𑄣𑄧 𑄉𑄍𑄴 𑄃𑄊𑄬𑅁 𑄢𑄬𑄘𑄮𑄖𑄴 𑄦𑄧𑄣𑄬 𑄜𑄪𑄣𑄴 𑄜𑄪𑄘𑄧𑄚𑄴𑅁 𑄖𑄪𑄟𑄴𑄝𑄌𑄴 𑄚𑄳𑄦𑄨𑄉𑄨𑄣𑄬𑅁 𑄥𑄏𑄧𑄚𑄳𑄠 𑄃𑄧𑄇𑄴𑄖𑄧𑄖𑄴 𑄜𑄪𑄣𑄪𑄚𑄴 𑄜𑄪𑄘𑄨 𑄙𑄧𑄣𑄴 𑄛𑄧𑄦𑄴𑄢𑄴 𑄃𑄧𑄇𑄴𑄖𑄧𑄖𑄴 𑄏𑄧𑄢𑄨 𑄛𑄧𑄢𑄧𑄚𑄴𑅁 𑄏𑄧𑄢𑄨 𑄛𑄧𑄌𑄳𑄠 𑄥𑄨𑄅𑄣𑄩 𑄜𑄪𑄣𑄪𑄚𑄴 𑄉𑄌𑄴𑄍𑄮 𑄉𑄮𑄢𑄖𑄴 𑄛𑄧𑄢𑄨 𑄗𑄚𑄴 𑄙𑄪𑄛𑄴 𑄉𑄧𑄢𑄨𑅁 𑄡𑄬 𑄜𑄪𑄣𑄪𑄚𑄴 𑄟𑄘𑄨𑄖𑄴 𑄛𑄧𑄢𑄨 𑄚𑄧 𑄛𑄢𑄧𑄚𑄴 𑄥𑄬 𑄜𑄪𑄣𑄮𑄚𑄴 𑄛𑄘𑄖𑄴 𑄝𑄏𑄨 𑄗𑄚𑄴𑅁 𑄝𑄪𑄠𑄬𑄢𑄴 𑄆𑄣𑄬 𑄥𑄬 𑄜𑄪𑄣𑄪𑄚𑄴–𑄃𑄮 𑄟𑄘𑄨𑄖𑄴 𑄏𑄧𑄢𑄨 𑄛𑄧𑄌𑄳𑄠 𑄜𑄪𑄣𑄮 𑄣𑄧𑄊𑄬 𑄥𑄧𑄟𑄢𑄨 𑄦𑄧𑄚𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄨𑄟𑄮𑄚𑄧𑄢𑄬 𑄌 𑄡𑄚𑄴 𑄖 𑄟𑄟𑄪𑄣𑄱𑄰 𑄟𑄟𑄨𑅁 𑄇𑄧𑄚𑄧 𑄘𑄨𑄘𑄬𑄴𑄢𑄨 𑄦𑄧𑄢𑄴 𑄚𑄇𑄨 𑄛𑄪𑄏𑄮𑄢𑄴 𑄉𑄧𑄢𑄧𑄚𑄴𑅁 

𑄄𑄚𑄴𑄘𑄨 𑄃𑄣𑄮 𑄝𑄨𑄇𑄥𑄬 𑄇𑄧𑄣𑄬𑄎𑄧𑄖𑄴 𑄡𑄘𑄬, 𑄥𑄧𑄟𑄌𑄳𑄠𑄣𑄱𑄰 𑄝𑄬𑄢𑄘𑄬 𑄚𑄨𑄟𑄮𑄚𑄧𑄢𑄬 𑄛𑄪𑄢𑄨 𑄜𑄬𑄣𑄳𑄠𑄬𑄉𑄱𑄰𑅁 𑄃𑄝𑄙 𑄉𑄧𑄢𑄨 𑄦𑄨𑄘𑄮𑄖𑄴 𑄅𑄙𑄨 𑄇𑄧𑄣𑄧, 𑄃𑄮𑄟! 𑄚𑄨𑄟𑄮𑄚𑄬 𑄇𑄬𑄚𑄬 𑄃𑄊𑄬, 𑄌 𑄘𑄧 𑄛𑄧𑄢𑄨𑄝𑄮𑄉𑄱𑄰𑅁 𑄆𑄙𑄧𑄇𑄴 𑄞𑄨𑄣𑄧𑄚𑄴 𑄖𑄬 𑄦𑄧𑄣𑄬 𑄟𑄧𑄢𑄬 𑄃𑄏 𑄦𑄢𑄬𑄠𑄳𑄠𑄬 𑄦𑄧𑄝𑄧𑅁 𑄃𑄣𑄮 𑄝𑄨𑄇𑄥𑄬 𑄎𑄬𑄢𑄴 𑄚𑄧 𑄜𑄬𑄣𑄬𑄭 𑄚𑄨𑄟𑄮𑄚𑄧 𑄥𑄨𑄙𑄪 𑄉𑄬𑄣𑄧, 𑄚𑄨𑄟𑄮𑄚𑄧𑄢𑄬 𑄖𑄮𑄉𑄬𑄭 𑄖𑄮𑄉𑄬𑄭𑅁 𑄖𑄮𑄉𑄘𑄬 𑄖𑄮𑄉𑄘𑄬 𑄥𑄪𑄇𑄴 𑄛𑄬𑄣𑄧𑄉𑄱𑄰𑅁 𑄚𑄨𑄟𑄮𑄚𑄬 𑄗𑄠𑄴𑄘𑄬 𑄇𑄣𑄨𑄚𑄴𑄘𑄨𑄛𑄪𑄢𑄧𑄖𑄴𑅁 𑄚𑄨𑄟𑄮𑄚𑄧𑄢𑄬 𑄘𑄬𑄊𑄨 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄬𑄎𑄚𑄴 𑄃𑄊𑄧𑄌𑄴 𑄞𑄬𑄭𑅃

𑄉𑄧𑄟𑄴 𑄃𑄊𑄧𑄁 𑄘𑄧 𑄘𑅁

𑄝𑄂! 𑄊𑄧𑄢𑄚𑄴 𑄞𑄢𑄨 𑄘𑄮𑄣𑄴 𑄘𑄬𑄊𑄧𑄋𑄧𑄢𑄴𑅁 𑄖𑄬 𑄛𑄚𑄴 𑄇𑄧𑄘𑄧𑄇𑄧𑅃

𑄘𑄬𑄢𑄴 𑄃𑄎𑄢𑄴𑅁 𑄝𑄧𑄌𑄴 𑄘𑅁

𑄃𑄣𑄮 𑄝𑄨𑄇𑄥𑄬 𑄝𑄧𑄣𑄧𑅁

𑄖𑄬 𑄘 𑄇𑄪𑄚𑄴𑄘𑄨𑄖𑄴𑄪𑄚𑄴 𑄆𑄣𑄬𑅃

𑄖𑄧𑄢𑄬 𑄦𑄨𑄘𑄮𑄖𑄴 𑄅𑄙𑄨 𑄊𑄧𑄢𑄧𑄖𑄴𑄪𑄚𑄴 𑄆𑄣𑄪𑄋𑄳𑄠𑅁

𑄆𑄙𑄧𑄇𑄴 𑄞𑄨𑄣𑄧𑄚𑄴 𑄟𑄬 𑅃

𑄃𑄣𑄮 𑄝𑄨𑄇𑄥𑄬 𑄦𑄎𑄨 𑄦𑄎𑄨 𑄇𑄧𑄣𑄧, 𑄃𑄎𑄧𑄘𑄬 𑄇𑄨 𑄇𑄮𑄟𑄴 𑄞𑄬𑄭! 𑄆𑄌𑄳𑄠–𑄃𑄮 𑄆𑄏𑄚 𑄚𑄧 𑄦𑄧𑄘𑄧𑅁 𑄇𑄨 𑄃𑄝𑄙 𑄉𑄧𑄢𑄨 𑄦𑄨𑄘𑄮𑄖𑄴 𑄅𑄗𑄳𑄠𑄬 𑄖𑄧𑄢𑄬𑅁 𑄇𑄧𑄣𑄬𑄎𑄧𑄖𑄴 𑄚𑄧 𑄡𑄬𑄭 𑄆 𑄟𑄧𑄇𑄳𑄠 𑄆𑄣𑄪𑄁𑄉𑄬𑅁

𑄇𑄧𑄣𑄬𑄎𑄧𑄖𑄴 𑄡𑄬𑄭 𑄝𑄬𑄣𑄳𑄠 𑄘𑄧 𑄆𑄙𑄬 𑄛𑄖𑄴𑄬𑅁 𑄄𑄙𑄪 𑄗𑄬𑄭 𑄛𑄣𑄳𑄠𑄬𑄚𑄴𑅁

𑄇𑄧𑄣𑄬𑄎𑄧𑄖𑄴 𑄉𑄬𑄣𑄬 𑄥𑄧𑄟𑄌𑄳𑄠𑄉𑄪𑄚𑄴 𑄣𑄊𑄧𑄖𑄴 𑄛𑄬𑄣𑄬 𑄇𑄪𑄚𑄴𑄘𑄨 𑄛𑄧𑄢𑄧𑄁𑄉𑄱𑄰 𑄅𑄘𑄮 𑄚𑄬𑄭𑅁

𑄆𑄌𑄴𑄍𑄮𑄌𑄴 𑄉𑄧𑄟𑄴𑄦𑄱𑄰𑄠𑄬𑅁 𑄇𑄧𑄣𑄬𑄎𑄴 𑄉𑄧𑄢𑄨 𑄚𑄧 𑄛𑄬𑄣𑄬 𑄘𑄬 𑄃𑄭𑅁

𑄘𑄨𑄚𑄴 𑄟𑄭𑄚𑄬–𑄃𑄮 𑄛𑄢𑄬 𑄘𑄬 𑄚𑄬𑅁 𑄖𑄬 𑄖𑄧 𑄞𑄧𑄖𑄴𑄖𑄨 𑄦𑄧𑄚 𑄇𑄧𑄟𑄧𑄣𑄬 𑄦𑄧𑄢𑄴𑅃

𑄟𑄟𑄪–𑄃𑄮 𑄚𑄧 𑄖𑄋𑄧𑄢𑄬𑄢𑄴𑅁 𑄉𑄭 𑄉𑄭 𑄡𑄬𑄝𑄢𑄧 𑄟𑄧𑄚𑄬 𑄚𑄧 𑄇𑄧𑄠𑄴𑅁

𑄃 𑄖𑄧 𑄟𑄟𑄪 𑄇𑄨𑄖𑄴𑄖𑄬𑄭 𑄣𑄉𑄬𑄖𑄴𑄬! 𑄖𑄪𑄭 𑄡𑄬𑄌𑄴, 𑄟𑄪𑄭 𑄝𑄬𑄇𑄴𑄇𑄚𑄨 𑄒𑄨𑄇𑄴 𑄉𑄧𑄢𑄨 𑄘𑄨𑄟𑄴𑅁

𑄦𑄱𑄰𑄠𑄬 𑄘𑅁 𑄖𑄧 𑄇𑄧𑄙 𑄥𑄪𑄚𑄨 𑄟𑄪𑄭 𑄈𑄪𑄎𑄨 𑄦𑄮𑄣𑄪𑄁𑅁

𑄘𑄨𑄎𑄧𑄚𑄬 𑄇𑄧𑄙 𑄇𑄧𑄙𑄬 𑄇𑄧𑄙𑄬 𑄝𑄬𑄣𑄴 𑄞𑄣𑄧𑄘𑄴𑄫𑄢𑄴 𑄅𑄙𑄨𑄣𑄧𑅁 𑄚𑄨𑄟𑄮𑄚𑄬 𑄇𑄧𑄣𑄧, 𑄃𑄣𑄮 𑄘, 𑄚𑄧 𑄡𑄬𑄌𑄴, 𑄄𑄙𑄪 𑄞𑄖𑄴 𑄈𑄬𑄌𑄴𑅁

𑄇𑄧𑄚𑄴𑄚 𑄢𑄚𑄨 𑄘𑄬𑅃

𑄟𑄪𑄭 𑄢𑄚𑄧𑄁𑄉𑄬𑅁

𑄝𑄂! 

𑄇𑄢𑄬 𑄘𑄪𑄈𑄴 𑄘𑄨𑄟𑄴𑅁

𑄞𑄖𑄴 𑄢𑄚𑄧𑄘𑄬 𑄃𑄣𑄴𑄥𑄨 𑄚𑄧 𑄉𑄧𑄢𑄬𑅃

𑄚𑄙𑄬𑄭 𑄘𑅁

𑄊𑄧𑄢𑄚𑄴 𑄘𑄮𑄣𑄴 𑄘𑄬𑄊𑄧𑄋𑄧𑄢𑄴𑅁 𑄌𑄪𑄝𑄬–𑄌𑄝𑄬 𑄗𑄬𑄝𑄢𑄴 𑄟𑄧𑄚𑄬 𑄚𑄧 𑄇𑄧𑄣𑄬, 𑄖𑄧𑄢𑄬 𑄘𑄪𑄈𑄴 𑄘𑄨𑄟𑄴𑄝𑄨𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄖𑄮𑄌𑄴𑄍𑄬 𑄉𑄧𑄢𑄨𑄟𑄴𑄝𑄨𑅁

𑄥𑄨𑄠𑄬𑄚𑄴 𑄇𑄨 𑄘𑄪𑄈𑄴𑅁 𑄖𑄪𑄭 𑄆𑄣𑄬 𑄟𑄪𑄭 𑄈𑄪𑄎𑄨 𑄦𑄮𑄟𑄴𑅁

𑄉𑄧𑄛𑄴–𑄥𑄧𑄛𑄴 𑄘𑄨 𑄚𑄨𑄟𑄮𑄚𑄬 𑄇𑄧𑄣𑄧, 𑄝𑄧𑄌𑄴 𑄘, 𑄟𑄪𑄭 𑄞𑄖𑄴 𑄛𑄨𑄣𑄬𑄝𑄮 𑄛–𑄖𑄴 𑄘𑄮𑄁𑅁

𑄚𑄨𑄟𑄮𑄚𑄬 𑄞𑄖𑄴 𑄢𑄚𑄧𑄘𑄬 𑄢𑄚𑄧𑄘𑄬 𑄇𑄧𑄙 𑄇𑄧𑄠𑄴𑅁 𑄃𑄣𑄮 𑄝𑄨𑄇𑄥𑄬 𑄛𑄬𑄛𑄢𑄴 𑄛𑄧𑄢𑄳𑄦𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬𑅁 𑄇𑄧𑄙–𑄝𑄖𑄴𑄖𑄠𑄴 𑄞𑄖𑄴 𑄢𑄚𑄨 𑄜𑄪𑄢𑄬𑄣𑄧 𑄚𑄨𑄟𑄮𑄚𑄬𑅁 𑄞𑄖𑄴 𑄈 𑄝𑄱𑄰𑄚𑄬 𑄖𑄮𑄚𑄚𑄨 𑄥𑄮𑄖𑄴 𑄛𑄬𑄭 𑄃𑄣𑄮 𑄝𑄨𑄇𑄥𑄬 𑄞𑄢𑄨 𑄉𑄧𑄢𑄨 𑄚𑄨𑄟𑄮𑄚𑄧𑄢𑄬 𑄝𑄄𑄚𑄨 𑄉𑄧𑄣𑄳𑄠𑄧𑅁 𑄇𑄧𑄣𑄧, 𑄖𑄧 𑄙𑄧𑄇𑄳𑄠𑄚𑄴 𑄟𑄨𑄣𑄬𑄉𑄪𑄚𑄬–𑄃𑄮 𑄖𑄮𑄚𑄴 𑄢𑄚𑄨 𑄚𑄧 𑄎𑄚𑄨𑄝𑄬𑄇𑄴𑅁 𑄟𑄪𑄭 𑄈𑄣𑄨𑄇𑄴 𑄖𑄧𑄢𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄖𑄮𑄌𑄴𑄍𑄬 𑄣𑄉𑄬𑄟𑄴𑄝𑄨𑅁 𑄥𑄮𑄖𑄳𑄠 𑄖𑄮𑄚𑄴 𑄈 𑄆𑄟𑄴𑅁 𑄃𑄣𑄮 𑄝𑄨𑄇𑄥𑄧𑄢𑄴 𑄝𑄄𑄚𑄨 𑄛𑄬𑄭 𑄚𑄨𑄟𑄮𑄚𑄬 𑄦𑄎𑄬𑅁 𑄇𑄖𑄴𑄮𑄚𑄧𑄖𑄴 𑄡𑄬𑄭 𑄡𑄧𑄇𑄴𑄬 𑄞𑄖𑄴 𑄢𑄚𑄨𑄝𑄮, 𑄖𑄮𑄚𑄚𑄨 𑄡𑄧𑄇𑄴𑄬 𑄥𑄮𑄖𑄴 𑄛𑄬𑄝𑄇𑄴, 𑄥𑄧𑄇𑄴𑄬 𑄚𑄨𑄟𑄮𑄚𑄧𑄢𑄬 𑄝𑄄𑄚𑄨 𑄉𑄧𑄖𑄴𑄖𑄇𑄴 𑄝𑄬𑄇𑄴 𑄇𑄖𑄴𑄮𑄚𑄳𑄠𑄉𑄪𑄚𑄬𑅁 𑄇𑄧𑄙𑄇𑄴, 𑄚𑄨𑄟𑄮𑄚𑄴, 𑄖𑄪𑄭 𑄆𑄇𑄴𑄨 𑄖𑄮𑄚𑄴 𑄥𑄮𑄖𑄴 𑄉𑄧𑄢𑄨 𑄢𑄚𑄨 𑄎𑄚𑄧𑄌𑄴! 𑄃𑄣𑄮 𑄝𑄨𑄇𑄥𑄧𑄢𑄴 𑄝𑄄𑄚𑄨 𑄥𑄪𑄚𑄨 𑄇𑄖𑄴𑄮𑄚𑄧𑄖𑄴 𑄡𑄬𑄠𑄳𑄠𑄬 𑄟𑄚𑄪𑄌𑄴𑄪𑄚𑄧𑄢𑄴 𑄝𑄄𑄚𑄨 𑄦𑄨𑄘𑄮𑄖𑄴 𑄅𑄙𑄨𑄣𑄧𑅁 𑄞𑄖𑄴–𑄖𑄘𑄴 𑄈𑄬𑄭 𑄗𑄎𑄬 𑄉𑄧𑄛𑄴 𑄘𑄨 𑄃𑄣𑄮 𑄝𑄨𑄇𑄥𑄬 𑄖 𑄊𑄧𑄢𑄧𑄖𑄴 𑄡𑄢𑄴𑅁 𑄚𑄨𑄟𑄮𑄚𑄬 𑄇𑄧𑄣𑄧 𑄃𑄢𑄧 𑄝𑄬𑄢 𑄆𑄝𑄖𑄴𑄖𑄬𑄭𑅁

𑄆𑄇𑄴 𑄥𑄛𑄴𑄖 𑄛𑄧𑄢𑄬𑄘𑄨 𑄚𑄨𑄟𑄮𑄚𑄬 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄣𑄧𑅁 𑄖 𑄝𑄨𑄖𑄴𑄖𑄨 𑄛𑄬𑄠𑄳𑄠𑄬 𑄇𑄝𑄪𑄌𑄴𑄍𑄚𑄨 𑄘𑄬𑄊𑄨 𑄌𑄋𑄴𑄟 𑄟𑄌𑄴𑄖𑄧𑄢𑄪𑄚𑄬 𑄈𑄪𑄎𑄨 𑄦𑄧𑄣𑄇𑄴𑅁 𑄝𑄋𑄣𑄴 𑄟𑄌𑄴𑄖𑄧𑄢𑄴 𑄃 𑄇𑄧𑄣𑄬𑄎𑄧 𑄚𑄚𑄪𑄝𑄱𑄰 𑄌𑄮𑄈𑄴 𑄛𑄉𑄬𑄭 𑄢𑄨𑄚𑄨 𑄌𑄬𑄣𑄧 𑄚𑄨𑄟𑄮𑄚𑄧𑄢𑄬𑅁 𑄟𑄪𑄢𑄬 𑄟𑄪𑄢𑄬 𑄦𑄨𑄁𑄥𑄬 𑄉𑄧𑄢𑄨 𑄇𑄧𑄣𑄧, 𑄦𑄣𑄢𑄴 𑄌𑄟𑄴𑄟, 𑄉𑄳𑄢𑄟𑄬–𑄃𑄮 𑄆𑄖𑄮 𑄟𑄬𑄙𑄝𑄨 𑄗𑄇𑄬𑅁 𑄆𑄢 𑄆𑄇𑄴𑄘𑄨𑄚𑄴 𑄃𑄟𑄘𑄬𑄢𑄴 𑄟𑄗 𑄈𑄝𑄬𑅁 𑄡𑄝𑄬 𑄝𑄨𑄘𑄬𑄥𑄬𑅁 𑄝𑄁𑄣𑄘𑄬𑄥𑄬𑄢𑄴 𑄘𑄪𑄢𑄴𑄚𑄟𑄴 𑄢𑄧𑄑𑄝𑄬𑅁 𑄆 𑄌𑄟𑄴𑄟𑄘𑄬𑄢𑄴 𑄟𑄗 𑄞𑄬𑄋𑄬 𑄘𑄨𑄖𑄬 𑄦𑄧𑄝𑄬𑅁 𑄇𑄧𑄣𑄬𑄎𑄧 𑄚𑄚𑄪𑄝𑄱𑄰 𑄌𑄮𑄈𑄴 𑄊𑄪𑄟𑄮𑄢𑄬𑄭 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄇𑄨 𑄚𑄟𑄴 𑄖𑄮𑄟𑄢𑄴𑅃

𑄥𑄢𑄴, 𑄚𑄨𑄟𑄮𑄚𑄴 𑄌𑄋𑄴𑄟𑅁

𑄇𑄩𑅃

𑄥𑄢𑄴, 𑄚𑄨𑄟𑄮𑄚𑄴 𑄌𑄋𑄴𑄟𑅁

𑄆 𑄇𑄬𑄟𑄧𑄚𑄴 𑄚𑄟𑄴 𑄖𑄮𑄟𑄢𑄴𑅁 𑄚𑄨𑄟𑄮𑄚𑄴 𑄝𑄁𑄣𑄠𑄴 𑄇𑄩 𑄝𑄮𑄏𑄠𑄴𑅃

𑄥𑄳𑄠𑄢𑄴, 𑄄𑄠𑄬 

𑄚𑄨𑄟𑄮𑄚𑄴 𑄝𑄁𑄣𑄠𑄴 𑄇𑄨 𑄇𑄧𑄠𑄴, 𑄚𑄨𑄟𑄮𑄚𑄬 𑄗𑄉𑄧𑄖𑄴 𑄉𑄧𑄢𑄨 𑄝𑄪𑄏𑄬𑄭 𑄘𑄨 𑄚𑄧 𑄛𑄣𑄳𑄠𑄧𑅁

𑄚𑄨𑄟𑄮𑄚𑄴 𑄃𑄧𑄢𑄴𑄗𑄧 𑄝𑄁𑄣𑄠𑄴 𑄇𑄨 𑄝𑄮𑄏𑄠𑄴 𑄖–𑄃𑄮 𑄝𑄧𑄣𑄴𑄖𑄬 𑄛𑄢𑄴𑄣𑄬 𑄚𑅁 𑄇𑄨 𑄇𑄧𑄢𑄬 𑄘𑄪𑄝𑄢𑄴 𑄝𑄳𑄢𑄨𑄖𑄴𑄖𑄨 𑄛𑄬𑄣𑄬𑅁 𑄆𑄥𑄴𑄆𑄥𑄴𑄥𑄨, 𑄆𑄭𑄌𑄴𑄆𑄥𑄴𑄥𑄨𑄖𑄬 𑄆𑄖𑄧 𑄝𑄧𑄢𑄧 𑄢𑄬𑄎𑄣𑄴𑄑𑄴 𑄇𑄧𑄢𑄴𑄣𑄬𑅃

𑄇𑄧𑄣𑄬𑄎𑄧 𑄚𑄚𑄪𑄝𑄱𑄰 𑄚𑄨𑄟𑄮𑄚𑄧𑄢𑄬 𑄣𑄎𑄴 𑄘𑄨𑄣𑄮𑅁 𑄝𑄚𑄳𑄦 𑄇𑄧𑄣𑄬𑄎𑄧𑄖𑄴 𑄚𑄧𑄠𑄴, 𑄝𑄋𑄣𑄪𑄚𑄬 𑄃𑄟𑄢𑄬 𑄛𑄧𑄙𑄬–𑄊𑄙𑄬 𑄇𑄧𑄘𑄧𑄇𑄴 𑄦𑄨𑄁𑄥𑄬 𑄉𑄧𑄢𑄧𑄚𑄴𑅁

𑄃𑄢𑄧 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄝𑄢𑄨 𑄇𑄮𑄗𑄠𑄴𑅃

𑄥𑄢𑄴, 𑄝𑄊𑄭𑄍𑄧𑄢𑄨, 𑄢𑄫𑄛𑄧𑄇𑄢𑄩 𑄉𑄳𑄢𑄟𑄬𑅁

𑄝𑄝 𑄇𑄨 𑄇𑄧𑄢𑄬𑅃 

𑄥𑄢𑄴, 𑄝𑄝 𑄌𑄥𑄴 𑄇𑄧𑄢𑄬𑄚𑄴𑅁

𑄖𑄦𑄧𑄣𑄬 𑄖𑄮 𑄉𑄮𑄝𑄧𑄢𑄬 𑄛𑄧𑄘𑄴𑄧𑄜𑄪𑄣𑄴𑅁

𑄇𑄧𑄣𑄬𑄎𑄧 𑄚𑄚𑄪𑄝𑄮 𑄡𑄬𑄙𑄧𑄇𑄴𑄇𑄚𑄨 𑄇𑄧𑄙 𑄇𑄧𑄣𑄧, 𑄝𑄬𑄇𑄴𑄇𑄚𑄨 𑄈 𑄚𑄧 𑄡𑄬𑄠𑄳𑄠𑄬 𑄇𑄧𑄙𑅁 𑄖𑄬 𑄇𑄧𑄙 𑄇𑄧𑄙𑄬 𑄥𑄧𑄣𑄖𑄴 𑄝𑄋𑄣𑄴 𑄟𑄌𑄴𑄖𑄧𑄢𑄪𑄚𑄬 𑄦𑄎𑄨 𑄦𑄎𑄨 𑄌𑄬𑄠𑄢𑄧𑄖𑄴 𑄝𑄧𑄏𑄨 𑄢𑄧𑄠𑄮𑄚𑄴𑅁 𑄌𑄋𑄴𑄟 𑄟𑄌𑄴𑄖𑄧𑄢𑄪𑄚𑄬 𑄥𑄪𑄚𑄨𑄣𑄬–𑄃𑄮 𑄚𑄧 𑄥𑄪𑄚𑄬𑄖𑄴𑄬 𑄙𑄧𑄇𑄴 𑄉𑄧𑄢𑄨 𑄢𑄧𑄠𑄮𑄚𑄴𑅁 𑄇𑄧𑄣𑄬𑄎𑄧 𑄚𑄚𑄪𑄝𑄮𑄢𑄴 𑄉𑄬𑄌𑄴–𑄉𑄬𑄎𑄚𑄨 𑄚𑄧𑄟𑄧𑄌𑄳𑄠 𑄇𑄧𑄙 𑄥𑄪𑄚𑄨 𑄟𑄪𑄢𑄬 𑄟𑄪𑄢𑄬 𑄚𑄨𑄟𑄮𑄚𑄬 𑄅𑄒𑄴 𑄇𑄟𑄢𑄬𑄣𑄧𑅁 𑄘𑄋𑄧𑄢𑄴 𑄇𑄧𑄙–𑄃𑄮 𑄇𑄱𑄰 𑄚𑄧 𑄛𑄢𑄬𑄢𑄴𑅁 𑄃 𑄃𑄊𑄧𑄚𑄴𑄘𑄬 𑄟𑄌𑄴𑄖𑄧𑄢𑄪𑄚𑄬–𑄃𑄮 𑄇𑄨𑄌𑄴𑄪 𑄚𑄧 𑄇𑄧𑄣𑄇𑄴, 𑄇𑄧𑄣𑄬𑄎𑄧 𑄚𑄚𑄪𑄝𑄮𑄢𑄬𑅁 𑄘𑄮𑄣𑄬𑄘𑄣𑄬𑄭 𑄣𑄬𑄊 𑄥𑄨𑄊𑄨𑄝𑄧 𑄟𑄧𑄚𑄬 𑄟𑄧𑄚𑄬 𑄆𑄉𑄬𑄟𑄴 𑄉𑄧𑄣𑄳𑄠𑄧𑅁 𑄈 𑄚𑄧 𑄡𑄬𑄠𑄳𑄠𑄬 𑄇𑄧𑄙 𑄥𑄪𑄚𑄨𑄣𑄬–𑄃𑄮 𑄚𑄨𑄟𑄮𑄚𑄬 𑄇𑄧𑄚𑄧 𑄇𑄧𑄙 𑄚𑄧 𑄇𑄱𑄰 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄧𑄣𑄧𑅁 𑄊𑄧𑄢𑄧𑄖𑄴 𑄆𑄭 𑄚𑄨𑄟𑄮𑄚𑄬 𑄞𑄝𑄬𑄢𑄴 𑄆𑄭 𑄝𑄋𑄣𑄪𑄚𑄬 𑄎𑄉 𑄇𑄢𑄨 𑄣𑄧𑄣𑄇𑄴, 𑄟𑄨𑄣𑄬 𑄇𑄝𑄧𑄢𑄴 𑄇𑄢𑄨 𑄣𑄧𑄣𑄇𑄴, 𑄄𑄠𑄬𑄘𑄧 𑄇𑄢𑄨 𑄣𑄧𑄣𑄇𑄴, 𑄎𑄖𑄴𑄮–𑄃𑄮 𑄇𑄢𑄨 𑄣𑄱𑄰𑄚𑄬 𑄟𑄎𑄢 𑄣𑄪𑄉𑄬 𑄘𑄨𑄝𑄬𑄇𑄴 𑄚𑄇𑄨𑅃

𑄥𑄖𑄴

𑄜𑄉𑄮𑄚𑄴 𑄟𑄥𑄴𑅁 𑄎𑄢𑄴𑄇𑄣𑄴 𑄡𑄬𑄠𑄳𑄠𑄬 𑄇𑄧𑄣𑄬 𑄥𑄎𑄬𑅁 𑄛𑄮𑄖𑄳𑄠 𑄃𑄟𑄧𑄣𑄳𑄠𑄬 𑄆𑄇𑄴𑄇 𑄆𑄇𑄴𑄇 𑄎𑄢𑄴 𑄛𑄧𑄢𑄬𑅁 𑄝𑄬𑄚𑄳𑄠 𑄝𑄬𑄣𑄴 𑄅𑄙𑄧𑄚𑄴𑄘𑄨 𑄥𑄧𑄣𑄖𑄴 𑄢𑄮𑄘𑄴 𑄝𑄏𑄬𑄣𑄬, 𑄢𑄮𑄘𑄴 𑄈𑄘𑄬 𑄉𑄧𑄟𑄴 𑄣𑄉𑄬𑅁 𑄢𑄮𑄘𑄴 𑄝𑄏𑄬𑄣𑄬, 𑄢𑄮𑄘𑄮 𑄍𑄧𑄘𑄧𑄇𑄴𑄇𑄚𑄴 𑄇𑄬𑄠𑄳𑄠𑄬𑄖𑄴 𑄛𑄧𑄣𑄬 𑄞𑄧𑄎𑄚𑄴 𑄥𑄪𑄚𑄴𑄎𑄪𑄇𑄴 𑄜𑄪𑄘𑄬𑅁 𑄆𑄚𑄴 𑄃𑄧𑄇𑄴𑄖𑄧𑄖𑄴 𑄝𑄪𑄢𑄮𑄉𑄪𑄚𑄬 𑄛𑄨𑄢𑄳𑄦𑄬𑄖𑄴 𑄝𑄧𑄏𑄨 𑄢𑄮𑄘𑄴 𑄜𑄪𑄠𑄮𑄚𑄴 𑄘𑄝 𑄈𑄬𑄭 𑄈𑄬𑄭𑅁 𑄟𑄨𑄣𑄬𑄉𑄪𑄚𑄬 𑄝𑄬𑄭𑄚𑄴 𑄝𑄪𑄚𑄧𑄚𑄴 𑄚𑄬–𑄃𑄣𑄴𑄥𑄨 𑄉𑄧𑄢𑄨𑅁 𑄟𑄨𑄣𑄬𑄉𑄪𑄚𑄮𑄢𑄴 𑄝𑄬𑄭𑄚𑄴 𑄝𑄪𑄚𑄚 𑄃𑄧𑄇𑄴𑄖𑄧 𑄦𑄧𑄣𑄧𑄘𑄬 𑄃𑄉𑄮𑄚𑄴 𑄟𑄏𑄧𑄖𑄴𑄪𑄚𑄴 𑄙𑄧𑄢𑄨 𑄌𑄮𑄖𑄴 𑄟𑄥𑄴 𑄥𑄧𑄁𑅁 𑄆𑄚𑄴 𑄃𑄧𑄇𑄴𑄖𑄧𑄖𑄴 𑄘𑄬𑄝𑄝𑄮 𑄏𑄧𑄢𑄴 𑄚𑄧 𑄘𑄬𑅁 𑄍𑄬𑄢𑄁–𑄟𑄬𑄢𑄁 𑄗𑄠𑄴 𑄟𑄘𑄨𑅁 𑄎𑄪𑄟𑄴𑄝𑄧𑄣𑄉𑄪𑄚𑄬 𑄎𑄪𑄟𑄴 𑄇𑄝𑄧𑄚𑄴𑅁 𑄞𑄪𑄭 𑄝𑄧𑄣𑄉𑄪𑄚𑄬 𑄝𑄱𑄰𑄭 𑄗𑄚𑄴𑅁 𑄝𑄮 𑄌, 𑄏𑄨 𑄌 𑄉𑄧𑄢𑄧𑄚𑄴 𑄃𑄉𑄪𑄚𑄴 𑄟𑄏𑄧𑄖𑄴𑄪𑄚𑄴 𑄙𑄧𑄢𑄨 𑄌𑄮𑄖𑄴 𑄟𑄥𑄴 𑄥𑄧𑄁𑅁 𑄝𑄱𑄰𑄏𑄬𑄈𑄴 𑄟𑄥𑄴 𑄆𑄣𑄬 𑄝𑄮 𑄇𑄧𑄟𑄴 𑄌𑄚𑄴𑅁 𑄈𑄟𑄇𑄴𑄇𑄭 𑄍𑄢𑄨 𑄚𑄧 𑄛𑄖𑄴𑄬 𑄖𑄬 𑄝𑄮 𑄌𑄚𑄴𑅁 𑄝𑄮 𑄃𑄚𑄧𑄚𑄴𑅁 𑄈𑄣𑄨𑄇𑄴 𑄝𑄮 𑄃𑄚𑄨𑄣𑄬–𑄃𑄮 𑄙𑄧𑄇𑄬 𑄚𑄧 𑄦𑄧𑄣𑄬 𑄚𑄁 𑄗𑄱𑄰 𑄘𑄮𑄚𑄴, 𑄝𑄮 𑄣𑄱𑄰𑄠𑄬 𑄟𑄏𑄧 𑄚𑄋𑄬 𑄚𑄋𑄬𑅁 𑄟𑄮𑄚𑄴𑄖𑄧𑄣 𑄃𑄘𑄟𑄧𑄖𑄴 𑄘𑄨𑄎𑄧𑄚𑄧𑄢𑄬 𑄚𑄁 𑄗𑄱𑄰 𑄘𑄮𑄚𑄴𑅁 𑄇𑄪𑄢𑄳𑄦𑄨 𑄌𑄮𑄊 𑄝𑄱𑄰𑄏𑄬𑄈𑄴 𑄟𑄏𑄧𑄖𑄴 𑄝𑄮 𑄣𑄱𑄰𑄠𑄬 𑄇𑄨𑄚𑄬𑄖𑄴𑄖𑄬𑄭 𑄝𑄱𑄰𑄏𑄬𑄈𑄳𑄠𑄬 𑄝𑄛𑄴 𑄓𑄉𑄧𑄚𑄴𑅁 𑄝𑄪𑄢𑄮𑄦𑄱𑄰𑄠𑄬 𑄖𑄪𑄠𑄮 𑄝𑄱𑄰𑄏𑄬𑄈𑄳𑄠𑄬 𑄝𑄛𑄴 𑄓𑄉𑄧𑄚𑄴𑅁 𑄃𑄏𑄧𑄣𑄬 𑄖 𑄛𑄮𑄝𑄮 𑄚𑄋𑄚𑄴 𑄦𑄧𑄣𑄧𑄘𑄬 𑄙𑄧𑄢𑄧𑄚𑄨 𑄟𑄧𑄚𑄴𑅁 𑄇𑄧𑄚𑄧𑄘𑄨𑄚𑄴 𑄙𑄧𑄢𑄧𑄚𑄨 𑄟𑄧𑄚𑄧 𑄝𑄛𑄴 𑄚𑄧 𑄓𑄉𑄨𑄣𑄬𑄇𑄴 𑄇𑄨𑄠𑄮𑄎𑄧𑄚𑄬𑅁 𑄃 𑄇𑄪𑄢𑄳𑄦𑄨 𑄌𑄮𑄊–𑄃𑄮 𑄚𑄧 𑄓𑄉𑄨𑄣𑄬𑄇𑄴𑅁 𑄆𑄉𑄧𑄎 𑄝𑄱𑄰𑄏𑄬𑄈𑄳𑄠𑄬 𑄝𑄛𑄴 𑄓𑄉𑄧𑄚𑄴𑅁 𑄃𑄌𑄴𑄍𑄢𑄴 𑄚𑄁 𑄝𑄧𑄌𑄳𑄠 𑄝𑄱𑄰𑄏𑄬𑄈𑄳𑄠𑄬 𑄝𑄛𑄴𑅁 𑄝𑄚𑄳𑄦 𑄇𑄪𑄢𑄳𑄦𑄨 𑄌𑄮𑄊 𑄚𑄧𑄠𑄴, 𑄘𑄬𑄝𑄬𑄚𑄴𑄘𑄳𑄢𑄧𑄢𑄬–𑄃𑄮 𑄝𑄢𑄨𑄏𑄬 𑄝𑄛𑄴 𑄓𑄉𑄧𑄚𑄴𑅁 𑄃𑄏𑄢𑄴 𑄟𑄥𑄳𑄠 𑄝𑄢𑄨𑄏𑄬𑄖𑄴 𑄝𑄮 𑄣𑄱𑄰𑄠𑄬 𑄇𑄨𑄚𑄬𑄖𑄴𑄖𑄬𑄭 𑄝𑄢𑄨𑄏𑄬 𑄝𑄛𑄴 𑄓𑄉𑄧𑄚𑄴𑅁 𑄃𑄉𑄪𑄚𑄴, 𑄟𑄊𑄴, 𑄜𑄉𑄪𑄚𑄴, 𑄌𑄮𑄖𑄴 𑄟𑄏𑄧𑄖𑄴 𑄝𑄮 𑄣𑄧𑄣𑄬, 𑄇𑄱𑄰! 𑄖𑄢𑄢𑄬 𑄘𑄧 𑄃𑄉𑄪𑄚𑄧 𑄝𑄛𑄴, 𑄟𑄊𑄧 𑄝𑄛𑄴, 𑄜𑄉𑄮𑄚𑄴 𑄝𑄛𑄴 𑄓𑄉𑄧𑄘𑄬 𑄥𑄪𑄚𑄮 𑄚𑄧 𑄡𑄠𑄴𑅁 𑄛𑄪𑄌𑄴 𑄟𑄥𑄴 𑄘𑄧 𑄝𑄮 𑄌 𑄚𑄧–𑄃𑄮 𑄡𑄚𑄴, 𑄝𑄮 𑄚𑄧–𑄃𑄮 𑄃𑄚𑄧𑄚𑄴𑅁 𑄛𑄪𑄏𑄧 𑄝𑄛𑄴, 𑄛𑄪𑄏𑄧 𑄟 𑄇𑄢𑄧𑄢𑄬 𑄚𑄧 𑄓𑄉𑄧𑄚𑄴𑅁 𑄃𑄉𑄮𑄚𑄴 𑄟𑄏𑄧𑄖𑄴𑄪𑄚𑄴 𑄙𑄧𑄢𑄨 𑄌𑄮𑄖𑄴 𑄟𑄥𑄴 𑄥𑄧𑄁 𑄘𑄮𑄣𑄴 𑄘𑄨𑄚𑄴 𑄇𑄨𑄚𑄬𑄖𑄴𑄖𑄬𑄭 𑄝𑄬𑄉𑄬 𑄥𑄪𑄘𑄨𑄚𑄴 𑄟𑄥𑄴 𑄇𑄧𑄚𑄴𑅁 𑄇𑄧𑄚𑄧 𑄟𑄚𑄴𑄎𑄳𑄠𑄧𑄢𑄴 𑄥𑄪𑄈𑄴, 𑄟𑄧𑄚𑄧𑄖𑄴 𑄈𑄪𑄎𑄨, 𑄦𑄎𑄨 𑄘𑄬𑄊𑄨𑄣𑄬 𑄇𑄧𑄚𑄴, 𑄖𑄧𑄢𑄴 𑄘𑄧 𑄥𑄪𑄘𑄨𑄚𑄴 𑄆𑄌𑄳𑄠𑅁 𑄝𑄚𑄳𑄦 𑄟𑄚𑄪𑄌𑄴𑄪𑄚𑄮𑄢𑄴 𑄥𑄪𑄘𑄨𑄚𑄴 𑄆𑄏𑄬𑄘𑄬 𑄚𑄧𑄠𑄴, 𑄏𑄢𑄧 𑄛𑄬𑄇𑄴𑄈𑄪𑄚𑄮𑄢𑄴–𑄃𑄮 𑄥𑄪𑄘𑄨𑄚𑄴 𑄆𑄏𑄬𑅁 𑄡𑄬𑄚𑄴 𑄜𑄉𑄮𑄚𑄴, 𑄌𑄮𑄖𑄴 𑄟𑄥𑄴 𑄆𑄣𑄬 𑄇𑄮𑄉𑄨𑄣𑄪𑄚𑄬 𑄅𑄌𑄴𑄧𑄠𑄴–𑄜𑄪𑄌𑄴𑄧𑄠𑄴 𑄅𑄢𑄨 𑄅𑄢𑄨 𑄝𑄬𑄢𑄚𑄴 𑄆 𑄉𑄏𑄧𑄖𑄴𑄪𑄚𑄴 𑄃𑄮 𑄉𑄏𑄧𑄖𑄴𑅁 𑄆𑄇𑄴 𑄙𑄬𑄣𑄖𑄴𑄪𑄚𑄴 𑄃𑄢𑄧 𑄆𑄇𑄴 𑄙𑄬𑄣𑄖𑄴 𑄅𑄢𑄨 𑄡𑄚𑄴 𑄘𑄮 𑄟𑄬𑄣𑄨𑅁 𑄇𑄚𑄴𑄥𑄪𑄈𑄴 𑄉𑄧𑄢𑄨 𑄓𑄧𑄉𑄧𑄢𑄧𑄚𑄴𑅁 𑄚𑄚𑄚𑄴 𑄛𑄬𑄊𑄬 𑄝𑄮𑄘 𑄛𑄢𑄨𑄝𑄖𑄴𑄖𑄬𑄭 𑄝𑄳𑄦 𑄉𑄧𑄢𑄨𑄝𑄬𑄢𑄴 𑄘𑄮𑄣𑄴 𑄉𑄍𑄴 𑄖𑄮𑄉𑄚𑄴𑅁 𑄆𑄌𑄳𑄠 𑄆𑄇𑄴𑄇𑄚𑄴, 𑄇𑄬𑄣𑄴𑄬 𑄆𑄇𑄴𑄇𑄚𑄴 𑄉𑄧𑄢𑄨 𑄘𑄫𑄢𑄧𑄖𑄴𑄪𑄚𑄴 𑄜𑄬𑄎 𑄖𑄮𑄉𑄬𑄭 𑄃𑄚𑄨 𑄘𑄮𑄣𑄴 𑄅𑄇𑄴𑄮 𑄝𑄳𑄦 𑄝𑄚𑄚𑄴𑅁 𑄉𑄏𑄧 𑄟𑄙𑄖𑄴 𑄛𑄬𑄊𑄮 𑄝𑄳𑄦𑄝𑄮 𑄝𑄪𑄠𑄬𑄢𑄴 𑄆𑄣𑄬 𑄙𑄪𑄣𑄬𑅁 𑄆𑄟𑄪𑄇𑄳𑄠–𑄅𑄟𑄪𑄇𑄳𑄠 𑄝𑄪𑄠𑄬𑄢𑄬 𑄙𑄪𑄣𑄨 𑄛𑄧𑄢𑄬𑅁 𑄡𑄬𑄟𑄴𑄝 𑄝𑄪𑄠𑄬𑄢𑄴 𑄝𑄬𑄘𑄧 𑄥𑄖𑄴 𑄖𑄪𑄠𑄮 𑄏𑄧𑄢𑄨 𑄚𑄧 𑄛𑄧𑄢𑄧𑄚𑄴 𑄛𑄬𑄊𑄮 𑄝𑄮𑄘𑄉𑄪𑄚𑄴𑅁 𑄇𑄨 𑄆𑄇𑄴𑄇𑄚𑄴 𑄛𑄬𑄇𑄴𑄈𑄪𑄚𑄮𑄢𑄴 𑄄𑄠𑄬𑄚𑄴 𑄝𑄧𑄢𑄴 𑄛𑄬𑄠𑄳𑄠𑄬𑅁 𑄟𑄨𑄣𑄬 𑄛𑄬𑄇𑄴𑄈𑄭𑄮 𑄡𑄧𑄇𑄴𑄬 𑄝𑄮𑄘 𑄛𑄢𑄨𑄝𑄮𑅁 𑄝𑄮𑄘 𑄛𑄢𑄨 𑄜𑄪𑄢𑄬𑄣𑄬 𑄆𑄇𑄴𑄇 𑄆𑄇𑄴𑄇 𑄅𑄟𑄴 𑄘𑄨𑄝𑄮, 𑄥𑄧𑄇𑄴𑄬 𑄟𑄧𑄢𑄧𑄖𑄴 𑄛𑄬𑄇𑄴𑄈𑄮 𑄙𑄬𑄣𑄖𑄴 𑄛𑄧𑄢𑄨 𑄌𑄬𑄭 𑄗𑄠𑄭𑄮𑅁 𑄟𑄨𑄣𑄬 𑄛𑄬𑄇𑄴𑄈𑄭𑄮 𑄝𑄳𑄦 𑄇𑄎𑄖𑄴 𑄒𑄪𑄖𑄴 𑄝𑄞𑄬𑄭 𑄌𑄬𑄭 𑄗𑄠𑄴 𑄟𑄧𑄢𑄧𑄖𑄴 𑄛𑄬𑄇𑄴𑄈𑄮𑄢𑄬𑅁 𑄟𑄨𑄣𑄬 𑄛𑄬𑄇𑄴𑄈𑄮 𑄅𑄟𑄴 𑄘𑄨–𑄘𑄭 𑄍𑄧 𑄜𑄪𑄘𑄬𑄣𑄬 𑄘𑄨𑄝𑄬 𑄛𑄬𑄊𑄬 𑄘𑄫𑄢𑄧𑄖𑄴𑄪𑄚𑄴 𑄛𑄪𑄇𑄴 𑄃𑄚𑄨 𑄃𑄙𑄢𑄴 𑄈𑄝𑄚𑄴𑄘𑄨 𑄍𑄧–𑄉𑄪𑄚𑄮𑄢𑄬𑅁 𑄃𑄙𑄢𑄴 𑄈𑄬𑄭 𑄈𑄬𑄭 𑄍𑄧–𑄉𑄪𑄚𑄬 𑄘𑄋𑄧𑄢𑄴 𑄦𑄧𑄚𑄴𑅁 𑄥𑄧𑄁 𑄜𑄮𑄢𑄴 𑄦𑄧𑄣𑄬 𑄝𑄳𑄦 𑄇𑄎𑄖𑄴 𑄅𑄙𑄨 𑄗𑄚𑄴, 𑄖 𑄟𑄣𑄱𑄰 𑄝𑄝𑄬 𑄃𑄙𑄢𑄴 𑄃𑄚𑄨 𑄘𑄨𑄝𑄬𑄇𑄴𑄬 𑄃𑄏𑄠𑄴𑅁 𑄎𑄧𑄘𑄬𑄝𑄧𑄘𑄬 𑄥𑄧𑄁 𑄜𑄮𑄢𑄴 𑄦𑄧𑄣𑄬 𑄝𑄳𑄦𑄝𑄮 𑄙𑄉𑄬–𑄛𑄎𑄢𑄠𑄴 𑄅𑄢𑄨 𑄅𑄢𑄨 𑄝𑄬𑄢𑄚𑄴𑅁 𑄆–𑄙𑄬𑄣𑄖𑄴 𑄅–𑄙𑄬𑄣𑄖𑄴 𑄅𑄢𑄨 𑄡𑄚𑄴𑅁 𑄎𑄬𑄢𑄬𑄘𑄨 𑄝𑄪𑄢𑄮 𑄛𑄬𑄇𑄴𑄈𑄮 𑄣𑄧𑄊𑄬 𑄅𑄢𑄨 𑄡𑄚𑄴 𑄝𑄳𑄦𑄝𑄮 𑄍𑄢𑄨𑅁 𑄛𑄬𑄊𑄮 𑄝𑄳𑄦𑄝𑄮 𑄃𑄏𑄢𑄴–𑄜𑄉𑄮𑄚𑄴 𑄟𑄥𑄳𑄠 𑄝𑄪𑄠𑄬𑄢𑄧𑄖𑄴 𑄏𑄧𑄢𑄨 𑄛𑄧𑄢𑄨 𑄗𑄠𑄴 𑄟𑄘𑄨𑄖𑄴𑅁

𑄥𑄪𑄘𑄨𑄚𑄴 𑄆𑄏𑄬 𑄉𑄌𑄴, 𑄝𑄌𑄴 𑄃 𑄚𑄚 𑄝𑄝𑄧𑄖𑄳𑄠 𑄣𑄧𑄘𑄨–𑄣𑄧𑄟𑄴𑄝𑄧𑄢𑄴–𑄃𑄮𑅁 𑄡𑄬𑄚𑄴 𑄜𑄉𑄮𑄚𑄴 𑄟𑄥𑄴 𑄆𑄣𑄬 𑄉𑄏𑄧 𑄝𑄪𑄢𑄮 𑄛𑄘𑄚𑄨 𑄏𑄧𑄢𑄨 𑄛𑄧𑄢𑄬𑅁 𑄉𑄌𑄴𑄍𑄪𑄚𑄬 𑄚𑄪𑄠𑄮 𑄉𑄧𑄢𑄨 𑄇𑄪𑄏𑄨 𑄛𑄘 𑄟𑄬𑄣𑄧𑄚𑄴𑅁 𑄇𑄪𑄏𑄨 𑄇𑄪𑄏𑄨 𑄉𑄏𑄧𑄛𑄘𑄚𑄨 𑄜𑄉𑄪𑄚𑄮 𑄦𑄝𑄠𑄴 𑄚𑄎𑄬𑅁 𑄘𑄧𑄉𑄨𑄚𑄧 𑄜𑄉𑄪𑄚𑄧 𑄦𑄝𑄠𑄴 𑄟𑄧𑄢 𑄛𑄘𑄚𑄨 𑄅𑄢𑄬 𑄚𑄬𑄡𑄠𑄴𑅁 𑄝𑄬𑄚𑄳𑄠 𑄦𑄧𑄣𑄬 𑄈𑄪𑄠𑄮𑄉𑄚𑄨 𑄅𑄢𑄨 𑄡𑄠𑄴 𑄟𑄮𑄚𑄮 𑄟𑄙𑄠𑄴 𑄟𑄙𑄠𑄴𑅁 𑄥𑄨𑄢𑄮 𑄛𑄚𑄨𑄚𑄨 𑄉𑄏𑄧 𑄇𑄪𑄏𑄨 𑄛𑄘𑄚𑄨𑄖𑄴 𑄛𑄧𑄢𑄨 𑄗𑄠𑄴𑅁 𑄢𑄮𑄘𑄴 𑄝𑄏𑄬𑄣𑄬 𑄏𑄨𑄟𑄨𑄖𑄴 𑄏𑄨𑄟𑄨𑄖𑄴 𑄎𑄧𑄣𑄬𑅁 𑄘𑄨𑄝𑄪𑄌𑄳𑄠𑄬 𑄦𑄧𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄃𑄉𑄏𑄧 𑄙𑄪𑄛𑄴 𑄟𑄬𑄊𑄧𑄌𑄇𑄴𑄪𑄚𑄴 𑄇𑄪𑄖𑄴𑄪𑄚𑄴 𑄅𑄢𑄨 𑄆𑄚𑄬𑄭 𑄍𑄝 𑄘𑄮𑄚𑄴𑄘𑄨𑅁 𑄢𑄬𑄖𑄴 𑄦𑄧𑄣𑄬 𑄎𑄪𑄚𑄮 𑄛𑄧𑄦𑄴𑄢𑄴 𑄝𑄏𑄠𑄴 𑄛𑄮𑄖𑄴𑄛𑄮𑄖𑄳𑄠 𑄉𑄧𑄢𑄨𑅁 𑄇𑄋𑄬𑄣𑄴 𑄞𑄋 𑄖𑄢, 𑄥𑄖𑄴𑄝𑄮𑄚𑄴 𑄖𑄢 𑄣𑄧𑄊𑄬 𑄏𑄇𑄴 𑄏𑄇𑄴 𑄖𑄢 𑄘𑄬𑄊𑄬 𑄘𑄫𑄢𑄴 𑄃𑄉𑄏𑄧𑄖𑄴𑅁 𑄛𑄫𑄢𑄴𑄕𑄨𑄟 𑄦𑄧𑄣𑄬 𑄘𑄨𑄚𑄧 𑄛𑄧𑄦𑄴𑄢𑄧 𑄥𑄚𑄴 𑄉𑄧𑄢𑄨 𑄎𑄪𑄚𑄮 𑄛𑄧𑄦𑄴𑄢𑄴 𑄝𑄏𑄠𑄴𑅁 𑄙𑄧𑄣𑄴 𑄛𑄧𑄦𑄴𑄢𑄴 𑄦𑄧𑄘𑄬 𑄥𑄧𑄣𑄖𑄴 𑄌𑄚𑄴 𑄌𑄨𑄘𑄨𑄣𑄬, 𑄝𑄘𑄮𑄣𑄴 𑄃𑄉𑄏𑄧𑄖𑄴 𑄅𑄢𑄧𑄚𑄴𑄘𑄬 𑄘𑄬𑄊𑄬𑅁 𑄄𑄠𑄬𑄚𑄨 𑄘𑄬𑄊𑄨 𑄚𑄇𑄴𑄧𑄝𑄨𑄢𑄴 𑄟𑄧𑄚𑄚𑄴 𑄈𑄪𑄎𑄨 𑄦𑄧𑄠𑄴𑅁 𑄛𑄬𑄊𑄮 𑄙𑄧𑄇𑄳𑄠𑄚𑄴 𑄅𑄢𑄨 𑄡𑄬𑄝𑄢𑄴 𑄌𑄠𑄴 𑄖 𑄟𑄧𑄚𑄚𑄬𑅁

𑄟𑄮𑄚𑄴𑄖𑄧𑄣 𑄃𑄘𑄟𑄚𑄴 𑄝𑄬𑄌𑄴 𑄘𑄋𑄧𑄢𑄴 𑄚𑄧𑄠𑄴𑅁 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴𑄪𑄚𑄴 𑄞𑄣𑄧𑄘𑄴𑄫𑄢𑄴 𑄘𑄫𑄢𑄧𑄖𑄴𑅁 𑄃 𑄢𑄫𑄛𑄧𑄇𑄢𑄩 𑄃𑄘𑄟𑄖𑄴𑄪𑄚𑄴 𑄘𑄮𑄈𑄬𑄠𑄳𑄠𑄬𑄘𑄨 𑄉𑄧𑄢𑄨 𑄟𑄮𑄚𑄴 𑄇𑄧𑄖𑄴𑄖𑄘𑄨 𑄉𑄬𑄣𑄬 𑄛𑄧𑄖𑄴𑄗𑄚𑄴 𑄅𑄎𑄪 𑄦𑄧𑄠𑄴𑅁 𑄏𑄘𑄨 𑄣𑄪𑄋𑄬𑄉𑄱𑄰𑅁 𑄟𑄮𑄚𑄮 𑄉𑄮𑄢𑄠𑄴 𑄉𑄮𑄢𑄠𑄴 𑄊𑄧𑄢𑄚𑄨 𑄇𑄨𑄚𑄬𑄖𑄴𑄖𑄬𑄭 𑄟𑄮𑄚𑄴𑄖𑄧𑄣 𑄃𑄘𑄟𑄴 𑄚𑄁𑄦𑄱𑄰𑄠𑄬𑅁 𑄃𑄘𑄟𑄧𑄖𑄴 𑄉𑄞𑄪𑄌𑄳𑄠–𑄉𑄞𑄪𑄢𑄨 𑄥𑄧𑄠𑄴–𑄥𑄉𑄧𑄌𑄳𑄠𑅁 𑄟𑄧𑄢𑄧𑄖𑄴𑄪𑄚𑄬 𑄚𑄙𑄬𑄁 𑄈𑄢, 𑄊𑄨𑄣𑄬 𑄈𑄢 𑄦𑄧𑄚𑄴𑅁 𑄚𑄇𑄴𑄧𑄝𑄨 𑄈𑄢𑄪𑄌𑄳𑄠𑄬 𑄗𑄉𑄧𑄘𑄬 𑄊𑄨𑄣𑄬 𑄈𑄢 𑄦𑄧𑄘𑄧𑅁 𑄉𑄞𑄪𑄢𑄴𑄦𑄱𑄰𑄚𑄬–𑄃𑄮 𑄝𑄨𑄏𑄪, 𑄦𑄣𑄴 𑄛𑄣𑄮𑄚𑄨 𑄘𑄨𑄚𑄳𑄠𑄬 𑄊𑄨𑄣𑄬 𑄈𑄢 𑄦𑄧𑄘𑄧𑅁 𑄚𑄇𑄴𑄧𑄝𑄨𑄘𑄊𑄨 𑄛𑄌𑄴 𑄞𑄬𑄭–𑄝𑄮𑄚𑄴𑅁 𑄟𑄨𑄣𑄬 𑄇𑄧𑄣𑄬 𑄝𑄚𑄳𑄦 𑄚𑄇𑄴𑄧𑄝𑄨𑅁 𑄅𑄇𑄴𑄮 𑄟𑄨𑄣𑄬 𑄇𑄨𑄚𑄬𑄖𑄴𑄖𑄬𑄭 𑄖𑄬 𑄞𑄢𑄨 𑄉𑄧𑄢𑄨 𑄚𑄮𑄚𑄬𑄠𑄳𑄠𑄬𑅁 𑄖 𑄟–𑄣𑄱𑄰 𑄖 𑄝𑄝𑄬 𑄇𑄧𑄚𑄧𑄘𑄨𑄚𑄴 𑄆𑄇𑄴 𑄗𑄪𑄛𑄴𑄨 𑄚𑄧 𑄘𑄮𑄚𑄴𑅁 𑄞𑄬𑄭𑄠𑄪𑄚𑄬–𑄃𑄮 𑄚𑄧 𑄟𑄢𑄧𑄚𑄴 𑄚𑄇𑄴𑄧𑄝𑄨 𑄡𑄬𑄟𑄴𑄝 𑄘𑄪𑄌𑄴 𑄉𑄧𑄖𑄴𑄧𑄥𑄖𑄴𑅁 𑄟𑄮𑄚𑄴𑄖𑄧𑄣 𑄃𑄘𑄟𑄧𑄖𑄴 𑄉𑄳𑄠𑄚𑄧𑄟𑄧𑄠𑄴 𑄦𑄧𑄣𑄧𑄘𑄬 𑄛𑄉𑄚 𑄉𑄞𑄪𑄢𑄴𑅁 𑄣𑄬𑄊 𑄥𑄨𑄈𑄳𑄠𑅁 𑄟𑄬𑄑𑄳𑄢𑄨𑄇𑄴 𑄛𑄧𑄢𑄨𑄇𑄴𑄈𑄬 𑄘𑄨–𑄝𑄢𑄴 𑄘𑄨𑄚𑄬 𑄛𑄥𑄴 𑄉𑄧𑄌𑄳𑄠𑅁 𑄟𑄮𑄚𑄴𑄖𑄧𑄣 𑄃𑄘𑄟𑄧𑄖𑄴 𑄥𑄨𑄇𑄴𑄈𑄨𑄖𑄧 𑄝𑄪𑄢𑄮 𑄉𑄞𑄪𑄌𑄳𑄠 𑄇𑄧𑄣𑄬 𑄖𑄬 𑄝𑄘𑄬 𑄇𑄨𑄠𑄭𑄮 𑄚𑄬𑄭𑅁 𑄝𑄪𑄢𑄮𑄦𑄱𑄰𑄠𑄬𑅁 𑄚𑄇𑄴𑄧𑄝𑄨𑄖𑄴𑄪𑄚𑄴 𑄝𑄢𑄧 𑄌𑄮𑄘𑄳𑄠𑄧 𑄝𑄧𑄏𑄧𑄢𑄴 𑄎𑄬𑄖𑄴 𑄦𑄧𑄝𑄧𑅁 𑄚𑄇𑄴𑄧𑄝𑄨 𑄌𑄨𑄉𑄮𑄚𑄴 𑄗𑄉𑄧𑄘𑄬 𑄟𑄮𑄚𑄴𑄖𑄧𑄣 𑄃𑄘𑄟𑄧𑄖𑄴 𑄖 𑄛𑄨𑄏𑄬𑄭𑄘𑄊𑄨𑄙𑄪 𑄝𑄬𑄢 𑄉𑄬𑄣𑄬 𑄞𑄢𑄨 𑄉𑄧𑄢𑄨 𑄘𑄧𑄢𑄬𑄘𑄧 𑄉𑄳𑄠𑄚𑄧𑄟𑄧𑄠𑄴𑄢𑄬 𑄘𑄬𑄣𑄬𑅁 𑄇𑄧𑄚𑄧 𑄘𑄨𑄚𑄴 𑄌𑄮𑄊𑄬 𑄌𑄮𑄊𑄬 𑄌𑄬𑄭 𑄚𑄧 𑄛𑄖𑄴𑄴𑄧𑅁 𑄉𑄳𑄠𑄚𑄧𑄟𑄧𑄠𑄴 𑄃𑄢𑄴𑄟𑄨𑄖𑄴𑄪𑄚𑄴 𑄙𑄧𑄢 𑄈𑄬𑄭 𑄍𑄧 𑄟𑄥𑄴 𑄎𑄬𑄣𑄴 𑄈𑄖𑄳𑄠𑄉𑄱𑄰𑅁

𑄚𑄇𑄴𑄧𑄝𑄨 𑄆𑄇𑄴𑄇𑄚𑄴 𑄛𑄨𑄚𑄮𑄚𑄴 𑄝𑄏𑄬𑄠𑄳𑄠𑄬𑅁 𑄖 𑄛𑄨𑄏𑄬𑄭𑄘𑄊𑄨𑄙𑄪 𑄇𑄧𑄠𑄬𑄇𑄴𑄮 𑄘𑄨𑄚𑄴 𑄗𑄬𑄝𑄧 𑄡𑄧𑄇𑄴𑄬, 𑄛𑄨𑄚𑄮𑄚𑄴 𑄥𑄪𑄙𑄮 𑄚𑄬𑄡𑄬𑄠𑄳𑄠𑄬 𑄣𑄧𑄊𑄬𑅁 𑄆 𑄛𑄨𑄚𑄮𑄚𑄚𑄴 𑄗𑄪𑄟𑄴 𑄦𑄧𑄣𑄬 𑄖𑄬𑄢𑄧𑄠𑄚𑄴 𑄛𑄨𑄚𑄮𑄚𑄴 𑄝𑄪𑄚𑄚 𑄦𑄧𑄝𑄧 𑄚𑄇𑄴𑄧𑄝𑄨𑄢𑄴𑅁 𑄚𑄇𑄴𑄧𑄝𑄨 𑄛𑄨𑄏𑄬𑄭𑄘𑄊𑄨 𑄊𑄧𑄢𑄚𑄴 𑄃𑄣𑄧𑄇𑄴𑅁 𑄛𑄨𑄚𑄮𑄚𑄚𑄴 𑄝𑄏𑄬𑄭, 𑄛𑄨𑄚𑄮𑄚𑄚𑄴 𑄝𑄪𑄚𑄨𑄝𑄖𑄴𑄖𑄬𑄭 𑄦𑄟𑄧𑄖𑄴𑄧𑄣𑄧 𑄇𑄬𑄘𑄇𑄴 𑄖𑄪𑄉𑄮𑄇𑄴 𑄃𑄢𑄴𑄝𑄚𑄨 𑄝𑄬𑄭𑄚𑄴 𑄝𑄪𑄚𑄬𑄢𑄴𑅁 𑄚𑄇𑄴𑄧𑄝𑄨 𑄙𑄉𑄬𑄘𑄨 𑄝𑄧𑄏𑄨 𑄃𑄊𑄬 𑄖 𑄛𑄨𑄏𑄬𑄭𑅁 𑄉𑄳𑄠𑄚𑄧𑄟𑄧𑄠𑄴–𑄃𑄮 𑄛𑄨𑄏𑄬𑄭 𑄓𑄉𑄬 𑄚𑄇𑄴𑄧𑄝𑄨 𑄛𑄨𑄏𑄬𑄋𑄝𑄮𑄢𑄬𑅁 𑄆𑄚𑄴 𑄃𑄧𑄇𑄴𑄖𑄧𑄖𑄴 𑄉𑄳𑄠𑄚𑄧𑄟𑄧𑄠𑄴 𑄆𑄣𑄧𑅁 𑄚𑄇𑄴𑄧𑄝𑄨 𑄙𑄉𑄧𑄖𑄴 𑄖 𑄛𑄨𑄏𑄬𑄭𑄢𑄬 𑄘𑄬𑄊𑄨 𑄇𑄧𑄣𑄧, 𑄃 𑄛𑄨𑄏𑄬𑄭 𑄇𑄨 𑄉𑄧𑄢𑄧𑄢𑄴𑅃 

𑄚𑄇𑄴𑄧𑄝𑄨 𑄝𑄬𑄭𑄚𑄴 𑄝𑄪𑄚𑄬𑄢𑄴 𑄌𑄬𑄭 𑄃𑄊𑄧𑄁𑄉𑄬𑅁

𑄃 𑄇𑄨 𑄚𑄧 𑄎𑄚𑄬 𑄘𑄬𑅃 𑄆𑄟𑄴𑄝 𑄟𑄨𑄣𑄬 𑄇𑄨 𑄝𑄬𑄭𑄚𑄴 𑄝𑄪𑄚𑄨 𑄚𑄧 𑄎𑄚𑄬! 𑄝𑄪𑄚𑄨 𑄚𑄧 𑄎𑄚𑄨𑄣𑄬 𑄝𑄧 𑄇𑄙𑄨𑄝𑄮𑄣𑄱𑄰 𑄇𑄨 𑄚𑄧 𑄝𑄌𑄴𑄌𑄌𑄴𑄴𑅁

𑄉𑄳𑄠𑄚𑄧𑄟𑄧𑄠𑄧 𑄇𑄧𑄙 𑄥𑄪𑄚𑄨 𑄚𑄇𑄴𑄧𑄝𑄨 𑄛𑄨𑄏𑄬𑄭 𑄦𑄎𑄨𑄣𑄮𑅁 𑄚𑄇𑄴𑄧𑄝𑄨 𑄇𑄧𑄣𑄧, 𑄟𑄧𑄚𑄬 𑄇𑄧𑄣𑄬 𑄘𑄧 𑄝𑄌𑄴𑄌𑄬𑄭 𑄛𑄢𑄬 𑄘𑄬! 

𑄃𑄭𑄠𑄬 𑄚𑄧 𑄛𑄖𑄴𑄴𑄧𑅁

𑄃 𑄖𑄧𑄢𑄬 𑄝𑄌𑄴𑄬𑄣𑄬 𑄘𑄧 𑄦𑄧𑄠𑄴𑅁

𑄟𑄪𑄭 𑄇𑄨 𑄚𑄧 𑄎𑄚𑄧𑄁𑄉𑄬! 

𑄃 𑄎𑄚𑄨𑄣𑄬 𑄝𑄪𑄚𑄴𑄘𑄨 𑄚𑅁

𑄚𑄇𑄴𑄧𑄝𑄨 𑄛𑄨𑄏𑄬𑄭 𑄇𑄧𑄣𑄧, 𑄞𑄬𑄭𑄛𑄪𑄖𑄴, 𑄊𑄧𑄢𑄧𑄖𑄴 𑄅𑄙𑄨 𑄘𑄝 𑄝𑄏𑄬𑄭 𑄈𑅁

𑄈𑄬𑄝𑄢𑄴 𑄟𑄧𑄚𑄬 𑄇𑄧𑄣𑄬 𑄟𑄪𑄭 𑄃𑄟𑄧𑄚𑄬 𑄝𑄏𑄬𑄭 𑄈𑄬𑄟𑄴 𑄛𑄨𑄏𑄬𑄭𑅁 𑄃 𑄛𑄨𑄏𑄬𑄭, 𑄄𑄝𑄬 𑄇𑄧𑄟𑄧𑄣𑄬 𑄆𑄌𑄳𑄠𑅃

𑄌𑄬𑄢𑄴–𑄛𑄌𑄴 𑄘𑄨𑄚𑄴 𑄦𑄧𑄣𑄧𑄘𑄬 𑄃𑄠𑄴𑅁

𑄇𑄨𑄖𑄴𑄖𑄬𑄭 𑄞𑄖𑄴 𑄘𑄮𑅃

𑄚𑄇𑄴𑄧𑄝𑄨 𑄛𑄨𑄏𑄬𑄭 𑄝𑄨𑄉𑄨𑄙𑄨 𑄉𑄧𑄢𑄨 𑄇𑄧𑄣𑄧, 𑄝𑄬𑄌𑄴 𑄗𑄬𑄣𑄬 𑄖𑄢𑄬 𑄇𑄧𑄚𑄴𑄚 𑄞𑄖𑄴 𑄘𑄨𑄘𑄮𑅁

𑄝𑄬𑄭𑄚𑄴 𑄝𑄏𑄬𑄭𑄠𑄬 𑄡𑄧𑄇𑄴𑄬, 𑄈𑄢𑄇𑄴𑄇𑄠𑄴 𑄡𑄬𑄝𑄧 𑄞𑄨𑄣𑄨 𑄞𑄧 𑄚𑄧 𑄘𑄬𑄊𑄧𑄋𑄧𑄢𑄴𑅁

𑄚𑄇𑄴𑄧𑄝𑄨 𑄇𑄨𑄌𑄴𑄪 𑄚𑄧 𑄇𑄱𑄰 𑄃𑄧𑄣𑄧𑄢𑄴 𑄉𑄧𑄢𑄨 𑄗𑄬𑄣𑄧𑅁

𑄉𑄳𑄠𑄚𑄧𑄟𑄧𑄠𑄴 𑄞𑄣𑄧𑄇𑄴𑄧𑄚𑄴 𑄇𑄧𑄙 𑄇𑄱𑄰 𑄅𑄙𑄨 𑄉𑄬𑄣𑄧𑅁 𑄡𑄘𑄬 𑄡𑄘𑄬 𑄞𑄝𑄬𑄢𑄴 𑄄𑄝𑄬 𑄇𑄧𑄟𑄧𑄣𑄬 𑄇𑄧𑄟𑄧𑄣𑄬 𑄆𑄟𑄴𑄝 𑄦𑄧𑄣𑄧𑅁 𑄆𑄙𑄧𑄇𑄴 𑄘𑄮𑄣𑄴 𑄇𑄬𑄚𑄬 𑄦𑄧𑄣𑄧𑅁 𑄏𑄪𑄝𑄪𑄢𑄮 𑄞𑄨𑄘𑄨𑄢𑄬 𑄛𑄧𑄢𑄮𑄣𑄴 𑄝𑄪𑄢𑄮 𑄦𑄧𑄠𑄴 𑄛𑄢 𑄇𑄧𑄟𑄧𑄣𑄬 𑄇𑄧𑄟𑄧𑄣𑄬 𑄆𑄥𑄚𑄳𑄠 𑄦𑄧𑄣𑄧𑅁 𑄌𑄨𑄉𑄮𑄚𑄴 𑄗𑄉𑄧𑄘𑄬 𑄘𑄧 𑄆𑄟𑄴𑄝 𑄘𑄮𑄣𑄴 𑄚𑄧 𑄆𑄣𑄧𑅁 𑄚𑄇𑄴𑄧𑄝𑄨𑄢𑄬 𑄘𑄬𑄊𑄨 𑄉𑄳𑄠𑄚𑄧𑄟𑄧𑄠𑄴 𑄄𑄇𑄴𑄬 𑄖 𑄟𑄧𑄚𑄚𑄴 𑄅𑄝𑄧𑄖𑄴–𑄏𑄝𑄧𑄖𑄴𑄦𑄱𑄰𑄠𑄬𑅁 𑄥𑄧𑄟𑄌𑄳𑄠𑄉𑄪𑄚𑄮𑄢𑄬 𑄣𑄊𑄧𑄖𑄴 𑄛𑄬𑄣𑄬 𑄝𑄨𑄉𑄨𑄙𑄨, 𑄇𑄨𑄢𑄨–𑄟𑄨𑄢𑄨 𑄉𑄧𑄢𑄬𑅁 𑄖𑄪𑄠𑄮 𑄖 𑄟𑄧𑄚𑄚𑄴 𑄎𑄉𑄪𑄣𑄪𑄇𑄴 𑄗𑄠𑄴𑅁 𑄥𑄧𑄟𑄌𑄳𑄠𑄣𑄱𑄰 𑄇𑄧𑄙 𑄦𑄮𑄇𑄴, 𑄝𑄬𑄢𑄮𑄇𑄴, 𑄇𑄟𑄧𑄖𑄴 𑄦𑄮𑄇𑄴, 𑄆𑄇𑄴𑄪𑄎𑄚𑄴 𑄞𑄝𑄬 𑄚𑄇𑄴𑄧𑄝𑄨 𑄇𑄬𑄚𑄬 𑄆𑄙𑄧𑄇𑄴 𑄘𑄮𑄣𑄴 𑄦𑄧𑄣𑄧𑅁 𑄚𑄇𑄴𑄧𑄝𑄨 𑄟𑄚𑄴𑄎𑄳𑄠𑄧 𑄊𑄧𑄢𑄧𑄖𑄴 𑄝𑄮 𑄡𑄬𑄭 𑄉𑄨𑄢𑄨𑄖𑄴𑄗𑄨 𑄊𑄧𑄢𑄧 𑄝𑄮 𑄦𑄧𑄝𑄧𑄉𑄱𑄰𑅁 𑄝𑄪𑄉𑄧𑄖𑄴 𑄈𑄘𑄨, 𑄟𑄙𑄖𑄴 𑄈𑄧𑄝𑄧𑄁 𑄝𑄚𑄨, 𑄒𑄬𑄋𑄧𑄖𑄴 𑄈𑄢𑄪 𑄛𑄨𑄚𑄨 𑄞𑄧𑄢𑄧𑄚𑄴 𑄈𑄪𑄟𑄴 𑄇𑄧𑄢𑄧𑄖𑄴 𑄉𑄧𑄢𑄨 𑄊𑄧𑄢𑄧𑄖𑄴 𑄅𑄙𑄨𑄝𑄬𑄢𑄴 𑄥𑄋𑄪𑄖𑄴 𑄒𑄬𑄁 𑄝𑄝𑄬𑄝𑄧, 𑄄𑄎𑄮𑄢𑄧𑄖𑄴 𑄞𑄧𑄢𑄧𑄚𑄴 𑄛𑄚𑄨 𑄈𑄪𑄟𑄴 𑄗𑄧𑄝𑄧𑅁 𑄊𑄧𑄢𑄴 𑄣𑄨𑄝𑄨𑄝𑄮, 𑄃𑄮𑄣𑄮𑄚𑄴 𑄥𑄣𑄴 𑄌𑄪𑄢𑄨𑄝𑄮𑅁 𑄝𑄬𑄚𑄳𑄠 𑄛𑄮𑄖𑄳𑄠𑄬 𑄅𑄙𑄨 𑄃𑄮𑄣𑄮𑄚𑄴 𑄥𑄣𑄧𑄖𑄴 𑄃𑄉𑄪𑄚𑄴 𑄎𑄣𑄬𑄝𑄧𑅁 𑄇𑄪𑄣𑄮 𑄦𑄘𑄧𑄖𑄴 𑄉𑄧𑄢𑄨 𑄝𑄢𑄳𑄦 𑄝𑄚 𑄣𑄟𑄨𑄝𑄮𑅁 𑄌𑄧𑄣𑄮 𑄖𑄧𑄁 𑄇𑄧𑄟𑄧𑄢𑄧𑄖𑄴 𑄉𑄧𑄢𑄨 𑄊𑄧𑄢𑄧 𑄞𑄨𑄘𑄨𑄢𑄬 𑄥𑄮𑄟𑄨𑄝𑄮𑅁 𑄄𑄠𑄬𑄚𑄴 𑄇𑄬𑄚𑄬𑄦𑄱𑄰 𑄛𑄢𑄬𑅁 𑄉𑄳𑄠𑄚𑄧𑄟𑄧𑄠𑄴 𑄈𑄣𑄨𑄇𑄴 𑄖 𑄟𑄧𑄚𑄧 𑄇𑄧𑄙 𑄇𑄢𑄧𑄢𑄬 𑄇𑄱𑄰 𑄚𑄧 𑄛𑄢𑄬𑄢𑄴𑅁 𑄎𑄬𑄢𑄬𑄘𑄨 𑄖 𑄥𑄧𑄟𑄌𑄳𑄠 𑄑𑄪𑄇𑄴 𑄈𑄪𑄣𑄮𑄢𑄬 𑄣𑄊𑄧𑄖𑄴 𑄛𑄬𑄭 𑄚𑄇𑄴𑄧𑄝𑄨 𑄇𑄧𑄙 𑄇𑄧𑄣𑄧𑅁 𑄑𑄪𑄇𑄴 𑄈𑄪𑄣𑄮 𑄒𑄑𑄴𑄑 𑄉𑄧𑄢𑄨 𑄇𑄧𑄣𑄧, 𑄥𑄬 𑄟𑄨𑄣𑄬𑄍𑄧𑄝𑄮𑄣𑄱𑄰 𑄖𑄧𑄢𑄴𑄦𑄱𑄰𑄠𑄬𑄘𑄬 𑄃𑄠𑄴𑅁 𑄖𑄪𑄭 𑄝𑄮 𑄣𑄧𑄘𑄬 𑄆𑄙𑄧𑄇𑄴 𑄞𑄨𑄣𑄮𑄚𑄴 𑄖𑄧 𑄏𑄨 𑄚𑄇𑄴𑄧𑄝𑄨 𑄛𑄢 𑄦𑄧𑄣𑄇𑄴𑄪𑄚𑄴𑅁 𑄑𑄪𑄇𑄴 𑄈𑄪𑄣𑄮 𑄛𑄮𑄝𑄮 𑄄𑄥𑄴𑄇𑄪𑄣𑄧𑄖𑄴 𑄌𑄬𑄢𑄴 𑄛𑄧𑄠𑄴𑄙𑄬𑄖𑄴 𑄛𑄧𑄢𑄳𑄦𑄬𑅁 𑄉𑄳𑄠𑄚𑄧𑄟𑄧𑄠𑄴 𑄑𑄪𑄇𑄴 𑄈𑄪𑄣𑄮𑄖𑄴𑄪𑄚𑄴–𑄃𑄮 𑄎𑄬𑄖𑄴𑅁 𑄑𑄪𑄇𑄴 𑄈𑄪𑄣𑄮𑄖𑄴𑄪𑄚𑄴 𑄟𑄪 𑄚𑄧 𑄛𑄬𑄣𑄧𑅁 𑄉𑄳𑄠𑄚𑄧𑄟𑄧𑄠𑄴 𑄆𑄇𑄴𑄪𑄎𑄚𑄴 𑄝𑄬𑄢 𑄡𑄠𑄴 𑄚𑄇𑄴𑄧𑄝𑄨 𑄥𑄨𑄙𑄪𑅁 𑄚𑄇𑄴𑄧𑄝𑄨𑄢𑄬 𑄝𑄨𑄉𑄨𑄙𑄨 𑄉𑄧𑄢𑄬𑅁 𑄛𑄧𑄙𑄧𑄖𑄴 𑄣𑄊𑄧𑄖𑄴 𑄛𑄬𑄣𑄬 𑄆𑄇𑄴𑄇 𑄆𑄇𑄴𑄇 𑄣𑄣𑄨 𑄟𑄢𑄬𑅁 𑄚𑄇𑄴𑄧𑄝𑄨 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄘𑄨 𑄆𑄇𑄴𑄇𑄚𑄴 𑄎𑄮𑄛𑄴 𑄘𑄬𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄧 𑄟𑄘𑄨 𑄟𑄪 𑄜𑄨𑄢𑄬𑄭 𑄟𑄙 𑄚𑄨𑄉𑄪𑄢𑄨 𑄛𑄎𑄢 𑄜𑄢𑄨 𑄡𑄠𑄴𑅁 𑄈𑄣𑄨𑄇𑄴 𑄚𑄇𑄴𑄧𑄝𑄨𑄢𑄬 𑄡𑄬𑄙𑄧𑄇𑄴 𑄘𑄬𑄊𑄬 𑄥𑄬𑄙𑄧𑄇𑄴 𑄘𑄮𑄣𑄴 𑄘𑄬𑄊𑄬 𑄉𑄳𑄠𑄚𑄧𑄟𑄧𑄠𑄴𑅁 𑄚𑄇𑄴𑄧𑄝𑄨𑄢𑄬 𑄘𑄮𑄣𑄴 𑄘𑄬𑄊𑄨𑄣𑄬–𑄃𑄮 𑄖 𑄥𑄧𑄟𑄌𑄳𑄠 𑄇𑄢𑄧𑄢𑄬 𑄇𑄱𑄰 𑄚𑄧 𑄛𑄢𑄬𑄢𑄴𑅁 𑄉𑄳𑄠𑄚𑄧𑄟𑄧𑄠𑄴 𑄥𑄧𑄟𑄌𑄳𑄠𑄉𑄪𑄚𑄬 𑄝𑄬𑄇𑄴𑄪𑄚𑄬 𑄝𑄮 𑄣𑄱𑄰 𑄉𑄨𑄢𑄨𑄖𑄴𑄗𑄨 𑄉𑄧𑄢𑄨 𑄈𑄘𑄧𑄚𑄴𑅁 𑄉𑄞𑄪𑄌𑄳𑄠𑄬 𑄃𑄊𑄧𑄚𑄴𑄘𑄬 𑄥𑄨𑄉𑄪𑄚𑄴 𑄖𑄖𑄴𑄪𑄚𑄴 𑄇𑄧𑄚𑄬𑄖𑄴𑅁 𑄖𑄢𑄢𑄬–𑄃𑄮 𑄇𑄬𑄚𑄬 𑄇𑄮𑄌𑄴𑄛𑄚 𑄇𑄧𑄙 𑄇𑄧𑄝𑄧𑅁 𑄇𑄢𑄧𑄢𑄬 𑄇𑄧𑄝𑄢𑄴 𑄎𑄪 𑄚𑄧 𑄛𑄬𑄭 𑄘𑄨𑄊𑄧𑄣𑄨 𑄟 𑄥𑄨𑄙𑄪 𑄉𑄬𑄣𑄧𑅁 𑄘𑄨𑄊𑄧𑄣𑄨 𑄟 𑄖 𑄎𑄬𑄖𑄴𑄖𑄛𑄪𑄖𑄴 𑄞𑄬𑄭𑄠𑄮 𑄟𑄮𑄇𑄴𑅁 𑄘𑄨𑄊𑄧𑄣𑄨 𑄟–𑄢𑄬 𑄞𑄪𑄎𑄨 𑄓𑄉𑄬 𑄉𑄳𑄠𑄚𑄧𑄟𑄧𑄠𑄴𑅁 𑄘𑄨𑄊𑄧𑄣𑄨𑄘𑄊𑄨 𑄊𑄧𑄢𑄚𑄴 𑄟𑄖𑄳𑄠𑅁 𑄉𑄳𑄠𑄚𑄧𑄟𑄧𑄠𑄴 𑄥𑄘𑄬–𑄇𑄟𑄬 𑄝𑄬𑄢 𑄡𑄬𑄠𑄳𑄠𑄬 𑄘𑄨𑄊𑄧𑄣𑄨𑄘𑄊𑄨𑄙𑄪𑅁 𑄘𑄨𑄊𑄧𑄣𑄨 𑄟 𑄃 𑄉𑄳𑄠𑄚𑄧𑄟𑄧𑄠𑄴 𑄛𑄨𑄢𑄳𑄦𑄬𑄖𑄴 𑄝𑄧𑄏𑄨 𑄘𑄨 𑄘𑄨𑄠𑄮𑄢𑄴–𑄞𑄮𑄏𑄬 𑄘𑄝 𑄈𑄘𑄧𑄚𑄴𑅁 𑄉𑄧𑄛𑄴 𑄘𑄬𑄘𑄧𑄚𑄴𑅁 𑄘𑄨𑄊𑄧𑄣𑄨 𑄟 𑄆𑄇𑄴𑄇 𑄆𑄇𑄴𑄇 𑄝𑄨𑄉𑄨𑄙𑄨 𑄉𑄧𑄢𑄨 𑄇𑄧𑄠𑄴 𑄇𑄱𑄰, 𑄖𑄧 𑄎𑄨𑄁𑄇𑄚𑄨𑄖𑄴 𑄟𑄬𑄣 𑄈𑄝𑄬𑄭 𑄛𑄢𑄨𑄣𑄬 𑄘𑄬𑅁 𑄖𑄧 𑄚𑄋𑄬 𑄛𑄨𑄖𑄴𑄗𑄨𑄟𑄨𑄖𑄴 𑄟𑄨𑄣𑄬 𑄚𑄧 𑄎𑄧𑄚𑄴𑄟𑄚𑄴 𑄛𑄢 𑄛𑄁𑅁 𑄟𑄧𑄢𑄨𑄣𑄬 𑄇𑄧𑄣 𑄉𑄍𑄴 𑄃𑄎 𑄉𑄧𑄢𑄨 𑄗𑄬𑄭 𑄛𑄬𑄝𑄬 𑄘𑄧𑅁 

𑄘𑄨𑄊𑄧𑄣𑄨 𑄟 𑄇𑄧𑄙 𑄥𑄪𑄚𑄨 𑄉𑄳𑄠𑄚𑄧𑄟𑄧𑄠𑄴 𑄘𑄝𑄝𑄮 𑄟𑄪𑄠𑄮𑄖𑄴 𑄘𑄨 𑄦𑄎𑄬𑅁 𑄚𑄚 𑄇𑄧𑄙 𑄇𑄧𑄙𑄬 𑄇𑄧𑄙𑄬 𑄉𑄳𑄠𑄚𑄧𑄟𑄧𑄠𑄴 𑄇𑄧𑄣𑄧, 𑄛𑄨𑄏𑄬𑄭 𑄞𑄬𑄭 𑄏𑄨 𑄚𑄇𑄴𑄧𑄝𑄨 𑄈𑄇𑄴𑄬 𑄇𑄬𑄚𑄬 𑄦𑄬𑄟𑄴𑄝𑄦𑄱𑄰𑄠𑄬𑅁

𑄟𑄨𑄣𑄬 𑄦𑄧𑄣𑄧𑄘𑄬 𑄝𑄢𑄨𑄏𑄬 𑄇𑄪𑄙𑄮𑄉𑄪𑄣𑄮𑅁 𑄈𑄇𑄴𑄬 𑄘𑄋𑄧𑄢𑄴 𑄦𑄧𑄚𑄴𑅁 𑄝𑄚𑄳𑄦 𑄇𑄪𑄢𑄮 𑄜𑄬𑄎𑄬𑄢 𑄞𑄋𑄨𑄣𑄬 𑄦𑄧𑄠𑄴𑅁 𑄖𑄪𑄭 𑄟𑄧𑄢𑄴 𑄚𑅁 𑄖𑄪𑄭 𑄡𑄪𑄚𑄨 𑄆𑄙𑄧𑄇𑄴 𑄞𑄨𑄣𑄮𑄚𑄴 𑄝𑄮 𑄣𑄧𑄘𑄬, 𑄖𑄧𑄢𑄴–𑄃𑄮 𑄆𑄟𑄴𑄝 𑄛𑄮–𑄏𑄨 𑄦𑄧𑄘𑄇𑄴𑅁

𑄦𑄧𑄝𑄇𑄴 𑄃𑄠𑄴 𑄞𑄪𑄎𑄨𑅁

𑄦𑄧𑄝𑄇𑄴 𑄦𑄧𑄝𑄇𑄴, 𑄇𑄧𑄟𑄧𑄣𑄬 𑄦𑄧𑄝𑄇𑄴𑅃 𑄦𑄧𑄘𑄇𑄴 𑄘𑄧 𑄆𑄙𑄧𑄇𑄴 𑄞𑄨𑄣𑄮𑄚𑄴 𑄦𑄧𑄣𑄇𑄴𑄪𑄚𑄴𑅁

𑄉𑄳𑄠𑄚𑄧𑄟𑄧𑄠𑄴 𑄦𑄎𑄨 𑄦𑄎𑄨 𑄇𑄧𑄣𑄧, 𑄦𑄧𑄝𑄖𑄴𑄖𑄬𑄭 𑄘𑄧 𑄖𑄧 𑄄𑄙𑄪 𑄆𑄣𑄪𑄁𑅁

𑄟𑄧 𑄄𑄙𑄪 𑄆𑄭 𑄇𑄨 𑄦𑄧𑄝𑄧𑅃 𑄟𑄧 𑄝𑄮𑄚𑄪𑄚𑄴 𑄝𑄬𑄇𑄴𑄪𑄚𑄴 𑄝𑄮 𑄡𑄬𑄠𑄮𑄚𑄴𑅁 𑄝𑄮𑄚𑄴 𑄗𑄬𑄣𑄬–𑄃𑄮 𑄖𑄧𑄖𑄴𑄖𑄬𑄭 𑄝𑄮 𑄚𑄧 𑄘𑄨𑄟𑄴𑅁

𑄟𑄨𑄘𑄬 𑄟𑄪 𑄉𑄧𑄢𑄨 𑄞𑄪𑄎𑄨 𑄞𑄪𑄎𑄨 𑄓𑄉𑄧𑄁, 𑄆𑄇𑄴𑄇–𑄃𑄮 𑄇𑄬𑄚𑄬 𑄌𑄨𑄖𑄴 𑄚𑄧 𑄛𑄪𑄢𑄬𑅁

𑄌𑄨𑄖𑄴 𑄛𑄪𑄢𑄴𑄣𑄬–𑄃𑄮 𑄌𑄬𑄭–𑄌𑄬𑄘𑄨 𑄆𑄟𑄴𑄝 𑄉𑄁–𑄉𑄢𑄋𑄳𑄠 𑄝𑄪𑄢𑄮 𑄟𑄚𑄴𑄎𑄳𑄠𑄧𑄖𑄴𑄖𑄬𑄭 𑄇𑄧𑄚𑄴𑄚 𑄝𑄮 𑄘𑄨𑄝𑄮𑅁 

𑄃 𑄥𑄣𑄬𑄚𑄴 𑄟𑄪𑄭 𑄆𑄚𑄬𑄝𑄘𑄬 𑄗𑄬𑄘𑄪𑄁𑅃

𑄗𑄬𑄝𑄬𑄘𑄬 𑄘𑄬! 

𑄘𑄨𑄠𑄮𑄢𑄴–𑄞𑄮𑄌𑄴 𑄞𑄨𑄣𑄨 𑄇𑄧𑄙𑅁 𑄖𑄢 𑄘𑄨𑄎𑄧𑄚𑄬 𑄚𑄚 𑄥𑄮𑄣𑄴 (𑄖𑄧𑄢𑄴𑄇–𑄖𑄧𑄢𑄴𑄇𑄨) 𑄑𑄚–𑄑𑄚𑄨 𑄉𑄧𑄖𑄴𑄧𑄚𑄴𑅁 𑄎𑄬𑄢𑄬𑄘𑄨 𑄉𑄳𑄠𑄚𑄧𑄟𑄧𑄠𑄴 𑄇𑄧𑄣𑄧, 𑄥𑄨𑄠𑄬𑄚𑄴 𑄚𑄧𑄠𑄴 𑄞𑄪𑄎𑄨, 𑄖𑄧 𑄝𑄮𑄚𑄴 𑄘𑄨𑄣𑄬 𑄘𑄬, 𑄚𑄧 𑄘𑄨𑄣𑄬 𑄚𑄬𑄭𑅁 𑄚𑄇𑄴𑄧𑄝𑄨𑄢𑄬 𑄝𑄮 𑄌𑄘𑄬 𑄥𑄪𑄚𑄴𑄮𑄌𑄴 𑄚𑄨𑅃

𑄇𑄱𑄰! 𑄚𑄧 𑄘𑄧 𑄥𑄪𑄚𑄧𑄁𑅁 𑄃𑄭𑄠𑄬𑅃

𑄚𑄇𑄴𑄧𑄝𑄨𑄢𑄬 𑄟𑄧𑄖𑄴𑄖𑄬𑄭 𑄇𑄱𑄰 𑄘𑄨 𑄛𑄢𑄨𑄝𑄬 𑄚𑄨𑅃𑅁

𑄖 𑄝𑄝𑄧𑄢𑄬𑅃

𑄚𑄙𑄬𑄭𑅁 𑄚𑄇𑄴𑄧𑄝𑄨𑄢𑄬𑅁

𑄝𑄂! 𑄆𑄝𑄧𑄖𑄬 𑄚𑄇𑄨 𑄣𑄁 𑄎𑄪𑄢𑄨𑄝𑄬𑄢𑄴 𑄃𑄧𑄇𑄴𑄖𑄧 𑄆𑄏𑄬𑄖𑄴𑄬𑅁 𑄃 𑄟𑄧𑄢𑄴 𑄇𑄨 𑄆𑄝𑄧𑄖𑄬 𑄝𑄬𑄣𑄴 𑄅𑄙𑄬𑄖𑄴𑄬, 𑄅𑄇𑄨𑄣𑄴 𑄉𑄧𑄢𑄨𑄝𑄬𑄢𑄴𑅁

𑄞𑄪𑄎𑄨, 𑄘𑄨𑄠𑄮𑄢𑄴–𑄞𑄮𑄎𑄧𑄢𑄴 𑄝𑄬𑄣𑄴 𑄆𑄇𑄴𑄪𑄎𑄚𑄴 𑄅𑄙𑄧𑄚𑄴𑄘𑄨 𑄗𑄠𑄴𑅁

𑄖𑄧𑄢𑄴 𑄅𑄙𑄮𑄇𑄴, 𑄟𑄧𑄢𑄴 𑄓𑄪𑄝𑄬𑄢𑄴𑅁

𑄃 𑄇 𑄞𑄪𑄎𑄨! 𑄆𑄇𑄴𑄇–𑄃𑄮 𑄌𑄨𑄖𑄴 𑄚𑄧 𑄛𑄪𑄢𑄬 𑄚𑄬𑅃

𑄌𑄨𑄖𑄴 𑄛𑄪𑄣𑄳𑄠𑄬 𑄦𑄧𑄣𑄬 𑄇𑄬𑄚𑄬 𑄇𑄧𑄙𑄪𑄁𑅁

𑄖𑄧𑄢𑄬 𑄘𑄧 𑄞𑄪𑄎𑄨 𑄓𑄉𑄬𑅁

𑄦𑄧𑄠𑄴, 𑄓𑄉𑄬𑅁

𑄚𑄧𑄚𑄧𑄚𑄴–𑄞𑄮𑄎𑄬 𑄇𑄧𑄘𑄧 𑄇𑄧𑄙 𑄇𑄮 𑄡𑄠𑄴𑅁 𑄟𑄧 𑄇𑄧𑄙 𑄇𑄱𑄰 𑄘𑄬𑄘𑄬 𑄇𑄨𑅁 𑄃𑄉𑄧𑄣𑄧𑄖𑄳𑄠 𑄝𑄨𑄉𑄨𑄙𑄨 𑄉𑄧𑄢𑄨 𑄇𑄧𑄝𑄬𑅁 𑄚𑄇𑄴𑄧𑄝𑄨 𑄇𑄧𑄙 𑄙𑄧𑄇𑄴 𑄝𑄪𑄏𑄨 𑄎𑄧𑄘𑄬𑄝𑄧𑄘𑄬 𑄇𑄧𑄝𑄬𑅁

𑄘𑄬𑄊 𑄡𑄮𑄇𑄴𑅁

𑄘𑄬𑄊 𑄡𑄮𑄇𑄴 𑄇𑄧𑄣𑄬 𑄘𑄧 𑄚𑄧 𑄦𑄧𑄝𑄧 𑄞𑄪𑄎𑄨𑅁 𑄈𑄟𑄇𑄴𑄇𑄭 𑄇𑄱𑄰 𑄘𑄳𑄠 𑄛𑄧𑄢𑄨𑄝𑄮𑅁 𑄟𑄬𑄣 𑄈𑄬𑄘𑄬–𑄃𑄮 𑄌𑄌𑄴, 𑄃 𑄝𑄮 𑄖𑄮𑄉𑄬𑄭 𑄘𑄨 𑄚𑄧 𑄛𑄢𑄨𑄝𑄬 𑄄𑄠𑄬𑄚𑄴 𑄇𑄬𑄚𑄬 𑄦𑄧𑄠𑄴𑅁

𑄉𑄳𑄠𑄚𑄧𑄟𑄧𑄠𑄴 𑄝𑄬𑄢𑄬–𑄇𑄮𑄢𑄬𑄭 𑄙𑄧𑄣𑄳𑄠𑄧 𑄘𑄨𑄊𑄧𑄣𑄨 𑄟–𑄢𑄬𑅁 𑄆𑄙𑄧𑄇𑄴 𑄡𑄧𑄇𑄴𑄬 𑄇𑄧𑄢𑄴, 𑄘𑄨𑄊𑄧𑄣𑄨 𑄟 𑄇𑄧𑄙 𑄚𑄧 𑄘𑄨 𑄚𑄧 𑄛𑄣𑄳𑄠𑄧𑅁 𑄇𑄧𑄣𑄧,𑄦𑄱𑄰𑄠𑄬 𑄃𑄠𑄴, 𑄇𑄱𑄰 𑄘𑄨 𑄌𑄬𑄟𑄴𑅁 𑄘𑄨𑄊𑄧𑄣𑄨 𑄟𑄢𑄴 𑄇𑄧𑄙 𑄛𑄬𑄭 𑄉𑄳𑄠𑄚𑄧𑄟𑄧𑄠𑄴 𑄈𑄪𑄎𑄨 𑄦𑄧𑄣𑄧𑅁 𑄈𑄣𑄨𑄇𑄴 𑄘𑄨𑄊𑄧𑄣𑄨 𑄟 𑄄𑄌𑄳𑄠 𑄇𑄱𑄰 𑄘𑄨𑄟𑄴, 𑄇𑄬𑄣𑄳𑄠 𑄇𑄱𑄰 𑄘𑄨𑄟𑄴 𑄉𑄧𑄖𑄴𑄬 𑄉𑄧𑄖𑄴𑄬 𑄚𑄇𑄴𑄧𑄝𑄨 𑄖 𑄝𑄬𑄚𑄚𑄴 𑄝𑄪𑄚𑄨 𑄜𑄪𑄢𑄬𑄭 𑄊𑄧𑄢𑄧𑄖𑄴 𑄉𑄬𑄣𑄧𑄉𑄱𑄰𑅁

𑄟𑄮𑄚𑄴𑄖𑄧𑄣 𑄃𑄘𑄟𑄧𑄖𑄴 𑄝𑄙𑄨𑄇𑄴𑄮 𑄆𑄥𑄴𑄛𑄭 𑄉𑄧𑄢𑄬𑅁 𑄥𑄚𑄴𑄖𑄨𑄝𑄦𑄨𑄚𑄩𑄉𑄪𑄚𑄮 𑄇𑄧𑄙𑄚𑄨 𑄇𑄱𑄰 𑄘𑄬𑄉𑄱𑄰 𑄃𑄢𑄴𑄟𑄨𑄉𑄪𑄚𑄮𑄢𑄬𑅁 𑄃 𑄃𑄘𑄟𑄧𑄖𑄴 𑄇𑄧𑄚𑄴𑄚 𑄛𑄧𑄚𑄴𑄌𑄠𑄬𑄖𑄴 𑄥𑄧𑄞𑄛𑄧𑄖𑄨, 𑄥𑄧𑄟𑄴𑄛𑄘𑄧𑄇𑄴, 𑄡𑄪𑄉𑄧 𑄥𑄧𑄞𑄛𑄧𑄖𑄨, 𑄥𑄧𑄟𑄴𑄛𑄘𑄧𑄇𑄴, 𑄥𑄧𑄘𑄧𑄥𑄳𑄠𑄧, 𑄉𑄧𑄕𑄧 𑄣𑄄𑄚𑄴 𑄇 𑄇 𑄊𑄧𑄢𑄧𑄖𑄴 𑄝𑄧𑄏𑄬𑅁 𑄇𑄧𑄟𑄧𑄣𑄬 𑄇𑄧𑄟𑄧𑄣𑄬 𑄥𑄚𑄴𑄖𑄨𑄝𑄦𑄨𑄚𑄩 𑄆𑄏𑄧𑄚𑄴𑅁 𑄇𑄖𑄴𑄪𑄚𑄴 𑄇𑄖𑄴𑄪𑄚𑄴 𑄈𑄪𑄇𑄴𑄬𑄠𑄬 𑄝𑄧𑄚𑄴𑄘𑄪𑄇𑄴 𑄃𑄊𑄬, 𑄝𑄬𑄇𑄴𑄇𑄚𑄨 𑄛𑄪𑄘𑄨 𑄛𑄪𑄘𑄨 𑄇𑄱𑄰 𑄘𑄬𑄉𑄱𑄰𑅁 𑄃𑄘𑄟𑄧 𑄇𑄧𑄙𑄚𑄨 𑄇𑄬𑄚𑄬 𑄇𑄱𑄰 𑄛𑄢𑄧𑄚𑄴 𑄃𑄢𑄴𑄟𑄨𑄉𑄪𑄚𑄬, 𑄆𑄝𑄴𑄬𑄢𑄬 𑄃𑄟𑄳𑄦𑄧𑄇𑄴 𑄃𑄘𑄟𑄳𑄠𑄉𑄪𑄚𑄬𑅁 𑄃𑄢𑄴𑄟𑄨𑄉𑄪𑄚𑄬 𑄡𑄬 𑄇𑄧𑄙𑄚𑄨 𑄛𑄪𑄏𑄮𑄢𑄴 𑄉𑄧𑄢𑄧𑄚𑄴, 𑄇𑄧𑄚𑄴, 𑄝𑄬𑄇𑄴𑄇𑄚𑄨 𑄇𑄧𑄚𑄧 𑄝𑄄𑄝𑄘𑄧𑄢𑄴 𑄚𑄬𑄭𑅁 𑄇𑄧𑄚𑄴𑄚 𑄇𑄱𑄰 𑄘𑄬 𑄃𑄘𑄟𑄳𑄠𑄉𑄪𑄚𑄬 𑄟𑄪𑄢𑄬 𑄟𑄪𑄢𑄬 𑄖𑄮𑄉 𑄙𑄧𑄣𑄳𑄠𑄇𑄴𑅁 𑄖𑄉𑄧𑄚𑄴𑄘𑄬 𑄢𑄧𑄖𑄴𑄚𑄧𑄥𑄬𑄚𑄧𑄢𑄬𑅁 𑄖𑄬 𑄦𑄧𑄝𑄧𑄘𑄬 𑄛𑄢 𑄛𑄁 𑄆𑄥𑄴𑄛𑄭 𑄉𑄧𑄢𑄬𑄘𑄬𑅁 𑄆𑄇𑄴 𑄛𑄧𑄣𑄴𑄣 𑄇𑄪𑄢𑄨–𑄛𑄧𑄏𑄮𑄌𑄴 𑄎𑄧𑄚𑄴 𑄥𑄚𑄴𑄖𑄨𑄝𑄦𑄨𑄚𑄩 𑄃𑄘𑄟𑄧𑄖𑄴 𑄆𑄌𑄴𑄍𑄮𑄚𑄴𑅁 𑄡𑄧𑄇𑄴𑄬 𑄞𑄖𑄴 𑄈 𑄝𑄧𑄏𑄧𑄘𑄧𑄚𑄴, 𑄌𑄚𑄴𑄘𑄬 𑄃𑄢𑄴𑄟𑄨 𑄆𑄖𑄴𑄧𑄚𑄴𑅁 𑄇𑄪𑄙𑄪 𑄃𑄢𑄴 𑄞𑄖𑄴 𑄈𑄚! 𑄡𑄪𑄘𑄴𑄙𑄧 𑄉𑄧𑄣𑄳𑄠𑄬 𑄃𑄘𑄟𑄳𑄠𑄉𑄪𑄚𑄴 𑄟𑄧𑄢𑄧𑄚𑄴, 𑄡𑄪𑄘𑄴𑄙𑄧 𑄚𑄧 𑄉𑄧𑄣𑄳𑄠𑄬–𑄃𑄮 𑄖𑄢 𑄍𑄢𑄨 𑄚𑄧 𑄛𑄢𑄧𑄚𑄴𑅁 𑄥𑄚𑄴𑄖𑄨𑄝𑄦𑄨𑄚𑄩 𑄇𑄧𑄟𑄚𑄴𑄓𑄌𑄴𑄍𑄬 𑄇𑄧𑄣𑄧, 𑄆 𑄟𑄚𑄪𑄌𑄴𑄪𑄚𑄴 𑄝𑄎𑄬𑄭𑄝𑄖𑄴𑄖𑄬𑄭 𑄥𑄚𑄴𑄖𑄨𑄝𑄦𑄨𑄚𑄩𑄦𑄱𑄰𑄠𑄬𑅁 𑄇𑄬𑄚𑄬 𑄡𑄪𑄘𑄴𑄙𑄧 𑄉𑄧𑄢𑄚𑅁 𑄖𑄬 𑄇𑄧𑄣𑄧, 𑄦𑄖𑄳𑄠𑄢𑄚𑄨𑄣𑄱𑄰 𑄟𑄧𑄢𑄧𑄁–𑄝𑄎𑄧𑄁 𑄙𑄝 𑄘𑄮𑅁 𑄇𑄧𑄟𑄚𑄴𑄓𑄌𑄴𑄍𑄬𑄢𑄴 𑄇𑄧𑄙 𑄥𑄪𑄚𑄨 𑄝𑄬𑄇𑄴 𑄥𑄚𑄴𑄖𑄨𑄝𑄦𑄨𑄚𑄩𑄉𑄪𑄚𑄴 𑄦𑄖𑄳𑄠𑄢𑄴 𑄃𑄎 𑄉𑄧𑄢𑄨 𑄛𑄪𑄚𑄧𑄖𑄴 𑄟𑄪𑄢𑄳𑄦𑄨 𑄝𑄏𑄬 𑄥𑄧𑄁 𑄙𑄝 𑄘𑄨𑄣𑄬𑄇𑄴𑅁 𑄎𑄬𑄢𑄬𑄘𑄨 𑄇𑄱𑄰 𑄛𑄢𑄨𑄣𑄬𑄇𑄴, 𑄃𑄢𑄴𑄟𑄨𑄉𑄪𑄚𑄬 𑄇𑄬𑄚𑄬 𑄇𑄱𑄰 𑄛𑄢𑄨𑄣𑄬𑄇𑄴 𑄥𑄚𑄴𑄖𑄨𑄝𑄦𑄨𑄚𑄩 𑄃𑄊𑄧𑄚𑄴𑄘𑄬 𑄥𑄨𑄠𑄬𑄚𑄴𑅁 𑄘𑄨 𑄃𑄋𑄪𑄣𑄳𑄠 𑄇𑄝𑄪𑄌𑄴 𑄆𑄇𑄴𑄇𑄚𑄴 𑄘𑄨𑄣𑄬𑄇𑄴 𑄥𑄚𑄴𑄖𑄨𑄝𑄦𑄨𑄚𑄩𑄉𑄪𑄚𑄬, 𑄇𑄧𑄚𑄴𑄚 𑄆𑄥𑄴𑄛𑄭 𑄉𑄧𑄢𑄬 𑄚𑄳𑄦𑄨𑄉𑄨𑄣𑄬𑄭 𑄘𑄨𑄝𑄬𑄖𑄴𑄖𑄬𑄭𑅁 𑄃 𑄚𑄧𑄣𑄬 𑄝𑄬𑄇𑄴 𑄃𑄘𑄟𑄳𑄠𑄉𑄪𑄚𑄧𑄢𑄬 𑄝𑄌𑄴 𑄘𑄧𑄣 𑄘𑄨𑄝𑄬𑄇𑄴𑄨, 𑄆𑄥𑄴𑄛𑄭 𑄉𑄧𑄢𑄬𑄘𑄬 𑄥𑄨𑄝𑄬 𑄚𑄳𑄦𑄨𑄉𑄨𑄣𑄬𑄭 𑄘𑄨 𑄚𑄧 𑄛𑄣𑄳𑄠𑄬𑅁 𑄢𑄧𑄖𑄴𑄚𑄧𑄥𑄬𑄚𑄧𑄢𑄬 𑄛𑄨𑄘𑄨–𑄛𑄘𑄠𑄴 𑄥𑄚𑄴𑄖𑄨𑄝𑄦𑄨𑄚𑄩𑄉𑄪𑄚𑄧𑄢𑄬 𑄉𑄮𑄎𑄬𑄭 𑄘𑄨𑄝𑄬𑄖𑄴𑄖𑄬𑄭 𑄃𑄘𑄟𑄳𑄠𑄉𑄪𑄚𑄬 𑄆𑄝𑄴𑄬𑄢𑄬 𑄘𑄧𑄢𑄧–𑄟𑄧𑄢𑄧𑅁 𑄢𑄧𑄖𑄴𑄚𑄧𑄥𑄬𑄚𑄬 𑄥𑄚𑄴𑄖𑄨𑄝𑄦𑄨𑄚𑄩𑄉𑄪𑄚𑄧𑄢𑄴 𑄇𑄧𑄙𑄚𑄨 𑄇𑄱𑄰 𑄘𑄬𑄊𑄰𑄱 𑄇𑄨𑄚𑄬𑄭 𑄃𑄢𑄴𑄟𑄨𑄉𑄪𑄚𑄬 𑄇𑄱𑄰 𑄛𑄢𑄧𑄚𑄴𑄘𑄬𑅁 𑄟𑄧𑄢 𑄣𑄇𑄴𑄬𑄖𑄴𑄖𑄬𑄭 𑄃𑄘𑄟𑄳𑄠𑄉𑄪𑄚𑄬 𑄝𑄬𑄇𑄴𑄪𑄚𑄴 𑄛𑄨𑄘𑄬 𑄈𑄬𑄭 𑄚𑄧 𑄛𑄢𑄨𑄝𑄧𑄁𑅁

𑄆𑄇𑄴 𑄘𑄨𑄚𑄳𑄠 𑄛𑄧𑄢𑄨𑄟𑄧𑄣𑄬 𑄏𑄢𑄴 𑄝𑄬𑄢 𑄡𑄬𑄠𑄳𑄠𑄬 𑄇𑄬𑄟𑄴𑄛𑄧 𑄇𑄠𑄴𑅁 𑄘𑄫𑄢𑄧𑄖𑄴𑄪𑄚𑄴 𑄇𑄳𑄠𑄟𑄴𑄛𑄧 𑄟𑄧𑄇𑄴𑄬 𑄌𑄭𑄘𑄬 𑄅𑄇𑄴𑄮 𑄟𑄚𑄪𑄌𑄴 𑄉𑄚𑄴𑄍𑄇𑄚𑄨 𑄛𑄨𑄚𑄳𑄠𑄬 𑄉𑄧𑄢𑄨 𑄡𑄢𑄴𑅁 𑄟𑄧𑄚𑄬 𑄟𑄧𑄚𑄬 𑄞𑄝𑄬𑄘𑄬 𑄄𑄝𑄬 𑄝𑄋𑄣𑄴 𑄚𑄧𑄠𑄴, 𑄌𑄋𑄴𑄟 𑄦𑄧𑄝𑄧𑄘𑄬𑅁 𑄚 𑄢𑄧𑄖𑄴𑄚𑄧𑄥𑄬𑄚𑄬 𑄡𑄢𑄴𑅁 𑄒𑄨𑄇𑄴 𑄘𑄨 𑄌𑄭𑄘𑄬, 𑄇𑄨 𑄝𑄘𑄨𑄇𑄴𑄮 𑄙𑄧𑄇𑄴 𑄘𑄬𑄊𑄬𑅁 𑄉𑄧𑄟𑄬–𑄘𑄣𑄬 𑄌𑄭𑄘𑄬, 𑄦𑄧𑄠𑄴𑄘𑄬 𑄆𑄚 𑄝𑄘𑄨𑄇𑄴𑄮𑅁 𑄃𑄮𑄟! 𑄝𑄘𑄨𑄇𑄴𑄮 𑄇𑄨𑄖𑄴𑄖𑄬𑄭 𑄇𑄬𑄟𑄴𑄛𑄧𑄖𑄴 𑄉𑄬𑄣𑄧𑅁 𑄛𑄧𑄢𑄨𑄟𑄧𑄣𑄬 𑄏𑄢𑄴 𑄚𑄧 𑄝𑄬𑄢𑄬𑄭 𑄌𑄪𑄝𑄨 𑄃𑄊𑄬𑅁 𑄞𑄣𑄧𑄇𑄴𑄧𑄚𑄴 𑄝𑄘𑄬 𑄌𑄭𑄘𑄬 𑄝𑄘𑄨𑄇𑄴𑄮 𑄆𑄇𑄴 𑄝𑄧𑄥𑄴𑄖 𑄌𑄮𑄣𑄴 𑄇𑄚𑄖𑄴 𑄉𑄧𑄢𑄨, 𑄅𑄇𑄴𑄮 𑄖𑄬𑄣𑄧 𑄝𑄧𑄘𑄧𑄣𑄴 𑄦𑄘𑄧𑄖𑄴 𑄉𑄧𑄢𑄨 𑄆𑄏𑄬𑄢𑄴𑄣𑄱𑄰𑅁 𑄃𑄮! 𑄟𑄧𑄢 𑄣𑄇𑄴𑄬, 𑄖𑄬 𑄚𑄬 𑄉𑄧𑄢𑄬𑄖𑄴𑄬𑅁 

𑄃𑄌𑄴𑄑𑄮

𑄚𑄨𑄟𑄮𑄚𑄬 𑄢𑄋𑄟𑄖𑄳𑄠𑄖𑄴 𑄡𑄬𑄠𑄳𑄠𑄬 𑄙𑄧𑄢𑄨 𑄖 𑄇𑄮𑄌𑄴𑄛𑄚 𑄦𑄃𑄮𑄎𑄮𑄢𑄴 𑄚𑄇𑄴𑄧𑄝𑄨𑄢𑄬 𑄌𑄨𑄙𑄨 𑄚𑄧 𑄣𑄬𑄊𑄬𑅁 𑄌𑄨𑄙𑄨 𑄚𑄧 𑄣𑄬𑄊𑄬𑄘𑄬 𑄚𑄧𑄠𑄴, 𑄌𑄨𑄙𑄨 𑄣𑄬𑄊𑄧𑄘𑄬 𑄞𑄣𑄧𑄇𑄴𑄇𑄚𑄨 𑄣𑄬𑄇𑄴𑄈𑄬𑅁 𑄈𑄣𑄨𑄇𑄴 𑄛𑄮𑄥𑄴𑄑𑄴 𑄃𑄧𑄞𑄨𑄌𑄴 𑄥𑄪𑄇𑄴 𑄚𑄧 𑄛𑄚𑄠𑄴 𑄌𑄨𑄙𑄨𑄉𑄚𑄨 𑄛𑄙𑄬𑄭 𑄘𑄨 𑄚𑄧 𑄛𑄢𑄬𑅁 𑄘𑄨𑄚𑄴 𑄟𑄭𑄚𑄬 𑄝𑄬𑄚𑄳𑄠, 𑄘𑄨𑄝𑄪𑄌𑄳𑄠, 𑄝𑄬𑄣𑄳𑄠, 𑄢𑄬𑄘𑄮𑄖𑄴 𑄌𑄨𑄙𑄨 𑄣𑄬𑄊𑄬𑅁 𑄃 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄌𑄬𑄭 𑄌𑄬𑄭 𑄇𑄧𑄠𑄴, 𑄇𑄨, 𑄢𑄉𑄴 𑄉𑄧𑄢𑄨 𑄃𑄊𑄧𑄌𑄴, 𑄟𑄧 𑄌𑄨𑄙𑄨 𑄚𑄧 𑄛𑄬𑄭𑅃 𑄢𑄉𑄴 𑄉𑄧𑄢𑄨 𑄚𑄧 𑄗𑄬𑄌𑄴𑅁 𑄟𑄪𑄭 𑄏𑄘𑄨 𑄏𑄘𑄨 𑄌𑄨𑄙𑄨 𑄛𑄙𑄬𑄟𑄴𑅁 𑄆𑄠𑄬 𑄌, 𑄖𑄧𑄢𑄬 𑄣𑄬𑄇𑄴𑄈𑄬 𑄌𑄨𑄙𑄨𑄚𑄨 𑄃𑄊𑄬𑅁 𑄄𑄠𑄬𑄚𑄨 𑄝𑄬𑄇𑄴𑄇𑄚𑄨 𑄛𑄬𑄝𑄬𑅁 𑄚𑄨𑄟𑄮𑄚𑄧𑄢𑄴 𑄇𑄧𑄚𑄧 𑄌𑄨𑄙𑄨 𑄚𑄧 𑄛𑄬𑄭 𑄅𑄚𑄴𑄘𑄨 𑄚𑄇𑄴𑄧𑄝𑄨 𑄌𑄨𑄘𑄬 𑄉𑄧𑄢𑄨 𑄗𑄠𑄴, 𑄚𑄨𑄟𑄮𑄚𑄧𑄢𑄴 𑄇𑄨 𑄦𑄧𑄣𑄧𑄚𑄬, 𑄇𑄨 𑄦𑄧𑄣𑄧𑅁 𑄞𑄧𑄖𑄴𑄖𑄨𑄦𑄱𑄰 𑄛𑄣𑄳𑄠𑄧 𑄚𑄨𑄚, 𑄚𑄧 𑄛𑄣𑄳𑄠𑄧𑅁 𑄉𑄧𑄟𑄴 𑄃𑄊𑄬𑄚𑄨 𑄚𑄬𑄭𑅁 𑄇𑄨𑄖𑄴𑄖𑄬𑄭 𑄌𑄨𑄙𑄨 𑄚𑄧 𑄣𑄬𑄊𑄬𑄢𑄴𑅁 𑄚𑄇𑄴𑄧𑄝𑄨–𑄃𑄮 𑄌𑄨𑄙𑄨 𑄛𑄙𑄬𑄭 𑄚𑄧 𑄛𑄢𑄬 𑄚𑄨𑄟𑄮𑄚𑄧𑄢𑄴 𑄦𑄧𑄖𑄴 𑄚𑄧 𑄛𑄚𑄠𑄴𑅁 𑄇𑄬𑄚𑄬 𑄇𑄨 𑄦𑄧𑄝𑄧 𑄞𑄝𑄬 𑄚𑄇𑄴𑄧𑄝𑄨𑅁 𑄘𑄨𑄚𑄴 𑄟𑄭𑄚𑄬 𑄃𑄏𑄠𑄴–𑄛𑄌𑄴𑄍𑄠𑄴 𑄇𑄧𑄣𑄬𑄎𑄧𑄖𑄴 𑄇𑄬𑄣𑄌𑄴 𑄗𑄪𑄟𑄴 𑄉𑄧𑄢𑄨 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴 𑄡𑄠𑄴 𑄚𑄨𑄟𑄮𑄚𑄧 𑄌𑄨𑄙𑄨 𑄛𑄬𑄝𑄧 𑄞𑄨𑄣𑄨𑅁 𑄈𑄣𑄨𑄇𑄴 𑄉𑄬𑄣𑄬 𑄚𑄧 𑄛𑄠𑄴𑅁 𑄚𑄨𑄟𑄮𑄚𑄧𑄢𑄴 𑄌𑄨𑄙𑄨 𑄚𑄧 𑄛𑄚𑄠𑄴 𑄌𑄪𑄙𑄮–𑄟𑄪 𑄉𑄧𑄢𑄨 𑄜𑄨𑄢𑄨 𑄆𑄏𑄬 𑄊𑄧𑄢𑄧𑄖𑄴 𑄟𑄧𑄚𑄧𑄖𑄴 𑄘𑄪𑄈𑄴 𑄉𑄧𑄢𑄨𑅁 𑄇𑄧𑄢𑄬𑄋𑄖𑄪𑄣𑄨 𑄝𑄎𑄢𑄧𑄖𑄴 𑄡𑄠𑄴 𑄖𑄪𑄠𑄮 𑄚𑄨𑄟𑄮𑄚𑄧𑄢𑄴 𑄌𑄨𑄙𑄨 𑄚𑄧 𑄛𑄠𑄴𑅁 𑄚𑄇𑄴𑄧𑄝𑄨 𑄇𑄧𑄣𑄬𑄎𑄧𑄖𑄴 𑄡𑄘𑄬 𑄑𑄬𑄟𑄴𑄛𑄮𑄖𑄴 𑄉𑄧𑄢𑄨 𑄡𑄠𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄥𑄧𑄟𑄌𑄳𑄠𑄣𑄱𑄰 𑄉𑄧𑄛𑄬–𑄥𑄧𑄛𑄬 𑄡𑄬𑄝𑄢𑄴 𑄟𑄧𑄚𑄬 𑄇𑄧𑄣𑄬 𑄦𑄘𑄨 𑄡𑄠𑄴𑅁 𑄇𑄎𑄧𑄣𑄧𑄁 𑄛𑄢𑄬 𑄛𑄢𑄬 𑄦𑄘𑄨 𑄡𑄘𑄬 𑄡𑄘𑄬 𑄆𑄇𑄴𑄎𑄧𑄚𑄴 𑄆𑄇𑄴𑄎𑄧𑄚𑄴 𑄣𑄊𑄧𑄖𑄴 𑄛–𑄛𑄨 𑄦𑄧𑄘𑄬 𑄦𑄧𑄘𑄬 𑄆𑄇𑄴 𑄏𑄇𑄴 𑄦𑄧𑄚𑄴𑅁 𑄜𑄨𑄖𑄴𑄖𑄨 𑄛𑄢𑄧𑄖𑄴 𑄆𑄇𑄴𑄇𑄚𑄴 𑄊𑄧𑄢𑄴 𑄃𑄊𑄬𑅁 𑄥𑄬 𑄊𑄧𑄢𑄚𑄧𑄖𑄴𑄪𑄚𑄴 𑄇𑄧𑄣𑄬𑄎𑄧𑄖𑄴 𑄡𑄠𑄴 𑄢𑄨𑄚𑄨𑄌𑅁 𑄚𑄇𑄴𑄧𑄝𑄨𑄣𑄱𑄰 𑄢𑄨𑄚𑄨𑄌 𑄞𑄢𑄨 𑄉𑄧𑄢𑄨 𑄥𑄧𑄁 𑄛𑄧𑄢𑄧𑄚𑄴𑅁 𑄢𑄫𑄛𑄧𑄇𑄢𑄩 𑄄𑄥𑄴𑄇𑄪𑄣𑄧𑄖𑄴 𑄡𑄬𑄇𑄴𑄬 𑄆𑄣𑄇𑄴, 𑄥𑄬𑄇𑄴𑄬–𑄃𑄮 𑄆𑄇𑄴 𑄥𑄧𑄟𑄢𑄬 𑄝𑄧𑄏𑄧𑄚𑄴𑅁 𑄆𑄇𑄴 𑄣𑄧𑄊𑄬 𑄛𑄥𑄴 𑄉𑄧𑄌𑄴𑄍𑄮𑄚𑄴𑅁 𑄇𑄧𑄣𑄬𑄎𑄧𑄖𑄴 𑄡𑄬𑄭𑄚𑄬–𑄃𑄮 𑄆𑄇𑄴 𑄥𑄟𑄢𑄬 𑄝𑄧𑄏𑄧𑄚𑄴𑅁 𑄝𑄧𑄢𑄴𑄃𑄘𑄟𑄧𑄖𑄴𑄪𑄚𑄴 𑄘𑄧𑄠𑄢𑄕𑄩, 𑄘𑄮𑄈𑄬𑄠𑄳𑄠𑄖𑄴𑄪𑄚𑄴 𑄟𑄳𑄢𑄨𑄕𑄣𑄩, 𑄉𑄮𑄣𑄍𑄧𑄢𑄨𑄖𑄴𑄪𑄚𑄴 𑄈𑄬𑄟𑄘𑄬𑄝𑄩, 𑄟𑄧𑄉𑄴𑄝𑄚𑄧𑄖𑄴𑄪𑄚𑄴 𑄎𑄮𑄖𑄴𑄥𑄧𑄚, 𑄟𑄨𑄚𑄧𑄖𑄨, 𑄏𑄧𑄉𑄧𑄢𑄝𑄨𑄣𑄧𑄖𑄴𑄪𑄚𑄴 𑄌𑄮𑄇𑄴𑄧𑄇𑄣 𑄃 𑄇𑄧𑄣𑄬𑄎𑄧𑄖𑄴 𑄉𑄬𑄣𑄬 𑄅𑄣𑄪𑄍𑄧𑄢𑄨, 𑄚𑄨𑄅𑄣𑄣𑄳𑄠𑄊𑄮𑄚, 𑄎𑄩𑄝𑄴𑄖𑄧𑄣𑄨, 𑄝𑄊𑄬𑄭𑄍𑄧𑄢𑄨 𑄃 𑄈𑄬𑄘𑄢𑄴𑄟𑄢𑄖𑄴𑄪𑄚𑄴 𑄆𑄏𑄧𑄚𑄴𑄘𑄬 𑄇𑄧𑄠𑄬𑄇𑄴𑄎𑄧𑄚𑄴 𑄟𑄨𑄣𑄬𑄣𑄱𑄰 𑄥𑄧𑄁 𑄛𑄧𑄢𑄬 𑄚𑄇𑄴𑄧𑄝𑄨𑅁 𑄆𑄇𑄴 𑄏𑄇𑄴 𑄟𑄨𑄣𑄬 𑄡𑄧𑄇𑄴𑄬 𑄇𑄧𑄣𑄬𑄎𑄴 𑄉𑄬𑄭𑄘𑄧 𑄝𑄧𑄑𑄴 𑄉𑄌𑄴𑄍𑄪𑄖𑄴 𑄖𑄧𑄣𑄬 𑄗𑄬𑄘𑄇𑄴, 𑄇𑄧𑄙 𑄇𑄧𑄝𑄇𑄴, 𑄦𑄎𑄨𑄝𑄬𑄇𑄴, 𑄥𑄧𑄇𑄴𑄬 𑄇𑄧𑄣𑄬𑄎𑄧 𑄛𑄮𑄉𑄪𑄚𑄬 𑄘𑄬𑄊𑄨𑄣𑄬 𑄇𑄧𑄚𑄴, 𑄄𑄉𑄪𑄚𑄴 𑄇𑄨 𑄉𑄪𑄢𑄨 𑄟𑄏𑄧 𑄏𑄉𑄧 𑄙𑄧𑄇𑄴 𑄉𑄧𑄢𑄨 𑄘𑄧𑄣 𑄝𑄮𑄘𑄨 𑄗𑄚𑄴𑅁 𑄡𑄨𑄝𑄬 𑄇𑄧𑄠𑄴 𑄥𑄨𑄝𑄬𑄢𑄬 𑄝𑄬𑄇𑄴𑄪𑄚𑄬 𑄆𑄇𑄴 𑄥𑄧𑄟𑄢𑄬 𑄇𑄧𑄙𑄇𑄴, 𑄦𑄮𑄇𑄴! 𑄃𑄟𑄨 𑄉𑄪𑄢𑄨 𑄟𑄏𑄧 𑄏𑄇𑄴𑅁 𑄃𑄟𑄨 𑄡𑄨𑄋𑄨𑄢𑄨 𑄗𑄬𑄘𑄧𑄁 𑄥𑄖𑄴, 𑄃𑄟𑄣𑄴𑄣𑄬𑄭 𑄖𑄧𑄢𑄴 𑄇𑄨𑅃 𑄄𑄠𑄬𑄚𑄴 𑄇𑄱𑄰 𑄝𑄬𑄇𑄴𑄪𑄚𑄬 𑄦𑄎𑄨𑄘𑄬𑄇𑄴𑅁

𑄚𑄨𑄟𑄮𑄚𑄬 𑄝𑄬𑄚𑄳𑄠 𑄝𑄱𑄰 𑄛𑄧𑄢𑄳𑄦𑄬𑄢𑄴𑅁 𑄆𑄚𑄴 𑄃𑄧𑄇𑄴𑄖𑄧𑄖𑄴 𑄖 𑄟𑄟𑄨 𑄣𑄪𑄋𑄨𑄣𑄮𑄉𑄱𑄰𑅁 𑄖 𑄟𑄟𑄨𑄢𑄬 𑄘𑄬𑄊𑄨 𑄇𑄧𑄣𑄧, 𑄟𑄟𑄨, 𑄥𑄧𑄟𑄴𑄟𑄨 𑄚𑅁

𑄚𑄨𑄟𑄮𑄚𑄧 𑄟𑄟𑄨 𑄥𑄬𑄚𑄧𑄖𑄴 𑄅𑄙𑄮𑄚𑄧𑄖𑄴 𑄒𑄨𑄠𑄬 𑄆𑄣𑄧𑅁 𑄚𑄨𑄟𑄮𑄚𑄬 𑄓𑄉𑄬𑄢𑄴 𑄇𑄨𑄚𑄬𑄖𑄴𑄖𑄬𑄭 𑄊𑄧𑄢𑄧 𑄞𑄨𑄘𑄨𑄢𑄬 𑄥𑄧𑄟𑄨𑄣𑄧 𑄖 𑄟𑄟𑄨𑅁 𑄇𑄧𑄣𑄧, 𑄚𑄨𑄟𑄮𑄚𑄴, 𑄖𑄧 𑄟𑄟𑄪 𑄇𑄱𑄰𑄠𑄬𑄘𑄬 𑄘𑄨𑄝𑄪𑄌𑄳𑄠 𑄃𑄟𑄥𑄨𑄙𑄪 𑄡𑄬𑄝𑄖𑄴𑄖𑄬𑄭𑅁 

𑄃 𑄇𑄨𑄖𑄴𑄖𑄬𑄭 𑄟𑄟𑄨𑅃

𑄟𑄬 𑄘𑄧 𑄚𑄧 𑄇𑄧𑄠𑄴𑅁

𑄡𑄬𑄟𑄴𑄝𑄬 𑄃𑄭 𑄟𑄟𑄨𑅁

𑄚𑄨𑄟𑄮𑄚𑄬 𑄡𑄬 𑄟𑄚𑄴𑄎𑄳𑄠𑄧 𑄊𑄧𑄢𑄚𑄧𑄖𑄴 𑄗𑄠𑄴, 𑄖 𑄟𑄟𑄪 𑄊𑄧𑄢𑄚𑄖𑄴𑄪𑄚𑄴 𑄞𑄢𑄨 𑄘𑄫𑄢𑄧𑄖𑄴 𑄚𑄧𑄠𑄴𑅁 𑄘𑄫𑄢𑄧𑄖𑄴 𑄚𑄧 𑄦𑄧𑄣𑄬–𑄃𑄮 𑄡𑄬𑄘𑄧 𑄌𑄬𑄣𑄬 𑄈𑄇𑄴𑄧𑄚𑄴 𑄣𑄉𑄬𑅁

𑄚𑄨𑄟𑄮𑄚𑄬 𑄇𑄨 𑄈𑄠𑄴, 𑄇𑄨 𑄚𑄧 𑄈𑄠𑄴, 𑄢𑄚𑄝𑄢 𑄇𑄬𑄚𑄬 𑄉𑄧𑄢𑄬𑅁 𑄖𑄮𑄚𑄴–𑄖𑄚𑄴 𑄇𑄬𑄎𑄚𑄴 𑄉𑄧𑄢𑄨 𑄢𑄚𑄬 𑄆𑄇𑄴𑄇 𑄢𑄨𑄚𑄨 𑄌𑄬𑄣𑄧 𑄖 𑄟𑄟𑄨𑅁 𑄞𑄖𑄴–𑄖𑄮𑄚𑄚𑄨 𑄢𑄚 𑄉𑄧𑄟𑄴 𑄘𑄬𑄊𑄨 𑄇𑄧𑄣𑄧, 𑄚𑄨𑄟𑄮𑄚𑄴, 𑄖𑄪𑄭 𑄘𑄧 𑄆𑄇𑄴𑄬 𑄟𑄧𑄢𑄧𑄖𑄴 𑄚𑄧𑄭𑄘𑄬 𑄙𑄧𑄇𑄴 𑄞𑄖𑄴 𑄢𑄚𑄨 𑄈𑄌𑄴𑅁

𑄚𑄨𑄟𑄮𑄚𑄬 𑄦𑄎𑄨 𑄦𑄎𑄨 𑄇𑄧𑄣𑄧, 𑄟𑄟𑄨, 𑄟𑄪𑄭 𑄃𑄘𑄟𑄳𑄠 𑄛𑄮𑅁 𑄝𑄬𑄌𑄴 𑄃𑄢𑄴 𑄇𑄧𑄟𑄴 𑄝𑄬𑄇𑄴𑄇𑄚𑄨 𑄃𑄧𑄞𑄳𑄠𑄥𑄴 𑄃𑄊𑄬𑅁

𑄃𑄟 𑄟𑄨𑄣𑄬𑄉𑄪𑄚𑄬 𑄦𑄬𑄟𑄴𑄝𑄦𑄱𑄰𑄚𑄬–𑄃𑄮 𑄞𑄖𑄴 𑄇𑄬𑄚𑄬 𑄢𑄚𑄬, 𑄇𑄱𑄰 𑄚𑄧 𑄛𑄢𑄧𑄚𑄴𑅁

𑄇𑄧𑄚𑄴 𑄑𑄅𑄚𑄧 𑄛𑄮𑄣𑄱𑄰 𑄃𑄘𑄟𑄳𑄠 𑄛𑄮 𑄥𑄧𑄁 𑄉𑄧𑄢𑄧𑄌𑄴 𑄟𑄟𑄨𑅁

𑄃 𑄄𑄠𑄬 𑄉𑄧𑄢𑄨𑄌𑄴 𑄚 𑄚𑄨𑄟𑄮𑄚𑄴, 𑄘𑄨𑄝𑄪𑄌𑄳𑄠 𑄞𑄖𑄴 𑄚𑄧 𑄢𑄚𑄨𑄌𑄴𑅁 𑄃𑄟𑄥𑄨𑄙𑄪 𑄢𑄚𑄨 𑄘𑄨𑄟𑄴 𑄟𑄪𑄭𑅁 𑄥𑄨𑄖𑄴𑄪𑄚𑄴 𑄈𑄬𑄭 𑄆 𑄛𑄢𑄨𑄝𑄬𑅁

𑄗𑄮𑄇𑄴, 𑄚𑄧 𑄣𑄉𑄨𑄝𑄮 𑄟𑄟𑄨𑅁 𑄝𑄬𑄚𑄳𑄠 𑄢𑄚𑄳𑄠 𑄞𑄖𑄴𑄪𑄚𑄴 𑄘𑄨𑄝𑄪𑄌𑄳𑄠 𑄥𑄧𑄁 𑄈𑄬𑄭 𑄛𑄢𑄨𑄟𑄴𑅁 𑄚𑄧 𑄈𑄬𑄣𑄬 𑄝𑄧𑄢𑄴𑄝𑄘𑄴 𑄡𑄬𑄝𑄇𑄴𑅁

𑄚𑄨𑄟𑄮𑄚𑄬 𑄞𑄖𑄴 𑄜𑄬𑄣–𑄥𑄬𑄣 𑄉𑄧𑄢𑄚 𑄉𑄧𑄟𑄴 𑄚𑄧 𑄛𑄠𑄴𑅁 𑄞𑄖𑄴 𑄅𑄉𑄪𑄣𑄳𑄠𑄬 𑄉𑄧𑄢𑄧𑄟𑄴 𑄉𑄧𑄢𑄨 𑄈𑄠𑄴𑅁 𑄞𑄘𑄧𑄖𑄴𑄖𑄬𑄭 𑄟𑄚𑄪𑄌𑄴 𑄟𑄧𑄢–𑄟𑄧𑄢𑄨𑅁 𑄞𑄖𑄴 𑄜𑄬𑄣𑄚 𑄦𑄧𑄣𑄧𑄘𑄬 𑄎𑄨𑄁𑄇𑄚𑄨 𑄜𑄬𑄣𑄚𑅁 𑄃 𑄡𑄪𑄚𑄨 𑄥𑄪𑄚𑄬 𑄟𑄚𑄳𑄠𑄬 𑄎𑄉 𑄝𑄬𑄎𑄧𑄘𑄧𑄚𑄴 𑄥𑄣𑄬𑄚𑄴 𑄖𑄬 𑄞𑄝𑄬, 𑄛𑄨𑄖𑄴𑄗𑄨𑄟𑄨𑄖𑄴 𑄡𑄬𑄙𑄧𑄇𑄳𑄠 𑄟𑄚𑄪𑄌𑄴 𑄝𑄢𑄧𑄘𑄧𑄚𑄴, 𑄥𑄬𑄙𑄧𑄇𑄳𑄠 𑄎𑄉 𑄚𑄧 𑄝𑄢𑄬𑄢𑄴𑅁 𑄘𑄨𑄚𑄴 𑄘𑄨𑄚𑄴 𑄎𑄉 𑄇𑄘𑄇𑄴–𑄇𑄘𑄨𑄇𑄴𑄦𑄱𑄰 𑄆𑄏𑄬𑄢𑄴𑅁 𑄎𑄉 𑄝𑄬𑄎𑄧𑄚𑄴𑄘𑄬 𑄟𑄚𑄪𑄌𑄴𑄪𑄚𑄬 𑄄𑄠𑄬𑄚𑄴 𑄇𑄨𑄖𑄴𑄖𑄬𑄭 𑄚𑄧 𑄝𑄪𑄏𑄧𑄚𑄴𑅁 𑄚𑄨𑄟𑄮𑄚𑄬 𑄘𑄨 𑄌𑄮𑄊𑄬 𑄘𑄬𑄇𑄴𑄈𑄬, 𑄖𑄢 𑄃𑄘𑄟𑄧𑄖𑄴 𑄟𑄬𑄢𑄇𑄴𑄬 𑄖 𑄝𑄝𑄧 𑄥𑄧𑄟𑄴𑄛𑄧𑄖𑄴𑄖𑄨 𑄥𑄧𑄠𑄴–𑄥𑄉𑄧𑄌𑄳𑄠 𑄛𑄬𑄠𑄳𑄠𑄬𑅁 𑄢𑄫𑄛𑄧𑄇𑄢𑄩 𑄞𑄪𑄭–𑄃𑄮 𑄟𑄙𑄧𑄖𑄴 𑄆𑄇𑄴 𑄘𑄪𑄚𑄧𑄖𑄴𑄪𑄚𑄴 𑄝𑄬𑄌𑄴 𑄞𑄪𑄭 𑄆𑄣𑄧𑅁 𑄟𑄪𑄢𑄮 𑄎𑄉 𑄆𑄣𑄧 𑄥𑄉𑄧𑄢𑄴𑅁 𑄇𑄛𑄴𑄖𑄬𑄭 𑄉𑄧𑄙𑄦𑄱𑄰 𑄡𑄨𑄉𑄪𑄚𑄬 𑄢𑄫𑄛𑄧𑄇𑄢𑄩𑄖𑄴 𑄆𑄌𑄴𑄍𑄮𑄚𑄴, 𑄥𑄨𑄉𑄪𑄚𑄬 𑄟𑄬𑄢𑄇𑄴𑄬 𑄝𑄝𑄧 𑄙𑄧𑄇𑄳𑄠𑄚𑄴 𑄇𑄨𑄠𑄮𑄎𑄧𑄚𑄬 𑄞𑄪𑄭 𑄚𑄧 𑄛𑄚𑄴𑅁 𑄃𑄘𑄬–𑄇𑄎𑄬 𑄃𑄘𑄟𑄳𑄠𑄉𑄪𑄚𑄬 𑄟𑄬𑄢𑄇𑄴𑄬 𑄝𑄛𑄴𑄮𑄢𑄬 𑄓𑄉𑄨𑄘𑄇𑄴 𑄞𑄪𑄭𑄠𑄮 𑄢𑄎𑅁 𑄈𑄣𑄨𑄇𑄴 𑄟𑄬𑄢𑄇𑄴𑄬 𑄃𑄟𑄧𑄣𑄧𑄖𑄴 𑄛𑄧𑄢𑄨 𑄆𑄌𑄳𑄠 𑄆𑄇𑄴𑄇, 𑄇𑄬𑄣𑄳𑄠 𑄆𑄇𑄴𑄇 𑄝𑄬𑄎𑄨 𑄈𑄘𑄬 𑄈𑄘𑄬 𑄝𑄬𑄇𑄴 𑄞𑄪𑄭𑄠𑄚𑄨 𑄝𑄬𑄎𑄨–𑄇𑄨𑄚𑄨 𑄍𑄢𑄚𑄙 𑄉𑄧𑄌𑄳𑄠𑅁 𑄄𑄇𑄴𑄬 𑄟𑄬𑄢𑄇𑄴𑄬 𑄛𑄮𑄉𑄪𑄚𑄮𑄢𑄴 𑄆𑄇𑄴 𑄉𑄮𑄏 𑄙𑄚𑄴 𑄣𑄉𑄬𑄝𑄢𑄴 𑄞𑄪𑄭 𑄚𑄬𑄭𑅁 𑄡𑄬𑄚𑄴 𑄚𑄧𑄚𑄴𑄘𑄨 𑄝𑄝𑄬𑅁 𑄖𑄖𑄴𑄪𑄚𑄴 𑄛𑄮 𑄦𑄧𑄣𑄇𑄴𑄬 𑄥𑄖𑄴𑄮𑅁 𑄖𑄬 𑄞𑄪𑄭 𑄛𑄬𑄠𑄳𑄠𑄬𑄘𑄬 𑄝𑄚𑄳𑄦 𑄛𑄌𑄴 𑄇𑄚𑄨𑅁 𑄖 𑄥𑄖𑄴𑄮 𑄛𑄮𑄢𑄬 𑄞𑄉𑄴 𑄉𑄧𑄢𑄨 𑄘𑄨𑄣𑄬 𑄆𑄇𑄴 𑄇𑄚𑄨𑄖𑄴 𑄘𑄧𑄢𑄬–𑄃𑄮 𑄞𑄉𑄧𑄖𑄴 𑄚𑄧 𑄛𑄚𑄴𑅁 𑄄𑄇𑄴𑄬 𑄚𑄧𑄚𑄴𑄘𑄨 𑄝𑄝𑄧 𑄚𑄘𑄨𑄚𑄧 𑄃𑄟𑄧𑄣𑄴 𑄛𑄧𑄌𑄳𑄠𑄉𑄨𑅁 𑄥𑄖𑄴𑄮 𑄛𑄮𑄖𑄴𑄪𑄚𑄴 𑄇𑄧𑄠𑄴𑄝𑄮 𑄚𑄘𑄨𑄚𑄴 𑄇𑄨𑄎𑄬𑄚𑄨! 𑄃 𑄞𑄪𑄭𑄠𑄚𑄨–𑄃𑄮 𑄇𑄬𑄚𑄬 𑄇𑄬𑄚𑄬 𑄞𑄉𑄴–𑄝𑄧𑄚𑄴𑄑𑄧𑄚𑄴 𑄉𑄧𑄢𑄨 𑄘𑄨𑄣𑄧, 𑄚𑄨𑄟𑄮𑄚𑄬 𑄇𑄱𑄰 𑄚𑄧 𑄛𑄢𑄬, 𑄃𑄘𑄟𑄳𑄠𑄉𑄪𑄚𑄬 𑄇𑄱𑄰 𑄚𑄧 𑄛𑄢𑄧𑄚𑄴𑅁 𑄆 𑄘𑄨𑄎𑄧𑄚𑄧𑄢𑄴 𑄘𑄪𑄢𑄴𑄉𑄧𑄘𑄨 𑄘𑄬𑄊𑄨, 𑄚𑄨𑄟𑄮𑄚𑄬 𑄎𑄉 𑄝𑄬𑄎𑄨𑄝𑄢𑄴 𑄚𑄧 𑄌𑄠𑄴𑅁 𑄎𑄉 𑄝𑄬𑄎𑄨 𑄚𑄧 𑄛𑄢𑄬𑅁

𑄇𑄨 𑄈𑄬𑄝𑄬 𑄟𑄟𑄨𑅃

𑄇𑄨 𑄈𑄬𑄘𑄮! 

𑄟𑄟𑄨, 𑄛𑄧𑄢𑄚𑄴 𑄍𑄧 𑄃𑄊𑄬𑅃

𑄚𑄬𑄭𑅁 𑄉𑄚𑄴 𑄥𑄨𑄊 𑄡𑄬𑄠𑄳𑄠𑄬𑅁 𑄗𑄇𑄴 𑄥𑄣𑄬𑄚𑄴, 𑄟𑄪𑄭 𑄡𑄁𑅁

𑄃 𑄇𑄨𑄌𑄴𑄪 𑄘𑄧 𑄈𑄬𑄭 𑄚𑄧 𑄛𑄬𑄣𑄬 𑄟𑄟𑄨𑅁

𑄚𑄧 𑄣𑄉𑄨𑄝𑄮, 𑄚𑄧 𑄣𑄉𑄨𑄝𑄮𑅁 𑄈𑄟𑄇𑄴𑄇𑄭 𑄡𑄬𑄌𑄴 𑄥𑄨𑄠𑄬𑅁

𑄦𑄧𑄘𑄬𑄭 𑄟𑄟𑄨𑅁

𑄚𑄨𑄟𑄮𑄚𑄧 𑄟𑄟𑄨 𑄡𑄚𑄠𑄴 𑄚𑄨𑄟𑄮𑄚𑄴 𑄃 𑄝𑄱𑄰 𑄛𑄧𑄢𑄳𑄦 𑄙𑄧𑄣𑄳𑄠𑄧𑅁 𑄇𑄧𑄣𑄬𑄎𑄧𑄖𑄴 𑄚𑄧 𑄡𑄠𑄴𑅁 𑄇𑄳𑄣𑄎𑄧 𑄛𑄧𑄢𑄣𑄬𑄊 𑄚𑄬𑄭𑅁 𑄇𑄧𑄣𑄬𑄎𑄧𑄖𑄴 𑄇𑄳𑄣𑄥𑄴 𑄃𑄢𑄧𑄟𑄴𑄞𑄧 𑄚𑄧 𑄦𑄧𑄠𑄴𑅁 𑄥𑄬𑄚𑄧𑄖𑄴𑄖𑄬𑄭 𑄚𑄚𑄝𑄝𑄧𑄖𑄳𑄠 𑄝𑄱𑄰 𑄛𑄧𑄢𑄳𑄦𑄬𑅁 𑄝𑄱𑄰 𑄛𑄧𑄢𑄳𑄦𑄨–𑄛𑄢𑄠𑄴, 𑄉𑄙𑄨–𑄉𑄙𑄠𑄴, 𑄘𑄨𑄝𑄬 𑄞𑄖𑄴 𑄈𑄬𑄭 𑄛𑄧𑄏–𑄛𑄨𑄢𑄬𑄚𑄨 𑄝𑄬𑄇𑄴𑄇𑄚𑄨 𑄉𑄪𑄌𑄴𑄍𑄬 𑄗𑄱𑄰𑄚𑄬, 𑄝𑄬𑄣𑄴 𑄇𑄧𑄘𑄴𑄪𑄢𑄴 𑄅𑄙𑄨 𑄚𑄨𑄟𑄮𑄚𑄬 𑄖 𑄟𑄟𑄪𑄘𑄊𑄨𑄙𑄪 𑄉𑄬𑄣𑄧𑅁 𑄚𑄨𑄟𑄮𑄚𑄬 𑄣𑄪𑄋𑄳𑄠𑄬𑄉𑄱𑄰𑄘𑄬 𑄃𑄧𑄇𑄴𑄖𑄧𑄖𑄴 𑄚𑄨𑄟𑄮𑄚𑄧 𑄟𑄟𑄪 𑄑𑄬𑄣𑄨𑄞𑄨𑄥𑄧𑄚𑄴 𑄌𑄢𑄴𑅁 𑄚𑄨𑄟𑄮𑄚𑄧 𑄟𑄟𑄪𑄝𑄮 𑄞𑄢𑄨 𑄉𑄧𑄢𑄨 𑄚𑄑𑄧𑄇𑄴 𑄌𑄠𑄴𑅁 𑄚𑄨𑄟𑄮𑄚𑄧𑄢𑄬 𑄘𑄬𑄊𑄨 𑄇𑄧𑄣𑄧, 𑄃𑄠𑄴 𑄞𑄉𑄬𑄚𑄴, 𑄝𑄧𑄌𑄴𑄍𑄨𑅁

𑄚𑄨𑄟𑄮𑄚𑄬 𑄝𑄧𑄏𑄨𑄣𑄧𑅁

𑄚𑄨𑄟𑄮𑄚𑄧 𑄟𑄟𑄪 𑄑𑄬𑄣𑄨𑄞𑄨𑄥𑄧𑄚𑄧𑄖𑄴𑄪𑄚𑄴 𑄟𑄪 𑄜𑄨𑄢𑄬𑄭 𑄇𑄧𑄣𑄧, 𑄟𑄪𑄭–𑄃𑄮 𑄡𑄨𑄚𑄴𑄘𑄨 𑄛𑄠𑄴 𑄡𑄁𑅁 𑄇𑄨 𑄉𑄧𑄢𑄧𑄢𑄴, 𑄇𑄬𑄚𑄬 𑄃𑄊𑄧𑄌𑄴 𑄖𑄣𑄌𑄴 𑄣𑄱𑄰 𑄚𑄧 𑄛𑄢𑄧𑄋𑄧𑄢𑄴𑅁 𑄖𑄬 𑄖𑄧 𑄟𑄟𑄨𑄢𑄬 𑄇𑄁𑄧𑄉𑄬, 𑄞𑄉𑄬𑄚𑄴𑄚𑄮𑄢𑄬 𑄆𑄝𑄖𑄴𑄖𑄬𑄭 𑄇𑄧𑄉𑄱𑄰𑅁 𑄖𑄬 𑄇𑄬𑄚𑄬 𑄃𑄊𑄧𑄌𑄴𑅃

𑄉𑄧𑄟𑄬 𑄃𑄊𑄧𑄁 𑄟𑄟𑄪𑅁

𑄆 𑄞𑄨𑄘𑄨𑄢𑄬 𑄊𑄧𑄢𑄧𑄖𑄴𑄪𑄚𑄴 𑄆𑄌𑄴𑄍𑄮𑄚𑄴𑅃

𑄚𑄧 𑄆𑄏𑄧𑄚𑄴 𑄟𑄟𑄪𑅁 𑄝𑄧𑄚𑄧𑄢𑄫𑄛𑄮𑄖𑄴 𑄡𑄬𑄭 𑄣𑄊𑄧𑄖𑄴 𑄛𑄬𑄠𑄧𑄁 𑄛𑄳𑄢𑄩𑄖𑄨𑄟𑄧𑄠𑄴 𑄘–𑄢𑄬𑅁

𑄖𑄬 𑄇𑄬𑄎𑄚𑄴 𑄃𑄊𑄧𑄚𑄴𑅃

𑄉𑄧𑄟𑄴 𑄃𑄊𑄧𑄚𑄴 𑄞𑄨𑄣𑄬𑅁

𑄚𑄨𑄟𑄮𑄚𑄧 𑄟𑄟𑄪 𑄖 𑄘𑄨𑄠𑄬𑄚𑄴 𑄒𑄬𑄁 𑄉𑄪𑄌𑄴𑄍𑄬𑄭 𑄇𑄧𑄣𑄧, 𑄞𑄉𑄬𑄚𑄴, 𑄢𑄋𑄟𑄖𑄳𑄠𑄖𑄴 𑄆𑄣𑄬𑅁 𑄃𑄉𑄬 𑄝𑄬𑄢𑄖𑄴𑄖𑄬𑄭 𑄆𑄣𑄬–𑄃𑄮 𑄆𑄙𑄧𑄇𑄳𑄠 𑄉𑄧𑄢𑄨 𑄗𑄬𑄝𑄖𑄴𑄖𑄬𑄭 𑄚𑄧 𑄆𑄏𑄧𑄌𑄴𑅁 𑄄𑄙𑄪 𑄥𑄖𑄴 𑄝𑄨𑄣𑄧 𑄟𑄚𑄪𑄌𑄴 𑄃𑄊𑄧𑄚𑄴𑅁 𑄃 𑄇𑄧𑄣𑄬𑄎𑄧𑄖𑄴–𑄃𑄮 𑄇𑄨𑄠𑄬 𑄆𑄏𑄧𑄚𑄴 𑄣𑄬𑄊 𑄥𑄨𑄊𑄨𑄝𑄖𑄴𑄖𑄬𑄭, 𑄇𑄨𑄠𑄬 𑄆𑄏𑄧𑄚𑄴 𑄟–𑄝𑄝𑄧𑄢𑄴 𑄟𑄧𑄚𑄴 𑄝𑄪𑄏𑄬𑄭 𑄘𑄨 𑄘𑄨𑄚𑄴 𑄇𑄘𑄬𑄝𑄖𑄴𑄖𑄬𑄭, 𑄇𑄨𑄠𑄬 𑄆𑄏𑄧𑄚𑄴 𑄟–𑄝𑄝𑄧𑄢𑄬 𑄍𑄢𑄚𑄙 𑄉𑄧𑄢𑄨𑄝𑄬𑄖𑄴𑄖𑄬𑄭𑅁 𑄙𑄬𑄁–𑄛𑄎𑄨 𑄥𑄧𑄟𑄌𑄳𑄠 𑄣𑄧𑄊𑄬 𑄚𑄧 𑄟𑄨𑄏𑄬𑄝𑄬𑅁 𑄖𑄪𑄭 𑄣𑄬𑄊 𑄥𑄨𑄊𑄨𑄝𑄖𑄴𑄖𑄬𑄭 𑄆𑄌𑄴𑄍𑄮𑄌𑄴𑅁 𑄖𑄧 𑄟–𑄝𑄝𑄬 𑄖𑄧𑄢𑄬 𑄣𑄬𑄊 𑄥𑄨𑄊𑄬𑄝𑄖𑄴𑄖𑄬𑄭 𑄛𑄙𑄬𑄠𑄧𑄚𑄴 𑄄𑄠𑄬𑄚𑄴 𑄖𑄧𑄖𑄴𑄪𑄚𑄴 𑄟𑄧𑄚𑄧𑄖𑄴 𑄢𑄊 𑄛𑄧𑄢𑄨𑄝𑄮𑅁

𑄥𑄨𑄠𑄬𑄚𑄴 𑄘𑄧 𑄦𑄧𑄠𑄴 𑄟𑄟𑄪𑅁

𑄖𑄪𑄭 𑄉𑄧𑄟𑄴 𑄄𑄥𑄴𑄇𑄪𑄣𑄳𑄠 𑄛𑄮, 𑄖𑄧𑄢𑄬–𑄃𑄮 𑄇𑄨 𑄇𑄧𑄝𑄧𑅁

𑄟𑄟𑄪, 𑄖𑄪𑄭 𑄦𑄪𑄌𑄴 𑄚𑄧 𑄘𑄨𑄣𑄬 𑄇𑄧𑄚𑄴𑄚 𑄘𑄨𑄘𑄮𑅁

𑄝𑄚𑄳𑄦 𑄟𑄧 𑄦𑄪𑄌𑄴 𑄘𑄬𑄚𑄣𑄱𑄰 𑄚𑄧 𑄦𑄧𑄝𑄧𑅁 𑄖𑄧𑄖𑄴𑄪𑄚𑄮 𑄦𑄪𑄎𑄬 𑄗 𑄛𑄧𑄢𑄨𑄝𑄮𑅁

𑄥𑄨𑄠𑄬𑄚𑄴 𑄘𑄧 𑄦𑄧𑄠𑄴 𑄟𑄟𑄪𑅁

𑄉𑄧𑄟𑄴–𑄝𑄧𑄎𑄧𑄁 𑄝𑄬𑄇𑄴𑄇𑄚𑄨 𑄝𑄪𑄏𑄮𑄢𑄴𑅁 𑄄𑄠𑄬𑄚𑄴 𑄉𑄧𑄢𑄨𑄌𑄴, 𑄛𑄧𑄢𑄳𑄦𑄣𑄬𑄊 𑄚𑄧 𑄗𑄬𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄑𑄨𑄞𑄨 𑄌 𑄆𑄌𑄴𑅁

𑄚𑄧 𑄌𑄬𑄌𑄴𑄍𑄨 𑄇𑄧𑄣𑄬–𑄃𑄮 𑄌 𑄛𑄧𑄢𑄨𑄝𑄮𑄉𑄨𑅁 𑄝𑄨𑄥𑄴𑄧 𑄇𑄛𑄴 𑄆𑄏𑄬𑄢𑄴𑅁

𑄘𑄨 𑄟𑄧𑄣𑄳𑄠𑄬 𑄞𑄉𑄨𑄚𑄬 𑄇𑄧𑄙 𑄇𑄧𑄙𑄬 𑄥𑄧𑄣𑄖𑄴 𑄚𑄨𑄟𑄮𑄚𑄧 𑄟𑄟𑄨 𑄆𑄇𑄴𑄇𑄚𑄴 𑄑𑄳𑄢𑄬𑄭 𑄦𑄘𑄧𑄖𑄴 𑄉𑄧𑄢𑄨 𑄆𑄣𑄧𑅁 𑄅𑄇𑄴𑄮 𑄌 𑄛𑄬𑄝𑄬𑄣𑅁 𑄘𑄨 𑄛𑄳𑄣𑄬𑄑𑄴 𑄃𑄜𑄬𑄣𑄴, 𑄃𑄁𑄉𑄪𑄢𑄴𑅁 𑄚𑄨𑄟𑄮𑄚𑄧 𑄟𑄟𑄨 𑄇𑄧𑄣𑄧, 𑄞𑄉𑄬𑄚𑄴, 𑄎𑄧𑄘𑄬𑄝𑄧𑄘𑄬 𑄄𑄙𑄪 𑄞𑄖𑄴 𑄚𑄧 𑄈𑄬𑄝𑄬𑅃

𑄚𑄙𑄬𑄭 𑄟𑄟𑄨𑅁

𑄙𑄧𑄢𑄴 𑄥𑄣𑄬𑄚𑄴, 𑄄𑄠𑄬𑄚𑄨 𑄈𑅁

𑄇𑄨 𑄘𑄪𑄈𑄴 𑄉𑄧𑄢𑄧𑄢𑄴 𑄟𑄟𑄨! 

𑄚𑄨𑄟𑄮𑄚𑄧 𑄟𑄟𑄨 𑄖 𑄚𑄬𑄇𑄴𑄮𑄢𑄬 𑄌 𑄛𑄬𑄝𑄬𑄣𑄝𑄮 𑄘𑄨 𑄇𑄧𑄣𑄧, 𑄝𑄧𑄌𑄴 𑄞𑄉𑄬𑄚𑄴 𑄥𑄣𑄬𑄚𑄴𑅁

𑄦𑄧𑄘𑄬𑄭 𑄟𑄟𑄨𑅁 

𑄘𑄨 𑄟𑄧𑄣𑄳𑄠𑄬–𑄞𑄉𑄨𑄚𑄬 𑄞𑄣𑄧𑄇𑄴𑄧𑄚𑄴 𑄥𑄧𑄁 𑄇𑄧𑄙 𑄇𑄱𑄰 𑄜𑄢𑄧𑄇𑄴 𑄦𑄧𑄣𑄇𑄴𑅁

𑄇𑄢𑄬𑄚𑄴𑄑𑄴 𑄡𑄬𑄠𑄳𑄠𑄬𑅁 𑄊𑄧𑄢𑄧 𑄞𑄨𑄘𑄨𑄢𑄬 𑄅𑄇𑄴𑄮 𑄟𑄮𑄟𑄴𑄝𑄖𑄴𑄖𑄨 𑄙𑄧𑄢𑄬𑄭 𑄘𑄨𑄠𑄬 𑄚𑄨𑄟𑄮𑄚𑄬𑅁 𑄇𑄢𑄬𑄚𑄴𑄑𑄴 𑄚𑄧 𑄗𑄚𑄠𑄴 𑄚𑄨𑄟𑄮𑄚𑄬 𑄊𑄧𑄢𑄴 𑄘𑄮𑄢𑄮𑄖𑄴 𑄝𑄧𑄏𑄨 𑄃𑄊𑄬𑅁 𑄇𑄢𑄬𑄚𑄴𑄑𑄴 𑄆𑄏𑄮𑄇𑄴 𑄆𑄏𑄮𑄇𑄴 𑄉𑄧𑄢𑄨 𑄝𑄌𑄴𑄍𑄬 𑄃𑄊𑄬𑅁 𑄥𑄎𑄴𑄦𑄱𑄰𑄠𑄬𑅁 𑄆𑄇𑄴𑄈𑄬𑄚 𑄃𑄉𑄬𑄘𑄨 𑄉𑄮𑄎𑄬𑄚𑄧𑄢𑄬 𑄎𑄪 𑄎𑄪 𑄉𑄧𑄌𑄴𑄍𑄬𑅁 𑄖𑄧𑄝𑄧𑄚 𑄉𑄧𑄌𑄴𑄍𑄬 𑄃𑄧𑄚𑄢𑄴𑄥𑄴 𑄉𑄧𑄟𑄬–𑄘𑄣𑄬 𑄛𑄥𑄴 𑄉𑄧𑄢𑄨 𑄛𑄢𑄬 𑄛𑄢𑅁 𑄇𑄧𑄚𑄧 𑄗𑄬𑄉𑄧𑄖𑄴 𑄚𑄧 𑄛𑄧𑄢𑄬 𑄛𑄢𑅁 𑄇𑄢𑄬𑄚𑄴𑄑𑄴 𑄚𑄧 𑄗𑄚𑄠𑄴 𑄃𑄘𑄟𑄚𑄴 𑄆𑄇𑄴𑄇𑄚 𑄟𑄧𑄚𑄧𑄖𑄴 𑄅𑄗𑄳𑄠𑄬𑅁 𑄥𑄧𑄟𑄌𑄳𑄠𑄉𑄪𑄚𑄧𑄢𑄬 𑄦𑄨𑄘𑄮𑄖𑄴 𑄅𑄙𑄨𑄣𑄧𑅁 𑄥𑄎𑄴 𑄦𑄧𑄣𑄬 𑄝𑄬𑄢𑄴𑄌𑄉 𑄇𑄚 𑄍𑄬𑄢𑄬𑄘𑄨 𑄌𑄬𑄢𑄉𑄧 𑄛𑄧𑄦𑄴𑄢𑄴 𑄘𑄬𑄊𑄬𑅁 𑄥𑄧𑄟𑄌𑄳𑄠𑄉𑄪𑄚𑄬 𑄡𑄨𑄖𑄴𑄪𑄚𑄴 𑄛𑄠𑄴 𑄆𑄣𑄬𑄉𑄱𑄰, 𑄛𑄧𑄙𑄬𑄘𑄨 𑄦𑄘𑄨 𑄡𑄘𑄬 𑄓𑄉𑄧𑄚𑄴𑄘𑄨𑅁 𑄊𑄧𑄢𑄧𑄖𑄴 𑄈𑄬𑄁𑄉𑄳𑄢𑄬𑄁–𑄈𑄁𑄉𑄢𑄁 𑄢𑄧 𑄥𑄪𑄚𑄬 𑄟𑄨𑄣𑄬𑄉𑄪𑄚𑄬 𑄗𑄣𑄴–𑄇𑄧𑄘𑄧𑄢 𑄌𑄟𑄬𑄌𑄴 𑄙𑄧𑄘𑄬𑅁 𑄝𑄢𑄨𑄏𑄬 𑄘𑄨𑄚𑄮𑄖𑄴 𑄦𑄧𑄣𑄬, 𑄏𑄧𑄢𑄴 𑄘𑄨𑄣𑄬, 𑄢𑄬𑄘𑄮𑄖𑄴 𑄇𑄨 𑄘𑄮𑄣𑄴 𑄉𑄧𑄢𑄨 𑄘𑄬𑄊𑄬 𑄌𑄬𑄢𑄉𑄧 𑄛𑄧𑄦𑄴𑄢𑄚𑄨𑅁 𑄝𑄪𑄠𑄬𑄢𑄴 𑄝𑄬𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄇𑄢𑄧 𑄇𑄢𑄧 𑄊𑄧𑄢𑄧𑄖𑄴 𑄌𑄬𑄢𑄇𑄴 𑄟𑄧𑄢𑄨 𑄡𑄚𑄴𑅁 𑄌𑄬𑄢𑄇𑄴 𑄟𑄧𑄢𑄨 𑄉𑄬𑄣𑄬 𑄊𑄧𑄢𑄴 𑄃𑄚𑄴𑄙𑄢𑄴 𑄦𑄧𑄠𑄴𑅁 𑄆𑄌𑄳𑄠–𑄃𑄮 𑄇𑄢𑄬𑄚𑄚𑄴 𑄡𑄬𑄚𑄬𑄭 𑄃𑄘𑄟𑄧 𑄝𑄢𑄨𑄏𑄬 𑄊𑄧𑄢𑄚𑄨 𑄙𑄧𑄇𑄴 𑄣𑄉𑄬𑄢𑄴𑅁 𑄄𑄠𑄬𑄚𑄴–𑄅𑄝𑄧𑄚𑄴 𑄞𑄝𑄧𑄘𑄬 𑄞𑄝𑄧𑄘𑄬 𑄛𑄧𑄙𑄬𑄘𑄨 𑄑𑄬𑄇𑄴𑄥𑄩 𑄢𑄧 𑄥𑄪𑄚𑄨𑄣𑄮 𑄚𑄨𑄟𑄮𑄚𑄬𑅁 𑄑𑄬𑄇𑄴𑄥𑄩 𑄢𑄧 𑄥𑄪𑄚𑄨 𑄚𑄨𑄟𑄮𑄚𑄧𑄢𑄴 𑄞𑄝𑄧𑄚 𑄞𑄋𑄨 𑄉𑄬𑄣𑄧𑅁 𑄝𑄧𑄢𑄴 𑄛𑄧𑄙𑄧𑄖𑄴 𑄚𑄳𑄦𑄨𑄉𑄨𑄣𑄨𑄣𑄬 𑄛𑄬𑄀–𑄛𑄀 𑄑𑄬𑄇𑄴𑄥𑄩𑄢𑄴 𑄢𑄧 𑄥𑄪𑄚𑄬𑅁 𑄚𑄨𑄟𑄮𑄚𑄬 𑄗𑄠𑄴𑄘𑄬 𑄊𑄧𑄢𑄧 𑄥𑄨𑄚𑄴𑄘𑄨 𑄉𑄣–𑄉𑄣 𑄑𑄬𑄇𑄴𑄥𑄩 𑄆𑄏𑄬𑅁 𑄃 𑄉𑄢𑄳𑄦𑄨 𑄘𑄧 𑄆𑄭 𑄚𑄧 𑄛𑄢𑄬–𑄃𑄮𑅁 𑄝𑄚𑄳𑄦 𑄦𑄮𑄚𑄴𑄘𑄚𑄨 𑄆𑄏𑄬𑅁 𑄑𑄬𑄇𑄴𑄥𑄩 𑄢𑄧𑄝𑄮 𑄥𑄪𑄚𑄨 𑄚𑄨𑄟𑄮𑄚𑄧𑄢𑄴 𑄞𑄝𑄧𑄚 𑄞𑄋𑄨 𑄉𑄬𑄣𑄬–𑄃𑄮 𑄖𑄬 𑄡𑄬𑄭 𑄝𑄧𑄏𑄨 𑄃𑄊𑄬𑅁 𑄇𑄪𑄖𑄴𑄪𑄚𑄴 𑄇𑄪𑄖𑄴𑄪𑄚𑄴 𑄟𑄚𑄪𑄌𑄴 𑄆𑄏𑄧𑄚𑄴 𑄢𑄋𑄟𑄖𑄳𑄠𑄖𑄴! 𑄟𑄚𑄳𑄠𑄬 𑄑𑄬𑄇𑄴𑄥𑄩 𑄃𑄚𑄧𑄚𑄴𑅁 𑄥𑄬𑄚𑄧𑄖𑄴𑄖𑄬𑄭 𑄉𑄣–𑄉𑄣 𑄑𑄬𑄇𑄴𑄥𑄩 𑄆𑄏𑄬𑅁 𑄑𑄬𑄇𑄴𑄥𑄩𑄠𑄚𑄴 𑄇𑄨 𑄚𑄨𑄟𑄮𑄚𑄬 𑄗𑄠𑄴𑄘𑄬 𑄊𑄧𑄢𑄧 𑄛𑄧𑄖𑄴𑄖𑄚𑄧𑄖𑄴 𑄟𑄪𑄠𑄮𑄚𑄧𑄖𑄴 𑄟𑄳𑄦𑄧 𑄦𑄧𑄣𑄧𑄉𑄨𑅁 𑄚𑄨𑄟𑄮𑄚𑄬 𑄞𑄝𑄬𑄢𑄴 𑄇𑄧𑄚𑄴𑄚 𑄆𑄏𑄬𑄢𑄴𑅁 𑄊𑄧𑄢𑄧𑄖𑄴𑄪𑄚𑄴 𑄆𑄝𑄢𑄴 𑄇𑄧𑄙 𑄚𑄧𑄠𑄴𑅁 𑄊𑄧𑄢𑄧𑄖𑄴𑄪𑄚𑄴 𑄆𑄚𑄬 𑄘𑄨𑄝𑄪𑄌𑄳𑄠𑄬 𑄣𑄪𑄋𑄧𑄚𑄴𑄘𑄨𑅁 𑄝𑄨𑄢𑄧𑄖𑄨𑄦𑄩𑄚𑄴 𑄝𑄮𑄘𑄬 𑄆𑄏𑄧𑄚𑄴𑅁 𑄃 𑄣𑄮𑄇𑄬𑄣𑄴 𑄝𑄮𑄘𑄬 𑄆𑄣𑄬–𑄃𑄮 𑄝𑄬𑄣𑄴 𑄗𑄉𑄧𑄘𑄬 𑄣𑄪𑄋𑄧𑄚𑄴𑄘𑄨𑅁 𑄚𑄨𑄟𑄮𑄚𑄬 𑄖𑄧𑄘 𑄃𑄣𑄧𑄇𑄴 𑄉𑄧𑄢𑄨 𑄛𑄧𑄙𑄬𑄘𑄨 𑄌𑄠𑄴𑄘𑄬 𑄇𑄣 𑄇𑄣 𑄉𑄧𑄢𑄨 𑄟𑄚𑄪𑄌𑄴𑄪𑄚𑄴 𑄘𑄬𑄊𑄬𑅁 𑄆𑄇𑄴 𑄏𑄇𑄴 𑄘𑄬𑄊𑄨 𑄗𑄉𑄧𑄖𑄴 𑄉𑄧𑄢𑄨 𑄖 𑄟𑄧𑄚𑄧𑄖𑄴 𑄇𑄟𑄣𑄳𑄠𑄧 𑄆𑄏𑄧𑄚𑄴𑄘𑄬 𑄥𑄨𑄉𑄪𑄚𑄴 𑄦𑄧𑄝𑄇𑄴 𑄚𑄇𑄨! 𑄃𑄉𑄬 𑄞𑄣𑄧𑄇𑄴𑄝𑄢𑄴 𑄆𑄌𑄴𑄍𑄮𑄚𑄴𑅁 𑄥𑄨𑄉𑄬𑄢𑄬𑄑𑄴 𑄈𑄚𑄴𑅁 𑄣𑄟𑄴𑄝 𑄣𑄟𑄴𑄝 𑄉𑄧𑄢𑄨 𑄛𑄧𑄢𑄨 𑄗𑄚𑄴𑅁 𑄖𑄬𑄋 𑄚𑄳𑄦𑄨𑄉𑄨𑄣𑄚𑄴 𑄎𑄬𑄝𑄧𑄖𑄴𑄪𑄚𑄴𑅁 𑄣𑄬𑄊𑄛𑄧𑄢𑄳𑄦 𑄉𑄧𑄛𑄴 𑄘𑄮𑄚𑄴𑅁 𑄌𑄉𑄧𑄢𑄨 𑄇𑄧𑄙 𑄇𑄧𑄚𑄴𑅁 𑄇𑄢𑄬 𑄇𑄢𑄬 𑄆𑄙𑄧𑄇𑄴 𑄦𑄎𑄢𑄴 𑄖𑄬𑄋 𑄅𑄙𑄮𑄢𑄴 𑄘𑄮𑄚𑄴 𑄇𑄧𑄚𑄴𑅁 𑄖𑄬𑄋𑄉𑄪𑄚𑄴 𑄚𑄧 𑄥𑄪𑄎𑄬, 𑄇𑄧𑄚𑄴𑅁 𑄜𑄧𑄣𑄧𑄚𑄢𑄬 𑄟𑄧 𑄉𑄪𑄙𑄨𑄖𑄴 𑄎𑄉 𑄘𑄮𑄁 𑄛𑄌𑄴–𑄍𑄧 𑄟𑄥𑄴 𑄥𑄧𑄁 𑄟𑄧 𑄖𑄬𑄋𑄣𑄱𑄰 𑄈𑄝𑄬𑄠𑄧𑄁𑅁 𑄆𑄇𑄴 𑄖𑄬𑄋–𑄃𑄮 𑄚𑄧 𑄣𑄧𑄁 𑄖𑄪𑄠𑄮 𑄟𑄧𑄢𑄬 𑄝𑄧𑄚𑄴𑄚𑄁 𑄉𑄧𑄢𑄬𑅁 𑄆𑄥𑄚𑄳𑄠𑄬 𑄉𑄧𑄢𑄨 𑄖𑄢 𑄖𑄢 𑄇𑄮–𑄝𑄪𑄣𑄮 𑄉𑄧𑄢𑄧𑄚𑄴𑅁 𑄚𑄨𑄟𑄮𑄚𑄬 𑄝𑄚𑄳𑄦 𑄥𑄪𑄚𑄨 𑄗𑄠𑄴𑅁 𑄛𑄧𑄠𑄴𑄣𑄬 𑄛𑄧𑄠𑄴𑄣𑄬 𑄚𑄨𑄟𑄮𑄚𑄬 𑄟𑄧𑄚𑄬 𑄉𑄧𑄌𑄴𑄍𑄬 𑄄𑄉𑄪𑄚𑄴 𑄃𑄘𑄟𑄳𑄠 𑄛𑄮 𑄡𑄧𑄇𑄴𑄈𑄬 𑄉𑄧𑄟𑄴 𑄦𑄧𑄝𑄇𑄴𑅁 𑄚𑄨𑄅𑄑𑄧𑄚𑄴 𑄚𑄋𑄬 𑄅𑄇𑄴𑄮 𑄢𑄋𑄟𑄖𑄳𑄠 𑄛𑄮 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄨𑄟𑄮𑄚𑄧 𑄥𑄨𑄙𑄪 𑄆𑄏𑄬𑅁 𑄚𑄨𑄅𑄑𑄧𑄚𑄬 𑄇𑄱𑄰 𑄛𑄢𑄬 𑄄𑄉𑄪𑄚𑄬 𑄃𑄘𑄟𑄧𑄖𑄴𑄪𑄚𑄴 𑄡𑄬 𑄛𑄮–𑄉𑄪𑄚𑄴 𑄆𑄏𑄧𑄚𑄴, 𑄥𑄨𑄉𑄪𑄚𑄴 𑄚𑄪𑄠𑄮 𑄚𑄪𑄠𑄮 𑄈𑄪𑄝𑄴 𑄥𑄧𑄦𑄧𑄎𑄴–𑄥𑄧𑄢𑄧𑄣𑄴 𑄉𑄧𑄢𑄨 𑄗𑄚𑄴𑅁 𑄈𑄣𑄨𑄇𑄴 𑄇𑄧𑄚𑄧 𑄇𑄧𑄚𑄧 𑄛𑄮 𑄥𑄧𑄢𑄧𑄣𑄴 𑄉𑄧𑄢𑄨 𑄛𑄧𑄢𑄳𑄦𑄣𑄬𑄊 𑄗𑄪𑄟𑄴 𑄉𑄧𑄢𑄧𑄚𑄴𑅁 𑄇𑄧𑄚𑄧 𑄇𑄧𑄚𑄧 𑄛𑄮 𑄃𑄧𑄟𑄧𑄇𑄧𑄘𑄧 𑄛𑄎𑄨 𑄦𑄧𑄚𑄴𑅁 𑄥𑄬 𑄛𑄎𑄨𑄉𑄪𑄚𑄮 𑄦𑄘𑄧𑄖𑄴 𑄛𑄧𑄢𑄧𑄚𑄴𑄘𑄨 𑄚𑄪𑄠𑄮 𑄆𑄌𑄳𑄠 𑄃𑄘𑄟𑄳𑄠 𑄛𑄮–𑄉𑄪𑄚𑄴𑅁 𑄚𑄨𑄅𑄑𑄧𑄚𑄬 𑄃𑄘𑄟𑄧𑄖𑄴𑄪𑄚𑄴 𑄆𑄏𑄧𑄚𑄴𑄘𑄬 𑄚𑄪𑄠𑄮 𑄚𑄪𑄠𑄮 𑄛𑄮–𑄉𑄪𑄚𑄧𑄢𑄬 𑄦𑄪𑄌𑄴–𑄉𑄪𑄌𑄴 𑄘𑄬𑅁 𑄚𑄨𑄟𑄮𑄚𑄧𑄢𑄬–𑄃𑄮 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄦𑄪𑄌𑄴 𑄘𑄬𑄊𑄨𑅁 𑄝𑄱𑄰 𑄛𑄧𑄢𑄨𑄝𑄖𑄴𑄖𑄬𑄭 𑄇𑄧𑄠𑄴𑅁 𑄚𑄨𑄟𑄮𑄚𑄬 𑄆𑄚𑄬–𑄃𑄮 𑄝𑄱𑄰 𑄛𑄧𑄢𑄳𑄦𑄬𑅁 𑄚𑄨𑄅𑄑𑄧𑄚𑄬 𑄖 𑄇𑄨𑄚𑄳𑄠𑄬 𑄝𑄱𑄰 𑄃𑄚𑄨 𑄘𑄬𑅁 𑄥𑄨𑄉𑄪𑄚𑄴 𑄚𑄨𑄟𑄮𑄚𑄬 𑄛𑄧𑄢𑄳𑄦𑄨–𑄛𑄧𑄢𑄠𑄴 𑄜𑄨𑄢𑄬𑄭 𑄘𑄬𑅁 𑄚𑄨𑄟𑄮𑄚𑄬 𑄆𑄝𑄧 𑄇𑄳𑄣𑄎𑄧 𑄝𑄱𑄰 𑄝𑄘𑄬 𑄇𑄧𑄚𑄧 𑄝𑄱𑄰 𑄚𑄧 𑄇𑄨𑄚𑄬𑅁 𑄇𑄳𑄣𑄥𑄧 𑄝𑄱𑄰 𑄛𑄧𑄢𑄳𑄦 𑄝𑄘𑄬 𑄝𑄚𑄳𑄦 𑄚𑄨𑄅𑄑𑄧𑄚𑄬 𑄃𑄚𑄳𑄦𑄨 𑄘𑄳𑄠 𑄝𑄱𑄰𑄉𑄪𑄚𑄴𑅁 𑄚𑄨𑄟𑄮𑄚𑄴𑄘𑄱𑄰𑄚𑄨𑄅𑄑𑄧𑄚𑄬 𑄥𑄧𑄁 𑄛𑄧𑄢𑄧𑄚𑄴𑅁 𑄎𑄧𑄉𑄧𑄖𑄴𑄟𑄧𑄠𑄴𑄘𑄊𑄨 𑄆𑄏𑄧𑄚𑄴𑄘𑄬 𑄥𑄨𑄠𑄬𑄚𑄴 𑄇𑄱𑄰 𑄛𑄌𑄴𑄍𑄬 𑄚𑄨𑄅𑄑𑄧𑄚𑄬𑅁 𑄚𑄨𑄟𑄮𑄚𑄧𑄢𑄬 𑄇𑄱𑄰𑄠𑄬 𑄥𑄨𑄉𑄪𑄚𑄴𑄘𑄭𑄮 𑄟𑄨𑄣𑄧𑄚𑄴–𑄏𑄨𑄣𑄧𑄚𑄴 𑄉𑄧𑄢𑄨 𑄚𑄧 𑄗𑄬𑄝𑄖𑄴𑄖𑄬𑄭𑅁 𑄚𑄨𑄅𑄑𑄧𑄚𑄧 𑄇𑄧𑄙 𑄥𑄪𑄚𑄨 𑄆𑄇𑄴𑄇 𑄆𑄇𑄴𑄇 𑄄𑄢𑄴𑄌𑄬–𑄄𑄢𑄴𑄌𑄬 𑄥𑄧𑄢𑄴𑄌𑄬–𑄥𑄧𑄢𑄴𑄴𑄌𑄬 𑄉𑄧𑄢𑄨 𑄗𑄠𑄴 𑄚𑄨𑄟𑄮𑄚𑄬𑅁 𑄆𑄚𑄬–𑄃𑄮 𑄎𑄧𑄉𑄧𑄖𑄴𑄟𑄧𑄠𑄴𑄘𑄊𑄨 𑄙𑄧𑄇𑄴𑄇𑄚𑄨 𑄝𑄪𑄏𑄨 𑄛𑄌𑄴𑄍𑄬 𑄚𑄨𑄟𑄮𑄚𑄬𑅁 𑄃𑄌𑄴𑄑𑄮–𑄘𑄧𑄌𑄴 𑄘𑄨𑄚𑄴 𑄛𑄧𑄢𑄴 𑄛𑄧𑄢𑄴 𑄆𑄏𑄧𑄚𑄴𑅁 𑄇𑄧𑄚𑄧 𑄃𑄧𑄇𑄴𑄖𑄧𑄖𑄴 𑄛𑄌𑄴𑄎𑄧𑄚𑄴, 𑄇𑄧𑄚𑄧 𑄃𑄧𑄇𑄴𑄖𑄧𑄖𑄴 𑄖𑄨𑄚𑄴𑄎𑄧𑄚𑄴𑅁 𑄇𑄧𑄚𑄧 𑄃𑄧𑄇𑄴𑄖𑄴 𑄆𑄇𑄴 𑄏𑄇𑄴𑅁 𑄆𑄣𑄬 𑄄𑄚𑄴𑄘𑄨–𑄅𑄚𑄴𑄘𑄨 𑄝𑄬𑄢 𑄡𑄬𑄝𑄖𑄴𑄖𑄬𑄭 𑄅𑄎𑄪𑄣𑄮𑄚𑄴𑅁 𑄚𑄨𑄟𑄮𑄚𑄬 𑄡𑄬𑄘𑄧 𑄚𑄧 𑄌𑄠𑄴𑅁 𑄆𑄇𑄴𑄝𑄢𑄴 𑄖𑄪𑄠𑄮 𑄝𑄧𑄣𑄬 𑄙𑄧𑄢𑄨 𑄚𑄬𑄡𑄬𑄠𑄮𑄚𑄴 𑄢𑄋𑄟𑄖𑄳𑄠𑄖𑄴 𑄝𑄬𑄢𑄚𑄳𑄠𑄬 𑄎𑄉𑄖𑄴 (𑄛𑄧𑄢𑄴𑄡𑄧𑄑𑄧𑄚𑄴) 𑄆𑄏𑄚–𑄡𑄚 𑄘𑄨𑄠𑄬𑄚𑄴 𑄑𑄬𑄇𑄴𑄥𑄩𑄢𑄴 𑄟𑄚𑄴𑄎𑄳𑄠𑄧 𑄖𑄬𑄋𑄉𑄪𑄚𑄴 𑄝𑄬𑄇𑄴𑄪𑄚𑄴 𑄘𑄨 𑄛𑄬𑄠𑄳𑄠𑄬 𑄚𑄨𑄟𑄮𑄚𑄬𑅁 𑄥𑄬𑄘𑄨𑄚𑄳𑄠 𑄇𑄱𑄰𑄠𑄧𑄚𑄴 𑄆𑄌𑄳𑄠 𑄖𑄪𑄭 𑄘𑄬 𑄞𑄬𑄭𑅁 𑄃𑄢𑄧 𑄘𑄧 𑄆𑄝𑄧𑄁𑅁 𑄥𑄬𑄇𑄴𑄬 𑄃𑄟𑄨 𑄃𑄟𑄧𑄚𑄬 𑄘𑄨𑄝𑄧𑄁𑅁 𑄚𑄨𑄟𑄮𑄚𑄬 𑄖𑄬𑄋𑄉𑄪𑄚𑄴 𑄘𑄨𑄠𑄬𑅁 𑄃 𑄆𑄇𑄴𑄘𑄨𑄚𑄳𑄠𑄬 𑄚𑄨𑄟𑄮𑄚𑄬 𑄇𑄧𑄣𑄬𑄎𑄧𑄖𑄴𑄪𑄚𑄴 𑄆𑄖𑄴𑄬 𑄚𑄨𑄅𑄟𑄢𑄴𑄇𑄬𑄑𑄧𑄖𑄴 𑄣𑄊𑄧𑄖𑄴 𑄛𑄬𑄭 𑄟𑄢𑄴𑄇𑄬𑄑𑄧𑄖𑄴 𑄥𑄮𑄟𑄬𑄭 𑄞𑄨𑄣𑄬 𑄥𑄮𑄟𑄬𑄭𑅁 𑄥𑄨𑄠𑄬–𑄃𑄮 𑄥𑄮𑄟𑄬 𑄛𑄬𑄣𑄧 𑄝𑄧𑄣𑄬 𑄝𑄧𑄣𑄬𑅁 𑄌 𑄘𑄮𑄉𑄚𑄧𑄖𑄴 𑄝𑄧𑄏𑄨 𑄌, 𑄛𑄨𑄙𑄬 𑄟𑄧𑄚𑄬 𑄟𑄧𑄚𑄴𑄎𑄧𑄇𑄴𑄇 𑄈𑄬𑄣𑄇𑄴𑅁 𑄉𑄮𑄣𑄴𑄓𑄴𑄣𑄨𑄛𑄴 𑄥𑄨𑄉𑄬𑄢𑄬𑄑𑄴 𑄣𑄧𑄣𑄇𑄴𑅁 𑄌 𑄈𑄬𑄭–𑄈𑄭 𑄅𑄙𑄨 𑄆𑄖𑄴𑄬 𑄎𑄧𑄉𑄧𑄖𑄴𑄟𑄧𑄠𑄴 𑄛𑄬𑄚𑄧 𑄎𑄬𑄛𑄴𑄮𑄖𑄴 𑄦𑄖𑄴 𑄞𑄧𑄢𑄬𑄭 𑄇𑄧𑄣𑄧, 𑄄𑄥𑄧! 𑄟𑄚𑄨 𑄝𑄬𑄇𑄴𑄮 𑄘𑄬 𑄜𑄬𑄣𑄬𑄭 𑄆𑄌𑄴𑄍𑄁𑄮𑄉𑄬𑅁 𑄃 𑄇𑄨 𑄦𑄧𑄝𑄧! 𑄚𑄨𑄟𑄮𑄚𑄬 𑄘𑄧 𑄇𑄱𑄰 𑄛𑄢𑄬 𑄆𑄥𑄚𑄳𑄠𑄬 𑄉𑄧𑄢𑄨𑄝𑄇𑄴𑄬𑅁

𑄚𑄧𑄠𑄴

𑄥𑄬𑄘𑄨𑄚𑄳𑄠 𑄝𑄚𑄳𑄦 𑄌𑄬𑄢𑄴𑄎𑄧𑄚𑄴 𑄆𑄣𑄇𑄴𑅁 𑄖𑄨𑄚𑄴𑄎𑄧𑄚𑄬 𑄇𑄧𑄙𑄧𑄚𑄴 𑄖𑄪𑄭 𑄈𑄝𑄬𑄝𑄬 𑄞𑄨𑄣𑄬 𑄥𑄬𑄚𑄧𑄖𑄴𑄖𑄬𑄭 𑄃𑄟𑄨 𑄖𑄬𑄋 𑄚𑄧 𑄃𑄚𑄨𑅁 𑄟𑄧𑄢𑄣𑄇𑄴𑄬! 𑄖𑄬𑄋 𑄚𑄬𑄭 𑄃𑄠𑄳𑄠𑄬 𑄚𑄧 𑄇𑄧𑄌𑄴𑅃

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄇𑄨 𑄣𑄎𑄴 𑄉𑄧𑄢𑄬 𑄛𑄢 𑄇𑄧𑄙 𑄇𑄧! 𑄟𑄧𑄖𑄴𑄪𑄚𑄴 𑄖𑄬𑄋 𑄆𑄣𑄇𑄴𑅁 𑄖𑄪𑄟𑄨 𑄚 𑄝𑄊𑄬 𑄣𑄧𑄢𑄖𑄳𑄠𑄬 𑄙𑄧𑄇𑄴 𑄉𑄧𑄢𑄨 𑄈𑄨𑄎𑄬–𑄈𑄨𑄌𑄳𑄠 𑄝𑄎𑄬𑄠𑄳𑄠𑄧𑅁 𑄛𑄬𑄚𑄧 𑄎𑄬𑄛𑄴𑄛𑄮𑄖𑄴 𑄖𑄬𑄋 𑄆𑄣𑄇𑄴 𑄥𑄧𑄖𑄴𑄬 𑄆𑄣𑄇𑄴𑅁 𑄟𑄪𑄭–𑄃𑄮 𑄝𑄨𑄎𑄨𑄢𑄬𑄭 𑄚𑄧 𑄌𑄬𑄣𑄪𑄁𑅁

𑄖𑄢 𑄇𑄧𑄙 𑄥𑄪𑄚𑄨 𑄘𑄮𑄉𑄚𑄴𑄘𑄌𑄳𑄠 𑄟𑄪 𑄌𑄨𑄟𑄬 𑄌𑄨𑄟𑄬 𑄦𑄎𑄬𑄢𑄴𑅁 𑄘𑄮𑄉𑄚𑄴𑄘𑄌𑄴𑄍𑄬 𑄝𑄪𑄏𑄨 𑄛𑄌𑄳𑄠 𑄖𑄢 𑄙𑄧𑄁 𑄉𑄣𑄧𑄘𑄧𑄚𑄴𑄘𑄬 𑄥𑄨𑄠𑄬𑄚𑄴𑅁 𑄎𑄧𑄉𑄧𑄖𑄴𑄟𑄧𑄠𑄴 𑄃 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭𑄝𑄮𑄢𑄬–𑄃𑄮 𑄣𑄊𑄧𑄖𑄴 𑄛𑄬𑄣𑄧𑄁𑅁 𑄖𑄢𑄬 𑄌 𑄈𑄝𑄬𑄝𑄖𑄴𑄖𑄬𑄭 𑄞𑄨𑄣𑄬 𑄃𑄚𑄨𑄣𑄧𑄁𑄉𑄬𑅁 𑄥𑄬𑄘𑄨𑄚𑄳𑄠–𑄃𑄮 𑄝𑄬𑄇𑄴 𑄖𑄬𑄋𑄉𑄪𑄚𑄴 𑄖𑄖𑄴𑄪𑄚𑄴 𑄘𑄨 𑄛𑄬𑄠𑄳𑄠𑄬𑅁 𑄃 𑄇𑄨 𑄉𑄧𑄢𑄨𑄝𑄮 𑄚𑄨𑄟𑄮𑄚𑄴 𑄞𑄬𑄭, 𑄣𑄎𑄴 𑄚𑄬 𑄍𑄧𑄢𑄧𑄟𑄴, 𑄖𑄬𑄋 𑄗𑄬𑄣𑄬 𑄌 𑄖𑄬𑄋𑄉𑄪𑄚𑄴 𑄘𑄨 𑄘𑄬𑅁 𑄟𑄪𑄭 𑄃𑄟𑄬𑄚𑄬 𑄝𑄬𑄣𑄳𑄠𑄬, 𑄈𑄟𑄇𑄴𑄈𑄭 𑄘𑄨𑄟𑄴𑄝𑄨𑅁 𑄇𑄧𑄚𑄧 𑄝𑄬𑄌𑄴𑄇𑄧𑄟𑄴 𑄚𑄧 𑄦𑄧𑄝𑄧𑅁 𑄚𑄨𑄟𑄮𑄚𑄬 𑄃𑄢𑄧 𑄌 𑄖𑄬𑄋𑄉𑄪𑄚𑄴 𑄘𑄨 𑄛𑄬𑄣𑄧𑅁 𑄌 𑄈𑄚 𑄎𑄬𑄢𑄬𑄘𑄨 𑄇𑄧𑄠𑄬𑄇𑄴𑄛𑄧𑄣𑄴𑄣 𑄡𑄬𑄠𑄮𑄚𑄴, 𑄖𑄬𑄋 𑄥𑄪𑄎𑄮𑄚 𑄘𑄧 𑄦𑄧𑄝𑄧𑄣 𑄇𑄧𑄙! 𑄅𑄉𑄮𑄘𑄮 𑄉𑄧𑄢𑄨 𑄃 𑄖𑄬𑄋 𑄟𑄊𑄧𑄚𑄴𑅁 𑄖𑄢𑄢𑄴 𑄟𑄧𑄖𑄨𑄉𑄧𑄖𑄨 𑄘𑄬𑄊𑄨 𑄖𑄬𑄋 𑄚𑄧 𑄘𑄬 𑄚𑄨𑄟𑄮𑄚𑄬𑅁 𑄚𑄨𑄅𑄑𑄧𑄚𑄬–𑄃𑄮 𑄆𑄇𑄴𑄪𑄎𑄚𑄴 𑄦𑄪𑄌𑄴 𑄘𑄬 𑄑𑄬𑄋–𑄛𑄧𑄠𑄴𑄏𑄬 𑄃𑄝𑄘𑄌𑄴𑄍𑄬 𑄥𑄧𑄟𑄌𑄳𑄠𑄢𑄬 𑄚𑄧 𑄘𑄨𑄝𑄬𑄖𑄴𑄖𑄬𑄭𑅁 𑄚𑄨𑄟𑄮𑄚𑄧 𑄟𑄟𑄪–𑄃𑄮 𑄟𑄚 𑄉𑄧𑄌𑄴𑄍𑄬 𑄡𑄢𑄬–𑄖𑄢𑄬 𑄖𑄬𑄋 𑄚𑄧 𑄘𑄨𑄝𑄬𑄖𑄴𑄖𑄬𑄭𑅁 𑄥𑄨𑄖𑄴𑄪𑄚𑄴 𑄙𑄧𑄢𑄨 𑄚𑄨𑄟𑄮𑄚𑄬 𑄖𑄬𑄋 𑄚𑄧 𑄘𑄬𑅁 𑄆 𑄞𑄨𑄘𑄨𑄢𑄬 𑄎𑄧𑄉𑄧𑄖𑄴𑄟𑄧𑄠𑄴𑄘𑄊𑄨 𑄇𑄧𑄠𑄬𑄇𑄴𑄛𑄧𑄣𑄴𑄣 𑄖𑄬𑄋 𑄟𑄊𑄨 𑄖𑄬𑄋 𑄚𑄧 𑄛𑄬𑄭 𑄖𑄢 𑄢𑄉𑄬 𑄜𑄪𑄣𑄨 𑄃𑄊𑄧𑄚𑄴𑅁 𑄇𑄬𑄚𑄬 𑄖𑄬𑄋 𑄛𑄬𑄝𑄇𑄴 𑄚𑄨𑄟𑄮𑄚𑄧𑄖𑄴𑄪𑄚𑄴 𑄖𑄬𑄟𑄴𑄟𑄁 𑄉𑄧𑄌𑄴𑄍𑄮𑄚𑄴𑅁 𑄡𑄬𑄚𑄬 𑄛𑄢𑄧𑄚𑄴 𑄚𑄨𑄟𑄮𑄚𑄧𑄖𑄴𑄪𑄚𑄴 𑄖𑄬𑄋 𑄚𑄳𑄦𑄨𑄉𑄨𑄣𑄬𑄝𑄇𑄴𑅁 𑄆𑄚𑄬–𑄃𑄮 𑄏𑄉𑄧𑄖𑄴 𑄟𑄨𑄏𑄬𑄝𑄖𑄴𑄖𑄬𑄭 𑄌𑄬𑄣𑄬–𑄃𑄮 𑄙𑄬𑄭 𑄙𑄬𑄭 𑄗𑄠𑄴𑅁 𑄆𑄚𑄬 𑄚𑄧 𑄦𑄧𑄝𑄧, 𑄆𑄚𑄬 𑄚𑄧 𑄦𑄧𑄝𑄧𑅁 𑄆𑄌𑄳𑄠 𑄖𑄢𑄬 𑄚𑄪𑄠𑄮 𑄛𑄧𑄗𑄴 𑄘𑄬𑄊 𑄛𑄧𑄢𑄨𑄝𑄮𑅁 𑄚𑄧 𑄦𑄧𑄣𑄬 𑄚𑄧 𑄦𑄧𑄝𑄧𑅁 𑄟𑄢𑄨–𑄛𑄨𑄘𑄨 𑄞𑄪𑄖𑄴 𑄝𑄚𑄬𑄭–𑄝𑄚𑄠𑄴 𑄡 𑄗𑄚𑄴 𑄖𑄬𑄋 𑄝𑄬𑄇𑄴𑄪𑄚𑄴 𑄇𑄢𑄨 𑄃𑄚 𑄛𑄧𑄢𑄨𑄝𑄮𑅁 𑄆𑄥𑄚𑄳𑄠𑄬 𑄉𑄧𑄢𑄨 𑄖𑄢 𑄖𑄬𑄟𑄴𑄟𑄁 𑄉𑄮𑄌𑄴𑄍𑄮𑄚𑄴𑅁 𑄖𑄢 𑄏𑄉𑄧𑄖𑄴𑄪𑄚𑄴 𑄝𑄬𑄌𑄴 𑄇𑄧𑄙 𑄇𑄧𑄠𑄴 𑄎𑄧𑄉𑄧𑄖𑄴𑄟𑄧𑄠𑄴𑅁 𑄖𑄬 𑄝𑄬𑄌𑄴 𑄛𑄎𑄨𑅁 𑄦𑄧𑄘𑄬–𑄟𑄧𑄘𑄬 𑄥𑄖𑄴𑄎𑄧𑄚𑄴𑅁 𑄍𑄧𑄎𑄧𑄚𑄴 𑄌𑄋𑄴𑄟𑅁 𑄆𑄇𑄴𑄎𑄧𑄚𑄴 𑄦𑄨𑄚𑄴𑄘𑄪 𑄝𑄋𑄣𑄴𑅁 𑄎𑄧𑄉𑄧𑄖𑄴𑄟𑄧𑄠𑄴 𑄃𑄇𑄴𑄮𑄣𑄴 𑄃𑄇𑄴𑄮𑄣𑄴 𑄆𑄏𑄬𑄢𑄴𑅁 𑄖 𑄛𑄨𑄏𑄬𑄘𑄨 𑄍𑄧𑄎𑄧𑄚𑄴𑅁 𑄚𑄨𑄟𑄮𑄚𑄧 𑄊𑄧𑄢𑄧 𑄇𑄠𑄴 𑄆𑄠𑄴 𑄇𑄧𑄣𑄧, 𑄃𑄮! 𑄇𑄢𑄬𑄚𑄚𑄴–𑄃𑄮 𑄚𑄬𑄭𑅁 𑄚𑄨𑄟𑄮𑄚𑄴 𑄞𑄬𑄭 𑄃𑄊𑄧𑄌𑄴𑄍𑄬𑅃

𑄃𑄊𑄧𑄁𑅁 𑄆𑄏𑄧𑅁 𑄝𑄧𑄏𑄧𑄉𑄨𑅁

𑄚𑄨𑄟𑄮𑄚𑄬 𑄟𑄧𑄚𑄬 𑄚𑄧 𑄇𑄱𑄰𑄠𑄬 𑄉𑄧𑄢𑄨 𑄓𑄉𑄨𑄣𑄮𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄇𑄢𑄬𑄚𑄴𑄑𑄴 𑄚𑄬𑄭, 𑄃 𑄇𑄬𑄚𑄬 𑄝𑄱𑄰 𑄛𑄧𑄢𑄳𑄦𑄧𑄢𑄴𑅃

𑄚𑄙𑄬𑄭 𑄝𑄱𑄰 𑄚𑄧 𑄛𑄧𑄢𑄳𑄦𑄧𑄋𑄧𑄢𑄴𑅁 𑄆𑄚𑄬 𑄝𑄱𑄰𑄭 𑄃𑄉𑄧𑄁𑄉𑄬𑅁

𑄦𑄨𑄚𑄴𑄘𑄪 𑄝𑄋𑄣𑄳𑄠 𑄌𑄋𑄴𑄟𑄠𑄴–𑄝𑄁𑄣𑄠𑄴 𑄇𑄧𑄣𑄧, 𑄇𑄢𑄬𑄚𑄴𑄑𑄴 𑄚𑄭 𑄉𑄧𑄟𑄴𑄦𑄱𑄰𑄠𑄬𑅁 𑄞𑄣𑄧𑄇𑄴𑄧𑄚𑄴 𑄥𑄧𑄁 𑄉𑄧𑄣𑄴𑄛𑄧 𑄇𑄧𑄢𑄴𑄖𑄬 𑄛𑄢𑄴𑄝𑄧𑅁

𑄖𑄢𑄴 𑄘𑄧 𑄛𑄧𑄢𑄳𑄦𑄬𑄘𑄬 𑄃𑄧𑄇𑄴𑄖𑄧𑅁 𑄃𑄟𑄨 𑄇𑄨𑄖𑄴𑄖𑄬𑄭 𑄆𑄣𑄧𑄁𑅁 𑄃𑄟𑄨 𑄆𑄏𑄚𑄠𑄴 𑄖𑄢𑄴 𑄛𑄧𑄢𑄳𑄦𑄣𑄬𑄊 𑄚𑄧 𑄦𑄧𑄝𑄧𑅁

𑄘𑄨𑄎𑄧𑄚𑄬 𑄉𑄧𑄟𑄴 𑄌𑄬𑄘𑄬𑄭 𑄇𑄧𑄣𑄇𑄴𑄬 𑄥𑄪𑄚𑄨𑄣𑄮 𑄚𑄨𑄟𑄮𑄚𑄬𑅁 𑄢𑄋𑄟𑄖𑄳𑄠 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄈𑄇𑄴𑄧𑄚𑄴 𑄉𑄧𑄛𑄴 𑄘𑄨𑅁 𑄇𑄢𑄬𑄚𑄴𑄑𑄴 𑄆𑄣𑄬 𑄖𑄬 𑄡𑄬𑄝𑄧𑄁𑄉𑄬 𑄃𑄭𑅁

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄇𑄬𑄎𑄚𑄴 𑄛𑄧𑄢𑄳𑄦𑄣𑄬𑄊𑅃

𑄇𑄧𑄚𑄧 𑄝𑄝𑄧𑄘𑄬 𑄉𑄧𑄢𑄧𑄋𑄧𑄢𑄴𑅁

𑄝𑄧𑄢𑄴𑄇𑄧𑄣𑄴 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄖𑄬 𑄘𑄧 𑄢𑄬𑄉𑄪𑄣𑄢𑄴 𑄇𑄧𑄣𑄬𑄎𑄧𑄖𑄴 𑄡𑄠𑄴𑅁 𑄉𑄧𑄟𑄴 𑄢𑄬𑄎𑄣𑄴𑄑𑄴 𑄉𑄧𑄢𑄨𑄝𑄮𑅁 

𑄎𑄪𑄢𑄧𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄖𑄬 𑄚𑄧 𑄝𑄬𑄢𑄠𑄴𑅁 𑄖𑄬 𑄇𑄨𑄖𑄴𑄖𑄬𑄭 𑄛𑄥𑄴 𑄚𑄧 𑄉𑄧𑄖𑄴𑄧! 𑄡𑄧𑄘𑄧 𑄃𑄧𑄥𑄨𑄝𑄨𑄣𑄴 𑄃𑄟𑄨𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭, 𑄇𑄧𑄚𑄧𑄘𑄨𑄚𑄴 𑄟𑄧𑄘𑄴 𑄈𑄬𑄠𑄮𑄌𑄴𑄚𑄨𑅃

𑄚𑄙𑄬𑄭𑅁 𑄚𑄧 𑄈𑄁𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄃𑄘𑄟𑄳𑄠 𑄛𑄮𑄦𑄱𑄰𑄚𑄬 𑄇𑄧𑄟𑄧𑄣𑄬 𑄟𑄧𑄘𑄴 𑄚𑄧 𑄈𑄠𑄴𑅁 𑄝𑄨𑄏𑄪 𑄃𑄧𑄇𑄴𑄖𑄧𑄖𑄴 𑄇𑄧𑄘𑄧𑄇𑄴 𑄟𑄧𑄘𑄴 𑄈𑄬𑄭𑄠𑄬𑄭 𑄃𑄟𑄨𑅁 𑄟𑄏𑄧 𑄎𑄪, 𑄦𑄎𑄧 𑄎𑄪, 𑄝𑄧𑄏𑄧𑄢𑄧 𑄟𑄙𑄖𑄴 𑄆𑄇𑄴 𑄎𑄪𑅁 𑄝𑄨𑄏𑄪 𑄘𑄨𑄚𑄳𑄠 𑄅𑄑𑄴𑄥𑄧𑄝𑄴 𑄚𑄧 𑄉𑄧𑄢𑄨𑄣𑄬 𑄇𑄧𑄇𑄴𑄬 𑄉𑄧𑄢𑄚𑅁 𑄃 𑄟𑄧𑄘𑄴 𑄚𑄧 𑄈𑄬𑄣𑄬 𑄇𑄪𑄖𑄴𑄪𑄚𑄴 𑄆𑄝𑄧 𑄅𑄌𑄴𑄍𑄮𑄚𑄨𑅁

𑄖𑄢 𑄙𑄧𑄇𑄴 𑄝𑄪𑄏𑄨 𑄚𑄨𑄟𑄮𑄚𑄬 𑄇𑄨𑄌𑄴𑄪 𑄚𑄧 𑄇𑄧𑄢𑄴𑅁

𑄦𑄨𑄚𑄴𑄘𑄪 𑄝𑄋𑄣𑄳𑄠 𑄇𑄧𑄣𑄧, 𑄖𑄮𑄟𑄴𑄢 𑄟𑄧𑄘𑄬𑄢𑄴 𑄇𑄧𑄙 𑄇𑄧𑄢𑄴, 𑄇𑄮𑄚𑄮𑄘𑄨𑄚𑄴 𑄦𑄬𑄢𑄮𑄄𑄚𑄴 𑄈𑄬𑄠𑄮𑄌𑄴 𑄚𑄨𑅃

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄚𑄙𑄬𑄭𑅁 𑄚𑄧 𑄈𑄬𑄭𑅁 𑄦𑄬𑄢𑄮𑄄𑄚𑄴 𑄇𑄬𑄙𑄧𑄇𑄳𑄠𑄬𑄚𑄴𑅃

𑄇𑄬𑄚𑄬 𑄘𑄬𑄊𑄬𑄟𑄴! 

𑄦𑄨𑄚𑄴𑄘𑄪 𑄝𑄋𑄣𑄴 𑄛𑄮𑄝𑄮 𑄇𑄇𑄴𑄬 𑄝𑄁𑄣 𑄞𑄏𑄬, 𑄇𑄇𑄴𑄬 𑄌𑄋𑄴𑄟 𑄞𑄏𑄬 𑄇𑄧𑄙 𑄇𑄧𑄠𑄴𑅁 

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄦𑄬𑄢𑄮𑄄𑄚𑄴 𑄛𑄠𑄴 𑄝𑄪𑄏𑄧𑄁! 

𑄥𑄧𑄝𑄴 𑄎𑄉𑄘𑄴 𑄚𑄧 𑄛𑄠𑄴𑅁 𑄆𑄇𑄴𑄑 𑄟𑄖𑄳𑄢𑄧 𑄎𑄉 𑄃𑄊𑄬, 𑄥𑄬𑄈𑄚𑄬 𑄛𑄃𑄮𑄠 𑄡𑄠𑄴𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄦𑄬𑄢𑄮𑄄𑄚𑄴 𑄞𑄨𑄣𑄬 𑄉𑄧𑄟𑄴 𑄚𑄧𑄠𑄴𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄉𑄧𑄟𑄴 𑄚𑄧 𑄦𑄧𑄣𑄬–𑄃𑄮 𑄎𑄩𑄝𑄧𑄚𑄧𑄖𑄴 𑄆𑄇𑄴𑄛𑄧𑄣𑄴𑄣 𑄈𑄬𑄭 𑄌𑄚 𑄘𑄧𑄢𑄴𑄇𑄢𑄴𑅁 𑄉𑄧𑄟𑄴 𑄚𑄧 𑄦𑄧𑄣𑄬 𑄚𑄧 𑄈𑄬𑄝𑄧𑄁! 𑄚𑄨𑄎𑄧 𑄟𑄧𑄚𑄴 𑄆𑄚𑅁 𑄈𑄬𑄣𑄬 𑄛𑄢𑄬𑅁 𑄚𑄧 𑄈𑄬𑄣𑄬 𑄛𑄢𑄬𑅁 

𑄖𑄢 𑄦𑄬𑄢𑄮𑄄𑄚𑄴 𑄇𑄧𑄙 𑄇𑄮–𑄝𑄪𑄣𑄮 𑄉𑄧𑄖𑄴𑄬 𑄚𑄨𑄟𑄮𑄚𑄬 𑄥𑄪𑄚𑄨 𑄃𑄊𑄬𑅁 𑄎𑄧𑄉𑄧𑄖𑄴𑄟𑄧𑄠𑄴 𑄃 𑄇𑄧𑄣𑄧, 𑄆𑄇𑄴𑄛𑄧𑄣𑄴𑄣 𑄈𑄬𑄭 𑄌 𑄛𑄧𑄢𑄨𑄝𑄧𑅁 𑄇𑄨 𑄥𑄪𑄝𑄧𑄣𑄴, 𑄥𑄧𑄖𑄴𑄖𑄨 𑄛𑄃𑄮𑄠 𑄡𑄝𑄬𑅃

𑄆𑄙𑄧𑄇𑄴𑄘𑄨𑄚𑄴 𑄆𑄖𑄴𑄧𑄚𑄴𑄘𑄬 𑄦𑄨𑄚𑄴𑄘𑄪 𑄝𑄋𑄣𑄳𑄠𑄢𑄴 𑄚𑄋𑄚𑄴 𑄚𑄧 𑄛𑄠𑄴 𑄚𑄨𑄟𑄮𑄚𑄬𑅁 𑄚𑄁 𑄙𑄧𑄢𑄨 𑄓𑄉𑄧𑄘𑄬–𑄃𑄮 𑄚𑄧 𑄥𑄪𑄚𑄬𑅁 𑄆𑄣𑄬 𑄝𑄧𑄚𑄴𑄙𑄪 𑄓𑄉–𑄓𑄉𑄨 𑄉𑄧𑄢𑄧𑄚𑄴𑅁 𑄆𑄌𑄳𑄠 𑄖𑄬 𑄛𑄬𑄣𑄧𑄘𑄬𑅁 𑄦𑄨𑄚𑄴𑄘𑄪 𑄝𑄋𑄣𑄳𑄠 𑄚𑄁 𑄥𑄪𑄝𑄧𑄣𑄴 𑄘𑄬𑅁 𑄥𑄪𑄝𑄧𑄣𑄬 𑄇𑄧𑄣𑄧, 𑄌𑄬𑄥𑄴𑄑 𑄇𑄧𑄢𑄬 𑄘𑄬𑄈𑄴𑄝𑄮𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭, 𑄈𑄬𑄭 𑄌𑄬𑄝𑄬𑄚𑄨𑅃

𑄇𑄨𑅃

𑄦𑄬𑄢𑄮𑄄𑄚𑄴𑅁

𑄚𑄙𑄬𑄭𑅁 𑄚𑄧 𑄈𑄬𑄟𑄴 𑄟𑄪𑄭𑅁

𑄥𑄪𑄝𑄧𑄣𑄳𑄠 𑄇𑄧𑄣𑄧, 𑄎𑄩𑄝𑄧𑄚𑄬 𑄥𑄧𑄝𑄴𑄇𑄨𑄍𑄪 𑄈𑄬𑄠𑄬 𑄘𑄬𑄈 𑄘𑄧𑄢𑄴𑄇𑄢𑄴𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄡𑄬𑄭 𑄡𑄬𑄭 𑄞𑄬𑄭𑅁 𑄇𑄢𑄬𑄚𑄴𑄑𑄴–𑄃𑄮 𑄚𑄬𑄭𑅁 𑄝𑄱𑄰–𑄃𑄮 𑄛𑄧𑄢𑄨𑄝𑄬𑄘𑄬 𑄚𑄧𑄠𑄴𑅁 𑄥𑄨𑄖𑄴𑄪𑄚𑄴 𑄆𑄭 𑄃𑄠𑄴 𑄛𑄧𑄢𑄳𑄦𑄨 𑄛𑄧𑄢𑄨𑄝𑄬𑄉𑄨𑅁

𑄚𑄙𑄬𑄭, 𑄚𑄧 𑄡𑄬𑄟𑄴𑄝𑄬 𑄥𑄨𑄠𑄬𑅁 𑄖𑄪𑄟𑄨 𑄡𑄧𑅁

𑄛𑄚𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭, 𑄎𑄩𑄝𑄧𑄚𑄧𑄖𑄴 𑄝𑄬𑄇𑄴𑄇𑄚𑄨 𑄌𑄉𑄨 𑄌𑄚 𑄘𑄧𑄢𑄴𑄇𑄢𑄴𑅁 𑄃𑄟𑄨–𑄃𑄮 𑄌𑄉𑄨 𑄌𑄬𑄝𑄧𑄁𑄉𑄬 𑄃𑄠𑄴𑅁 𑄈𑄟𑄇𑄴𑄇𑄭 𑄉𑄧𑄟𑄴 𑄚𑄧 𑄦𑄧𑄣𑄬 𑄚𑄧 𑄈𑄬𑄝𑄧𑄁! 𑄃𑄟 𑄟𑄧𑄚𑄴 𑄆𑄚𑅁 𑄝𑄛𑄴 𑄛𑄢 𑄛𑄮𑄦𑄱𑄰𑄠𑄬𑅁 𑄉𑄧𑄟𑄴–𑄝𑄧𑄎𑄧𑄁 𑄃𑄟𑄨 𑄇𑄨 𑄇𑄱𑄰 𑄚𑄧 𑄛𑄢𑄨𑄘𑄬 𑄚𑄇𑄨! 𑄡𑄬𑄭 𑄚𑄨𑄟𑄮𑄚𑄴 𑄞𑄬𑄭, 𑄡𑄬𑄭𑅁 𑄇𑄧𑄚𑄧 𑄌𑄨𑄘𑄬 𑄚𑄧 𑄉𑄧𑄢𑄨𑄌𑄴𑅁 𑄆𑄌𑄳𑄠 𑄖𑄧𑄖𑄴𑄪𑄚𑄴 𑄖𑄬𑄋 𑄘𑄨 𑄚𑄧 𑄛𑄬𑄝𑄬𑅁 𑄟𑄧𑄖𑄴𑄪𑄚𑄴 𑄖𑄬𑄋 𑄃𑄊𑄧𑄚𑄴𑅁 𑄟𑄪𑄭 𑄘𑄨𑄟𑄴𑅁

𑄛𑄚𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄖𑄬𑄋 𑄚𑄳𑄦𑄨𑄉𑄨𑄣𑄬𑄭 𑄘𑄬𑄊𑄬𑄣𑄧𑅁

𑄑𑄬𑄋𑄖𑄴𑄖𑄬𑄭 𑄚𑄧𑄠𑄴𑅁 𑄆𑄚𑄬–𑄃𑄮 𑄟𑄧𑄚𑄬 𑄚𑄧 𑄇𑄧𑄖𑄴𑄬𑅁

𑄎𑄧𑄉𑄧𑄖𑄴𑄟𑄧𑄠𑄴 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄥𑄣𑄬𑄚𑄴 𑄚𑄧 𑄡𑄬𑄝𑄬𑅃

𑄝𑄬𑄎𑄢𑄴 𑄚𑄧 𑄦𑄭𑄪𑄠𑄮𑅁 𑄚𑄧 𑄡𑄬𑄟𑄴𑄝𑄬 𑄥𑄨𑄠𑄬𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄚𑄨𑄟𑄮𑄚𑄬 𑄚𑄧 𑄉𑄬𑄣𑄬 𑄃𑄟𑄨 𑄡𑄬𑄭 𑄥𑄣𑄬𑄚𑄴𑅁

𑄦𑄨𑄚𑄴𑄘𑄪 𑄝𑄋𑄣𑄳𑄠 𑄇𑄧𑄣𑄧, 𑄖𑄢𑄬 𑄚𑄨𑄖𑄬 𑄛𑄢𑄴𑄣𑄬 𑄞𑄣𑄮 𑄦𑄧𑄖𑄮𑅁

𑄝𑄧𑄢𑄴𑄇𑄧𑄣𑄴 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄇𑄅𑄇𑄬 𑄎𑄮𑄢𑄴 𑄇𑄧𑄢𑄬 𑄚𑄬𑄃𑄮𑄠 𑄡𑄠𑄴 𑄚𑅁

𑄎𑄪𑄢𑄧𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄖𑄬–𑄖𑄭 𑄚𑄧 𑄉𑄧𑄢𑄨 𑄆𑄇𑄴𑄇 𑄡𑄬𑄭 𑄘𑄬𑅁 𑄈𑄇𑄴𑄬 𑄝𑄬𑄌𑄴 𑄢𑄬𑄖𑄴 𑄦𑄧𑄝𑄧𑅁

𑄥𑄘𑄧𑄎𑄧𑄚𑄬 𑄝𑄬𑄇𑄴𑄪𑄚𑄬 𑄡𑄬𑄝𑄖𑄴𑄖𑄬𑄭 𑄒𑄨𑄠𑄬𑄣𑄇𑄴𑅁 𑄦𑄘–𑄃𑄮 𑄙𑄧𑄣𑄳𑄠𑄇𑄴𑅁 𑄎𑄧𑄉𑄧𑄖𑄴𑄟𑄧𑄠𑄴 𑄛𑄨𑄏𑄬 𑄛𑄧𑄢𑄨 𑄃𑄊𑄬𑅁 𑄖𑄢 𑄊𑄧𑄢𑄧𑄖𑄴𑄪𑄚𑄴 𑄚𑄳𑄦𑄨𑄉𑄨𑄣𑄨 𑄡𑄘𑄬 𑄚𑄨𑄟𑄮𑄚𑄧𑄢𑄬 𑄇𑄧𑄣𑄇𑄴, 𑄗𑄇𑄴 𑄥𑄣𑄬𑄚𑄴, 𑄚𑄧 𑄡𑄬𑄝𑄬 𑄡𑄧𑄇𑄴𑄬𑅁 𑄝𑄬𑄇𑄴𑄪𑄚𑄴 𑄉𑄬𑄣𑄇𑄴𑅁 𑄚𑄨𑄟𑄮𑄚𑄬 𑄟𑄧𑄚𑄬 𑄟𑄧𑄚𑄬 𑄞𑄝𑄨 𑄌𑄢𑄴 𑄆𑄥𑄚𑄳𑄠 𑄦𑄧𑄣𑄬 𑄘𑄧 𑄄𑄉𑄪𑄚𑄬 𑄝𑄨𑄛𑄧𑄘𑄧𑄖𑄴 𑄜𑄬𑄣𑄬𑄝𑄇𑄴𑅁 𑄄𑄉𑄪𑄚𑄮𑄖𑄴𑄪𑄚𑄴 𑄙𑄬𑄭 𑄙𑄬𑄭 𑄗 𑄛𑄧𑄢𑄨𑄝𑄮𑅁 𑄆𑄌𑄳𑄠 𑄡𑄬𑄚𑄬–𑄥𑄬𑄚𑄬 𑄍𑄢𑄧𑄣𑄪𑄁𑅁 𑄖𑄢 𑄃𑄢𑄧 𑄆𑄝𑄇𑄴𑅁 𑄆𑄇𑄴𑄪𑄎𑄚𑄴 𑄖𑄧𑄌𑄳𑄠𑄬 𑄉𑄧𑄢𑄨𑄝𑄬𑄇𑄴𑄇𑄨𑅁 𑄟𑄟𑄪𑄢𑄬 𑄇𑄧𑄣𑄬 𑄇𑄬𑄏𑄚𑄴 𑄦𑄧𑄠𑄴 𑄞𑄝𑄬𑄢𑄴 𑄚𑄨𑄟𑄮𑄚𑄬𑅁 𑄈𑄇𑄴𑄧𑄚𑄴 𑄞𑄝𑄨 𑄊𑄧𑄢𑄧 𑄞𑄨𑄘𑄨𑄢𑄬𑄖𑄴𑄪𑄚𑄴 𑄆𑄇𑄴𑄇 𑄝𑄢𑄬 𑄆𑄭 𑄇𑄨 𑄞𑄪𑄘𑄪 𑄞𑄪𑄘𑄪 𑄢𑄧 𑄥𑄪𑄚𑄬𑅁 𑄟! 𑄥𑄨𑄉𑄪𑄚𑄴 𑄆𑄝𑄧 𑄚𑄧 𑄡𑄚𑄴 𑄚𑄇𑄨! 𑄖𑄢 𑄃𑄢𑄧 𑄆𑄝𑄇𑄴𑄬 𑄛𑄢 𑄛𑄁𑅁 𑄄𑄠𑄬𑄚𑄴 𑄟𑄧𑄚𑄬 𑄉𑄧𑄢𑄨 𑄚𑄨𑄟𑄮𑄚𑄬 𑄊𑄧𑄢𑄧 𑄞𑄨𑄘𑄨𑄢𑄬 𑄥𑄮𑄟𑄨 𑄘𑄮𑄢𑄚𑄴 𑄚𑄖𑄳𑄠𑄬𑄉𑄨𑅁 𑄚𑄨𑄟𑄮𑄚𑄬 𑄖 𑄙𑄧𑄇𑄬 𑄖𑄬 𑄟𑄮𑄟𑄴𑄝𑄖𑄴𑄖𑄨 𑄅𑄇𑄴𑄮 𑄙𑄧𑄢𑄬𑄭 𑄘𑄨 𑄝𑄱𑄰 𑄛𑄧𑄢𑄳𑄦𑄬𑄢𑄴𑅁 𑄆𑄇𑄴 𑄛𑄘 𑄛𑄧𑄢𑄨 𑄃 𑄆𑄇𑄴 𑄛𑄘 𑄅𑄣𑄳𑄠𑄖𑄳𑄠𑄬 𑄎𑄧𑄉𑄧𑄖𑄴𑄟𑄧𑄠𑄴 𑄓𑄉𑄬𑄣𑄴𑄨, 𑄚𑄨𑄟𑄮𑄚𑄴 𑄞𑄬𑄭, 𑄘𑄮𑄢𑄚𑄴 𑄚𑄘𑄨𑄣𑄬 𑄘𑄬𑅃

𑄦𑄧𑄘𑄬𑄭𑅁

𑄆𑄇𑄴𑄇 𑄘𑄮𑄢𑄚𑄴 𑄈𑄪𑄣𑄴 𑄚𑅁 𑄇𑄧𑄙 𑄃𑄊𑄬𑅁

𑄚𑄨𑄟𑄮𑄚𑄬 𑄟𑄧𑄚𑄬 𑄚𑄧 𑄇𑄱𑄰𑄠𑄬 𑄉𑄧𑄢𑄨 𑄘𑄮𑄢𑄚𑄴 𑄈𑄪𑄣𑄨 𑄘𑄨𑄣𑄧𑅁 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄃 𑄇𑄨 𑄇𑄧𑄙𑅃

𑄑𑄬𑄋 𑄃𑄊𑄧𑄚𑄴𑄘𑄬𑅃𑅁 𑄗𑄬𑄣𑄬 𑄘𑄨𑄝𑄬𑄥𑄧𑄖𑄴 𑄖𑄬𑄋 𑄘𑄬𑅁 𑄟𑄧 𑄥𑄧𑄟𑄌𑄳𑄠 𑄝𑄬𑄇𑄴𑄪𑄚𑄧𑄖𑄴𑄪𑄚𑄴 𑄖𑄬𑄋 𑄃𑄊𑄧𑄚𑄴, 𑄝𑄚𑄳𑄦 𑄟𑄧𑄖𑄴𑄪𑄚𑄴 𑄖𑄬𑄋 𑄚𑄬𑄭 𑄘𑄬𑅁

𑄘𑄬𑄭 𑄛𑄢 𑄖𑄬𑄋 𑄘𑄧 𑄚𑄬𑄭𑅁

𑄅𑄟𑄪𑄣𑄳𑄠𑄬 𑄚𑄧𑄭𑄚𑄬 𑄇𑄧𑄣𑄬𑄘𑄬, 𑄖𑄬𑄋𑄖𑄴𑄖𑄬𑄭 𑄚𑄧 𑄗𑄬𑄝𑄧𑅁

𑄃𑄊𑄧𑄚𑄴𑄘𑄬 𑄖𑄬𑄋𑄉𑄪𑄚𑄴 𑄖𑄧𑄢𑄬 𑄘𑄨𑄣𑄬 𑄟𑄪𑄭 𑄗𑄬𑄉𑄧𑄘𑄴 𑄛𑄧𑄢𑄨𑄟𑄴𑅁 𑄊𑄧𑄢𑄧𑄖𑄴𑄪𑄚𑄴 𑄖𑄬𑄋 𑄛𑄙𑄬𑄭 𑄘𑄬𑄘𑄬 𑄎𑄬𑄢𑄴 𑄛𑄧𑄢𑄨𑄝𑄧𑅁

𑄟𑄪𑄭 𑄇𑄬𑄣𑄳𑄠 𑄘𑄨𑄟𑄴𑄝𑄨𑅁 𑄃 𑄇𑄨 𑄚𑄧 𑄛𑄌𑄴 𑄞𑄨𑄣𑄨 𑄌𑄨𑄘𑄬 𑄉𑄧𑄢𑄧𑄌𑄴 𑄚𑄇𑄨 𑅃 𑄃𑄉𑄧 𑄥𑄨𑄉𑄪𑄚𑄴 𑄇𑄨 𑄚𑄧 𑄥𑄪𑄎𑄧𑄁 𑄚𑄇𑄨𑅃

𑄃 𑄇𑄧𑄟𑄧𑄣𑄬 𑄘𑄨𑄣𑄘𑄬𑅃

𑄚𑄨𑄟𑄮𑄚𑄬 𑄇𑄧𑄟𑄧𑄣𑄬 𑄘𑄨𑄣𑄘𑄬 𑄇𑄱𑄰 𑄎𑄧𑄉𑄧𑄖𑄴𑄟𑄧𑄠𑄴 𑄃𑄉𑄧𑄟𑄚𑄴 𑄛𑄬𑄣𑄧𑅁 𑄆𑄇𑄴𑄇 𑄢𑄉𑄴 𑄘𑄬𑄊𑄬𑄭 𑄇𑄧𑄣𑄧, 𑄃 𑄥𑄨𑄠𑄬𑄚𑄴 𑄇𑄬𑄙𑄧𑄇𑄳𑄠! 𑄘𑄨𑄚𑄬 𑄘𑄨 𑄚𑄧 𑄘𑄨 𑄇𑄧𑄚𑅁

𑄃𑄦𑄱𑄰𑄠𑄬 𑄃𑄠𑄴 𑄘𑄨𑄣𑄬𑅁

𑄈𑄇𑄴𑄬 𑄘𑄨𑄠𑄬𑄭, 𑄈𑄇𑄴𑄬 𑄚𑄧 𑄘𑄨, 𑄇𑄨 𑄇𑄧𑄌𑄴𑄍𑄬 𑄞𑄬𑄭𑅃

𑄚𑄧 𑄘𑄨𑄚𑄬 𑄘𑄨𑄠𑄬 𑄇𑄧𑄢𑄴 𑄡𑄧𑄇𑄴𑄬, 𑄃 𑄘𑄮–𑄘𑄬 𑄃𑄠𑄴𑅁

𑄖𑄢 𑄘𑄨𑄎𑄧𑄚𑄬 𑄇𑄧𑄙 𑄥𑄮𑄣𑄴 𑄑𑄚–𑄑𑄚𑄨 𑄉𑄧𑄖𑄴𑄬 𑄍𑄧𑄎𑄧𑄚𑄬 𑄣𑄪𑄋𑄨𑄣𑄇𑄴𑄇𑄨𑅁 𑄇𑄣 𑄌𑄨𑄇𑄴𑄮 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄃 𑄆𑄙𑄧𑄇𑄴𑄧𑄚𑄴 𑄇𑄨 𑄚𑄧 𑄡𑄧𑄢𑄴 𑄌 𑄆𑄌𑄳𑄠𑄘𑄬𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄆𑄖𑄬 𑄘𑄬 𑄃𑄟𑄢𑄬 𑄝𑄧𑄚𑄴𑄚𑄁 𑄉𑄧𑄢𑄬𑄖𑄴𑄬, 𑄃𑄟𑄨 𑄞𑄨𑄣𑄬 𑄖𑄬𑄋 𑄣𑄮𑄣𑄬 𑄚𑄧 𑄥𑄪𑄎𑄨𑅁 𑄝𑄚𑄳𑄦 𑄌𑄮𑄙𑄬𑄭 𑄘𑄨𑄝𑄬𑄢𑄴 𑄚𑄋𑄬 𑄗𑄬𑄭𑅁 𑄣𑄬𑄊𑄛𑄧𑄢 𑄚𑄧 𑄉𑄧𑄢𑄨𑅁 𑄝𑄬𑄢𑄬𑄭 𑄝𑄬𑄢𑄬𑄭 𑄗𑄬𑄭𑅁 𑄝𑄛𑄴–𑄟𑄢𑄬 𑄚𑄘𑄚𑄧𑄖𑄴 𑄜𑄬𑄣𑄬𑄝𑄖𑄴𑄖𑄬𑄭 𑄢𑄋𑄟𑄖𑄳𑄠𑄖𑄴 𑄆𑄌𑄴𑄌𑄬𑄭𑅁 𑄝𑄛𑄴–𑄟 𑄟𑄙 𑄈𑄬𑄭 𑄘𑄨𑄢𑄴𑅁 𑄄𑄇𑄴𑄬 𑄞𑄨𑄣𑄬 𑄦𑄬𑄢𑄮𑄄𑄚𑄴 𑄈𑄬𑄢𑄴𑅁 𑄟–𑄝𑄛𑄴 𑄉𑄨𑄢𑄨𑄖𑄴𑄗𑄨 𑄞𑄨𑄣𑄬 𑄛𑄪𑄚𑄴𑄘𑄬𑄢𑄨 𑄅𑄝𑄮𑄖𑄴 𑄉𑄧𑄢𑄨 𑄘𑄨𑄝𑄧𑄁𑅁 𑄃𑄟 𑄣𑄧𑄊𑄬 𑄣𑄧𑄊𑄬 𑄖𑄢𑄬–𑄃𑄮 𑄝𑄧𑄢𑄴𑄝𑄘𑄴 𑄚𑄬𑄡𑄬𑄢𑄴𑅁 𑄆𑄇𑄴 𑄣𑄋𑄬𑄣𑄴 𑄇𑄧𑄖𑄴𑄬𑅁 𑄆𑄭 𑄥𑄨𑄠𑄬𑄚𑄨 𑄥𑄪𑄚𑄨 𑄗𑄉𑄧𑄘𑄬 𑄘𑄬𑄢𑄨 𑄦𑄧𑄋𑄧𑄖𑄴𑄬𑅁

𑄚𑄱𑄰𑄠𑄬 𑄚𑄱𑄰𑄠𑄬 𑄉𑄧𑄢𑄨 𑄇𑄧𑄣𑄧 𑄎𑄧𑄉𑄧𑄖𑄴𑄟𑄧𑄠𑄴𑅁

𑄚𑄨𑄟𑄮𑄚𑄬 𑄇𑄧𑄣𑄧, 𑄚𑄧𑄠𑄴 𑄘𑄧 𑄞𑄬𑄭𑄣𑄧𑄇𑄴, 𑄟𑄪𑄭 𑄥𑄨𑄋𑄨𑄢𑄨 𑄚𑄧 𑄇𑄁𑄧𑅁

𑄃𑄱𑄰 𑄌𑄘𑄬𑄭 𑄌𑄘𑄬𑄭 𑄌𑄮𑄈𑄴 𑄗𑄬𑄝𑄧𑄖𑄴 𑄚𑄧 𑄉𑄧𑄌𑄴𑄍𑄬 𑄉𑄧𑄢𑄨 𑄃𑄢𑄧 𑄟𑄨𑄏𑄬 𑄇𑄧𑄙 𑄇𑄧𑄣𑄧𑅁

𑄎𑄪𑄢𑄧𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄝𑄂! 𑄟–𑄝𑄝𑄧𑄢𑄴 𑄞𑄣𑄬𑄘𑄨 𑄉𑄧𑄢𑄨 𑄘𑄨𑄠𑄬 𑄉𑄧𑄟𑄴 𑄛𑄮𑄝𑄮 𑄇𑄬𑄚𑄬 𑄇𑄬𑄚𑄬 𑄢𑄋𑄟𑄖𑄳𑄠𑄖𑄴 𑄆𑄣𑄧𑅁

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄆𑄇𑄴𑄇 𑄟𑄪𑄠𑄚𑄴 𑄌𑄁 𑄘𑄬𑄭𑅁

𑄝𑄧𑄢𑄴𑄇𑄧𑄣𑄴 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄟𑄧𑄉𑄧𑄘 𑄣𑄇𑄴𑄬𑄢𑄬 𑄘𑄨𑄝𑄬 𑄅𑄇𑄴𑄮 𑄘𑄮 𑄚 𑄈𑄝𑄬𑄭𑅁

𑄝𑄧𑄢𑄴𑄇𑄧𑄣𑄴 𑄇𑄪𑄣𑄳𑄠𑄬𑄝𑄮 𑄈𑄝𑄬𑄭 𑄘𑄮𑄮 𑄚 𑄇𑄧𑄙𑄬 𑄚𑄧 𑄇𑄧𑄙𑄬 𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄟𑄧𑄉𑄧𑄘 𑄣𑄇𑄴𑄬𑄢𑄬 𑄆𑄇𑄴𑄇 𑄈𑄁 𑄥𑄣𑄬𑄚𑄴𑅁 

𑄘𑄧𑄌𑄴

𑄄𑄠𑄬𑄚𑄴 𑄇𑄧𑄙𑄬 𑄚𑄧 𑄇𑄧𑄙𑄬 𑄛𑄇𑄴–𑄛𑄪𑄇𑄴 𑄘𑄨𑄠𑄬 𑄙𑄧𑄣𑄳𑄠𑄇𑄴𑅁 𑄚𑄨𑄟𑄮𑄚𑄬 𑄃𑄮𑄟–𑄈𑄮𑄘 𑄥𑄟𑄬𑄣𑄬𑄭 𑄅𑄘𑄮 𑄚𑄧 𑄛𑄢𑄴𑅁 𑄖𑄨𑄚𑄴 𑄌𑄬𑄢𑄴𑄎𑄧𑄚𑄬 𑄆𑄉𑄧𑄎 𑄝 𑄖𑄪𑄣𑄨 𑄖𑄪𑄣𑄨 𑄛𑄨𑄒𑄴 𑄎𑄧𑄉, 𑄚𑄇𑄴–𑄟𑄪 𑄏𑄝𑄬𑄭, 𑄏𑄝𑄬𑄭 𑄘𑄨𑄣𑄇𑄴𑅁 𑄗𑄎𑄬 𑄟𑄢𑄨 𑄛𑄨𑄘𑄨 𑄦𑄖𑄴–𑄒𑄬𑄁 𑄝𑄚𑄨 𑄗𑄧𑄣𑄇𑄴𑅁 𑄚𑄨𑄟𑄮𑄚𑄧𑄢𑄬 𑄝𑄚𑄨 𑄗𑄱𑄰 𑄆𑄉𑄧𑄎 𑄖𑄬𑄋 𑄖𑄮𑄉 𑄙𑄧𑄣𑄳𑄠𑄇𑄴𑅁 𑄥𑄨𑄣𑄪𑄟𑄴, 𑄛𑄬𑄚𑄴𑄘𑄧𑄣𑄧𑄁, 𑄝𑄳𑄠𑄉𑄴, 𑄝𑄱𑄰𑄠𑄮 𑄖𑄇𑄴, 𑄝𑄱𑄰–𑄠𑄮 𑄞𑄎𑄴 𑄝𑄬𑄇𑄴𑄇𑄚𑄨 𑄊𑄘𑄨 𑄊𑄘𑄨 𑄌𑄬𑄘𑄬𑄢𑄴–𑄞𑄬𑄘𑄬𑄢𑄴 𑄉𑄧𑄢𑄨 𑄘𑄨𑄣𑄇𑄴𑅁 𑄖𑄬𑄋 𑄡 𑄛𑄬𑄠𑄳𑄠𑄧𑄚𑄴 𑄝𑄬𑄇𑄴𑄪𑄚𑄴 𑄣𑄧𑄣𑄇𑄴𑅁 𑄃𑄢𑄴 𑄖𑄬𑄋 𑄖𑄮𑄉𑄘𑄬 𑄥𑄪𑄇𑄴 𑄛𑄬𑄣𑄇𑄴 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮𑅁 𑄇𑄣 𑄌𑄨𑄇𑄴𑄮 𑄜𑄧𑄑𑄮𑄝𑄮 𑄛𑄬𑄭 𑄇𑄧𑄣𑄧, 𑄆𑄇𑄴𑄇𑄚𑄴 𑄛𑄬𑄠𑄧𑄁𑅁

𑄎𑄧𑄉𑄧𑄖𑄴𑄟𑄧𑄠𑄴 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄇𑄨 𑄛𑄬𑄣𑄬 𑄘𑄬! 𑄇𑄨 𑄛𑄬𑄣𑄬 𑄘𑄬! 

𑄘𑄮𑄣𑄴 𑄆𑄇𑄴𑄇𑄚𑄴 𑄎𑄨𑄚𑄨𑄥𑄴𑅁

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄟𑄧𑄢𑄬 𑄆𑄇𑄴𑄇 𑄘𑄬𑄊 𑄚𑅁

𑄥𑄘𑄧𑄎𑄧𑄚𑄬 𑄖 𑄦𑄘𑄧𑄖𑄴𑄪𑄚𑄴 𑄖 𑄦𑄘𑄧𑄖𑄴 𑄉𑄧𑄖𑄴𑄧𑄚𑄴 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮𑅁 𑄚𑄨𑄟𑄮𑄚𑄬 𑄟𑄧𑄚𑄬 𑄉𑄧𑄌𑄴𑄍𑄬 𑄛𑄌𑄴𑄥𑄧 𑄖𑄬𑄇𑄴𑄬𑄠𑄚𑄴 𑄥𑄪𑄇𑄴 𑄛𑄬𑄠𑄳𑄠𑄧𑄚𑄴𑅁 𑄈𑄣𑄨𑄇𑄴 𑄥𑄨𑄠𑄬𑄚𑄴 𑄚𑄧𑄠𑄴𑅁 𑄛𑄬𑄠𑄮𑄚𑄴𑄘𑄬 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮𑅁 𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭, 𑄄𑄝𑄬 𑄖𑄧 𑄣𑄋𑄮𑄚𑄨𑅃

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄃 𑄘𑄧 𑄘𑄮𑄣𑄴 𑄃𑄊𑄬𑅁

𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄖𑄬 𑄆𑄇𑄴𑄇 𑄌𑄪𑄟𑄬, 𑄖𑄬 𑄆𑄇𑄴𑄇 𑄌𑄪𑄟𑄬𑅁 𑄌𑄪𑄟𑄨 𑄌𑄪𑄟𑄨 𑄇𑄧𑄚𑄬 𑄇𑄨 𑄇𑄧𑄙𑄧𑄚𑄴 𑄛𑄧𑄢𑄨𑄥𑄨𑄟𑄬 𑄚𑄬𑄭𑅁 𑄚𑄨𑄟𑄮𑄚𑄬 𑄟𑄚 𑄉𑄧𑄢𑄨 𑄇𑄱𑄰𑄠𑄬, 𑄞𑄬𑄭𑄣𑄧𑄇𑄴, 𑄡𑄬 𑄡𑄨𑄠𑄬𑄚𑄴 𑄣𑄧𑄘𑄥𑄘𑄴, 𑄥𑄨𑄝𑄬 𑄗𑄱𑄰 𑄘𑄮𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄖𑄧 𑄣𑄋𑄮𑄚𑄨 𑄦𑄧𑄠𑄴 𑄞𑄨𑄣𑄨 𑄝𑄚𑄳𑄦 𑄖𑄪𑄭 𑄌𑄬𑄝𑄬 𑄌𑄪𑄟𑄨𑄝𑄬, 𑄥𑄨𑄠𑄬𑄚𑄴 𑄇𑄬𑄚𑄬 𑄦𑄧𑄠𑄴𑅁 𑄇𑄬𑄠𑄳𑄠𑄬𑄖𑄴 𑄚 𑄝𑄎𑄨 𑄚𑄧 𑄛𑄢𑄨𑄝𑄧𑄁𑄉𑄬𑅁 𑄡𑄬𑄘𑄧𑄇𑄧–𑄥𑄬𑄘𑄧𑄇𑄴 𑄦𑄧𑄠𑄴 𑄞𑄨𑄣𑄨 𑄜𑄧𑄑𑄮𑄝𑄮–𑄃𑄮 𑄌𑄪𑄟𑄨 𑄚𑄧 𑄛𑄢𑄨𑄝𑄧𑄁𑅁 

𑄎𑄬𑄢𑄬𑄘𑄨 𑄦𑄨𑄚𑄴𑄘𑄪 𑄛𑄮𑄝𑄮 𑄦𑄘𑄧𑄖𑄴 𑄛𑄧𑄢𑄨 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄌𑄪𑄟𑄨 𑄌𑄪𑄟𑄨 𑄇𑄨 𑄇𑄨 𑄇𑄧𑄢𑄴! 𑄚𑄧 𑄇𑄧𑄠𑄴𑄘𑄬 𑄇𑄧𑄙𑄚𑄨 𑄝𑄬𑄇𑄴𑄇𑄚𑄨 𑄇𑄧𑄢𑄴𑅁 𑄝𑄬𑄌𑄴 𑄉𑄧𑄖𑄴𑄧𑄚𑄴 𑄇𑄨𑄚𑄬𑄖𑄴𑄖𑄬𑄭, 𑄇𑄬𑄚 𑄚𑄧 𑄡𑄬𑄭 𑄚𑄨𑄟𑄮𑄚𑄬 𑄇𑄧𑄣𑄧, 𑄟𑄧𑄉𑄧𑄘 𑄣𑄇𑄴𑄬𑄢𑄬 𑄆𑄇𑄴𑄇 𑄈𑄁 𑄥𑄣𑄬𑄚𑄴𑅁 𑄝𑄬𑄌𑄴 𑄉𑄧𑄢𑄬𑄖𑄴𑄬𑅁 𑄝𑄚𑄳𑄠 𑄦𑄖𑄴𑄖𑄚𑄨 𑄈𑄮𑄝𑄖𑄴𑄖𑄬𑄭 𑄝𑄧𑄣𑄴 𑄚𑄳𑄦𑄨𑄉𑄨𑄣𑄢𑄴𑅁 𑄆𑄚𑄧𑄖𑄴 𑄎𑄧𑄉𑄧𑄖𑄴𑄟𑄧𑄠𑄴 𑄆𑄭 𑄚𑄨𑄟𑄮𑄚𑄧𑄢𑄬 𑄝𑄪𑄇𑄴 𑄌𑄬𑄭 𑄆𑄇𑄴 𑄣𑄘𑄨 𑄘𑄨 𑄇𑄧𑄣𑄧, 𑄇𑄪𑄉𑄪𑄢𑄮 𑄍𑄧𑄝𑄮, 𑄇𑄨 𑄇𑄧𑄌𑄴𑄍𑄬! 𑄝𑄎𑄨𑄝𑄬𑄢𑄴 𑄃𑄏 𑄗𑄬𑄣𑄬 𑄚𑄧 𑄟𑄘𑄨𑄌𑄴𑅁 𑄆𑄇𑄴𑄬 𑄟𑄢𑄬𑄭 𑄜𑄬𑄣𑄬𑄭 𑄡𑄬𑄝𑄧𑄁𑄉𑄬𑅁 𑄖𑄪𑄭 𑄇𑄨 𑄝𑄟𑄴 𑄝𑄪𑄌𑄴𑄍𑄮𑄌𑄴𑅁 𑄞𑄢𑄨 𑄉𑄧𑄟𑄴 𑄌𑄬𑄘𑄧𑄖𑄴𑄬! 𑄦𑄖𑄴–𑄒𑄬𑄁 𑄝𑄚𑄳𑄠 𑄝𑄘𑄬 𑄚𑄨𑄟𑄮𑄚𑄬 𑄇𑄨𑄌𑄴𑄪 𑄚𑄧 𑄇𑄱𑄰 𑄃𑄮𑄟 𑄃𑄮𑄟 𑄉𑄧𑄢𑄨 𑄃𑄊𑄬𑅁 𑄖 𑄇𑄮𑄌𑄴𑄛𑄚 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄡𑄬 𑄡𑄨𑄠𑄬𑄚𑄴 𑄉𑄧𑄖𑄴𑄖𑄇𑄴𑄥𑄖𑄴 𑄇𑄨𑄌𑄴𑄪 𑄉𑄧𑄢𑄨 𑄚𑄧 𑄛𑄣𑄳𑄠𑄧𑅁 𑄘𑄬𑄣𑄬–𑄃𑄮 𑄚𑄧 𑄘𑄬𑄊𑄬𑄖𑄴𑄬 𑄙𑄧𑄇𑄴 𑄉𑄧𑄢𑄨 𑄗𑄬𑄣𑄧𑅁 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮𑄣𑄱𑄰 𑄟𑄧𑄚𑄴𑄎𑄧𑄇𑄴𑄇 𑄈𑄢 𑄦𑄧𑄣𑄇𑄴𑅁 𑄡𑄬 𑄡𑄨𑄠𑄬𑄚𑄴 𑄎𑄚𑄬 𑄖𑄬 𑄥𑄨𑄠𑄬𑄚𑄴 𑄇𑄧𑄣𑄇𑄴𑅁 𑄎𑄬𑄢𑄬𑄘𑄨 𑄜𑄧𑄑𑄮𑄝𑄮 𑄇𑄪𑄘𑄨 𑄇𑄪𑄘𑄨 𑄇𑄧𑄎𑄮𑄘𑄨–𑄇𑄎𑄘𑄠𑄴 𑄜𑄮𑄉𑄮𑄘𑄨 𑄇𑄚𑄘𑄨 𑄜𑄬𑄣𑄬𑄭 𑄘𑄨𑄣𑄬𑄇𑄴𑅁 𑄖𑄬𑄋 𑄡 𑄛𑄬𑄠𑄳𑄠𑄧𑄚𑄴 𑄝𑄬𑄇𑄴𑄪𑄚𑄴 𑄚𑄨𑄣𑄬𑄇𑄴𑅁 𑄡𑄘𑄬 𑄇𑄱𑄰 𑄉𑄬𑄣𑄇𑄴 𑄛𑄧𑄢𑄚𑄴 𑄝𑄎𑄬𑄝𑄢𑄴 𑄟𑄧𑄚𑄬 𑄇𑄧𑄣𑄬 𑄇𑄢𑄧𑄢𑄬 𑄚𑄧 𑄇𑄧𑄝𑄬𑅁 𑄇𑄪𑄠𑄮𑄌𑄴 𑄥𑄪𑄚𑄨𑄣𑄬 𑄥𑄣𑄬𑄚𑄴 𑄖𑄪𑄭 𑄄𑄙𑄪 𑄚𑄬𑄭𑅁 𑄟𑄧𑄘𑄴, 𑄦𑄬𑄢𑄮𑄄𑄚𑄴 𑄚𑄬𑄭𑄘𑄬 𑄎𑄉𑄘𑄴 𑄛𑄙𑄬𑄝𑄧𑄁𑅁 𑄡𑄘𑄬 𑄦𑄖𑄴–𑄒𑄬𑄋𑄧𑄖𑄴𑄪𑄚𑄴 𑄝𑄚𑄴 𑄈𑄪𑄣𑄨 𑄘𑄨 𑄉𑄬𑄣𑄇𑄴𑄇𑄱𑄰𑅁 𑄚𑄨𑄟𑄮𑄚𑄬 𑄟𑄬𑄢𑄴 𑄈𑄬𑄭𑄠𑄬𑅁 𑄖𑄬𑄋 𑄚𑄬𑄡𑄬𑄃𑄮𑄚𑄴, 𑄛𑄧𑄏𑄉𑄚𑄨 𑄌𑄬𑄘𑄬𑄢𑄴–𑄞𑄬𑄘𑄬𑄢𑄴 𑄉𑄧𑄢𑄨 𑄗𑄱𑄰 𑄘𑄮𑄚𑄴 𑄥𑄨𑄠𑄬𑄚𑄴𑄘𑄱𑄰𑄖𑄢𑄴 𑄡𑄬𑄖𑄴𑄧𑄟𑄚𑄴 𑄟𑄧𑄚𑄧𑄖𑄴 𑄘𑄪𑄈𑄴𑄦𑄱𑄰𑄠𑄬, 𑄥𑄨𑄖𑄴𑄪𑄚𑄴 𑄝𑄬𑄌𑄴 𑄟𑄧𑄚𑄧𑄖𑄴 𑄘𑄪𑄈𑄴𑄦𑄱𑄰𑄠𑄬 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄌𑄬𑄭 𑄌𑄬𑄭 𑄡𑄨𑄠𑄬𑄚𑄴 𑄛𑄠𑄴 𑄇𑄱𑄰 𑄘𑄨𑄚𑄬𑅁 𑄦𑄨𑄚𑄴𑄘𑄪 𑄛𑄮𑄝𑄮 𑄌𑄪𑄟𑄨 𑄘𑄨𑄚𑄬𑅁 𑄝𑄬𑄉𑄧 𑄃𑄉𑄬 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄛𑄬𑄘𑄬𑄝𑄖𑄴𑄖𑄬𑄭 𑄡𑄢𑄴𑅁 𑄊𑄧𑄢𑄧𑄖𑄴𑄪𑄚𑄴 𑄝𑄢𑄬𑄘𑄨 𑄚𑄧 𑄚𑄳𑄦𑄨𑄉𑄨𑄣𑄧𑄘𑄬 𑄇𑄢𑄬𑄚𑄚𑄴 𑄆𑄌𑄳𑄠𑅁 𑄜𑄮𑄉𑄮𑄘𑄨 𑄇𑄚𑄝𑄮 𑄅𑄎𑄪 𑄡𑄬𑄭 𑄌𑄭𑄘𑄬 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄇𑄧𑄖𑄴𑄖 𑄇𑄧𑄖𑄴𑄖𑄦𑄱𑄰 𑄡𑄨𑄚𑄴𑄘𑄨𑄛𑄠𑄴 𑄍𑄨𑄘𑄨 𑄛𑄧𑄌𑄳𑄠𑅁 𑄚𑄨𑄟𑄮𑄚𑄬 𑄌𑄮𑄊𑄮𑄛𑄚𑄨 𑄜𑄬𑄣𑄬𑄭 𑄜𑄬𑄣𑄬𑄭 𑄚𑄇𑄴𑄧𑄝𑄨 𑄜𑄧𑄑𑄮𑄝𑄮 𑄇𑄧𑄖𑄴𑄖–𑄇𑄧𑄖𑄴𑄖𑄨𑄚𑄨 𑄛𑄬𑄘𑄬𑄭 𑄆𑄉𑄧𑄖𑄴𑄧𑄢𑄴 𑄉𑄧𑄣𑄳𑄠𑄧𑅁 𑄉𑄮𑄘 𑄝𑄬𑄇𑄴𑄇𑄚𑄨 𑄆𑄉𑄧𑄖𑄴𑄧𑄢𑄴 𑄉𑄧𑄢𑄨 𑄎𑄮𑄢 𑄣𑄉𑄬𑄭 𑄇𑄧𑄣𑄧, 𑄚𑄇𑄴𑄪 𑄟𑄪𑄭 𑄖𑄧𑄢𑄬 𑄘𑄬𑄊𑄬𑄝𑄖𑄴𑄖𑄬𑄭 𑄚𑄧 𑄌𑄁𑅁 𑄖𑄢 𑄝𑄧𑄣𑄬 𑄝𑄧𑄣𑄬 𑄌𑄬𑄠𑄧𑄚𑄴𑅁 𑄖𑄧𑄢𑄬 𑄡𑄨𑄠𑄬𑄚𑄴𑄛𑄠𑄴 𑄉𑄧𑄖𑄴𑄬, 𑄇𑄧𑄙𑄬 𑄟𑄪𑄭 𑄇𑄢𑄨𑄣𑄱𑄰 𑄚𑄧 𑄛𑄢𑄧𑄁𑅁 𑄖𑄪𑄭 𑄛𑄣𑄳𑄠 𑄟𑄧𑄢𑄬 𑄈𑄬𑄟 𑄉𑄧𑄢𑄨 𑄘𑄨𑄌𑄴𑅁 𑄜𑄧𑄑𑄮𑄝𑄮 𑄎𑄮𑄢 𑄣𑄉𑄬𑄭 𑄌𑄭𑄘𑄬, 𑄚𑄇𑄴𑄧𑄝𑄨 𑄦𑄎𑄨 𑄦𑄎𑄨 𑄃𑄊𑄬𑅁 𑄚𑄇𑄴𑄧𑄝𑄨 𑄦𑄎𑄨𑄝𑄮 𑄘𑄬𑄊𑄨 𑄚𑄨𑄟𑄮𑄚𑄧𑄢𑄴 𑄝𑄬𑄇𑄴𑄴 𑄘𑄪𑄇𑄴𑄈𑄚𑄨 𑄛𑄚𑄨𑄦𑄱𑄰 𑄡𑄨𑄠𑄬𑅁 𑄟𑄧𑄚𑄬 𑄉𑄧𑄣𑄳𑄠𑄧 𑄚𑄇𑄴𑄧𑄝𑄨 𑄥𑄨𑄙𑄪 𑄖𑄢𑄴 𑄇𑄧𑄚𑄧 𑄘𑄪𑄌𑄴 𑄚𑄬𑄭𑅁 𑄝𑄬𑄇𑄴𑄇𑄚𑄨 𑄈𑄬𑄟 𑄉𑄧𑄢𑄨 𑄘𑄨𑄠𑄬𑅁 𑄊𑄧𑄢𑄧𑄖𑄴 𑄅𑄙𑄨 𑄝𑄬𑄇𑄴 𑄛𑄧𑄏𑄚𑄨 𑄥𑄧𑄟𑄧𑄢𑄨 𑄌𑄭𑄘𑄬 𑄆𑄇𑄴 𑄖𑄬𑄋–𑄃𑄮 𑄚𑄬𑄭𑅁 𑄝𑄬𑄇𑄴 𑄖𑄬𑄋𑄉𑄪𑄚𑄴 𑄚𑄬𑄡𑄬𑄠𑄮𑄚𑄴𑅁 𑄚𑄨𑄟𑄮𑄚𑄬 𑄡𑄬𑄙𑄧𑄇𑄳𑄠 𑄘𑄪𑄈𑄴 𑄛𑄬𑄘𑄧𑄥𑄖𑄴 𑄖𑄖𑄴𑄪𑄚𑄴 𑄃𑄧𑄚𑄢𑄴𑄥𑄴 𑄛𑄥𑄴 𑄉𑄧𑄢 𑄛𑄧𑄢𑄨𑄝𑄮𑅁 𑄃𑄧𑄚𑄢𑄴𑄥𑄴 𑄛𑄥𑄴 𑄚𑄧 𑄉𑄧𑄢𑄨 𑄢𑄋𑄟𑄖𑄳𑄠𑄖𑄴𑄪𑄚𑄴 𑄚𑄧 𑄡𑄬𑄝𑄧𑅁 𑄃 𑄄𑄠𑄬𑄚𑄨 𑄇𑄢𑄧𑄢𑄬 𑄚𑄧 𑄇𑄧𑄝𑄧𑅁 𑄊𑄧𑄢𑄴𑄝𑄮𑄉𑄪𑄚𑄴𑄢𑄬–𑄃𑄮 𑄚𑄧 𑄇𑄧𑄝𑄧𑅁 𑄇𑄧𑄣𑄬 𑄥𑄣𑄬𑄚𑄴 𑄆𑄇𑄴𑄪𑄎𑄚𑄴 𑄌𑄨𑄘𑄬 𑄉𑄧𑄢𑄨 𑄗𑄬𑄝𑄇𑄴𑅁 𑄦𑄧𑄣𑄬 𑄚𑄧 𑄦𑄧𑄣𑄬 𑄢𑄋𑄟𑄖𑄳𑄠𑄖𑄴 𑄗𑄬𑄝𑄢𑄴 𑄚𑄧 𑄘𑄨𑄝𑄬𑄇𑄴𑅁 𑄢𑄬𑄖𑄴𑄮 𑄟𑄧𑄚𑄧𑄖𑄴 𑄘𑄪𑄈𑄴 𑄉𑄧𑄢𑄨, 𑄚𑄚𑄇𑄴𑄇𑄚𑄴 𑄞𑄝𑄨 𑄞𑄝𑄨 𑄃𑄧𑄢𑄴 𑄊𑄪𑄟𑄮 𑄃𑄧𑄢𑄴 𑄊𑄪𑄟𑄮 𑄉𑄧𑄢𑄨 𑄇𑄘𑄬𑄣𑄧𑅁 𑄝𑄬𑄚𑄳𑄠 𑄛𑄧𑄦𑄴𑄢𑄴𑄦𑄱𑄰 𑄇𑄧𑄣𑄬𑄎𑄧𑄖𑄴 𑄉𑄬𑄣𑄧𑅁 𑄇𑄧𑄣𑄬𑄎𑄧𑄖𑄴𑄪𑄚𑄴 𑄜𑄨𑄢𑄧𑄘𑄬 𑄖 𑄛𑄨𑄖𑄴𑄬𑄣 𑄚𑄧𑄝𑄧𑄇𑄪𑄟𑄮𑄢𑄬 𑄣𑄊𑄧𑄖𑄴 𑄛𑄬𑄠𑄳𑄠𑄬𑅁 𑄊𑄧𑄢𑄧𑄖𑄴 𑄇𑄱𑄰 𑄛𑄙𑄬𑄭𑄠𑄬 𑄟𑄪𑄭 𑄉𑄧𑄟𑄴 𑄃𑄊𑄧𑄁𑅁 𑄟𑄧 𑄌𑄨𑄘𑄬 𑄚𑄧 𑄉𑄧𑄖𑄴𑄮𑄇𑄴𑅁 𑄃 𑄛𑄣𑄳𑄠 𑄖𑄬𑄋 𑄛𑄙𑄬𑄭 𑄘𑄬𑄘𑄮𑄇𑄴𑅁 𑄚𑄨𑄟𑄮𑄚𑄬 𑄡𑄬𑄙𑄧𑄇𑄳𑄠 𑄘𑄪𑄈𑄴 𑄛𑄬𑄘𑄧𑄥𑄖𑄴 𑄇𑄢𑄧𑄢𑄬 𑄚𑄧 𑄇𑄧𑄠𑄴𑅁 𑄖𑄬 𑄖 𑄙𑄧𑄇𑄬 𑄖𑄬 𑄣𑄬𑄊𑄛𑄧𑄢𑄳𑄦𑄬𑅁 𑄇𑄧𑄣𑄬𑄎𑄧𑄖𑄴 𑄡𑄠𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄃𑄣𑄮 𑄝𑄨𑄇𑄥𑄬 𑄆𑄏𑄬𑅁 𑄃𑄣𑄮 𑄝𑄨𑄇𑄥𑄳𑄠𑄬𑄣𑄱𑄰 𑄚𑄚𑄚𑄴 𑄇𑄧𑄙 𑄇𑄱𑄰 𑄘𑄨𑄚𑄴 𑄜𑄬𑄣𑄚𑄴𑅁 

𑄆𑄌𑄳𑄠 𑄌𑄚𑄚𑄧𑄢𑄬 𑄉𑄧𑄚𑄴𑄓𑄠𑄴 𑄙𑄧𑄢𑄨𑄝𑄮𑅁 𑄛𑄫𑄢𑄴𑄕𑄨𑄟 𑄘𑄨𑄚𑄳𑄠𑄬 𑄌𑄚𑄚𑄧𑄢𑄬 𑄉𑄧𑄚𑄴𑄓𑄠𑄴 𑄙𑄧𑄢𑄬𑅁 𑄃 𑄛𑄧𑄖𑄴𑄖𑄨 𑄝𑄧𑄏𑄧𑄢𑄴 𑄇𑄧𑄚𑄧 𑄌𑄚𑄚𑄧𑄢𑄬 𑄉𑄧𑄚𑄴𑄓𑄠𑄴 𑄚𑄧 𑄙𑄧𑄢𑄬𑅁 𑄙𑄧𑄣𑄳𑄠𑄬–𑄃𑄮 𑄆𑄇𑄴 𑄘𑄬𑄏𑄧𑄖𑄴 𑄘𑄬𑄊𑄨𑄣𑄬 𑄃 𑄆𑄇𑄴 𑄘𑄬𑄏𑄧𑄖𑄴 𑄚𑄧 𑄘𑄬𑄊𑄧𑄚𑄴𑅁 𑄆 𑄛𑄧𑄣𑄴𑄣𑄖𑄴 𑄦𑄨𑄣𑄴 𑄌𑄘𑄨𑄉𑄋𑄧𑄖𑄴 𑄘𑄮𑄣𑄬–𑄘𑄣𑄬 𑄘𑄬𑄊 𑄡𑄬𑄝𑄧𑅁 𑄌𑄚𑄚𑄧𑄢𑄬 𑄉𑄮𑄘 𑄉𑄨𑄣𑄨𑄝𑄮𑅁 𑄆 𑄈𑄬𑄝𑄧𑄖𑄴 𑄚𑄧 𑄌𑄬𑄣𑄬, 𑄚𑄧 𑄘𑄬𑄣𑄬 𑄥𑄣𑄬𑄚𑄴 𑄃𑄢𑄴 𑄞𑄣𑄧𑄇𑄴 𑄝𑄧𑄏𑄧𑄢𑄴 𑄛𑄧𑄢𑄴 𑄖𑄬 𑄘𑄬𑄝𑄧𑄘𑄬𑅁 𑄆𑄌𑄳𑄠 𑄌𑄚𑄚𑄧𑄢𑄬 𑄉𑄧𑄚𑄴𑄓𑄠𑄴 𑄙𑄧𑄢𑄨𑄝𑄮𑄘𑄬 𑄢𑄬𑄖𑄴 𑄥𑄧𑄟𑄴𑄞𑄉𑄧𑄘𑄴𑅁 𑄥𑄬𑄙𑄧𑄇𑄴𑄧𑄚𑄴 𑄥𑄧𑄁 𑄚𑄇𑄴𑄧𑄝𑄨 𑄇𑄬𑄚𑄬 𑄎𑄉𑄨 𑄗𑄬𑄝𑄧 𑄉𑄠𑄴 𑄉𑄠𑄴𑅁 𑄆𑄚𑄬 𑄦𑄧𑄣𑄬 𑄌𑄬𑄝𑄢𑄴 𑄞𑄢𑄨 𑄉𑄧𑄢𑄨 𑄟𑄧𑄚𑄬 𑄇𑄧𑄢𑄴 𑄚𑄇𑄴𑄧𑄝𑄨𑄖𑄴𑄪𑄚𑄴𑅁 𑄌𑄨𑄉𑄮𑄚𑄴 𑄗𑄉𑄧𑄘𑄬 𑄆𑄙𑄧𑄇𑄳𑄠 𑄉𑄧𑄢𑄨 𑄌𑄚𑄧𑄢𑄬, 𑄝𑄬𑄣𑄚𑄧𑄢𑄬 𑄉𑄧𑄚𑄴𑄓𑄠𑄴 𑄙𑄧𑄣𑄴𑄬, 𑄈𑄨𑄎𑄬–𑄈𑄨𑄌𑄳𑄠 𑄉𑄧𑄢𑄨 𑄛𑄚𑄨𑄖𑄴 𑄌𑄮𑄣𑄴, 𑄛𑄧𑄠𑄴𑄏𑄬 𑄜𑄬𑄣𑄬𑄭 𑄘𑄨𑄘𑄮 𑄚𑄇𑄴𑄧𑄝𑄨𑅁 𑄖𑄬 𑄥𑄪𑄚𑄳𑄠𑄬, 𑄌𑄚𑄚𑄬–𑄝𑄬𑄣𑄚𑄬 𑄇𑄧𑄢𑄧𑄎𑄴 𑄈𑄬𑄭 𑄥𑄪𑄎𑄨 𑄚𑄧 𑄛𑄢𑄬 𑄇𑄨𑄚𑄬𑄖𑄴𑄖𑄬𑄭, 𑄉𑄧𑄚𑄴𑄓𑄠𑄴 𑄙𑄧𑄢𑄬𑄉𑄨𑅁 𑄛𑄚𑄨𑄖𑄴 𑄌𑄮𑄣𑄴, 𑄛𑄧𑄠𑄴𑄎𑄬 𑄜𑄬𑄣𑄬𑄭 𑄘𑄨𑄣𑄬 𑄏𑄘𑄨 𑄍𑄢𑄨 𑄡𑄠𑄴𑅁 𑄌𑄚𑄧𑄢𑄬 𑄉𑄧𑄚𑄴𑄓𑄠𑄴 𑄙𑄧𑄢𑄚 𑄚𑄨𑄚𑄬𑄭 𑄊𑄧𑄢𑄧𑄢𑄴 𑄇𑄢𑄧𑄢𑄴 𑄙𑄢𑄧–𑄙𑄢𑄨 𑄚𑄬𑄭𑅁 𑄊𑄧𑄢𑄧 𑄟𑄚𑄪𑄌𑄴𑄪𑄚𑄬 𑄇𑄧𑄣𑄇𑄴 𑄇𑄨𑄠𑄮𑄎𑄧𑄚𑄬 𑄚𑄧 𑄌𑄬𑄝𑄇𑄴𑅁 𑄥𑄬𑄙𑄧𑄇𑄴𑄧𑄚𑄴 𑄥𑄧𑄁 𑄇𑄧𑄚𑄧𑄎𑄧𑄚𑄬 𑄎𑄉𑄨 𑄚𑄧 𑄗𑄬𑄝𑄇𑄴 𑄇𑄱𑄰𑄠𑄮𑄚𑄴𑅁 𑄈𑄣𑄨𑄇𑄴 𑄚𑄇𑄴𑄧𑄝𑄨𑄖𑄴𑄪𑄚𑄴 𑄌𑄬𑄝𑄢𑄴 𑄞𑄢𑄨 𑄉𑄧𑄢𑄨 𑄟𑄧𑄚𑄬 𑄇𑄧𑄢𑄴𑅁 𑄇𑄧𑄣𑄬𑄎𑄧𑄖𑄴 𑄡𑄬𑄭𑄚𑄬 𑄇𑄮–𑄝𑄪𑄣𑄮 𑄉𑄧𑄖𑄴𑄬 𑄥𑄪𑄚𑄳𑄠𑄬𑄉𑄱𑄰 𑄆𑄇𑄴𑄘𑄊𑄨𑄠𑄬 𑄢𑄬𑄖𑄴 𑄎𑄉𑄨 𑄗𑄬𑄭 𑄌𑄚𑄚𑄧𑄢𑄬 𑄉𑄧𑄚𑄴𑄓𑄠𑄴 𑄙𑄧𑄖𑄴𑄬 𑄌𑄬𑄝𑄇𑄴𑅁 𑄇𑄢𑄬 𑄥𑄧𑄟𑄌𑄳𑄠 𑄛𑄬𑄝𑄧 𑄞𑄝𑄬𑄢𑄴 𑄚𑄇𑄴𑄧𑄝𑄨𑅁 𑄡𑄢𑄬 𑄛𑄠𑄴–𑄃𑄮 𑄓𑄉𑄨𑄝𑄬𑄢𑄴 𑄚𑄧𑄠𑄴𑅁 𑄚𑄇𑄴𑄧𑄝𑄨𑄘𑄊𑄨 𑄊𑄧𑄢𑄧 𑄇𑄠𑄴 𑄆𑄇𑄴𑄇𑄚𑄴 𑄊𑄧𑄢𑄴 𑄃𑄊𑄬𑅁 𑄥𑄬 𑄊𑄧𑄢𑄚𑄧𑄖𑄴 𑄅𑄇𑄴𑄮 𑄝𑄪𑄢𑄮 𑄟𑄨𑄣𑄬 𑄃𑄊𑄬𑅁 𑄝𑄪𑄢𑄨 𑄃𑄧𑄟𑄧𑄇𑄧𑄘𑄧 𑄇𑄪𑄖𑄴𑄮𑄢𑄨𑅁 𑄖𑄢𑄴 𑄘𑄨𑄝𑄬 𑄉𑄞𑄪𑄌𑄳𑄠𑄬 𑄟𑄨𑄣𑄬 𑄚𑄘𑄨𑄚𑄴 𑄃𑄊𑄧𑄚𑄴𑅁 𑄉𑄞𑄪𑄌𑄳𑄠𑄬 𑄟𑄧𑄢𑄧𑄖𑄴 𑄆𑄣𑄬 𑄆𑄉𑄧𑄎 𑄞𑄪𑄘𑄴–𑄞𑄪𑄘𑄠𑄴𑅁 𑄝𑄚𑄳𑄦 𑄖𑄢 𑄊𑄧𑄢𑄧𑄖𑄴 𑄉𑄞𑄪𑄌𑄳𑄠𑄬 𑄟𑄧𑄢𑄧𑄖𑄴 𑄆𑄣𑄬 𑄚𑄧𑄠𑄴, 𑄚𑄇𑄴𑄧𑄝𑄨𑄘𑄊𑄨 𑄊𑄧𑄢𑄧𑄖𑄴 𑄆𑄣𑄬–𑄃𑄮 𑄇𑄧𑄠𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄇𑄴𑄧𑄝𑄨𑄢𑄬 𑄝𑄧𑄚𑄴𑄚𑄁 𑄉𑄧𑄢𑄬𑅁 𑄚𑄇𑄴𑄧𑄝𑄨 𑄟–𑄝𑄝𑄧𑄢𑄬 𑄚𑄱𑄰𑄠𑄬 𑄚𑄱𑄰𑄠𑄬 𑄉𑄧𑄢𑄨 𑄡𑄨𑄠𑄬𑄚𑄴 𑄛𑄠𑄴 𑄥𑄪𑄚𑄬 𑄘𑄬𑅁 𑄚𑄇𑄴𑄧𑄝𑄨 𑄇𑄬𑄙𑄧𑄇𑄳𑄠 𑄟𑄨𑄣𑄬 𑄖 𑄟𑄣𑄱𑄰 𑄖 𑄝𑄝𑄬 𑄇𑄱𑄰 𑄛𑄢𑄧𑄚𑄴 𑄞𑄨𑄣𑄨 𑄇𑄨𑄌𑄴𑄪 𑄚𑄧 𑄇𑄧𑄚𑄴𑅁 𑄃 𑄝𑄪𑄢𑄨 𑄙𑄧𑄇𑄴𑄇𑄚𑄴–𑄃𑄮 𑄇𑄱𑄰 𑄛𑄢𑄧𑄚𑄴, 𑄝𑄢 𑄇𑄧𑄙 𑄇𑄧𑄠𑄴𑄘𑄬 𑄥𑄨𑄠𑄬𑄚𑄴𑅁 𑄃𑄘𑄟𑄧𑄖𑄴 𑄝𑄬𑄇𑄴 𑄥𑄧𑄟𑄌𑄳𑄠𑄣𑄱𑄰 𑄥𑄧𑄁 𑄛𑄧𑄣𑄬–𑄃𑄮 𑄟𑄧𑄢𑄧𑄖𑄴𑄪𑄚𑄴 𑄢𑄫𑄛𑄧𑄌𑄚𑄧𑄢𑄬 𑄝𑄬𑄌𑄴 𑄉𑄧𑄟𑄴 𑄛𑄠𑄴𑅁 𑄢𑄫𑄛𑄧𑄌𑄚𑄬 𑄈𑄣𑄨𑄇𑄴 𑄣𑄬𑄊 𑄚𑄧 𑄥𑄨𑄊𑄬𑅁 𑄖𑄬 𑄣𑄬𑄊 𑄚𑄧 𑄥𑄨𑄊𑄨𑄣𑄬–𑄃𑄮 𑄝𑄪𑄏𑄬𑅁 𑄟𑄚𑄴𑄎𑄳𑄠𑄧𑄣𑄱𑄰 𑄟𑄨𑄣𑄧𑄚𑄴–𑄏𑄨𑄣𑄧𑄚𑄴 𑄉𑄧𑄢𑄨 𑄗𑄠𑄴𑅁 𑄇𑄧𑄚𑄧 𑄉𑄍𑄴–𑄝𑄥𑄴, 𑄜𑄬𑄎–𑄇𑄧𑄎 𑄚𑄧 𑄣𑄉𑄨𑄣𑄬, 𑄚𑄧 𑄇𑄝𑄬𑅁 𑄉𑄍𑄴–𑄝𑄥𑄴 𑄇𑄝𑄨–𑄇𑄝𑄠𑄴 𑄜𑄬𑄣𑄬𑄭 𑄉𑄬𑄣𑄬 𑄃𑄧𑄟𑄧𑄇𑄧𑄘𑄧 𑄉𑄧𑄟𑄴 𑄚𑄧 𑄛𑄠𑄴𑅁 𑄡𑄨𑄝𑄬 𑄇𑄝𑄨 𑄡𑄠𑄴 𑄥𑄨𑄝𑄬𑄢𑄬 𑄝𑄨𑄌𑄴 𑄘𑄬𑄊𑄬𑅁 𑄟𑄪𑄎𑄪𑄋𑄮𑄖𑄴 𑄣𑄊𑄧𑄖𑄴 𑄛𑄬𑄣𑄬 𑄟𑄚 𑄉𑄧𑄢𑄬𑅁 𑄝𑄣𑄪𑄈𑄣𑄩 𑄇𑄨𑄠𑄧𑄋𑄧𑄖𑄴 𑄙𑄧𑄢𑄴𑄟𑄧 𑄦𑄧𑄣𑄬 𑄟𑄧𑄚𑄴 𑄘𑄨 𑄇𑄟𑄴 𑄉𑄧𑄢𑄬𑅁 𑄞𑄨𑄇𑄴𑄈𑄪 𑄥𑄧𑄁𑄊𑄧𑄢𑄬 𑄥𑄬𑄝–𑄛𑄫𑄎𑄮 𑄉𑄧𑄢𑄬𑅁 𑄝𑄪𑄘𑄴𑄙𑄧 𑄇𑄱𑄰𑄠𑄬𑄘𑄬 𑄇𑄧𑄙𑄚𑄨, 𑄞𑄨𑄇𑄴𑄈𑄪𑄉𑄪𑄚𑄬 𑄇𑄧𑄚𑄴𑄘𑄬 𑄇𑄧𑄙𑄚𑄨 𑄞𑄢𑄨 𑄉𑄧𑄢𑄨 𑄟𑄚𑄬𑅁 𑄛𑄪𑄇𑄴–𑄎𑄪𑄇𑄴 𑄥𑄪𑄟𑄪𑄖𑄴𑄮 𑄇𑄧𑄚𑄧 𑄛𑄧𑄢𑄚𑄴𑄝𑄧𑄣𑄢𑄬 𑄚𑄧 𑄟𑄢𑄬𑅁 𑄢𑄫𑄛𑄧𑄌𑄚𑄬 𑄉𑄧𑄟𑄴 𑄦𑄧𑄣𑄬–𑄃𑄮 𑄝𑄪𑄢𑄨 𑄉𑄧𑄟𑄴 𑄚𑄧 𑄛𑄠𑄴 𑄚𑄇𑄴𑄧𑄝𑄨𑄘𑄊𑄨𑄙𑄪 𑄆𑄣𑄬𑅁 𑄆𑄇𑄴 𑄛𑄧𑄣𑄴𑄣 𑄚𑄇𑄴𑄧𑄝𑄨𑄣𑄱𑄰 𑄝𑄪𑄢𑄨 𑄇𑄮𑄌𑄴𑄬 𑄝𑄎𑄬𑄭𑄠𑄧𑄚𑄴𑅁 𑄝𑄪𑄢𑄨 𑄛𑄪𑄏𑄮𑄢𑄴 𑄉𑄧𑄌𑄴𑄍𑄬, 𑄥𑄨𑄝𑄬 𑄇𑄨𑄖𑄴𑄖𑄬𑄭 𑄖𑄪𑄉𑄪𑄖𑄴 𑄖𑄪𑄉𑄪𑄖𑄴 𑄖𑄧𑄟𑄥𑄨𑄙𑄪 𑄆𑄏𑄬𑅁

𑄚𑄇𑄴𑄧𑄝𑄨 𑄇𑄱𑄰𑄠𑄬, 𑄟𑄚𑄴𑄎𑄳𑄠𑄧 𑄥𑄨𑄙𑄪 𑄟𑄚𑄪𑄌𑄴 𑄆𑄏𑄬, 𑄥𑄨𑄠𑄬𑄚𑄴𑄘𑄱𑄰𑄖𑄧𑄢𑄴 𑄇𑄨𑅁

𑄥𑄨𑄠𑄬𑄚𑄴𑄘𑄱𑄰𑄖𑄧𑄢𑄴 𑄇𑄨 𑄇𑄱𑄰𑄚𑄬 𑄝𑄪𑄢𑄨𑄖𑄴𑄪𑄚𑄴 𑄅𑄙𑄨𑄣𑄧 𑄢𑄉𑄴𑅁 𑄆𑄇𑄴 𑄣𑄋𑄬𑄣𑄴 𑄉𑄧𑄢𑄨 𑄇𑄮 𑄙𑄧𑄣𑄳𑄠𑄧, 𑄟𑄚𑄴𑄎𑄳𑄠𑄧𑄄𑄙𑄪 𑄟𑄚𑄪𑄌𑄴 𑄡𑄠𑄴 𑄞𑄨𑄣𑄨 𑄆𑄙𑄧𑄇𑄴 𑄇𑄨 𑄊𑄧𑄚𑄧 𑄊𑄧𑄚𑄧 𑄆𑄏𑄚𑅁 𑄃𑄉𑄪𑄚𑄧 𑄇𑄪𑄢𑄬 𑄊𑄨 𑄗𑄧𑄣𑄬 𑄇𑄧𑄟𑄧𑄣𑄬 𑄚𑄧 𑄉𑄧𑄣𑄬𑅁 𑄣𑄧𑄝𑄢𑄴 𑄟𑄧𑄚𑄬 𑄇𑄧𑄣𑄬, 𑄣𑄧𑄣𑄬𑄉𑄱𑄰 𑄘𑄧 𑄦𑄧𑄠𑄴𑅁 𑄌𑄮𑄈𑄴 𑄑𑄧𑄚𑄴–𑄑𑄧𑄚𑄠𑄴 𑄛𑄢𑅁 𑄖𑄧 𑄣𑄧𑄊𑄬 𑄣𑄧𑄊𑄬 𑄟𑄧 𑄚𑄘𑄨𑄚𑄴𑄮𑄢𑄬–𑄃𑄮 𑄝𑄧𑄢𑄴𑄝𑄘𑄴 𑄣𑄉𑄬𑄝𑄬𑅁 𑄢𑄫𑄛𑄧𑄌𑄚𑄴 𑄇𑄧𑄝𑄣𑄴𑄛𑄧𑄢 𑄆𑄝𑄧, 𑄇𑄬𑄇𑄴 𑄇𑄬𑄇𑄴 𑄦𑄎𑄨𑄝𑅁 𑄝𑄬𑄇𑄴 𑄟𑄚𑄴𑄎𑄳𑄠𑄧 𑄊𑄧𑄢𑄴 𑄎𑄪𑄢𑄮, 𑄝𑄚𑄳𑄦 𑄄𑄠𑄮𑄖𑄴 𑄦𑄎𑄨 𑄢𑄧𑅁 𑄝𑄚𑄳𑄦 𑄇𑄨 𑄖𑄪𑄭 𑄉𑄞𑄪𑄢𑄴 𑄟𑄨𑄣𑄬 𑄃𑄊𑄧𑄌𑄴𑄬 𑄃𑄘𑄟𑄧𑄖𑄴𑅃 𑄃𑄢𑄴 𑄇𑄨 𑄃𑄘𑄟𑄧𑄖𑄴 𑄉𑄞𑄪𑄢𑄴 𑄟𑄨𑄣𑄬 𑄚𑄬𑄭𑅃 

𑄝𑄪𑄢𑄨𑄢𑄬 𑄇𑄧𑄝𑄖𑄴𑄖𑄬𑄭 𑄌𑄬𑄭𑄠𑄬 𑄚𑄇𑄴𑄧𑄝𑄨𑅁 𑄅𑄎𑄪 𑄟𑄧𑄚𑄬 𑄖𑄟𑄴𑄟 𑄣𑄪𑄁𑄋𑄬𑄉𑄨𑅁 𑄖 𑄟𑄭 𑄆𑄏𑄚𑄠𑄴 𑄇𑄨𑄌𑄴𑄪 𑄇𑄱𑄰 𑄚𑄧 𑄛𑄣𑄴𑄧 𑄚𑄇𑄴𑄧𑄝𑄨𑅁 𑄝𑄪𑄢𑄨 𑄡𑄨𑄠𑄬𑄚𑄴 𑄛𑄠𑄴 𑄇𑄧𑄣𑄬, 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄇𑄴𑄧𑄝𑄨 𑄞𑄢𑄨 𑄉𑄧𑄢𑄨 𑄇𑄮𑄌𑄴𑄍𑄬 𑄝𑄏𑄠𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄧 𑄟𑄘𑄨 𑄥𑄪𑄚𑄨 𑄗𑄠𑄴𑅁 𑄆𑄌𑄳𑄠 𑄇𑄨 𑄦𑄧𑄝𑄧𑅁 𑄘𑄨𑄚𑄮𑄖𑄴 𑄟𑄧𑄢𑄧𑄖𑄴 𑄆𑄣𑄬 𑄡𑄨𑄠𑄬𑄚𑄴 𑄛𑄠𑄴 𑄇𑄧𑄠𑄴, 𑄃 𑄢𑄬𑄘𑄮𑄖𑄴 𑄆𑄖𑄴𑄬 𑄘𑄬𑄊𑄨𑄣𑄬, 𑄇𑄱𑄰 𑄛𑄣𑄴𑄬 𑄥𑄣𑄬𑄚𑄴 𑄃𑄘𑄟𑄧 𑄘𑄪𑄣𑄮–𑄟𑄪𑄣𑄮 𑄉𑄧𑄢𑄬𑄭 𑄘𑄨𑄝𑄧𑅁 𑄈𑄣𑄨𑄇𑄴 𑄢𑄫𑄛𑄧𑄌𑄚𑄴 𑄝𑄘𑄬 𑄇𑄨𑄠𑄰𑄱 𑄚𑄬𑄭𑅁 𑄆𑄚𑄬–𑄃𑄮 𑄢𑄫𑄛𑄧𑄌𑄚𑄬–𑄃𑄮 𑄆𑄝𑄧 𑄚𑄧 𑄆𑄏𑄬𑅁 𑄥𑄨𑄝𑄬 𑄇𑄪𑄙𑄪 𑄟𑄧𑄣𑄴𑄧𑄉𑄱𑄰𑅁 𑄝𑄬𑄣𑄳𑄠 𑄆𑄝𑄧 𑄚𑄬 𑄚𑄧 𑄆𑄝𑄧𑅁

𑄢𑄫𑄛𑄧𑄇𑄢𑄩 𑄞𑄪𑄭𑄠𑄮 𑄟𑄖𑄴𑄮 𑄉𑄮𑄘 𑄢𑄋𑄦𑄱𑄰𑄠𑄬 𑄙𑄚𑄴 𑄛𑄉𑄚𑄠𑄴𑅁 𑄇𑄎𑄧𑄣𑄧𑄋𑄧 𑄥𑄨𑄚𑄴𑄘𑄨 𑄇𑄚𑄴 𑄛𑄘𑄨𑄣𑄬 𑄝𑄮𑄘𑄮 𑄢𑄧 𑄥𑄪𑄚𑄬𑅁 𑄇𑄛𑄴𑄖𑄬𑄭 𑄉𑄧𑄙 𑄔𑄬𑄝 𑄛𑄚𑄨𑄠𑄬 𑄇𑄎𑄧𑄣𑄧𑄋𑄚𑄴 𑄛𑄬𑄣𑄬 𑄛𑄬𑄣𑄬𑄦𑄱𑄰𑄠𑄬𑅁 𑄟𑄏𑄧 𑄌𑄮𑄊𑄧𑄝𑄨𑄌𑄨 𑄉𑄏𑄧 𑄙𑄬𑄣𑄉𑄪𑄚𑄴 𑄆𑄇𑄴𑄇 𑄆𑄇𑄴𑄇 𑄛𑄚𑄨𑄖𑄴 𑄝𑄏𑄧𑄚𑄴𑅁 𑄟𑄧𑄢 𑄃 𑄛𑄘 𑄚𑄬𑄭 𑄙𑄬𑄣𑄖𑄴 𑄟𑄳𑄦𑄢𑄋𑄉𑄪𑄚𑄬 𑄛𑄧𑄢𑄨 𑄗𑄬𑄭 𑄟𑄍𑄴 𑄈𑄛𑄴 𑄘𑄨 𑄗𑄚𑄴𑅁 𑄎𑄪 𑄛𑄬𑄣𑄬 𑄟𑄏𑄧 𑄇𑄋𑄬𑄣𑄴𑄣𑄮𑄖𑄴 𑄌𑄬𑄭 𑄜𑄇𑄴 𑄉𑄧𑄢𑄨 𑄒𑄪𑄘𑄮𑄖𑄴 𑄖𑄪𑄣𑄨 𑄟𑄌𑄴𑄍𑄪𑄚𑄴 𑄃𑄚𑄧𑄚𑄴 𑄛𑄚𑄨𑄖𑄴𑄪𑄚𑄴𑅁 𑄞𑄪𑄭𑄠𑄮 𑄟𑄙𑄧𑄖𑄴 𑄉𑄪𑄢𑄪–𑄍𑄉𑄧𑄣𑄴 𑄌𑄧𑄖𑄴𑄬 𑄚𑄧 𑄘𑄬𑄊𑄬, 𑄙𑄚𑄴 𑄛𑄉𑄚𑄠𑄴𑅁 𑄇𑄖𑄴𑄧𑄣𑄩𑄖𑄴𑄪𑄚𑄴 𑄙𑄧𑄢𑄨 𑄝𑄢𑄧𑄝𑄨𑄚𑄴𑄘𑄪 𑄊𑄘𑄧 𑄥𑄧𑄁 𑄡𑄬 𑄛𑄧𑄖𑄴𑄗𑄚𑄴 𑄃𑄊𑄬 𑄥𑄬 𑄛𑄧𑄖𑄴𑄗𑄚𑄴 𑄓𑄬𑄚𑄬–𑄝𑄋𑄬 𑄞𑄧𑄢𑄧𑄚𑄴𑄘𑄨 𑄃𑄘𑄟𑄴 𑄃 𑄞𑄪𑄭𑅁 𑄃𑄘𑄟𑄧𑄖𑄴 𑄥𑄮𑄟𑄬𑄣𑄬 𑄘𑄬𑄊𑄬 𑄚𑄚 𑄝𑄝𑄧𑄖𑄳𑄠 𑄊𑄧𑄢𑄚𑄨𑅁 𑄉𑄪𑄘𑄮𑄟𑄴, 𑄝𑄬𑄢𑄴𑄌𑄉 𑄝𑄬𑄢, 𑄌𑄨𑄉𑄮𑄚𑄴–𑄘𑄋𑄧𑄢𑄴 𑄊𑄧𑄢𑄴𑅁 𑄌𑄨𑄉𑄮𑄚𑄴 𑄉𑄪𑄢𑄮𑄉𑄪𑄚𑄬 𑄇𑄨𑄠𑄬 𑄄𑄥𑄴𑄇𑄪𑄣𑄧𑄖𑄴 𑄡𑄘𑄧𑄚𑄴, 𑄇𑄨𑄠𑄬 𑄃𑄟𑄴, 𑄇𑄖𑄴𑄮𑄣𑄴 𑄉𑄏𑄧 𑄍𑄝𑄖𑄴𑄖𑄧𑄣𑄬 𑄊𑄨𑄣𑄬 𑄈𑄢, 𑄚𑄙𑄬𑄁 𑄈𑄢 𑄦𑄧𑄘𑄧𑄚𑄴𑅁 𑄌𑄘𑄬 𑄃𑄧𑄟𑄧𑄇𑄧𑄘𑄧 𑄘𑄮𑄣𑄴 𑄘𑄬𑄊𑄬𑅁 𑄞𑄪𑄭𑄠𑄚𑄨 𑄙𑄚𑄚𑄨–𑄃𑄮 𑄛𑄉𑄚, 𑄟𑄙 𑄢𑄋, 𑄣𑄁𑄮𑄋𑄳𑄠𑄬, 𑄥𑄧𑄁 𑄖𑄮𑄣𑄧 𑄃 𑄛𑄬𑄖𑄴 𑄗𑄪𑄢𑄴𑅁 𑄝𑄪𑄠𑄬𑄢𑄴 𑄆𑄣𑄬 𑄝𑄬𑄇𑄴 𑄙𑄚𑄚𑄨 𑄦𑄣𑄬𑄭 𑄛𑄧𑄢𑄬𑅁 𑄝𑄪𑄠𑄬𑄢𑄴 𑄡𑄬𑄭 𑄜𑄪𑄢𑄬𑄣𑄬 𑄃 𑄅𑄎𑄪 𑄦𑄧𑄠𑄴𑅁 𑄡𑄨𑄠𑄬𑄚𑄨 𑄥𑄧𑄁 𑄖𑄮𑄣𑄧𑄦𑄱𑄰𑄠𑄬 𑄥𑄨𑄠𑄬𑄚𑄨𑄖𑄴 𑄇𑄧𑄚𑄧 𑄉𑄍𑄴 𑄖𑄢𑄪𑄟𑄴, 𑄉𑄏𑄧 𑄥𑄪𑄢𑄮𑄋𑄧𑄖𑄴𑄪𑄚𑄴 𑄆𑄭 𑄇𑄪𑄖𑄴𑄪𑄚𑄴 𑄆𑄏𑄧𑄚𑄴 𑄞𑄬𑄚𑄴–𑄞𑄬𑄚𑄨 𑄃 𑄟𑄪–𑄛𑄪𑄇𑄴𑄪𑄚𑄴𑅁 𑄒𑄬𑄁 𑄞𑄧𑄢𑄧𑄚𑄴 𑄒𑄬𑄁 𑄞𑄧𑄢𑄧𑄚𑄴 𑄜𑄪𑄣𑄴 𑄍𑄨𑄘𑄬𑄚𑄨 𑄣𑄱𑄰 𑄇𑄧𑄚𑄴 𑄝𑄧𑄢𑄴 𑄟𑄮𑄚𑄮 𑄉𑄍𑄴 𑄖𑄢𑄪𑄟𑄧𑄖𑄴 𑄅𑄢𑄨 𑄡𑄚𑄴𑅁 𑄄𑄖𑄬 𑄆𑄇𑄴𑄇 𑄃𑄮𑄖𑄬 𑄆𑄇𑄴𑄇 𑄚𑄬𑄡𑄘𑄬 𑄚𑄬𑄡𑄘𑄬 𑄈𑄘𑄴 𑄞𑄧𑄢𑄧𑄚𑄴 𑄟𑄧𑄙𑄪 𑄦𑄧𑄠𑄴𑅁 𑄚𑄇𑄴𑄧𑄝𑄨𑄘𑄊𑄨 𑄊𑄧𑄢𑄚𑄴 𑄟𑄪𑄢𑄮 𑄅𑄉𑄪𑄢𑄬𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄚𑄇𑄴𑄧𑄝𑄨 𑄌𑄬𑄭 𑄗𑄠𑄨 𑄙𑄚𑄴 𑄜𑄪𑄣𑄮𑄖𑄴 𑄆𑄏𑄧𑄚𑄴𑄘𑄬 𑄞𑄬𑄚𑄴–𑄞𑄬𑄚𑄨 𑄃 𑄟𑄪–𑄛𑄪𑄇𑄴𑄪𑄚𑄧𑄢𑄬𑅁 𑄙𑄚𑄴𑄛𑄘 𑄟𑄙𑄚𑄨𑄖𑄴 𑄜𑄨𑄢𑄨𑄁 𑄛𑄧𑄢𑄨 𑄗𑄚𑄴𑅁 𑄛𑄧𑄖𑄴𑄖𑄛𑄧𑄖𑄴𑄖𑄨, 𑄖𑄬𑄁𑄖𑄬𑄋𑄮𑄢𑄨 𑄛𑄧𑄢𑄧𑄚𑄴𑅁 𑄛𑄧𑄖𑄴𑄖𑄛𑄧𑄖𑄴𑄖𑄨𑄉𑄪𑄚𑄬 𑄞𑄪𑄭𑄠𑄮 𑄟𑄙𑄧 𑄇𑄧𑄖𑄴𑄖 𑄘𑄨 𑄅𑄢𑄨 𑄡𑄚𑄴𑅁 𑄄𑄠𑄬𑄚𑄨 𑄘𑄬𑄣𑄬 𑄈𑄪𑄎𑄨𑄠𑄬 𑄦𑄎𑄬 𑄚𑄇𑄴𑄧𑄝𑄨𑅁 𑄞𑄝𑄬 𑄛𑄧𑄖𑄴𑄖𑄛𑄧𑄖𑄴𑄖𑄨 𑄙𑄚𑄴𑄜𑄪𑄣𑄮𑄖𑄴 𑄆𑄏𑄧𑄚𑄴𑄘𑄬 𑄙𑄧𑄇𑄴 𑄉𑄧𑄢𑄨 𑄚𑄨𑄟𑄮𑄚𑄬–𑄃𑄮 𑄃𑄧𑄚𑄢𑄴𑄥𑄴 𑄛𑄥𑄴 𑄉𑄧𑄢𑄨𑄣𑄬 𑄟𑄧–𑄄𑄙𑄪 𑄆𑄝𑄧𑅁 𑄥𑄬𑄇𑄴𑄬 𑄃𑄟𑄨 𑄆𑄉𑄧𑄖𑄴𑄧𑄢𑄴 𑄦𑄧𑄝𑄧𑄁𑅁 𑄡𑄬𑄚𑄴 𑄙𑄚𑄴𑄜𑄪𑄣𑄮𑄖𑄴 𑄞𑄬𑄚𑄴–𑄞𑄬𑄚𑄨, 𑄟𑄪–𑄛𑄪𑄇𑄴, 𑄛𑄧𑄖𑄴𑄖𑄛𑄧𑄖𑄴𑄖𑄨, 𑄖𑄬𑄁𑄖𑄬𑄋𑄮𑄢𑄨 𑄆𑄉𑄧𑄖𑄴𑄧𑄢𑄴 𑄦𑄧𑄚𑄴 𑄛𑄢𑅁 𑄆𑄇𑄴𑄛𑄧𑄣𑄴𑄣 𑄆𑄇𑄴𑄇𑄚𑄴 𑄌𑄨𑄙𑄨 𑄛𑄬𑄠𑄳𑄠𑄬 𑄚𑄨𑄟𑄮𑄚𑄧𑄢𑄴𑅁 𑄥𑄬𑄘𑄨𑄚𑄳𑄠 𑄥𑄬 𑄌𑄨𑄙𑄨𑄠𑄚𑄴 𑄥𑄧𑄟𑄌𑄳𑄠𑄉𑄪𑄚𑄬 𑄖 𑄦𑄘𑄧𑄖𑄴𑄪𑄚𑄴 𑄖 𑄦𑄘𑄧𑄖𑄴𑄪𑄚𑄴 𑄉𑄧𑄖𑄴𑄬 𑄇𑄧𑄣𑄬𑄎𑄧 𑄌𑄣𑄧 𑄅𑄉𑄪𑄢𑄬𑄖𑄴𑄪𑄚𑄴 𑄟𑄘𑄨𑄖𑄴 𑄛𑄧𑄌𑄳𑄠𑄉𑄱𑄰𑅁 𑄆𑄇𑄴𑄇–𑄃𑄮 𑄛𑄧𑄢𑄨 𑄚𑄧 𑄛𑄠𑄴𑅁 𑄃 𑄥𑄧𑄟𑄌𑄳𑄠𑄉𑄪𑄚𑄧𑄢𑄬 𑄚𑄨𑄚𑄬𑄭 𑄢𑄉𑄴 𑄅𑄙𑄬𑅁 𑄚𑄇𑄴𑄧𑄝𑄨 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨 𑄇𑄧𑄣𑄬𑄎𑄧𑄖𑄴 𑄡𑄠𑄴𑅁 𑄖𑄬 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨𑄣𑄬 𑄇𑄧𑄣𑄬𑄎𑄧 𑄛𑄮–𑄉𑄪𑄚𑄬 𑄗𑄢𑄬𑄭 𑄗𑄢𑄬𑄭 𑄢𑄨𑄚𑄨 𑄌𑄚𑄴𑅁 𑄆𑄇𑄴𑄎𑄧𑄚𑄬 𑄖𑄪𑄠𑄮 𑄇𑄱𑄰 𑄖𑄋𑄧𑄌𑄴𑄬 𑄚𑄇𑄴𑄧𑄝𑄨, 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨𑄣𑄬 𑄖𑄧𑄢𑄬 𑄞𑄢𑄨 𑄥𑄎𑄬𑅁 𑄖𑄧 𑄥𑄚𑄳𑄠𑄬 𑄌𑄋𑄴𑄟 𑄟𑄨𑄣𑄬𑄉𑄪𑄚𑄬 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨 𑄇𑄧𑄣𑄬𑄎𑄧𑄖𑄴 𑄆𑄘𑄇𑄴 𑄥𑄣𑄬𑄚𑄴 𑄃𑄟 𑄎𑄘𑄧𑄢𑄴 𑄟𑄎𑄢 𑄆𑄇𑄴𑄇 𑄦𑄧𑄣𑄬 𑄗𑄬𑄣𑄪𑄚𑄴𑅁 𑄄𑄠𑄬 𑄝𑄬𑄇𑄴𑄇𑄚𑄨 𑄝𑄋𑄣𑄧 𑄅𑄢𑄧𑄚𑄴–𑄛𑄨𑄚𑄮𑄚𑄴 𑄛𑄨𑄚𑄨𑅁 𑄇𑄪𑄖𑄴𑄪𑄚𑄴 𑄗𑄬𑄝𑄧 𑄌𑄋𑄴𑄟 𑄟𑄎𑄢𑅁 𑄈𑄣𑄨𑄇𑄴 𑄚𑄇𑄴𑄧𑄝𑄨 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨 𑄇𑄧𑄣𑄬𑄎𑄧𑄖𑄴 𑄡𑄠𑄴 𑄇𑄨𑄚𑄬𑄖𑄴𑄖𑄬𑄭 𑄆𑄇𑄴𑄛𑄧𑄣𑄴𑄣 𑄃𑄧𑄉𑄧𑄙 𑄈𑄬𑄭𑄠𑄬𑄉𑄱𑄰 𑄅𑄇𑄴𑄮 𑄟𑄌𑄴𑄖𑄧𑄢𑄧𑄖𑄴𑄪𑄚𑄴𑅁 𑄟𑄌𑄴𑄖𑄧𑄌𑄳𑄠𑄬 𑄇𑄱𑄰𑄠𑄬–𑄄𑄠𑄬𑄚𑄴 𑄇𑄨 𑄟𑄬𑄣–𑄟𑄬𑄝𑄴𑄝𑄚𑄴 𑄚𑄇𑄨, 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨 𑄆𑄌𑄴𑄍𑄮𑄌𑄳𑄠𑅁 𑄟𑄌𑄴𑄖𑄧𑄌𑄳𑄠𑄬 𑄆 𑄇𑄧𑄙𑄚𑄴 𑄇𑄧𑄣𑄬–𑄃𑄮 𑄇𑄧𑄚𑄧 𑄆𑄇𑄴𑄘𑄨𑄚𑄴 𑄆𑄝𑄧 𑄌𑄋𑄴𑄟 𑄟𑄨𑄣𑄬𑄉𑄪𑄚𑄬 𑄛𑄨𑄚𑄮𑄚𑄴–𑄈𑄘𑄨 𑄛𑄨𑄚𑄨 𑄇𑄧𑄣𑄬𑄎𑄧𑄘𑄴, 𑄃𑄧𑄞𑄨𑄎𑄧𑄘𑄴, 𑄟𑄬𑄣𑄥𑄚𑄨𑄖𑄴, 𑄦𑄘𑄬–𑄝𑄎𑄢𑄬 𑄡𑄬𑄝𑄇𑄴𑅁 𑄥𑄬𑄇𑄴𑄬 𑄚𑄇𑄴 𑄃𑄧𑄎𑄧𑄣𑄴 𑄉𑄧𑄢𑄨 𑄇𑄧𑄝𑄇𑄴, 𑄃𑄟𑄨 𑄌𑄋𑄴𑄟𑅁 𑄄𑄠𑄬𑄚𑄨 𑄃𑄟 𑄎𑄘𑄧𑄢𑄴 𑄅𑄢𑄧𑄚𑄴–𑄛𑄨𑄚𑄮𑄚𑄴𑅁 𑄄𑄠𑄬𑄚𑄨 𑄌𑄋𑄴𑄟 𑄟𑄨𑄣𑄬𑄉𑄪𑄚𑄬 𑄛𑄨𑄚𑄧𑄚𑄴𑅁 𑄄𑄠𑄬𑄚𑄴𑄘𑄱𑄰𑄌𑄋𑄴𑄟 𑄎𑄖𑄴 𑄞𑄨𑄣𑄨 𑄃𑄟𑄢𑄬 𑄌𑄨𑄚𑄧𑄚𑄴𑅁 𑄚𑄇𑄴𑄧𑄝𑄨 𑄌𑄨𑄙𑄨𑄠𑄚𑄴 𑄦𑄢𑄬𑄭𑄠𑄬𑄘𑄬 𑄥𑄨𑄖𑄴𑄪𑄚𑄴 𑄙𑄧𑄢𑄨 𑄖 𑄟𑄧𑄚𑄚𑄴 𑄉𑄮𑄢𑄴 𑄉𑄮𑄢𑄴 𑄛𑄠𑄴𑅁 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄌𑄮𑄊𑄮𑄖𑄴 𑄞𑄎𑄬, 𑄇𑄧𑄣𑄬𑄎𑄧 𑄌𑄣𑄧𑄖𑄴𑄪𑄚𑄴 𑄌𑄨𑄙𑄨𑄠𑄚𑄴 𑄛𑄧𑄢𑄬𑄖𑄴𑄬 𑄥𑄨𑄠𑄬𑄚𑄴𑅁 𑄇𑄧𑄣𑄬𑄎𑄧𑄖𑄴 𑄆𑄣𑄬 𑄦𑄨𑄘𑄮𑄖𑄴 𑄅𑄙𑄬𑅁 𑄌𑄨𑄙𑄨𑄠𑄚𑄴 𑄛𑄧𑄢𑄬𑄖𑄴𑄬 𑄦𑄨𑄘𑄮𑄖𑄴 𑄅𑄙𑄨𑄣𑄬 𑄃𑄘𑄬𑄇𑄴𑄬 𑄉𑄧𑄢𑄨 𑄟𑄧𑄚𑄧𑄖𑄴 𑄅𑄙𑄬, 𑄖 𑄝𑄛𑄴𑄛𑄱𑄰 𑄖 𑄟 𑄓𑄇𑄴𑄖𑄧𑄌𑄳𑄠𑄬𑄖𑄴𑄖𑄬𑄭 𑄝𑄮 𑄘𑄨𑄝𑄬𑄢𑄴 𑄌𑄚𑄴𑄘𑄬 𑄥𑄨𑄠𑄬𑄚𑄴𑅁 𑄚𑄇𑄴𑄧𑄝𑄨 𑄝𑄮 𑄚𑄧 𑄡𑄠𑄴 𑄇𑄨𑄚𑄬𑄖𑄴𑄖𑄬𑄭 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄘𑄨 𑄟𑄠𑄴–𑄏𑄨𑄠𑄬 𑄟𑄘𑄝𑄪𑄣𑄮 𑄚𑄬𑄭 𑄉𑄧𑄢𑄨 𑄗𑄚𑄴𑅁 𑄇𑄧𑄣𑄬𑄎𑄧𑄖𑄴𑄪𑄚𑄴 𑄆𑄣𑄬𑄉𑄱𑄰 𑄝𑄨𑄌𑄴𑄍𑄮𑄚𑄧𑄖𑄴 𑄛𑄧𑄢𑄨 𑄗𑄠𑄨, 𑄖𑄪𑄠𑄮 𑄖 𑄟 𑄚𑄧 𑄇𑄧𑄠𑄴, 𑄇𑄧𑄇𑄴𑄬 𑄞𑄖𑄴 𑄈𑄬𑄝𑄬𑅁 𑄉𑄖𑄴𑄖𑄱𑄰 𑄚𑅁 𑄃𑄉𑄬 𑄝𑄮–𑄃𑄮 𑄇𑄧𑄙 𑄚𑄧 𑄇𑄧𑄙𑄬 𑄄𑄥𑄴𑄇𑄪𑄣𑄴, 𑄇𑄧𑄣𑄬𑄎𑄧𑄖𑄴𑄪𑄚𑄴 𑄆𑄣𑄬𑄉𑄱𑄰 𑄇𑄧𑄙𑄧, 𑄚𑄇𑄴𑄮, 𑄡 𑄉𑄖𑄴𑄖𑄱𑄰𑅁 𑄉𑄙𑄨–𑄉𑄙𑄠𑄴 𑄝𑄧𑄣𑄴 𑄛𑄬𑄠𑄳𑄠𑄬 𑄉𑄧𑄢𑄨 𑄞𑄖𑄴 𑄈𑄬𑄌𑄴𑄍𑄨𑅁 𑄝𑄮 𑄌𑄘𑄧𑄚𑄴𑄘𑄬 𑄇𑄧𑄙 𑄚𑄨𑄟𑄮𑄚𑄧𑄢𑄬 𑄚𑄧 𑄇𑄧𑄝𑄧𑅁 𑄥𑄪𑄚𑄨𑄣𑄬 𑄛𑄧𑄢𑄣𑄬𑄊 𑄚𑄧 𑄉𑄧𑄢𑄨𑄝𑄧𑅁 𑄟𑄧𑄚𑄧𑄖𑄴 𑄘𑄪𑄈𑄴 𑄉𑄧𑄢𑄨 𑄗𑄬𑄝𑄧𑅁 𑄝𑄮 𑄡𑄧𑄇𑄴𑄬 𑄚𑄧 𑄡𑄬𑄟𑄴, 𑄇𑄨𑄖𑄴𑄖𑄬𑄭 𑄇𑄮𑄟𑄴𑅁 𑄛𑄧𑄢𑄩𑄇𑄴𑄈𑄬–𑄃𑄮 𑄊𑄮𑄚𑄬𑄭 𑄆𑄌𑄳𑄠𑅁 𑄄𑄌𑄴𑄬 𑄚𑄇𑄴𑄧𑄝𑄨 𑄇𑄧𑄣𑄬𑄎𑄧𑄖𑄴 𑄡𑄢𑄴𑅁 𑄥𑄧𑄠𑄴–𑄥𑄉𑄧𑄌𑄳𑄠 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄛𑄬𑄠𑄳𑄠𑄬𑅁 𑄝𑄬𑄇𑄴𑄪𑄚𑄴𑄘𑄱𑄰𑄆𑄇𑄴𑄇 𑄆𑄇𑄴𑄇 𑄇𑄧𑄙 𑄇𑄱𑄰𑄚𑄬 𑄛𑄎𑄢 𑄜𑄢𑄨 𑄡𑄠𑄴𑅁 𑄚𑄇𑄴𑄧𑄝𑄨 𑄙𑄧𑄇𑄴 𑄝𑄪𑄏𑄨 𑄇𑄨𑄠𑄮𑄎𑄧𑄚𑄬 𑄇𑄨𑄌𑄴𑄪 𑄚𑄧 𑄇𑄧𑄚𑄴𑅁 𑄉𑄮𑄘 𑄛𑄧𑄖𑄴𑄗𑄚𑄴 𑄉𑄭 𑄉𑄭 𑄡𑄬𑄭𑄠𑄬𑅁 𑄝𑄢𑄧𑄝𑄨𑄚𑄴𑄘𑄪 𑄊𑄘𑄧𑄖𑄴 𑄡𑄬𑄭 𑄌𑄭𑄘𑄬 𑄢𑄨𑄚𑄨𑄌 𑄇𑄎𑄧𑄣𑄧𑄋𑄧 𑄛𑄢𑄧𑄖𑄴 𑄒𑄨𑄠𑄬 𑄃𑄊𑄬𑅁 𑄚𑄧𑄉𑄚𑄴 𑄝𑄌𑄴𑄍𑄬 𑄃𑄊𑄬𑅁 𑄥𑄬𑄇𑄴𑄬 𑄛𑄪𑄇𑄴 𑄇𑄪𑄣𑄬𑄘𑄨 𑄚𑄧𑄉𑄚𑄴 𑄡𑄬𑄠𑄳𑄠𑄬 𑄟𑄚𑄪𑄌𑄴𑄪𑄚𑄧𑄢𑄬 𑄛𑄢𑄴 𑄉𑄧𑄢𑄬𑄭 𑄘𑄨𑄝𑄬𑄖𑄴𑄖𑄬𑄭𑅁 𑄚𑄇𑄴𑄧𑄝𑄨𑄢𑄬 𑄘𑄬𑄊𑄨 𑄢𑄨𑄚𑄨𑄌 𑄇𑄧𑄣𑄧, 𑄟𑄪𑄭 𑄟𑄧𑄚𑄬 𑄉𑄧𑄌𑄴𑄍𑄪𑄁 𑄖𑄪𑄭 𑄆𑄙𑄧𑄇𑄴𑄧𑄚𑄴 𑄇𑄧𑄣𑄬𑄎𑄧𑄖𑄴 𑄣𑄪𑄁𑄉𑄧𑄌𑄴𑄍𑄱𑄰𑅁 𑄃𑄭𑄠𑄬 𑄘𑄬𑄢𑄨 𑄦𑄧𑄣𑄬𑅃

𑄞𑄖𑄴 𑄈𑄘𑄬𑅁

𑄡𑄬𑄭, 𑄚𑄧𑄉𑄚𑄴 𑄆𑄌𑄳𑄠𑅁 𑄅𑄙𑄨𑄉𑄱𑄰𑅁

𑄚𑄧𑄉𑄚𑄧𑄖𑄴 𑄅𑄙𑄨 𑄚𑄇𑄴𑄧𑄝𑄨 𑄇𑄧𑄣𑄧, 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴 𑄆𑄇𑄴𑄇 𑄡𑄬𑄝𑄧𑄁 𑄃𑄧𑅁

𑄇𑄧𑄇𑄴𑄬𑅃

𑄇𑄳𑄣𑄥𑄴 𑄗𑄪𑄟𑄴 𑄦𑄧𑄣𑄬𑅁

𑄘𑄬𑄢𑄨 𑄚𑄧 𑄦𑄧𑄝𑄧𑄁𑅃

𑄝𑄮𑄘𑄮𑄖𑄴 𑄉𑄧𑄢𑄨 𑄆𑄝𑄧𑄁 𑄃𑄠𑄴𑅁

𑄚𑄧𑄉𑄚𑄴 𑄇𑄎𑄧𑄣𑄧𑄋𑄧 𑄛𑄪𑄇𑄴𑄇𑄪𑄣𑄬𑄘𑄨 𑄆𑄭 𑄖𑄢 𑄚𑄧𑄉𑄚𑄧𑄖𑄴𑄪𑄚𑄴 𑄣𑄟𑄨𑄣𑄇𑄴𑅁 𑄖𑄢 𑄣𑄧𑄊𑄬 𑄝𑄬𑄇𑄴 𑄟𑄚𑄪𑄌𑄴𑄪𑄚𑄴 𑄣𑄟𑄨𑄣𑄇𑄴𑅁 𑄘𑄮𑄉𑄚𑄚𑄨 𑄡𑄘𑄬 𑄌𑄪𑄝𑄬–𑄌𑄝𑄬 𑄉𑄬𑄣𑄇𑄴𑅁 𑄇𑄪𑄘𑄴𑄫𑄢𑄴 𑄡𑄬𑄭 𑄢𑄨𑄚𑄨𑄌 𑄇𑄧𑄣𑄧, 𑄖𑄧𑄢𑄬 𑄘𑄧 𑄞𑄨𑄣𑄬 𑄓𑄇𑄴𑄖𑄧𑄢𑄧𑄖𑄴𑄖𑄬𑄭 𑄝𑄮 𑄌𑄘𑄧𑄚𑄴𑅁

𑄇𑄧𑄚𑄴𑄚 𑄇𑄧𑄖𑄴𑄬! 

𑄟𑄪𑄭 𑄥𑄪𑄚𑄳𑄁𑄠𑄧𑅁 𑄝𑄪𑄠𑄬𑄢𑄴 𑄚𑄧 𑄝𑄬𑄣𑄬 𑄇𑄨 𑄛𑄘 𑄣𑄧𑄢𑄬𑄘𑄬! 

𑄖𑄧𑄢𑄬 𑄇𑄧𑄚𑄴𑄚 𑄇𑄧𑄠𑄴 𑄥𑄬𑄭 𑄇𑄧𑄙𑅁 𑄟𑄧𑄢𑄬 𑄝𑄮 𑄌𑄘𑄧𑄚𑄴, 𑄟𑄪𑄭 𑄇𑄱𑄰 𑄚𑄧 𑄛𑄢𑄧𑄁, 𑄥𑄨𑄠𑄬𑄚𑄴 𑄇𑄬𑄚𑄬 𑄦𑄧𑄠𑄴𑅁

𑄟𑄧𑄖𑄴𑄪𑄚𑄴 𑄣𑄪𑄉𑄧𑄖𑄴𑄬 𑄃𑄠𑄴 𑄃𑄧𑅁 𑄚𑄨𑄟𑄮𑄚𑄧𑄢𑄬 𑄇𑄱𑄰 𑄘𑄮𑄁 𑄞𑄨𑄣𑄨𑅁

𑄇𑄨 𑄖𑄧𑄖𑄴𑄪𑄚𑄴 𑄣𑄪𑄉𑄬𑄘𑄪𑄁! 

𑄓𑄇𑄴𑄖𑄧𑄢𑄴 𑄦𑄧𑄣𑄬 𑄘𑄧 𑄉𑄧𑄟𑄴𑅁 𑄃𑄧𑄥𑄪𑄈𑄴–𑄝𑄨𑄥𑄪𑄈𑄴 𑄦𑄧𑄣𑄬 𑄌𑄨𑄘𑄬 𑄚𑄧 𑄗𑄠𑄴𑅁

𑄉𑄧𑄟𑄴 𑄡𑄧𑄇𑄴𑄬 𑄖𑄪𑄭 𑄡𑄬𑄝𑄬 𑄚𑄇𑄨𑅃

𑄟𑄧𑄢𑄬 𑄘𑄧 𑄚𑄧 𑄌𑄚𑄴𑅁

𑄦𑄱𑄰𑄠𑄬, 𑄖𑄧𑄢𑄬 𑄌𑄬𑄝𑄖𑄴𑄖𑄬𑄭 𑄇𑄱𑄰 𑄘𑄨𑄟𑄴𑅁

𑄢𑄨𑄚𑄨𑄌 𑄆𑄇𑄴𑄇 𑄦𑄎𑄨𑄣𑄮𑅁

𑄘𑄨𑄎𑄧𑄚𑄬 𑄇𑄧𑄙 𑄇𑄱𑄰 𑄡𑄘𑄬 𑄡𑄘𑄬 𑄖𑄪𑄣𑄮𑄝𑄚𑄧𑄖𑄴𑄪𑄚𑄴 𑄃𑄢𑄧𑄖𑄨𑄢𑄬 𑄣𑄊𑄧𑄖𑄴 𑄛𑄬𑄣𑄇𑄴𑅁 𑄃𑄢𑄧𑄖𑄨𑄢𑄬 𑄣𑄊𑄧𑄖𑄴 𑄛𑄬𑄭 𑄝𑄮 𑄌𑄚 𑄇𑄧𑄙 𑄝𑄘𑄴 𑄘𑄨𑄣𑄇𑄴𑅁 𑄖𑄨𑄚𑄴𑄎𑄧𑄚𑄬 𑄛𑄧𑄢𑄣𑄬𑄊 𑄇𑄧𑄙 𑄇𑄱𑄰 𑄇𑄱𑄰 𑄦𑄘𑄧𑄘𑄧𑄚𑄴𑅁 𑄛𑄥𑄴 𑄉𑄧𑄢𑄨𑄣𑄬 𑄇𑄧𑄚𑄬 𑄇𑄪𑄙𑄪 𑄞𑄧𑄖𑄴𑄖𑄨 𑄦𑄧𑄝𑄇𑄴 𑄇𑄮–𑄝𑄪𑄣𑄮 𑄉𑄧𑄖𑄴𑄧𑄚𑄴𑅁 𑄃𑄢𑄧𑄖𑄨 𑄆𑄇𑄴𑄇 𑄆𑄇𑄴𑄇 𑄇𑄮𑄌𑄴𑄛𑄚 𑄇𑄧𑄙 𑄚𑄳𑄦𑄨𑄉𑄨𑄣𑄠𑄴𑅁 𑄖𑄬 𑄆𑄇𑄴𑄇 𑄝𑄢𑄴 𑄉𑄧𑄢𑄬𑅁 𑄖𑄢𑄬 𑄞𑄨𑄣𑄬 𑄟𑄧𑄢𑄧𑄖𑄴𑄪𑄚𑄬 𑄆𑄇𑄴𑄪𑄎𑄚𑄴 𑄢𑄨𑄚𑄨 𑄌𑄚𑄴𑅁 𑄌𑄨𑄙𑄨 𑄣𑄬𑄊𑄧𑄚𑄴 𑄇𑄧𑄠𑄴𑅁 𑄥𑄧𑄠𑄴–𑄥𑄉𑄧𑄌𑄳𑄠 𑄟𑄧𑄢𑄧𑄘𑄬 𑄌𑄨𑄚𑄮𑄚𑄴𑅁 𑄛𑄧𑄙𑄧𑄖𑄴 𑄣𑄊𑄧𑄖𑄴 𑄛𑄬𑄣𑄬 𑄟𑄘𑄚𑄴𑅁 𑄟𑄧𑄢𑄧𑄖𑄴𑄪𑄚𑄬 𑄞𑄨𑄣𑄬 𑄖𑄢𑄬 𑄇𑄧𑄚𑄴, 𑄖𑄧 𑄦𑄎𑄨, 𑄇𑄧𑄙 𑄇𑄧𑄚, 𑄢𑄧𑄝𑄮, 𑄚𑄇𑄴𑄪, 𑄌𑄮𑄇𑄴𑄪𑄚𑄴, 𑄇𑄚𑄚𑄨, 𑄦𑄘𑄧𑄚𑄨 𑄝𑄬𑄇𑄴𑄇𑄚𑄨 𑄘𑄮𑄣𑄴𑅁 𑄟𑄧𑄢𑄧𑄖𑄴𑄪𑄚𑄬 𑄚𑄧 𑄇𑄧𑄚𑄴𑄘𑄬–𑄃𑄮 𑄚𑄧𑄠𑄴𑅁 𑄇𑄧𑄚𑄴𑅁 𑄟𑄧𑄢𑄧𑄖𑄴𑄪𑄚𑄬 𑄇𑄧𑄣𑄬 𑄥𑄨𑄠𑄬𑄝𑄬𑄌𑄴 𑄚𑄪𑄘𑄨 𑄚𑄪𑄘𑄨 𑄉𑄧𑄢𑄨 𑄦𑄎𑄬, 𑄦𑄘𑄬 𑄃𑄢𑄧𑄖𑄨𑅁 𑄃𑄢𑄧𑄖𑄨 𑄇𑄧𑄣𑄧, 𑄟𑄪𑄭 𑄛𑄥𑄴 𑄉𑄧𑄣𑄳𑄠 𑄔𑄇𑄖𑄴 𑄡𑄬𑄟𑄴𑅁 𑄟𑄧𑄢𑄴 𑄦𑄃𑄮𑄌𑄴 𑄓𑄇𑄴𑄖𑄧𑄢𑄨 𑄛𑄧𑄢𑄨𑄝𑄬𑄢𑄴𑅁

𑄃𑄢𑄧𑄖𑄨 𑄓𑄇𑄴𑄖𑄧𑄢𑄨 𑄛𑄧𑄢𑄚 𑄦𑄃𑄮𑄌𑄴 𑄥𑄪𑄚𑄨 𑄢𑄨𑄚𑄨𑄌 𑄦𑄎𑄨𑄣𑄮 𑄚𑄇𑄴𑄧𑄝𑄨𑄢𑄬 𑄌𑄬𑄭𑅁 𑄖𑄬 𑄇𑄧𑄣𑄧, 𑄆𑄇𑄴𑄘𑄊𑄨𑄠𑄬 𑄓𑄇𑄴𑄖𑄧𑄢𑄨 𑄚𑄧 𑄛𑄧𑄢𑄨 𑄓𑄇𑄴𑄖𑄧𑄢𑄴 𑄦𑄧𑄚𑄴𑅁

𑄇𑄬𑄚𑄬 𑄦𑄧𑄘𑄇𑄴𑅃

𑄚𑄇𑄴𑄧𑄝𑄨 𑄇𑄧𑄣𑄧, 𑄓𑄇𑄴𑄖𑄧𑄢𑄴 𑄒𑄨𑄇𑄴 𑄉𑄧𑄌𑄳𑄠 𑄃𑄊𑄬 𑄦𑄧𑄝𑄧 𑄃𑄠𑄴𑅁

𑄃𑄢𑄧𑄖𑄨 𑄇𑄧𑄣𑄧, 𑄦𑄧𑄝𑄧𑄘𑄬 𑄦𑄧𑄝𑄧𑄘𑄬𑅁 𑄚𑄧𑄣𑄬 𑄟𑄧𑄇𑄴𑄖𑄧 𑄇𑄧𑄖𑄴𑄬 𑄓𑄇𑄴𑄖𑄧𑄢𑄨 𑄚𑄧 𑄛𑄧𑄢𑄨 𑄓𑄇𑄴𑄖𑄧𑄢𑄴 𑄦𑄧𑄚𑄴𑅁

𑄢𑄨𑄚𑄨𑄌 𑄇𑄧𑄣𑄧, 𑄦𑄧𑄚𑄴 𑄦𑄧𑄚𑄴𑅁

𑄚𑄇𑄴𑄧𑄝𑄨𑄢𑄬 𑄓𑄇𑄴𑄖𑄧𑄢𑄴 𑄟𑄚𑄴𑄎𑄳𑄠𑄧𑄖𑄴𑄖𑄬𑄭 𑄝𑄮 𑄌𑄘𑄧𑄚𑄴𑄘𑄬 𑄥𑄨𑄠𑄬𑄚𑄴 𑄚𑄧 𑄇𑄧𑄣𑄧𑅁

𑄃𑄢𑄧𑄖𑄨 𑄃 𑄝𑄢𑄴 𑄉𑄧𑄢𑄨 𑄇𑄧𑄣𑄧, 𑄚𑄨𑄎𑄬 𑄛𑄧𑄢𑄨 𑄓𑄇𑄴𑄖𑄧𑄢𑄴 𑄚𑄧 𑄦𑄧𑄣𑄬, 𑄚𑄋𑄬 𑄓𑄇𑄴𑄖𑄧𑄢𑄴𑄦𑄱𑄰𑄚𑄬 𑄇𑄨 𑄦𑄧𑄝𑄧𑅁

𑄚𑄇𑄴𑄧𑄝𑄨 𑄥𑄬 𑄇𑄧𑄙 𑄚𑄧 𑄇𑄱𑄰 𑄇𑄧𑄣𑄧, 𑄟𑄪𑄭 𑄦𑄧𑄣𑄬 𑄛𑄥𑄴 𑄉𑄧𑄢𑄨 𑄛𑄣𑄳𑄠𑄬 𑄦𑄧𑄝𑄧𑅁

𑄃𑄢𑄧𑄖𑄨 𑄇𑄧𑄣𑄧, 𑄖𑄪𑄭 𑄘𑄧 𑄛𑄥𑄴 𑄉𑄧𑄢𑄨𑄝𑄬𑅁

𑄢𑄨𑄚𑄨𑄌 𑄇𑄧𑄣𑄧, 𑄟𑄪𑄭 𑄛𑄥𑄴 𑄉𑄧𑄣𑄳𑄠𑄬–𑄃𑄮 𑄡𑄬 𑄄𑄙𑄪 𑄞𑄧𑄖𑄴𑄖𑄨 𑄦𑄮𑄟𑄴𑅁

𑄖𑄨𑄚𑄧𑄎𑄧𑄚𑄬 𑄦𑄘𑄨 𑄡𑄘𑄬 𑄆𑄇𑄴𑄇𑄚𑄴–𑄅𑄇𑄴𑄮𑄚𑄴 𑄢𑄨𑄇𑄴𑄥 𑄙𑄇𑄴 𑄊𑄎𑄨 𑄡𑄠𑄴𑅁 𑄑𑄬𑄇𑄴𑄥𑄩 𑄆𑄏𑄬–𑄡𑄠𑄴𑅁 𑄌𑄨𑄚𑄳𑄠 𑄟𑄚𑄪𑄌𑄴 𑄣𑄊𑄧𑄖𑄴 𑄛𑄚𑄴𑅁 𑄇𑄧𑄣𑄬𑄎𑄧𑄖𑄴 𑄣𑄪𑄋𑄨𑄣𑄇𑄴𑄇𑄱𑄰𑅁 𑄇𑄳𑄣𑄥𑄴 𑄉𑄧𑄢𑄨𑄣𑄇𑄴𑅁 𑄟𑄢𑄨𑄥𑄳𑄠 𑄝𑄎𑄢𑄧𑄖𑄴 𑄉𑄬𑄣𑄇𑄴𑅁 𑄚𑄨𑄟𑄮𑄚𑄧𑄢𑄴 𑄌𑄨𑄙𑄨–𑄃𑄮 𑄆𑄇𑄴𑄇𑄚𑄴 𑄛𑄬𑄣𑄧 𑄚𑄇𑄴𑄧𑄝𑄨𑅁 𑄌𑄨𑄙𑄨𑄠𑄚𑄴 𑄛𑄬𑄭 𑄃𑄧𑄟𑄧𑄇𑄧𑄘𑄧 𑄈𑄪𑄎𑄨𑄦𑄱𑄰𑄠𑄬𑅁 𑄌𑄨𑄘𑄨𑄠𑄚𑄴 𑄚𑄧 𑄈𑄪𑄣𑄨 𑄝𑄱𑄰𑄠𑄮 𑄞𑄨𑄘𑄨𑄢𑄬 𑄞𑄮𑄢𑄬𑄭 𑄗𑄱𑄰𑄠𑄬𑅁 𑄢𑄨𑄚𑄨𑄌 𑄉𑄮𑄘 𑄛𑄧𑄖𑄴𑄗𑄚𑄴 𑄣𑄬𑄟𑄴 𑄛𑄬𑄘𑄬 𑄛𑄬𑄘𑄬 𑄡𑄬𑄠𑄳𑄠𑄬 𑄆𑄇𑄴𑄇 𑄘𑄬𑄊, 𑄘𑄬𑄊 𑄉𑄧𑄢𑄨𑅁 𑄈𑄣𑄨𑄇𑄴 𑄚𑄇𑄴𑄧𑄝𑄨 𑄚𑄧 𑄘𑄬𑄊𑄠𑄴𑅁 𑄖𑄬–𑄃𑄮 𑄚𑄧 𑄛𑄧𑄢𑄬𑅁 𑄊𑄧𑄢𑄧𑄖𑄴 𑄆𑄭 𑄖 𑄉𑄪𑄙𑄨𑄖𑄴 𑄥𑄮𑄟𑄨 𑄌𑄨𑄙𑄨𑄠𑄚𑄴 𑄈𑄪𑄣𑄨 𑄛𑄧𑄢𑄨, 𑄇𑄱𑄰 𑄛𑄢𑄨𑄣𑄮, 𑄚𑄨𑄟𑄮𑄚𑄬 𑄉𑄧𑄟𑄬 𑄃𑄊𑄬𑅁 𑄛𑄧𑄢𑄣𑄬𑄊 𑄘𑄮𑄣𑄬 𑄉𑄧𑄢𑄬𑄢𑄴𑅁 𑄝𑄪𑄉𑄧𑄘𑄴 𑄌𑄨𑄘𑄨𑄠𑄚𑄴 𑄗𑄱𑄰 𑄚𑄇𑄴𑄧𑄝𑄨 𑄟𑄧𑄚𑄬 𑄟𑄧𑄚𑄬 𑄉𑄮𑄎𑄬𑄚𑄧𑄖𑄴𑄪𑄚𑄴 𑄝𑄧𑄢𑄴 𑄟𑄊𑄨 𑄘𑄨𑄣𑄧 𑄉𑄧𑄟𑄬 𑄗𑄬𑄭 𑄛𑄢𑄬 𑄛𑄢𑅁 𑄘𑄮𑄣𑄬𑄘𑄣𑄬𑄭 𑄛𑄧𑄢𑄳𑄦𑄣𑄬𑄊 𑄉𑄧𑄢𑄨 𑄃𑄧𑄚𑄢𑄴𑄥𑄴 𑄛𑄥𑄴 𑄉𑄧𑄢𑄨 𑄛𑄢𑄬 𑄛𑄢𑅁 𑄈𑄇𑄴𑄧𑄚𑄴 𑄌𑄮𑄈𑄴 𑄈𑄘𑄨 𑄗𑄬𑄣𑄧𑅁 𑄌𑄨𑄙𑄨𑄠𑄚𑄴 𑄝𑄱𑄰𑄠𑄮𑄖𑄴 𑄉𑄪𑄌𑄴𑄍𑄬 𑄗𑄱𑄰 𑄉𑄙𑄨𑄝𑄖𑄴𑄖𑄬𑄭 𑄇𑄪𑄠𑄮 𑄉𑄋𑄧𑄖𑄴 𑄉𑄬𑄣𑄧𑅁 𑄣𑄧𑄊𑄬 𑄅𑄇𑄴𑄮 𑄇𑄪𑄟𑄴 𑄚𑄨𑄣𑄧𑅁 𑄉𑄙𑄨 𑄉𑄙𑄠𑄴 𑄆𑄭 𑄞𑄖𑄴 𑄈𑄬𑄭 𑄊𑄧𑄢𑄴 𑄌𑄪𑄢𑄨–𑄛𑄪𑄏𑄨 𑄗𑄧𑄣𑄧𑅁

𑄆𑄇𑄴𑄘𑄨𑄚𑄴 𑄇𑄧𑄣𑄬𑄎𑄧 𑄝𑄢𑄚𑄴𑄘𑄖𑄴 𑄒𑄨𑄠𑄬 𑄃𑄊𑄬 𑄚𑄨𑄟𑄮𑄚𑄬𑅁 𑄃𑄘𑄬𑄇𑄴𑄬 𑄉𑄧𑄢𑄨 𑄎𑄧𑄉𑄧𑄖𑄴𑄟𑄧𑄠𑄴 𑄆𑄣𑄧 𑄚𑄨𑄟𑄮𑄚𑄧 𑄇𑄠𑄴𑅁 𑄎𑄧𑄉𑄧𑄖𑄴𑄟𑄧𑄠𑄧𑄢𑄬 𑄘𑄬𑄊𑄨 𑄃𑄢𑄧 𑄖 𑄥𑄧𑄟𑄌𑄳𑄠𑄉𑄪𑄚𑄬–𑄃𑄮 𑄆𑄣𑄇𑄴𑅁 𑄃𑄉𑄬 𑄇𑄧𑄠𑄬𑄇𑄴𑄝𑄢𑄴 𑄚𑄨𑄟𑄮𑄚𑄬 𑄒𑄢𑄬𑄭𑄠𑄬, 𑄇𑄧𑄣𑄬𑄎𑄧𑄖𑄴 𑄚𑄨𑄟𑄮𑄚𑄧𑄢𑄬 𑄘𑄬𑄊𑄨𑄣𑄬 𑄖𑄢 𑄟𑄙 𑄚𑄨𑄉𑄪𑄢𑄨 𑄛𑄎𑄢 𑄜𑄢𑄨 𑄗𑄚𑄴𑅁 𑄚𑄨𑄟𑄮𑄚𑄬–𑄃𑄮 𑄇𑄨𑄌𑄴𑄪 𑄚𑄧 𑄇𑄧𑄠𑄴𑅁 𑄖 𑄙𑄧𑄇𑄬 𑄖𑄬 𑄗𑄠𑄴𑅁 𑄎𑄧𑄉𑄧𑄖𑄴𑄟𑄧𑄠𑄴 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄇𑄬𑄎𑄚𑄴 𑄃𑄊𑄧𑄌𑄴 𑄚𑄨𑄟𑄮𑄚𑄴 𑄞𑄬𑄭𑅃

𑄎𑄧𑄉𑄧𑄖𑄴𑄟𑄧𑄠𑄴 𑄚𑄨𑄟𑄮𑄚𑄧𑄢𑄬 𑄟𑄘𑄬𑄣𑄧𑅁

𑄚𑄨𑄟𑄮𑄚𑄬 𑄇𑄧𑄣𑄧, 𑄉𑄧𑄟𑄴 𑄃𑄊𑄧𑄁𑅁 𑄖𑄪𑄟𑄨 𑄉𑄧𑄟𑄴 𑄃𑄊𑄧𑅃

𑄦𑄧𑄘𑄬𑄭𑅁

𑄇𑄣𑄌𑄨𑄇𑄴𑄮 𑄇𑄧𑄣𑄧, 𑄖𑄧𑄢𑄬 𑄘𑄧 𑄞𑄢𑄨 𑄇𑄧𑄣𑄬𑄎𑄧𑄖𑄴 𑄘𑄬𑄊𑄧𑄁𑅁 

𑄟𑄪𑄭 𑄘𑄨𑄚𑄴 𑄛𑄧𑄖𑄴𑄖𑄨 𑄆𑄏𑄧𑄁𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄡𑄬𑄭 𑄚 𑄚𑄨𑄟𑄮𑄚𑄴 𑄞𑄬𑄭, 𑄇𑄧𑄣𑄬𑄎𑄧 𑄌𑄣𑄧 𑄅𑄉𑄪𑄢𑄬𑅁

𑄃𑄭𑄠𑄬𑅃

𑄇𑄧𑄙 𑄃𑄊𑄬𑅁

𑄃 𑄄𑄠𑄮𑄖𑄴 𑄇𑄧 𑄚𑅁

𑄎𑄧𑄉𑄧𑄖𑄴𑄟𑄧𑄠𑄴 𑄥𑄧𑄟𑄌𑄳𑄠𑄉𑄪𑄚𑄬 𑄆𑄇𑄴 𑄣𑄧𑄊𑄬 𑄇𑄧𑄣𑄇𑄴, 𑄡𑄬𑄭 𑄚𑄨𑄟𑄮𑄚𑄴 𑄞𑄬𑄭𑅁 𑄖𑄧𑄣𑄴𑄣𑄭𑄮 𑄆𑄌𑄳𑄠 𑄘𑄮𑄣𑄴 𑄇𑄧𑄙 𑄃𑄊𑄬𑅁

𑄚𑄨𑄟𑄮𑄚𑄬 𑄞𑄝𑄬𑄢𑄴 𑄇𑄨𑄦𑄱𑄰 𑄛𑄢𑄬 𑄘𑄮𑄣𑄴 𑄇𑄧𑄙𑅁 𑄦𑄧𑄣𑄬 𑄃𑄢𑄧 𑄖𑄬𑄋 𑄟𑄉𑄨𑄝𑄬𑄇𑄴𑅁 𑄚𑄧 𑄦𑄧𑄣𑄬 𑄝𑄬𑄢 𑄡𑄬𑄝𑄖𑄴𑄖𑄬𑄭 𑄇𑄧𑄝𑄇𑄴𑅁 𑄘𑄨𑄚𑄴 𑄘𑄨𑄝𑄪𑄌𑄳𑄠 𑄟𑄢𑄨 𑄘𑄧 𑄛𑄖𑄴𑄖𑄇𑄴 𑄚𑄧𑄠𑄴𑅁 𑄟𑄧𑄢𑄬 𑄟𑄖𑄴𑄬, 𑄟𑄚𑄳𑄠𑄬 𑄌𑄬𑄭 𑄚𑄧 𑄗𑄬𑄝𑄇𑄴𑅁 𑄟𑄧𑄚𑄧𑄖𑄴 𑄥𑄦𑄧𑄥𑄴 𑄃𑄚𑄨 𑄇𑄧𑄣𑄧, 𑄡𑄬𑄝𑄧𑄁𑄉𑄬 𑄃𑄠𑄴𑅁

𑄡𑄘𑄬 𑄡𑄘𑄬 𑄛𑄪𑄏𑄮𑄢𑄴 𑄉𑄧𑄖𑄴𑄧𑄚𑄴, 𑄇𑄬𑄎𑄚𑄴 𑄃𑄊𑄧𑄌𑄴𑅁 𑄛𑄧𑄢𑄣𑄬𑄊 𑄇𑄬𑄎𑄚𑄴 𑄦𑄧𑄢𑄴𑅁 𑄆𑄝𑄧 𑄥𑄬 𑄊𑄧𑄢𑄚𑄧𑄖𑄴 𑄃𑄊𑄧𑄌𑄴 𑄚𑄇𑄨𑅃 𑄆𑄖𑄬 𑄆𑄇𑄴𑄇𑄚𑄴 𑄃𑄮𑄖𑄬 𑄆𑄇𑄴𑄇𑄚𑄴 𑄦𑄘𑄦𑄖𑄳𑄠 𑄛𑄪𑄏𑄮𑄢𑄴 𑄉𑄧𑄢 𑄙𑄧𑄣𑄳𑄠𑄇𑄴𑅁 𑄚𑄨𑄟𑄮𑄚𑄬 𑄎𑄮𑄛𑄴 𑄘𑄬𑅁 𑄖𑄢 𑄇𑄧𑄙 𑄇𑄧𑄙𑄬 𑄚𑄨𑄟𑄮𑄚𑄬 𑄒𑄢𑄬𑄭𑄠𑄬 𑄖𑄢 𑄇𑄧𑄙𑄚𑄨 𑄚𑄧𑄢𑄧𑄟𑄴𑅁 𑄣𑄧𑄇𑄴𑄈𑄩 𑄣𑄧𑄇𑄴𑄈𑄩 𑄟𑄧𑄚𑄧𑄞𑄝𑄴𑅁 𑄃𑄉𑄧 𑄙𑄧𑄇𑄳𑄠𑄚𑄴 𑄌𑄪𑄣𑄴 𑄣𑄟𑄴𑄝 𑄚𑄬𑄭𑅁 𑄃𑄙𑄪𑄜𑄘 𑄛𑄬𑄚𑄴 𑄚𑄧 𑄛𑄨𑄚𑄧𑄚𑄴𑅁 𑄇𑄧𑄣𑄬𑄎𑄧 𑄌𑄣𑄧𑄖𑄴 𑄅𑄙𑄨 𑄅𑄇𑄴𑄮 𑄉𑄏𑄧𑄙𑄬𑄣 𑄍𑄝𑄖𑄴 𑄒𑄨𑄠𑄬𑄣𑄇𑄴𑅁 𑄚𑄨𑄟𑄮𑄚𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧, 𑄇𑄨 𑄇𑄧𑄙𑄖𑄴𑄖𑄬𑄭 𑄓𑄉𑄨 𑄃𑄚𑄨𑄣𑅁 𑄇𑄧 𑄚𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄇𑄧𑄣𑄬–𑄃𑄮 𑄣𑄎𑄴 𑄉𑄧𑄢𑄬 𑄞𑄬𑄭𑅁

𑄄𑄠𑄬𑄚𑄴 𑄇𑄱𑄰 𑄖𑄬 𑄟𑄙 𑄚𑄨𑄉𑄪𑄢𑄨𑄣𑄧𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄃𑄮𑄘𑄨𑄚𑄳𑄠 𑄄𑄠𑄬𑄚𑄧𑄖𑄴𑄖𑄬𑄭 𑄃𑄟𑄨 𑄝𑄬𑄇𑄴𑄪𑄚𑄬 𑄖𑄧𑄢𑄬 𑄘𑄬𑄣𑄬 𑄣𑄎𑄬𑄭𑅁

𑄎𑄪𑄢𑄧𑄍𑄧𑄢𑄨 𑄇𑄪𑄣𑄳𑄠𑄝𑄮 𑄇𑄧𑄣𑄧, 𑄥𑄬𑄘𑄨𑄚𑄳𑄠 𑄃𑄟𑄢𑄴 𑄥𑄨𑄠𑄬𑄚𑄴 𑄉𑄧𑄢𑄚 𑄒𑄨𑄇𑄴 𑄚𑄧 𑄆𑄣𑄧𑅁

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄝𑄮 𑄇𑄧𑄣𑄧 𑄚𑄨𑄟𑄮𑄚𑄴 𑄞𑄬𑄭, 𑄖𑄪𑄭 𑄃𑄟𑄢𑄬 𑄈𑄬𑄟 𑄉𑄧𑄢𑄨 𑄘𑄬𑅁

𑄛𑄚𑄴𑄍𑄧𑄢𑄨 𑄇𑄪𑄣𑄳𑄠𑄝𑄮 𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄝𑄮 𑄣𑄧𑄊𑄬 𑄣𑄧𑄊𑄬 𑄇𑄧𑄣𑄧, 𑄚𑄨𑄟𑄮𑄚𑄴 𑄞𑄬𑄭, 𑄖𑄪𑄭 𑄈𑄬𑄟 𑄉𑄧𑄢𑄨 𑄚𑄧 𑄘𑄨𑄣𑄬 𑄃𑄟𑄢𑄴 𑄎𑄧𑄚𑄧𑄟𑄚𑄴 𑄟𑄧𑄚𑄧𑄖𑄴 𑄘𑄪𑄈𑄴 𑄗𑄬𑄝𑄧𑅁 

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄦𑄧𑄠𑄴 𑄞𑄬𑄭𑅁 𑄡𑄪𑄚𑄨 𑄝𑄨𑄥𑄬𑄴𑄥𑄴 𑄉𑄧𑄢𑄧𑄌𑄴, 𑄥𑄨𑄠𑄬𑄚𑄨 𑄃𑄟𑄨 𑄚𑄧 𑄉𑄧𑄢𑄨 𑄃𑄢𑄴𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄚𑄧 𑄝𑄪𑄏𑄨𑄣𑄬 𑄇𑄨𑄌𑄴𑄪 𑄚𑄧𑄠𑄴𑅁 𑄥𑄬𑄇𑄴𑄬 𑄃𑄟𑄨 𑄚𑄧 𑄝𑄪𑄏𑄨𑅁 𑄝𑄚𑄳𑄦 𑄝𑄪𑄌𑄴𑄍𑄬 𑄖𑄬𑄋𑅁 𑄖𑄬𑄋𑄖𑄴𑄖𑄬𑄭 𑄚𑄧 𑄉𑄧𑄢𑄨 𑄛𑄢 𑄇𑄨𑄌𑄴𑄪 𑄚𑄬𑄭𑅁 𑄌𑄪𑄢𑄴 𑄉𑄧𑄌𑄴𑄍𑄬𑅁 𑄑𑄬𑄇𑄴𑄥𑄩 𑄓𑄳𑄢𑄭𑄞𑄢𑄴 𑄟𑄌𑄴𑄍𑄬𑅁 𑄃𑄟𑄢𑄴 𑄑𑄢𑄴𑄉𑄬𑄑𑄴 𑄆𑄣𑄧 𑄃𑄘𑄟𑄧𑄖𑄴𑄪𑄚𑄴 𑄡𑄨𑄉𑄪𑄚𑄴 𑄚𑄪𑄠𑄮 𑄚𑄪𑄠𑄮 𑄢𑄋𑄟𑄖𑄳𑄠𑄖𑄴 𑄆𑄏𑄧𑄚𑄴 𑄖𑄢𑄢𑄬𑅁 𑄡𑄨𑄉𑄪𑄚𑄴 𑄑𑄢𑄴𑄉𑄬𑄑𑄴 𑄘𑄨𑄠𑄬𑄭 𑄥𑄨𑄉𑄪𑄚𑄴 𑄥𑄧𑄣𑄬–𑄝𑄧𑄣𑄬 𑄃𑄟 𑄏𑄉𑄧𑄖𑄴 𑄃𑄚𑄳𑄠𑄬𑅁 𑄖𑄢𑄢𑄬 𑄍𑄢–𑄚𑄘 𑄉𑄧𑄢𑄨 𑄄𑄢𑄨 𑄘𑄨𑄠𑄬𑄭𑅁 𑄇𑄨𑄠𑄬 𑄣𑄬𑄊𑄛𑄧𑄢𑄳𑄦 𑄦𑄬𑄝 𑄘𑄨 𑄊𑄧𑄢𑄧𑄖𑄴 𑄡𑄨𑄠𑄧𑄚𑄴𑅁 𑄇𑄨𑄠𑄬 𑄇𑄨𑄠𑄬 𑄎𑄧𑄚𑄧𑄟𑄧𑄖𑄴𑄖𑄬𑄭 𑄢𑄪𑄇𑄴𑄬𑄦𑄱𑄰𑄠𑄧𑄚𑄴𑅁 𑄝𑄚𑄳𑄦 𑄖𑄧𑄢𑄬 𑄚𑄧 𑄛𑄢𑄨 𑄘𑄬𑄭𑅁 

𑄚𑄨𑄟𑄮𑄚𑄬 𑄇𑄨𑄌𑄴𑄪 𑄚𑄧 𑄇𑄱𑄰 𑄝𑄚𑄳𑄦 𑄇𑄧𑄙𑄚𑄨 𑄥𑄪𑄚𑄨 𑄃𑄊𑄬𑅁 𑄞𑄝𑄬𑄢𑄴 𑄎𑄧𑄘𑄬𑄝𑄧𑄘𑄬 𑄉𑄧𑄟𑄴 𑄦𑄧𑄣𑄇𑄴𑄬 𑄚𑄇𑄨𑅁

𑄇𑄣 𑄌𑄨𑄇𑄴𑄮 𑄇𑄧𑄙𑄬 𑄇𑄧𑄙𑄬 𑄎𑄧𑄉𑄧𑄖𑄴𑄟𑄧𑄠𑄴 𑄚𑄨𑄟𑄮𑄚𑄧 𑄦𑄘𑄧𑄖𑄴 𑄙𑄧𑄢𑄨 𑄇𑄧𑄢𑄴 𑄞𑄬𑄭, 𑄖𑄪𑄭 𑄟𑄧𑄢𑄬 𑄈𑄬𑄟 𑄉𑄧𑄢𑄨 𑄘𑄬𑅁 𑄥𑄬𑄘𑄨𑄚𑄳𑄠 𑄚𑄱𑄰𑄠𑄬 𑄚𑄱𑄰𑄠𑄬 𑄟𑄨𑄏𑄬 𑄇𑄧𑄙 𑄇𑄮𑄠𑄮𑄁𑅁

𑄆𑄭 𑄆𑄭𑅁 𑄄𑄠𑄬𑄚𑄴 𑄇𑄨 𑄉𑄧𑄢𑄧𑄖𑄴𑄬! 

𑄇𑄧 𑄥𑄣𑄬𑄚𑄴, 𑄖𑄪𑄭 𑄟𑄧𑄢𑄬 𑄈𑄬𑄟 𑄉𑄧𑄢𑄨 𑄘𑄮𑄌𑄴𑅁

𑄝𑄬𑄇𑄴𑄪𑄚𑄬 𑄚𑄨𑄟𑄮𑄚𑄧 𑄦𑄘𑄧𑄖𑄴 𑄙𑄧𑄢𑄨 𑄇𑄧𑄣𑄇𑄴, 𑄦𑄧𑄠𑄴 𑄞𑄬𑄭 𑄈𑄬𑄟 𑄉𑄧𑄢𑄨 𑄘𑄨𑄣𑄬 𑄘𑄬𑅃

𑄦𑄱𑄰𑄠𑄬𑄦𑄱𑄰𑄠𑄬 𑄈𑄬𑄟 𑄉𑄧𑄢𑄨 𑄘𑄨𑄣𑄪𑄁𑅁 𑄄𑄇𑄴𑄬 𑄈𑄪𑄎𑄨𑅃

𑄝𑄬𑄇𑄴𑄪𑄚𑄬 𑄦𑄎𑄨𑄣𑄬𑄇𑄴𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄃𑄟𑄨–𑄃𑄮 𑄉𑄧𑄟𑄴 𑄆𑄣𑄧𑄁𑅁 𑄝𑄧𑄎𑄧𑄁 𑄥𑄧𑄟𑄌𑄳𑄠 𑄛𑄉𑄧𑄘𑄴 𑄛𑄧𑄢𑄨 𑄥𑄬𑄠𑄬𑄚𑄳𑄠𑄦𑄱𑄰𑄠𑄬𑅁 𑄄𑄇𑄴𑄬 𑄃𑄟𑄨 𑄝𑄬𑄇𑄴𑄇𑄚𑄨 𑄝𑄪𑄌𑄴𑄍𑄬𑅁 𑄝𑄧𑄎𑄧𑄋𑄚𑄨 𑄝𑄬𑄇𑄴𑄇𑄚𑄨 𑄄𑄢𑄨 𑄘𑄨𑄠𑄬𑄭𑅁

𑄇𑄣 𑄌𑄨𑄇𑄴𑄮 𑄇𑄧𑄣𑄧, 𑄉𑄧𑄟𑄴 𑄟𑄚𑄴𑄎𑄳𑄠𑄧 𑄣𑄧𑄊𑄬 𑄝𑄬𑄢𑄬𑄣𑄬 𑄛𑄘𑄨𑄇𑄪𑄚𑄴𑄮 𑄝𑄘 𑄛𑄠𑄴, 𑄃𑄧𑄟𑄚𑄴𑄎𑄳𑄠𑄧 𑄣𑄧𑄊𑄬 𑄝𑄬𑄢𑄬𑄣𑄬 𑄣𑄙𑄨𑄝𑄮 𑄞𑄉𑄧𑄘𑄴 𑄛𑄠𑄴𑅁 𑄎𑄩𑄝𑄧𑄚𑄧𑄖𑄴 𑄃𑄢𑄴 𑄇𑄧𑄚𑄧𑄘𑄨𑄚𑄴 𑄆𑄥𑄚𑄳𑄠 𑄚𑄧 𑄦𑄧𑄝𑄧𑅁

𑄚𑄨𑄟𑄮𑄚𑄬 𑄇𑄧𑄣𑄧, 𑄖𑄪𑄟𑄨 𑄝𑄪𑄏𑄨 𑄛𑄌𑄴𑄍𑄮, 𑄄𑄠𑄬𑄚𑄴𑄘𑄱𑄰𑄟𑄪𑄭 𑄈𑄪𑄎𑄨𑅁 𑄄𑄠𑄮𑄖𑄴 𑄟𑄧𑄢𑄴 𑄈𑄬𑄟𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄛𑄛𑄴 𑄉𑄧𑄌𑄴𑄍𑄬 𑄡𑄧𑄇𑄴𑄬, 𑄃𑄟𑄖𑄴𑄪𑄚𑄴 𑄞𑄪𑄎𑄮 𑄛𑄧𑄢𑄨𑄝𑄮𑅁 𑄆𑄭 𑄥𑄬𑄚𑄧𑄖𑄴𑄖𑄬𑄭 𑄖𑄧𑄢𑄬 𑄓𑄉𑄨 𑄃𑄚𑄳𑄠𑄬𑄘𑄬𑅁

𑄓𑄉𑄨 𑄃𑄚𑄨 𑄃 𑄆𑄙𑄧𑄇𑄴𑄇𑄚𑄨 𑄇𑄧𑄙 𑄇𑄪𑄠𑄮 𑄛𑄧𑄢𑄬 𑄚𑄬𑅃

𑄟𑄳𑄦𑄣𑄴𑄍𑄧𑄢𑄨 𑄇𑄪𑄣𑄳𑄠𑄬𑄝𑄮 𑄇𑄧𑄣𑄧, 𑄚𑄧 𑄇𑄧𑄣𑄬 𑄘𑄧 𑄃𑄟𑄢𑄴 𑄟𑄧𑄚𑄚𑄨 𑄉𑄮𑄢𑄴 𑄉𑄮𑄢𑄴 𑄗𑄬𑄝𑄧𑅁

𑄚𑄨𑄟𑄮𑄚𑄬 𑄇𑄧𑄣𑄧,𑄦𑄱𑄰𑄠𑄬 𑄥𑄣𑄬𑄚𑄴, 𑄃𑄟𑄨 𑄆𑄌𑄳𑄠 𑄥𑄧𑄟𑄧𑄇𑄴 𑄈𑄬𑄭 𑄦𑄬𑄢𑄮𑄄𑄚𑄴, 𑄟𑄧𑄘𑄴, 𑄉𑄎 𑄚𑄧 𑄈𑄬𑄝𑄧𑄁𑅁 𑄃𑄧𑄊𑄘𑄬–𑄃𑄧𑄛𑄧𑄘𑄬 𑄚𑄧 𑄡𑄬𑄝𑄧𑄁 𑄃𑄟𑄨𑅁 𑄟𑄚𑄴𑄎𑄳𑄠𑄧𑄢𑄬–𑄃𑄮 𑄚𑄧 𑄚𑄨𑄝𑄧𑄁𑅁

𑄚𑄨𑄟𑄮𑄚𑄬 𑄖𑄢𑄢𑄬 𑄥𑄧𑄟𑄧𑄇𑄴 𑄈𑄝𑄬𑄣𑄧𑅁

𑄎𑄧𑄉𑄧𑄖𑄴𑄟𑄧𑄠𑄴 𑄇𑄧𑄣𑄧, 𑄆𑄌𑄳𑄠𑄖𑄴𑄪𑄚𑄴 𑄙𑄧𑄢𑄨 𑄃𑄟𑄨 𑄝𑄬𑄢𑄚𑄴–𑄌𑄬𑄢𑄚𑄴 𑄉𑄧𑄢𑄨 𑄗𑄬𑄝𑄧𑄁𑅁 𑄃𑄛𑄧𑄘𑄬–𑄝𑄨𑄛𑄧𑄘𑄬 𑄌–𑄌𑄨 𑄉𑄧𑄢𑄨𑄝𑄧𑄁𑅁 𑄆𑄇𑄴𑄎𑄧𑄚𑄬 𑄘𑄪𑄊𑄧𑄖𑄴 𑄛𑄧𑄣𑄬 𑄝𑄬𑄇𑄴𑄪𑄚𑄬 𑄅𑄎𑄬𑄭 𑄡𑄬𑄝𑄧𑄁𑅁 𑄄𑄙𑄪 𑄃𑄟 𑄟–𑄝𑄛𑄴 𑄚𑄬𑄭𑅁 𑄞𑄬𑄭–𑄝𑄮𑄚𑄴 𑄚𑄬𑄭𑅁 𑄃𑄟𑄨𑄄 𑄃𑄟𑄢𑄴 𑄟–𑄝𑄛𑄴, 𑄞𑄬𑄭–𑄝𑄮𑄚𑄴𑅁

𑄇𑄧𑄙 𑄇𑄱𑄰 𑄜𑄪𑄢𑄬𑄭 𑄜𑄢𑄠𑄴 𑄈𑄪𑄎𑄨–𑄢𑄎𑄨𑄠𑄬 𑄌𑄣𑄧𑄖𑄴𑄪𑄚𑄴 𑄣𑄟𑄨 𑄆𑄖𑄴𑄧𑄚𑄴𑅁 𑄝𑄬𑄇𑄴𑄪𑄚𑄧 𑄟𑄪𑄠𑄮𑄘𑄴 𑄦𑄎𑄨–𑄢𑄪𑄎𑄨𑅁 𑄥𑄬𑄘𑄨𑄚𑄳𑄠𑄖𑄴𑄪𑄚𑄴 𑄙𑄧𑄢𑄨 𑄇𑄧𑄣𑄬𑄎𑄧𑄖𑄴 𑄛𑄧𑄙𑄧𑄖𑄴 𑄣𑄊𑄧𑄖𑄴 𑄛–𑄛𑄨 𑄦𑄧𑄣𑄬 𑄟𑄘–𑄝𑄪𑄣𑄮 𑄉𑄧𑄢𑄧𑄚𑄴𑅁 𑄝𑄬𑄢𑄚𑄴–𑄌𑄬𑄢𑄚𑄴 𑄉𑄧𑄢𑄨 𑄗𑄚𑄴𑅁 𑄝𑄨𑄛𑄧𑄘𑄧𑄖𑄴 𑄛𑄧𑄣𑄬 𑄌–𑄌𑄨 𑄉𑄧𑄢𑄧𑄚𑄴𑅁 𑄖𑄬𑄋 𑄛𑄧𑄠𑄴𑄎𑄬 𑄚𑄧 𑄗𑄬𑄣𑄬 𑄅𑄙𑄮𑄢𑄴 𑄘𑄳𑄠–𑄘𑄨 𑄉𑄧𑄢𑄧𑄚𑄴𑅁 𑄆𑄝𑄴𑄬𑄢𑄬 𑄎𑄧𑄚𑄧𑄟𑄴 𑄇𑄣𑄧𑄢𑄴 𑄥𑄧𑄟𑄌𑄳𑄠𑅁 𑄘𑄮𑄣𑄬–𑄘𑄣𑄬𑄭 𑄇𑄧𑄣𑄬𑄎𑄴 𑄉𑄧𑄖𑄴𑄧𑄚𑄴𑅁 𑄛𑄧𑄢𑄳𑄦𑄣𑄬𑄊 𑄉𑄧𑄖𑄴𑄧𑄚𑄴𑅁 𑄆𑄥𑄚𑄳𑄠 𑄉𑄧𑄢𑄨 𑄘𑄨𑄚𑄪𑄚𑄴 𑄉𑄧𑄋𑄨 𑄡𑄢𑄴𑅁

𑄆𑄉𑄢𑄧

𑄇𑄧𑄣𑄬𑄎𑄧𑄖𑄴𑄪𑄚𑄴 𑄅𑄇𑄴𑄮 𑄟𑄬𑄉𑄎𑄨𑄚𑄴 𑄜𑄧𑄉𑄧𑄘𑄁 𑄉𑄧𑄢𑄨𑄝𑄬𑄇𑄴𑅁 𑄇𑄖𑄴𑄪𑄚𑄴 𑄇𑄖𑄴𑄪𑄚𑄴 𑄣𑄬𑄊 𑄘𑄨𑄝𑄬𑄢𑄴 𑄦𑄃𑄮𑄌𑄴 𑄃𑄊𑄬, 𑄘𑄨𑄝𑄬𑄖𑄴𑄖𑄬𑄭 𑄇𑄪𑄎𑄮𑄣𑄨 𑄉𑄧𑄌𑄳𑄠𑄧𑄚𑄴𑅁 𑄆𑄭 𑄥𑄨𑄠𑄬𑄚𑄴 𑄘𑄬𑄊𑄨 𑄇𑄧𑄣𑄬𑄎𑄧𑄖𑄴𑄪𑄚𑄴 𑄆𑄭 𑄇𑄳𑄣𑄥𑄧 𑄛𑄧𑄢 𑄚𑄧 𑄛𑄧𑄢𑄨 𑄇𑄧𑄝𑄨𑄖𑄬 𑄣𑄬𑄊 𑄙𑄧𑄣𑄳𑄠𑄧 𑄚𑄨𑄟𑄮𑄚𑄬𑅁 𑄃𑄘𑄟𑄧𑄖𑄴 𑄇𑄨 𑄇𑄨 𑄘𑄬𑄊𑄬, 𑄇𑄨 𑄇𑄨 𑄃𑄊𑄬𑅁 𑄖 𑄌𑄮𑄊𑄬 𑄃𑄘𑄟𑄴 𑄇𑄧𑄖𑄴𑄧𑄟𑄚𑄴 𑄘𑄮𑄣𑄴, 𑄣𑄬𑄊𑄨𑄣𑄮𑅁 𑄇𑄧𑄝𑄨𑄘𑄬𑄝𑄮 𑄣𑄬𑄊𑄨 𑄊𑄪𑄟𑄮𑄖𑄴 𑄛𑄧𑄣𑄧𑅁 𑄛𑄮𑄖𑄳𑄠 𑄃𑄟𑄧𑄣𑄳𑄠 𑄆𑄇𑄴𑄇𑄚𑄴 𑄝𑄨𑄢𑄪𑄇𑄴–𑄝𑄢𑄇𑄴 𑄥𑄧𑄝𑄧𑄚𑄴 𑄘𑄬𑄣𑄧 𑄚𑄇𑄴𑄧𑄝𑄨𑄢𑄬 𑄚𑄨𑄚𑄬𑅁 𑄝𑄬𑄚𑄳𑄠 𑄛𑄧𑄦𑄴𑄢𑄴𑄦𑄱𑄰 𑄘𑄨𑄝𑄬 𑄞𑄖𑄴 𑄈𑄬𑄭 𑄇𑄧𑄚𑄧 𑄇𑄨𑄌𑄴𑄪 𑄒𑄨𑄇𑄴 𑄚𑄧 𑄉𑄧𑄢𑄨 𑄊𑄧𑄢𑄧𑄖𑄴 𑄆𑄏 𑄙𑄧𑄣𑄳𑄠𑄧𑅁 𑄝𑄮𑄘𑄮𑄖𑄴 𑄅𑄙𑄨𑄣𑄮𑄉𑄨𑅁 𑄚𑄨𑄟𑄮𑄚𑄬 𑄊𑄧𑄢𑄧𑄖𑄴 𑄣𑄪𑄁𑄉𑄬𑄉𑄨 𑄝𑄬𑄣𑄴 𑄡𑄘𑄬 𑄡𑄘𑄬𑅁 𑄝𑄨𑄢𑄧𑄖𑄧𑄦𑄩𑄚𑄴 𑄝𑄮𑄑𑄴𑄑𑄚𑄴 𑄖𑄇𑄴 𑄚𑄧 𑄛𑄠𑄴, 𑄝𑄬𑄚𑄳𑄠 𑄞𑄖𑄴 𑄈𑄘𑄬 𑄃 𑄎𑄠𑄴𑄎𑄪𑄇𑄴𑄮𑄣𑄴 𑄦𑄧𑄘𑄬𑅁 𑄆𑄚𑄬 𑄎𑄬𑄢𑄴 𑄛𑄧𑄌𑄳𑄠, 𑄆𑄚𑄬 𑄎𑄬𑄢𑄴 𑄛𑄧𑄌𑄳𑄠, 𑄘𑄧𑄌𑄴𑄑 𑄝𑄮𑄘𑄬 𑄖𑄬 𑄆𑄌𑄳𑄠𑅁 𑄚𑄨𑄟𑄮𑄚𑄬 𑄡𑄧𑄇𑄴𑄬 𑄆𑄏𑄬𑄢𑄴 𑄥𑄧𑄇𑄴𑄬 𑄖 𑄟𑄠𑄴 𑄉𑄪𑄢𑄪𑄉𑄪𑄚𑄴 𑄝𑄚𑄬𑄢𑄴𑅁 𑄚𑄨𑄟𑄮𑄚𑄧 𑄝𑄮𑄚𑄴𑄮 𑄞𑄖𑄴 𑄢𑄚𑄨𑄝𑄖𑄴𑄖𑄬𑄭 𑄄𑄎𑄮𑄢𑄧𑄖𑄴 𑄝𑄧𑄏𑄨 𑄖𑄮𑄚𑄴 𑄇𑄪𑄘𑄬𑄢𑄴𑅁 𑄙𑄢𑄮𑄎𑄬 𑄄𑄥𑄴𑄇𑄪𑄣𑄧𑄖𑄴𑄪𑄚𑄴 𑄚𑄧 𑄆𑄏𑄬𑅁 𑄖 𑄌𑄨𑄉𑄮𑄚𑄴 𑄝𑄮𑄚𑄴𑄮 𑄖 𑄥𑄧𑄟𑄌𑄳𑄠 𑄅𑄇𑄴𑄮𑄣𑄱𑄰 𑄌𑄢 𑄈𑄢 𑄦𑄧𑄢𑄴𑅁 𑄈𑄢 𑄦𑄧𑄘𑄬 𑄦𑄧𑄘𑄬 𑄚𑄨𑄟𑄮𑄚𑄧𑄢𑄬 𑄘𑄬𑄊𑄨 𑄘𑄘 𑄆𑄏𑄬𑄢𑄴 𑄇𑄱𑄰 𑄆𑄇𑄴𑄇 𑄦𑄌𑄴𑄍𑄬𑅁 𑄚𑄨𑄟𑄮𑄚𑄬 𑄊𑄧𑄢𑄧𑄖𑄴 𑄆𑄣𑄬 𑄖𑄢𑄴 𑄇𑄬𑄠𑄳𑄠𑄬 𑄉𑄮𑄢𑄴 𑄦𑄧𑄠𑄴𑅁 𑄚𑄨𑄟𑄮𑄚𑄬 𑄃𑄧𑄁𑄇𑄧, 𑄄𑄁𑄢𑄬𑄎𑄨 𑄛𑄧𑄢𑄳𑄦 𑄙𑄧𑄢𑄬 𑄇𑄨𑄚𑄬𑄖𑄴𑄖𑄬𑄭𑅁 𑄚𑄨𑄟𑄮𑄚𑄧 𑄝𑄛𑄴𑄮 𑄆𑄝𑄧 𑄇𑄟𑄧𑄖𑄴𑄪𑄚𑄴 𑄚𑄧 𑄆𑄏𑄬𑄉𑄱𑄰𑅁 𑄙𑄚𑄴 𑄛𑄉𑄚𑄠𑄴 𑄝𑄬𑄣𑄴 𑄦𑄣𑄠𑄴, 𑄇𑄟𑄧𑄖𑄴𑄪𑄚𑄴 𑄅𑄙𑄬𑄉𑄨𑄘𑄬𑅁 𑄃 𑄝𑄬𑄣𑄳𑄠–𑄃𑄮 𑄢𑄬𑄖𑄴 𑄦𑄧𑄠𑄴 𑄇𑄟𑄧𑄖𑄴𑄪𑄚𑄴 𑄆𑄏𑄬𑄘𑄬𑅁 𑄇𑄟𑄧𑄖𑄴𑄪𑄚𑄴 𑄆𑄝𑄧–𑄃𑄮 𑄘𑄨𑄝𑄬 𑄞𑄖𑄴 𑄈𑄬𑄭 𑄙𑄪𑄚𑄴𑄘𑄧 𑄆𑄇𑄴 𑄌𑄪𑄣𑄪𑄟𑄴 𑄈𑄬𑄭 𑄊𑄪𑄟𑄮𑄖𑄴 𑄛𑄧𑄢𑄬𑅁 𑄉𑄮𑄘 𑄘𑄨𑄚𑄴𑄮 𑄢𑄮𑄘𑄮𑄖𑄴 𑄇𑄟𑄴 𑄉𑄧𑄢𑄚𑅁 𑄊𑄪𑄟𑄴 𑄉𑄬𑄣𑄬 𑄟𑄬𑄣𑄮𑄟𑄌𑄴 𑄦𑄧𑄠𑄴𑅁 𑄄𑄋𑄨𑄣𑄳𑄠 𑄚𑄨𑄟𑄮𑄚𑄧 𑄝𑄝𑄬 𑄆𑄇𑄴𑄇 𑄇𑄪𑄖𑄴𑄮𑄢𑄨𑄦𑄱𑄰𑄠𑄬𑅁 𑄇𑄟𑄬 𑄚𑄧 𑄎𑄨𑄚𑄨𑄣𑄬 𑄇𑄟𑄳𑄠𑄧 𑄟𑄚𑄪𑄌𑄴𑄪𑄚𑄬 𑄆𑄥𑄚𑄳𑄠 𑄦𑄧𑄚𑄴𑅁 𑄚𑄨𑄟𑄮𑄚𑄬 𑄊𑄧𑄢𑄧𑄖𑄴 𑄆𑄏𑄬𑄖𑄴𑄬 𑄘𑄬𑄊𑄨 𑄚𑄨𑄟𑄮𑄚𑄧 𑄝𑄧𑄢𑄴 𑄝𑄮𑄚𑄴𑄮 𑄖 𑄟𑄢𑄬 𑄓𑄉𑄨 𑄇𑄧𑄣𑄧, 𑄟, 𑄟, 𑄚𑄨𑄟𑄮𑄚𑄬 𑄆𑄏𑄬𑄢𑄴𑅁 𑄚𑄨𑄟𑄮𑄚𑄧–𑄟 𑄉𑄪𑄢𑄪 𑄝𑄚𑄴𑄘𑄬 𑄝𑄚𑄴𑄘𑄬 𑄟𑄙 𑄖𑄪𑄣𑄨 𑄌𑄠𑄴𑄘𑄬, 𑄦𑄧𑄠𑄴𑄘𑄬 𑄆𑄚 𑄚𑄨𑄟𑄮𑄚𑄬 𑄆𑄌𑄳𑄠𑅁 𑄊𑄧𑄢𑄧𑄖𑄴 𑄛𑄮–𑄏𑄨 𑄆𑄣𑄬 𑄟𑄉𑄪𑄚𑄬 𑄆𑄚𑄬–𑄃𑄮 𑄈𑄪𑄎𑄨 𑄦𑄧𑄚𑄴𑅁 𑄚𑄨𑄟𑄮𑄚𑄧–𑄟–𑄃𑄮 𑄈𑄪𑄎𑄨 𑄦𑄧𑄣𑄧𑅁 𑄇𑄨𑄖𑄴𑄖𑄬𑄭 𑄆𑄏𑄬𑄢𑄴, 𑄇𑄨𑄦𑄱𑄰𑄠𑄬 𑄛𑄪𑄏𑄮𑄢𑄴 𑄉𑄧𑄢𑄨𑄝𑄬𑄢𑄴 𑄦𑄃𑄮𑄌𑄴 𑄚𑄬𑄭𑅁 𑄚𑄨𑄟𑄮𑄚𑄬 𑄆𑄌𑄳𑄠 𑄘𑄬𑄊𑄨 𑄉𑄪𑄢𑄪 𑄍𑄧𑄝𑄮 𑄝𑄚𑄨 𑄘𑄨𑄣𑄧𑅁 𑄉𑄪𑄢𑄪𑄉𑄪𑄚𑄴 𑄝𑄚𑄨–𑄝𑄚𑄠𑄴 𑄦𑄖𑄴–𑄒𑄬𑄁 𑄙𑄱𑄰 𑄊𑄧𑄢𑄧 𑄞𑄨𑄘𑄨𑄢𑄬 𑄥𑄮𑄟𑄨 𑄚𑄨𑄟𑄮𑄚𑄧–𑄟 𑄖 𑄏𑄨𑄝𑄮𑄢𑄬 𑄇𑄧𑄣𑄧, 𑄞𑄖𑄴 𑄢𑄚𑄴, 𑄞𑄖𑄴 𑄢𑄚𑄴𑅁 𑄚𑄨𑄟𑄮𑄖𑄴𑄪𑄚𑄴 𑄛𑄬𑄖𑄴 𑄛𑄪𑄢𑄬𑄢𑄴 𑄦𑄧𑄝𑄧𑅁 𑄛𑄨𑄖𑄴𑄗𑄨𑄟𑄨𑄖𑄴 𑄝𑄬𑄇𑄴 𑄟𑄉𑄪𑄚𑄬 𑄇𑄧𑄚𑄴 𑄛𑄢 𑄚𑄨𑄟𑄮𑄚𑄧–𑄟–𑄃𑄮 𑄇𑄧𑄣𑄧𑅁 𑄚𑄨𑄟𑄮𑄚𑄧𑄢𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄚𑄨𑄟𑄮𑄚𑄴, 𑄃 𑄇𑄪𑄙𑄪 𑄞𑄖𑄴 𑄈𑄬𑄃𑄮𑄌𑄴𑅃 

𑄚𑄨𑄟𑄮𑄚𑄬 𑄝𑄬𑄇𑄴𑄮 𑄗𑄱𑄰 𑄇𑄧𑄣𑄧, 𑄇𑄪𑄙𑄪 𑄈𑄬𑄘𑄪𑄁! 𑄝𑄚𑄳𑄦 𑄝𑄚𑄳𑄦 𑄝𑄬𑄚𑄳𑄠 𑄈𑄬𑄠𑄧𑄁𑄉𑄬𑅁

𑄟𑄬𑄃𑄮𑄚𑄨 𑄘𑄮𑄢𑄴 𑄝𑄎𑄢𑄧𑄖𑄴 𑄃𑄭𑄠𑄬 𑄚𑄧 𑄈𑄌𑄴𑅁

𑄚𑄨𑄟𑄮𑄚𑄧 𑄝𑄧𑄢𑄴 𑄝𑄮𑄚𑄴𑄮 𑄇𑄧𑄣𑄧, 𑄖𑄬𑄋 𑄚𑄬𑄭 𑄦𑄧𑄝𑄧 𑄃𑄠𑄴𑅁

𑄚𑄨𑄟𑄮𑄚𑄧–𑄟 𑄃 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄦𑄧𑄠𑄴 𑄝𑄪𑄏𑄧𑄁 𑄖𑄬𑄋 𑄚𑄬𑄭 𑄘𑄬𑅃

𑄖𑄬𑄋 𑄆𑄣𑄇𑄴 𑄟𑅁

𑄃𑄭𑄠𑄬 𑄚𑄧 𑄈𑄌𑄴𑅃

𑄝𑄋𑄣𑄧 𑄞𑄖𑄴–𑄖𑄮𑄚𑄚𑄨 𑄝𑄚𑄳𑄦 𑄇𑄎𑄧𑄢𑄴𑅁

𑄝𑄬𑄇𑄴 𑄟𑄚𑄳𑄠𑄬 𑄈𑄘𑄧𑄚𑄴𑅁

𑄝𑄬𑄇𑄴 𑄟𑄚𑄳𑄠𑄬 𑄈𑄚𑄴 𑄞𑄨𑄣𑄨 𑄟𑄪𑄭–𑄃𑄮 𑄈𑄬𑄟𑄴, 𑄥𑄨𑄠𑄬𑄚𑄴 𑄘𑄧 𑄚𑄧𑄠𑄴𑅁

𑄛𑄧𑄢𑄚𑄴 𑄝𑄎𑄬𑄝𑄖𑄴𑄖𑄬𑄭 𑄆𑄇𑄴𑄇–𑄅𑄇𑄴𑄮 𑄈𑄬𑄭 𑄛𑄠𑄴𑅁 𑄆𑄚𑄬–𑄃𑄮 𑄝𑄧𑄢𑄴𑄟 𑄛𑄉𑄧𑄖𑄴 𑄇𑄨𑄌𑄴𑄪 𑄚𑄧 𑄦𑄧𑄠𑄴𑅁

𑄝𑄬𑄣𑄳𑄠 𑄝𑄬𑄣𑄴 𑄚𑄧 𑄓𑄪𑄛𑄳𑄠𑄬 𑄚𑄨𑄟𑄮𑄚𑄧–𑄝𑄝𑄬 𑄇𑄟𑄧𑄖𑄴𑄪𑄚𑄴 𑄆𑄌𑄳𑄠𑄉𑄱𑄰𑅁 𑄇𑄧𑄚𑄧 𑄘𑄨𑄚𑄧 𑄙𑄢𑄚𑄬 𑄆𑄌𑄳𑄠 𑄇𑄟𑄧𑄖𑄴𑄪𑄚𑄴 𑄏𑄘𑄨 𑄆𑄌𑄳𑄠𑄉𑄱𑄰𑅁 𑄊𑄧𑄢𑄧𑄖𑄴 𑄆𑄭 𑄖 𑄌𑄨𑄉𑄮𑄚𑄴 𑄏𑄨𑄝𑄮𑄢𑄬 𑄙𑄪𑄚𑄴𑄘𑄮 𑄝𑄎𑄬𑄝𑄖𑄴𑄖𑄬𑄭 𑄇𑄧𑄣𑄧𑅁 𑄖 𑄌𑄨𑄉𑄮𑄚𑄴 𑄏𑄨𑄝𑄮 𑄙𑄪𑄚𑄴𑄘𑄮 𑄝𑄎𑄬𑄭 𑄘𑄨 𑄇𑄪𑄣𑄴𑄉𑄨𑄝𑄮𑄖𑄴 𑄢𑄋 𑄙𑄮𑄇𑄴–𑄙𑄮𑄇𑄳𑄠 𑄃𑄉𑄪𑄚𑄧 𑄃𑄋𑄢 𑄖𑄨𑄚𑄴𑄮 𑄘𑄨 𑄦𑄘𑄧𑄖𑄴 𑄉𑄧𑄢𑄨 𑄆𑄭 𑄇𑄧𑄣𑄧, 𑄙𑄧𑄢𑄴 𑄝, 𑄇𑄪𑄣𑄴𑄉𑄨𑄝𑄮𑅁

𑄚𑄨𑄟𑄮𑄚𑄧 𑄝𑄝𑄬 𑄇𑄪𑄣𑄴𑄉𑄨𑄝𑄮 𑄙𑄧𑄣𑄳𑄠𑄧𑅁

𑄖 𑄏𑄨𑄝𑄮 𑄃 𑄇𑄧𑄣𑄧, 𑄝, 𑄚𑄨𑄟𑄮𑄚𑄴 𑄘𑄘 𑄆𑄌𑄳𑄠𑅁

𑄚𑄨𑄟𑄮𑄚𑄬 𑄆𑄌𑄳𑄠 𑄥𑄪𑄚𑄨 𑄆𑄇𑄴𑄇 𑄌𑄮𑄇𑄴𑄈𑄪𑄚𑄴 𑄘𑄋𑄧𑄢𑄴 𑄘𑄋𑄧𑄢𑄴 𑄉𑄧𑄢𑄨 𑄖 𑄏𑄨𑄝𑄮𑄢𑄬 𑄌𑄬𑄣𑄧 𑄚𑄨𑄟𑄮𑄚𑄧 𑄝𑄝𑄬𑅁 𑄟𑄪𑄠𑄚𑄴 𑄜𑄨𑄢𑄬𑄭 𑄘𑄝𑄝𑄮 𑄌𑄪𑄟𑄮 𑄙𑄧𑄣𑄳𑄠𑄧𑅁 𑄥𑄬𑄇𑄴𑄬 𑄚𑄨𑄟𑄮𑄚𑄬 𑄉𑄪𑄙𑄨𑄖𑄴 𑄥𑄮𑄟𑄬𑄭 𑄃𑄊𑄬𑅁 𑄈𑄇𑄴𑄧𑄚𑄴 𑄃𑄟𑄳𑄦𑄧𑄇𑄴 𑄉𑄧𑄢𑄨 𑄘𑄝𑄝𑄮 𑄌𑄪𑄏𑄨 𑄇𑄨 𑄞𑄝𑄨 𑄚𑄨𑄟𑄮𑄚𑄧𑄢𑄬 𑄓𑄉𑄨 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄚𑄨𑄟𑄮𑄚𑄴, 𑄃 𑄇𑄧𑄇𑄴𑄬 𑄆𑄣𑄬𑅃

𑄚𑄨𑄟𑄮𑄚𑄬 𑄉𑄪𑄙𑄨𑄖𑄴𑄪𑄚𑄴 𑄚𑄳𑄦𑄨𑄉𑄨𑄣𑄨 𑄆𑄭 𑄇𑄧𑄣𑄧, 𑄇𑄇𑄴𑄈𑄧𑄚𑄴 𑄦𑄧𑄣𑄧 𑄝𑅁

𑄃 𑄇𑄨𑄖𑄴𑄖𑄬𑄭 𑄆𑄣𑄬𑅃

𑄆𑄚𑄬𑅁

𑄆𑄚𑄬 𑄇𑄨 𑄆𑄘𑄴𑄪𑄢𑄴 𑄛𑄧𑄗𑄴 𑄆𑄏𑄬𑄘𑄬𑅃 𑄚 𑄇𑄧𑄣𑄬𑄎𑄴 𑄝𑄧𑄚𑄴𑄙𑄧𑅃

𑄚𑄙𑄬𑄭 𑄝𑅁

𑄚 𑄞𑄬𑄎𑄣𑄴𑄦𑄱𑄰𑄠𑄬𑄘𑄬 𑄇𑄧𑄣𑄬𑄎𑄧𑄖𑄴𑅃

𑄚𑄨𑄟𑄮𑄚𑄧 𑄝𑄝𑄬 𑄇𑄱𑄰 𑄛𑄢𑄬, 𑄇𑄧𑄣𑄬𑄎𑄧𑄖𑄴 𑄞𑄬𑄎𑄣𑄴 𑄦𑄧𑄣𑄬 𑄇𑄧𑄣𑄬𑄎𑄴 𑄝𑄧𑄚𑄴𑄙𑄧 𑄦𑄧𑄠𑄴𑅁 𑄄𑄇𑄴𑄪𑄚𑄪 𑄆𑄉𑄧𑄎 𑄝𑄋𑄣𑄬 𑄌𑄋𑄴𑄟𑄠𑄴 𑄞𑄬𑄎𑄣𑄴 𑄦𑄧𑄠𑄴𑅁 𑄝𑄋𑄣𑄬 𑄝𑄋𑄣𑄬 𑄞𑄬𑄎𑄣𑄴 𑄦𑄧𑄠𑄴𑅁 𑄛𑄦𑄢𑄨 𑄍𑄖𑄳𑄢𑄧 𑄛𑄧𑄢𑄨𑄥𑄧𑄘𑄴, 𑄝𑄋𑄣𑄨 𑄍𑄖𑄳𑄢𑄧 𑄛𑄧𑄢𑄨𑄥𑄧𑄘𑄴, 𑄝𑄨𑄆𑄚𑄴𑄛𑄨, 𑄃𑄃𑄮𑄠𑄟𑄩 𑄣𑄩𑄉𑄴, 𑄝𑄟𑄴𑄜𑄳𑄢𑄧𑄚𑄴𑄑𑄴 𑄃𑄢𑄧 𑄇𑄧𑄙𑄧𑄇𑄴 𑄎𑄧𑄘 𑄃𑄊𑄧𑄚𑄴𑅁 𑄄𑄉𑄪𑄚𑄮𑄢𑄴 𑄇𑄧𑄙𑄠𑄴 𑄇𑄧𑄙𑄠𑄴 𑄚𑄧 𑄟𑄨𑄣𑄬𑅁 𑄥𑄬𑄚𑄧𑄖𑄴𑄖𑄬𑄭 𑄇𑄪𑄌𑄴𑄍𑄬 𑄝𑄏𑄚𑄴𑅁 𑄖𑄢 𑄇𑄪𑄌𑄴𑄍𑄬 𑄝𑄏𑄬𑄣𑄬 𑄇𑄧𑄣𑄬𑄎𑄴 𑄝𑄧𑄚𑄴𑄙𑄧 𑄦𑄧𑄠𑄴𑅁

𑄄𑄠𑄬𑄚𑄧 𑄚𑄧𑄠𑄴, 𑄅𑄝𑄧𑄚𑄧 𑄚𑄧𑄠𑄴𑅁 𑄃 𑄇𑄨𑄖𑄴𑄖𑄬𑄭 𑄆𑄣𑄬𑅃 𑄚 𑄖𑄬𑄋 𑄜𑄪𑄢𑄬𑄭𑄠𑄧𑄚𑄴𑅃

𑄝, 𑄌𑄬𑄠𑄢𑄴𑄟𑄬𑄚𑄳𑄠𑄖𑄴𑄪𑄚𑄴 𑄆𑄇𑄴𑄇𑄚𑄴 𑄇𑄝𑄮𑄎𑄴 𑄣𑄉𑄨𑄝𑄮, 𑄥𑄬𑄚𑄧𑄖𑄴𑄖𑄬𑄭𑅁

𑄚𑄨𑄟𑄮𑄚𑄬 𑄟𑄨𑄏𑄬 𑄇𑄧𑄙 𑄇𑄧𑄣𑄧𑅁

𑄇𑄬𑄣𑄳𑄠 𑄞𑄨𑄣𑄬 𑄖𑄧 𑄛𑄨𑄏𑄬𑄭𑄝𑄝𑄪 𑄖𑄧𑄢𑄬 𑄣𑄊𑄧𑄖𑄴 𑄛𑄬𑄠𑄳𑄠𑄬, 𑄃𑄭𑄠𑄬 𑄇𑄱𑄰 𑄚𑄧 𑄛𑄙𑄌𑄴! 𑄟𑄚𑄴𑄎𑄳𑄠𑄧 𑄦𑄘𑄬 𑄛𑄙𑄬𑄭 𑄛𑄣𑄴𑄪𑄋𑄪𑄚𑄴𑅁

𑄚𑄨𑄟𑄮𑄚𑄧 𑄝𑄝𑄧𑄢𑄴 𑄇𑄧𑄙 𑄦𑄧𑄣𑄧𑄘𑄬, 𑄚𑄨𑄟𑄮𑄚𑄬 𑄚𑄧 𑄆𑄭 𑄇𑄱𑄰 𑄛𑄙𑄬𑄘𑄧 𑄥𑄣𑄬𑄚𑄴 𑄆𑄇𑄴𑄥𑄧 𑄈𑄬𑄖𑄴 𑄖𑄬𑄋 𑄝𑄎𑄨𑄣𑄇𑄴𑄪𑄚𑄴𑅁 𑄦𑄮𑄇𑄴 𑄣𑄮𑄇𑄣𑄴 𑄝𑄮𑄑𑄴, 𑄖𑄪𑄠𑄮 𑄝𑄮𑄘𑄮 𑄛𑄚𑄴 𑄆𑄖𑄴𑄬 𑄽𑄶, 𑄡𑄘𑄬 𑄽𑄶 𑄖𑄬𑄋𑅁 𑄑𑄬𑄇𑄴𑄥𑄩 𑄛𑄚𑄴, 𑄑𑄬𑄟𑄴𑄛𑄮 𑄛𑄚𑄴 𑄛𑄌𑄴 𑄖𑄬𑄋𑄖𑄴 𑄘𑄧𑄢𑄬, 𑄆𑄖𑄴𑄬–𑄡𑄘𑄬 𑄇𑄪𑄢𑄨 𑄖𑄬𑄋𑅁 𑄟𑄉𑄚 𑄦𑄧𑄝𑄧𑄘𑄬 𑄇𑄟𑄚𑄴, 𑄖𑄬𑄋 𑄈𑄧𑄢𑄧𑄌𑄴 𑄉𑄧𑄢𑄚𑅁 𑄚𑄨𑄟𑄮𑄚𑄬 𑄖 𑄝𑄝𑄧 𑄇𑄧𑄙 𑄥𑄪𑄚𑄨 𑄆𑄇𑄴𑄇 𑄣𑄎𑄬𑄣𑄧𑅁 𑄆𑄚𑄬–𑄃𑄮 𑄖 𑄝𑄝𑄬 𑄉𑄞𑄪𑄢𑄮 𑄖𑄬𑄋 𑄘𑄨 𑄚𑄧 𑄛𑄢𑄬𑄢𑄴𑅁 𑄃 𑄖𑄢𑄴 𑄊𑄧𑄢𑄧𑄖𑄴 𑄆𑄏𑄚𑅁 𑄖 𑄊𑄧𑄢𑄧𑄖𑄴 𑄆𑄏𑄚 𑄖𑄬𑄋𑄣𑄱𑄰 𑄆𑄇𑄴𑄎𑄧𑄚𑄴 𑄉𑄞𑄪𑄢𑄴 𑄖𑄨𑄚𑄴 𑄘𑄨𑄚𑄴 𑄛𑄬𑄣𑄪𑄚𑄴𑅁 𑄆𑄇𑄴𑄎𑄧𑄚𑄬 𑄖𑄨𑄚𑄴 𑄘𑄨𑄚𑄴 𑄙𑄚𑄴 𑄇𑄝𑄨𑄣𑄬 𑄞𑄧𑄎𑄚𑄴 𑄇𑄝𑄨 𑄛𑄣𑄴𑄪𑄚𑄴𑅁 𑄚𑄨𑄟𑄮𑄚𑄧 𑄝𑄝𑄬 𑄛𑄪𑄏𑄮𑄢𑄴 𑄉𑄧𑄣𑄳𑄠𑄧 𑄛𑄧𑄢𑄣𑄬𑄊 𑄇𑄬𑄏𑄚𑄴𑅃 𑄉𑄧𑄟𑄬 𑄉𑄧𑄢𑄧𑄌𑄴 𑄚𑄨𑅃 𑄚 𑄝𑄬𑄢𑄬𑄭 𑄝𑄬𑄢𑄬𑄭 𑄗𑄌𑄴𑅃

𑄃 𑄇𑄨 𑄝𑄬𑄢𑄬𑄘𑄪𑄁𑅁

𑄖𑄧𑄢𑄬 𑄚𑄨𑄚𑄬𑄭 𑄟𑄧𑄢𑄴 𑄝𑄨𑄢𑄬𑄑𑄴 𑄃𑄏𑅁 𑄌𑄬𑄌𑄴𑅁

𑄚𑄨𑄟𑄮𑄚𑄬 𑄖 𑄝𑄝𑄧 𑄇𑄧𑄙 𑄥𑄪𑄚𑄨 𑄆𑄇𑄴𑄇 𑄟𑄙 𑄚𑄨𑄉𑄪𑄣𑄳𑄠𑄧𑅁 𑄃𑄧𑄚𑄢𑄴𑄥𑄴 𑄞𑄧𑄖𑄴𑄖𑄨 𑄦𑄮 𑄡𑄘𑄬 𑄖 𑄝𑄝𑄬 𑄇𑄱𑄰𑄠𑄬𑄘𑄬 𑄇𑄧𑄙𑄚𑄨 𑄦𑄨𑄘𑄮𑄖𑄴 𑄅𑄙𑄨𑄣𑄧𑅁 𑄈𑄣𑄨𑄇𑄴 𑄖𑄬 𑄘𑄧 𑄇𑄧𑄣𑄬𑄎𑄴 𑄝𑄧𑄚𑄴𑄙𑄧 𑄚𑄧𑄦𑄱𑄰𑄠𑄬 𑄝𑄘𑄬 𑄊𑄧𑄢𑄧𑄖𑄴 𑄆𑄌𑄳𑄠𑅁 𑄖 𑄝𑄝𑄬 𑄄𑄠𑄬𑄚𑄴 𑄇𑄱𑄰 𑄛𑄣𑄴𑄬–𑄃𑄮 𑄃𑄏𑄧𑄣𑄴 𑄇𑄧𑄙 𑄇𑄱𑄰 𑄛𑄣𑄴𑄬 𑄃𑄧𑄉𑄧𑄟𑄚𑄴 𑄛𑄬𑄝𑄧𑅁 𑄚𑄨𑄟𑄮𑄚𑄧 𑄝𑄝𑄬 𑄇𑄧𑄣𑄧, 𑄃 𑄇𑄝𑄪𑄌𑄴𑄍𑄚𑄴 𑄇𑄧𑄇𑄴𑄬 𑄈𑄧𑄎 𑄡𑄬𑄝𑄬𑅁 𑄚 𑄟𑄪𑄭 𑄃𑄚𑄨 𑄘𑄨𑄟𑄴𑄝𑄱𑄰𑅃 

𑄚𑄨𑄟𑄮𑄚𑄧–𑄟 𑄊𑄧𑄢𑄧 𑄞𑄨𑄘𑄨𑄢𑄬𑄖𑄴𑄪𑄚𑄴 𑄇𑄧𑄣𑄧, 𑄖𑄬 𑄆𑄝𑄧 𑄞𑄘𑄧 𑄚𑄧 𑄈𑄠𑄴𑅁 𑄆𑄚𑄬–𑄃𑄮 𑄝𑄬𑄣𑄴 𑄡𑄢𑄴𑅁

𑄌𑄬𑄠𑄢𑄴𑄟𑄬𑄚𑄳𑄠𑄬 𑄊𑄧𑄢𑄚𑄴 𑄇𑄪𑄘𑄴𑄫𑄢𑄴 𑄖𑄬𑅁 𑄡𑄬𑄝𑄧–𑄃𑄮 𑄆𑄝𑄧𑄉𑄱𑄰𑅁 𑄆𑄌𑄳𑄠 𑄇𑄝𑄪𑄌𑄴𑄍𑄚𑄴 𑄛𑄬𑄣𑄬 𑄇𑄬𑄣𑄳𑄠 𑄢𑄋𑄟𑄖𑄳𑄠𑄖𑄴 𑄡𑄬𑄭 𑄛𑄢𑄨𑄝𑄮𑅁 𑄟𑄉𑄚 𑄟𑄉𑄚 𑄛𑄧𑄢 𑄈𑄮𑄠𑄭𑄮𑄚𑄬 𑄇𑄨𑅁

𑄚𑄨𑄟𑄮𑄚𑄬 𑄚𑄧 𑄉𑄙𑄨, 𑄛𑄬𑄚𑄴𑄘𑄧𑄣𑄧𑄁, 𑄥𑄨𑄟𑄪𑄣𑄴 𑄚𑄧 𑄝𑄧𑄘𑄧𑄣𑄬𑄭 𑄢𑄋𑄟𑄖𑄳𑄠𑄖𑄴𑄪𑄚𑄴 𑄆𑄖𑄴𑄬 𑄅𑄢𑄨 𑄆𑄌𑄳𑄠 𑄥𑄨𑄠𑄬𑄚𑄨𑄣𑄱𑄰 𑄛𑄨𑄚𑄳𑄠𑄬 𑄝𑄘𑄬 𑄃𑄋𑄪𑄣𑄧 𑄟𑄙𑄠𑄴 𑄟𑄙𑄠𑄴 𑄘𑄨𑄝𑄬 𑄞𑄖𑄴 𑄈𑄬𑄭 𑄌𑄬𑄠𑄢𑄴𑄟𑄬𑄚𑄳𑄠𑄬𑄖𑄴𑄪𑄚𑄴 𑄇𑄝𑄪𑄌𑄴𑄍𑄚𑄴 𑄃𑄚𑄨𑄝𑄖𑄴𑄖𑄬𑄭 𑄡𑄢𑄴𑅁 𑄇𑄪𑄘𑄴𑄫𑄢𑄴 𑄡𑄬𑄭 𑄌𑄬𑄠𑄢𑄴𑄟𑄬𑄚𑄳𑄠𑄬 𑄊𑄧𑄢𑄧 𑄥𑄨𑄙𑄪 𑄚𑄧 𑄡𑄬𑄭 𑄚𑄇𑄴𑄧𑄝𑄨𑄘𑄊𑄨 𑄇𑄪𑄠𑄮 𑄉𑄋𑄧 𑄥𑄨𑄚𑄴𑄘𑄨 𑄉𑄬𑄣𑄧𑅁 𑄡𑄬𑄭𑄚𑄬 𑄌𑄭𑄘𑄬 𑄆𑄇𑄴𑄘𑄊𑄨𑄠𑄬 𑄛𑄚𑄨 𑄞𑄧𑄢𑄧𑄘𑄧𑄚𑄴𑅁 𑄃 𑄇𑄨 𑄇𑄮–𑄝𑄪𑄣𑄮 𑄉𑄧𑄢𑄨 𑄦𑄎𑄧𑄘𑄧𑄚𑄴𑅁 𑄥𑄬𑄇𑄴𑄬 𑄚𑄇𑄴𑄧𑄝𑄨 𑄇𑄪𑄠𑄮 𑄉𑄋𑄧𑄖𑄴 𑄚𑄧 𑄆𑄏𑄬𑅁 𑄟𑄨𑄣𑄬𑄉𑄪𑄚𑄬 𑄦𑄎𑄧𑄘𑄬 𑄚𑄨𑄟𑄮𑄚𑄬 𑄉𑄏𑄧 𑄍𑄬𑄢𑄬𑄖𑄴𑄪𑄚𑄴 𑄛𑄮𑄣𑄴𑄬 𑄌𑄬𑄭 𑄃𑄊𑄬𑅁 𑄈𑄇𑄴𑄧𑄚𑄴 𑄝𑄘𑄬 𑄟𑄨𑄣𑄬𑄉𑄪𑄚𑄬 𑄇𑄮𑄟𑄴 𑄇𑄧𑄢𑄧𑄖𑄴, 𑄛𑄨𑄣𑄬 𑄇𑄧𑄢𑄧𑄖𑄴 𑄉𑄧𑄢𑄨 𑄊𑄧𑄢𑄧𑄖𑄴 𑄡𑄘𑄧𑄚𑄴𑅁 𑄚𑄨𑄟𑄮𑄚𑄧𑄢𑄴 𑄛𑄧𑄢𑄚𑄴 𑄍𑄧𑄑𑄴–𑄜𑄧𑄘𑄢𑄴 𑄇𑄧𑄇𑄴𑄬 𑄚𑄇𑄴𑄧𑄝𑄨 𑄆𑄝𑄧 𑄆𑄝𑄧 𑄉𑄧𑄢𑄨𑅁 𑄝𑄌𑄴𑄍𑄬𑄭 𑄗𑄉𑄧𑄘𑄬 𑄗𑄉𑄧𑄘𑄬 𑄌𑄭𑄘𑄬 𑄚𑄇𑄴𑄧𑄝𑄨 𑄟𑄝𑄮 𑄛𑄚𑄨 𑄈𑄧𑄎 𑄆𑄏𑄬𑄢𑄴 𑄇𑄪𑄟𑄴 𑄅𑄇𑄴𑄮 𑄇𑄧𑄢𑄧𑄖𑄴, 𑄛𑄨𑄣𑄬 𑄅𑄇𑄴𑄮 𑄦𑄘𑄧𑄖𑄴 𑄉𑄧𑄢𑄨𑅁 𑄖𑄬–𑄃𑄮 𑄛𑄚𑄨 𑄞𑄧𑄢𑄨𑄣𑄧𑅁 𑄊𑄧𑄢𑄧𑄖𑄴 𑄉𑄬𑄣𑄧𑅁 𑄇𑄨 𑄆𑄌𑄳𑄠 𑄇𑄧𑄚𑄧 𑄚𑄇𑄴𑄧𑄝𑄨 𑄛𑄚𑄨 𑄈𑄧𑄎 𑄚𑄧 𑄆𑄝𑄧 𑄚𑄨! 𑄚𑄨𑄟𑄮𑄚𑄬 𑄟𑄙 𑄇𑄌𑄴𑄍𑄱𑄰 𑄇𑄌𑄴𑄍𑄱𑄰 𑄃𑄊𑄬𑅁 𑄘𑄨𑄝𑄬 𑄅𑄇𑄴𑄮 𑄟𑄧𑄏𑄠𑄴 𑄚𑄧𑄣 𑄛𑄬𑄙𑄧𑄖𑄴 𑄇𑄟𑄖𑄴𑄧𑄚𑄴𑅁 𑄞𑄣𑄧𑄇𑄴𑄧𑄚𑄴 𑄝𑄌𑄴𑄍𑄬𑄭 𑄗𑄬𑄭 𑄌𑄭𑄘𑄬 𑄚𑄇𑄴𑄧𑄝𑄨 𑄇𑄪𑄖𑄴𑄪𑄚𑄴 𑄆𑄏𑄬𑄢𑄴𑄣𑄱𑄰𑅁 𑄚𑄇𑄴𑄧𑄝𑄨 𑄆𑄖𑄴𑄬 𑄘𑄬𑄊𑄨 𑄚𑄨𑄟𑄮𑄚𑄬 𑄈𑄪𑄎𑄨𑄠𑄬 𑄦𑄎𑄬𑄢𑄴𑅁 𑄆𑄇𑄴 𑄢𑄨𑄚𑄨 𑄌𑄬𑄭 𑄃𑄊𑄬 𑄚𑄇𑄴𑄧𑄝𑄨𑄢𑄬𑅁 𑄡𑄬𑄙𑄧𑄇𑄴 𑄌𑄠𑄴 𑄥𑄬𑄙𑄧𑄇𑄴 𑄝𑄬𑄌𑄴 𑄘𑄮𑄣𑄴 𑄘𑄬𑄊𑄬𑅁 𑄇𑄮𑄌𑄴𑄛𑄚 𑄉𑄧𑄞𑄨𑄚𑄴 𑄦𑄧𑄢𑄴𑅁 𑄍𑄧𑄑𑄴–𑄜𑄧𑄑𑄳𑄠 𑄟𑄧𑄚𑄴𑄘𑄱𑄰𑄝𑄌𑄴𑄍𑄬𑄭 𑄃𑄊𑄬, 𑄚𑄇𑄴𑄧𑄝𑄨 𑄆𑄏𑄮𑄇𑄴, 𑄆𑄏𑄮𑄇𑄴 𑄉𑄧𑄢𑄨𑅁 𑄚𑄇𑄴𑄧𑄝𑄨 𑄇𑄠𑄴 𑄆𑄭𑄚𑄬 𑄏𑄢𑄧 𑄍𑄬𑄢𑄬𑄖𑄴𑄪𑄚𑄴 𑄞𑄪𑄎𑄪𑄖𑄴 𑄉𑄧𑄢𑄨 𑄚𑄳𑄦𑄨𑄉𑄨𑄣𑄨 𑄆𑄇𑄴𑄬 𑄚𑄇𑄴𑄧𑄝𑄨 𑄟𑄪𑄎𑄪𑄋𑄧𑄖𑄴𑅁 𑄚𑄇𑄴𑄧𑄝𑄨 𑄇𑄧𑄙𑄧𑄇𑄴 𑄃𑄟𑄳𑄦𑄧𑄇𑄴𑄦𑄱𑄰 𑄇𑄧𑄣𑄧, 𑄖𑄪𑄭𑅃

𑄦𑄧𑄠𑄴, 𑄟𑄪𑄭! 

𑄇𑄪𑄖𑄴𑄪𑄚𑄴 𑄆𑄣𑄬𑅃

𑄚𑄨𑄟𑄮𑄚𑄬 𑄦𑄎𑄨 𑄦𑄎𑄨 𑄇𑄧𑄣𑄧, 𑄉𑄏𑄧 𑄙𑄬𑄣𑄖𑄴𑄪𑄚𑄴𑅁 𑄟𑄪𑄭 𑄉𑄏𑄧 𑄞𑄪𑄖𑄴𑅁

𑄞𑄪𑄖𑄴 𑄚𑄧 𑄦𑄧𑄣𑄬 𑄇𑄨 𑄄𑄢𑄨𑄋𑄨𑅃 𑄌𑄨𑄘𑄨𑄠𑄚𑄧𑄖𑄴 𑄘𑄧 𑄚𑄧 𑄣𑄬𑄊𑄧𑄌𑄴 𑄆𑄝𑄬𑄘𑄬 𑄥𑄨𑄠𑄬𑄚𑄴𑅁

𑄚𑄧 𑄣𑄬𑄊𑄬 𑄞𑄨𑄣𑄨 𑄆𑄭 𑄚𑄧 𑄛𑄢𑄬! 

𑄝𑄨𑄥𑄬𑄴𑄥𑄴 𑄚𑄧 𑄉𑄧𑄢𑄧𑄋𑄧𑄢𑄴, 𑄖𑄪𑄭 𑄆𑄣𑄬𑄘𑄬𑅁

𑄉𑄧𑄟𑄬–𑄘𑄣𑄬𑄭 𑄢𑄨𑄚𑄨 𑄌𑅁

𑄖𑄬 𑄇𑄨𑄖𑄴𑄖𑄬𑄭 𑄆𑄣𑄬 𑄊𑄧𑄢𑄧𑄖𑄴𑅃

𑄝–𑄃𑄮 𑄛𑄪𑄏𑄮𑄢𑄴 𑄉𑄧𑄌𑄴𑄍𑄬 𑄆 𑄇𑄧𑄙𑄚𑄴𑅁 𑄖𑄪𑄭–𑄃𑄮 𑄛𑄪𑄏𑄮𑄢𑄴 𑄉𑄧𑄢𑄧𑄢𑄴𑅁 𑄆𑄌𑄳𑄠 𑄇𑄨 𑄝𑄚𑄳𑄦 𑄄𑄠𑄬𑄚𑄴 𑄎𑄮𑄛𑄴 𑄘𑄳𑄠 𑄛𑄧𑄢𑄨𑄝𑄮𑅁 𑄄𑄠𑄬𑄚𑄴 𑄝𑄘𑄬 𑄇𑄨 𑄛𑄪𑄏𑄮𑄢𑄴 𑄉𑄧𑄢𑄨𑄝𑄬𑄢𑄴 𑄚𑄬𑄭 𑄇𑄢𑄧𑄢𑄴𑅃 𑄃𑄘𑄬𑄇𑄴𑄬 𑄉𑄧𑄢𑄨 𑄇𑄨 𑄟𑄧𑄢𑄴 𑄟𑄧𑄚𑄬 𑄚𑄧 𑄇𑄧𑄠𑄴 𑄄𑄙𑄪 𑄆𑄝𑄢𑄴𑅃 𑄖𑄧𑄢𑄬 𑄌𑄬𑄝𑄢𑄴𑅃 𑄃 𑄇𑄨𑄖𑄴𑄖𑄬𑄭 𑄆𑄣𑄪𑄁, 𑄥𑄨𑄠𑄬𑄚𑄴 𑄇𑄢𑄧𑄢𑄬 𑄇𑄪–𑄃𑄮 𑄚𑄧 𑄡𑄬𑄝𑄧𑅁

𑄇𑄨𑄖𑄴𑄖𑄬𑄭𑅃

𑄄𑄚𑄴𑄘𑄨 𑄡𑄬𑄭𑅁 𑄇𑄇𑄴𑄬 𑄟𑄚𑄳𑄠𑄬 𑄘𑄬𑄊𑄨𑄝𑄬𑄇𑄴𑅁

𑄟𑄪𑄭 𑄘𑄬𑄢𑄨 𑄦𑄮𑄟𑄴 𑄘𑄧𑅁 𑄇𑄬𑄣𑄳𑄠 𑄆𑄌𑄴 𑄚𑅁

𑄖𑄧𑄢𑄬 𑄅𑄎𑄪 𑄇𑄬𑄎𑄚𑄴 𑄇𑄬𑄎𑄚𑄴 𑄛𑄋𑄧𑄖𑄴𑄬𑅁 𑄇𑄨 𑄆𑄇𑄴𑄬 𑄥𑄧𑄣𑄴𑄣𑄨–𑄝𑄧𑄣𑄴𑄣𑄨𑅁

𑄖𑄢 𑄆𑄇𑄴𑄇𑄚 𑄛𑄧𑄙𑄧 𑄛𑄎𑄢 𑄜𑄢𑄨 𑄝𑄧𑄣𑄇𑄴𑅁 𑄚𑄨𑄟𑄮𑄚𑄬 𑄇𑄧𑄣𑄧, 𑄟𑄪𑄭 𑄥𑄧𑄝𑄧𑄚𑄬 𑄘𑄬𑄇𑄴𑄈𑄮𑄁𑄉𑄬 𑄖𑄧𑄢𑄴 𑄚𑄇𑄴, 𑄇𑄚𑄴, 𑄖𑄧𑄘𑄖𑄴, 𑄦𑄘𑄧𑄖𑄴, 𑄒𑄬𑄋𑄧𑄖𑄴 𑄝𑄚𑄳𑄦 𑄏𑄨𑄉𑄬𑄜𑄪𑄣𑄴 𑄜𑄪𑄑𑄳𑄠𑄧𑄚𑄴𑄘𑄬𑅁

𑄚𑄨𑄟𑄮𑄚𑄧 𑄇𑄧𑄙 𑄥𑄪𑄚𑄨 𑄚𑄇𑄴𑄧𑄝𑄨 𑄆𑄇𑄴𑄇 𑄟𑄙𑄝𑄮 𑄚𑄨𑄉𑄪𑄣𑄳𑄠𑄧𑅁 𑄆𑄇𑄴𑄇 𑄟𑄧𑄚𑄴𑄟𑄧𑄢 𑄉𑄧𑄢𑄨 𑄇𑄧𑄣𑄧, 𑄇𑄨 𑄍𑄧𑄚𑄴𑄘𑄧𑄞𑄌𑄴 𑄟𑄙𑄧𑄢𑄴𑅁 𑄇𑄧𑄙𑄚𑄴 𑄝𑄟𑄬𑄭 𑄡𑄬𑄭 𑄃 𑄇𑄧𑄣𑄧, 𑄄𑄠𑄮𑄖𑄴 𑄆𑄝𑄬𑄘𑄬 𑄥𑄨𑄠𑄬𑄚𑄴 𑄌𑄨𑄙𑄨𑄠𑄚𑄧𑄖𑄴 𑄃𑄭𑄠𑄬 𑄚𑄧 𑄣𑄬𑄊𑄧𑄌𑄴𑅃

𑄚𑄇𑄴𑄧𑄝𑄨𑄢𑄬 𑄣𑄊𑄧𑄖𑄴 𑄛𑄬𑄭 𑄚𑄨𑄟𑄮𑄚𑄧𑄢𑄴 𑄛𑄧𑄢𑄚𑄴 𑄎𑄪𑄢𑄬𑄭 𑄡𑄬𑄭𑄠𑄬𑅁 𑄇𑄧𑄙 𑄝𑄖𑄴𑄖 𑄚𑄬𑄭 𑄉𑄧𑄢𑄨 𑄆𑄌𑄳𑄠𑅁 𑄎𑄧𑄘𑄬𑄝𑄧𑄘𑄬 𑄚𑄇𑄴𑄧𑄝𑄨𑄣𑄱𑄰 𑄘𑄬𑄊 𑄦𑄧𑄝𑄧 𑄇𑄨𑄚 𑄆𑄙𑄧𑄇𑄴𑄧𑄚𑄴 𑄥𑄧𑄁 𑄃𑄧𑄟𑄧𑄇𑄧𑄘𑄧 𑄌𑄨𑄘𑄬 𑄆𑄣𑄧𑅁 𑄖𑄪𑄠𑄮 𑄚𑄬–𑄃𑄣𑄴𑄥𑄨 𑄉𑄧𑄢𑄨 𑄝𑄌𑄴𑄍𑄬 𑄢𑄰𑄱𑄠𑄬𑅁 𑄇𑄧𑄙–𑄝𑄖𑄴𑄖 𑄃𑄊𑄬𑄘𑄬 𑄙𑄧𑄇𑄴 𑄉𑄧𑄢𑄨𑅁 𑄇𑄧𑄙 𑄒𑄨𑄇𑄴–𑄒𑄇𑄴 𑄉𑄧𑄢𑄨 𑄘𑄬𑄊 𑄦𑄧𑄚𑄖𑄴𑄪𑄚𑄴 𑄃𑄘𑄬𑄇𑄴𑄬 𑄉𑄧𑄢𑄨 𑄘𑄬𑄊 𑄦𑄧𑄚 𑄞𑄢𑄨 𑄈𑄪𑄎𑄨 𑄦𑄧𑄠𑄴 𑄟𑄧𑄚𑄴𑅁

𑄚𑄇𑄴𑄧𑄝𑄨 𑄇𑄧𑄣𑄧, 𑄟𑄪𑄭 𑄝𑄬𑄌𑄴 𑄘𑄬𑄢𑄨 𑄗𑄬𑄭 𑄚𑄧 𑄛𑄢𑄨𑄟𑄴𑅁 𑄊𑄧𑄢𑄧𑄖𑄴𑄪𑄚𑄴 𑄖𑄮𑄉𑄬𑄝𑄇𑄴𑅁

𑄚𑄇𑄴𑄧𑄝𑄨 𑄘𑄬𑄢𑄨 𑄦𑄧𑄝𑄧𑄘𑄬 𑄥𑄨𑄚𑄴𑄘𑄨 𑄟𑄧𑄚𑄴 𑄚𑄧 𑄘𑄨 𑄚𑄨𑄟𑄮𑄚𑄬 𑄇𑄧𑄣𑄧, 𑄢𑄬𑄘𑄮𑄖𑄴 𑄆𑄭 𑄥𑄧𑄝𑄧𑄚𑄚𑄴 𑄘𑄬𑄊𑄨, 𑄛𑄮𑄏𑄛𑄨𑄢𑄬 𑄅𑄝𑄴 𑄉𑄧𑄢𑄨 𑄚𑄧 𑄛𑄢𑄨 𑄆𑄌𑄴𑄍𑄮𑄋𑄬𑅁 𑄇𑄧𑄙𑄚𑄴 𑄇𑄢𑄧𑄢𑄬 𑄇𑄮 𑄚𑄧 𑄡𑄬𑄝𑄧 𑄇𑄧𑄣𑄬–𑄃𑄮 𑄖𑄧𑄢𑄬 𑄇𑄧𑄣𑄪𑄁𑅁

𑄚𑄨𑄟𑄮𑄚𑄬 𑄄𑄠𑄬𑄚𑄴 𑄇𑄱𑄰𑄚𑄬 𑄘𑄨𑄎𑄧𑄚𑄬 𑄦𑄎𑄨𑄣𑄬𑄇𑄴𑅁 𑄚𑄇𑄴𑄧𑄝𑄨 𑄦𑄎𑄨 𑄦𑄎𑄨 𑄇𑄧𑄣𑄧, 𑄊𑄪𑄟𑄴 𑄝𑄬𑄌𑄴 𑄦𑄧𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄆𑄥𑄚𑄳𑄠 𑄥𑄧𑄝𑄧𑄚𑄴 𑄘𑄬𑄊𑄬𑅁

𑄊𑄪𑄟𑄴 𑄝𑄬𑄌𑄴𑄦𑄱𑄰𑄚𑄬 𑄥𑄧𑄝𑄧𑄚𑄴 𑄘𑄬𑄊𑄨𑄣𑄪𑄁, 𑄚 𑄎𑄧𑄘𑄬𑄝𑄧𑄘𑄬 𑄖𑄧 𑄇𑄬𑄠𑄳𑄠𑄬𑄖𑄴 𑄏𑄨𑄉𑄬𑄜𑄪𑄣𑄴 𑄜𑄪𑄘𑄮𑄘𑄧𑄚𑄴! 

𑄇𑄨 𑄃𑄢 𑄛𑄉𑄧𑄣𑄳𑄠 𑄇𑄧𑄙 𑄇𑄧𑄌𑄴! 

𑄖𑄪𑄭 𑄆𑄝𑄧 𑄚𑄧 𑄝𑄪𑄏𑄧𑄌𑄴 𑄟𑄧 𑄥𑄧𑄝𑄧𑄚𑄧 𑄇𑄧𑄙𑅃

𑄚𑄙𑄬𑄭𑅁

𑄥𑄪𑄚𑄴 𑄥𑄣𑄬𑄚𑄴𑅁 𑄝𑄨𑄢𑄬𑄑𑄴 𑄅𑄇𑄴𑄮 𑄟𑄮𑄚𑄮𑄖𑄴 𑄘𑄮𑄣𑄴 𑄆𑄇𑄴𑄇𑄚𑄴 𑄊𑄧𑄢𑄴𑅁 𑄝𑄧𑄣𑄴𑄛𑄬𑄠𑄳𑄠𑄬 𑄊𑄧𑄢𑄚𑄴𑅁 𑄛𑄨𑄝𑄨𑄢𑄴 𑄛𑄨𑄝𑄨𑄢𑄴 𑄝𑄪𑄠𑄬𑄢𑄴 𑄆𑄏𑄬𑅁 𑄌𑄬𑄢𑄮𑄛𑄣 𑄏𑄪𑄝𑄪𑄢𑄴 𑄏𑄪𑄝𑄪𑄢𑄴 𑄛𑄘 𑄞𑄧𑄢𑄧𑄚𑄴 𑄦𑄬𑄣𑄴 𑄦𑄬𑄣𑄴 𑄚𑄚 𑄝𑄝𑄧𑄖𑄳𑄠 𑄉𑄍𑄴𑅁 𑄉𑄏𑄬 𑄉𑄏𑄬 𑄏𑄇𑄴 𑄏𑄇𑄴 𑄛𑄬𑄈𑄴𑅁 𑄛𑄬𑄇𑄴𑄈𑄪𑄚𑄬 𑄓𑄧𑄉𑄧𑄢𑄧𑄚𑄴𑅁 𑄌𑄬𑄢𑄮 𑄇𑄨𑄖𑄳𑄠𑄚𑄴𑄘𑄨 𑄢𑄨𑄚𑄨 𑄌𑄬𑄣𑄬 𑄉𑄮𑄘 𑄛𑄨𑄖𑄴𑄗𑄨𑄟𑄨𑄠𑄚𑄴 𑄝𑄪𑄉𑄮𑄖𑄴 𑄖𑄧𑄣𑄬 𑄘𑄬𑄊𑄬𑅁 𑄘𑄬𑄝𑄝𑄮 𑄟𑄘𑄨𑄖𑄴 𑄝𑄌𑄴𑄍𑄬𑄘𑄬 𑄙𑄧𑄇𑄴 𑄣𑄉𑄬𑅁 𑄇𑄨 𑄘𑄮𑄣𑄴 𑄎𑄉! 𑄊𑄧𑄢𑄴 𑄌𑄬𑄢𑄮𑄛𑄣 𑄇𑄧𑄎𑄧 𑄜𑄪𑄣𑄴, 𑄍𑄧𑄘𑄧𑄢𑄧𑄇𑄴 𑄜𑄪𑄣𑄴, 𑄢𑄘𑄌𑄪𑄣𑄮 𑄜𑄪𑄣𑄴, 𑄥𑄧𑄚𑄴 𑄜𑄪𑄣𑄴𑅁 𑄇𑄨 𑄇𑄨 𑄥𑄧𑄠𑄴–𑄥𑄉𑄧𑄌𑄳𑄠 𑄚𑄁 𑄚𑄧 𑄛𑄬𑄠𑄳𑄠𑄬 𑄜𑄪𑄣𑄴, 𑄜𑄪𑄑𑄳𑄠𑄧𑄚𑄴𑅁 𑄖𑄧𑄢𑄴𑄣𑄱𑄰 𑄇𑄧𑄙 𑄇𑄮𑄢𑄴𑅁 𑄝𑄪𑄠𑄬𑄢𑄴 𑄆𑄣𑄬 𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄖𑄧 𑄌𑄪𑄣𑄚𑄨 𑄅𑄢𑄨 𑄡𑄬𑄭 𑄥𑄧𑄚𑄚𑄨 𑄣𑄧𑄊𑄬 𑄥𑄧𑄟𑄢𑄨 𑄦𑄧𑄠𑄴𑅁 𑄖𑄧 𑄌𑄪𑄣𑄚𑄨 𑄌𑄬𑄭 𑄗𑄉𑄧𑄘𑄬 𑄗𑄉𑄧𑄘𑄬 𑄃𑄘𑄬𑄇𑄴𑄬 𑄉𑄧𑄢𑄨 𑄝𑄢𑄬𑄘𑄨 𑄌𑄁𑄉𑄬, 𑄝𑄨𑄢𑄬𑄑𑄴 𑄆𑄇𑄴𑄇𑄚𑄴 𑄃𑄘𑄟𑄴𑅁 𑄊𑄧𑄢𑄴 𑄊𑄧𑄚𑄧𑅁 𑄢𑄘 𑄇𑄪𑄢𑄰𑄱 𑄓𑄇𑄴 𑄇𑄢𑄧𑄘𑄧𑄚𑄴𑅁 𑄇𑄪𑄉𑄪𑄢𑄬 𑄞𑄪𑄉𑄮𑄘𑄧𑄚𑄴𑅁 𑄝𑄢𑄳𑄦 𑄝𑄚𑄴𑄘𑄬 𑄔𑄬𑄋𑄨 𑄢𑄧 𑄥𑄪𑄚𑄬𑅁 𑄌𑄮𑄣𑄴 𑄏𑄢𑄧𑄘𑄬 𑄇𑄪𑄣𑄮 𑄢𑄧 𑄞𑄧𑄢𑄖𑄴–𑄞𑄪𑄢𑄪𑄖𑄴 𑄥𑄪𑄚𑄬𑅁 𑄇𑄧𑄚𑄧 𑄇𑄧𑄚𑄧 𑄊𑄧𑄢𑄧𑄖𑄴 𑄉𑄩𑄖𑄴 𑄝𑄏𑄬𑄭 𑄘𑄮𑄚𑄴𑅁 𑄥𑄨𑄚𑄴𑄘𑄨𑄖𑄴𑄪𑄚𑄴 𑄌𑄮𑄈𑄴 𑄜𑄨𑄢𑄬𑄭 𑄌𑄁𑄉𑄬, 𑄃𑄟𑄨 𑄘𑄨𑄎𑄧𑄚𑄬 𑄃𑄊𑄨𑄘𑄬 𑄊𑄧𑄢𑄚𑄧𑄖𑄴 𑄉𑄧 𑄉𑄧 𑄟𑄚𑄪𑄌𑄴𑅁 𑄖𑄧𑄢𑄬 𑄢𑄨𑄚𑄨 𑄌𑄬𑄭 𑄘𑄬𑄣𑄪𑄁, 𑄖𑄪𑄭 𑄎𑄧𑄣𑄧𑄁 𑄎𑄧𑄣𑄧𑄁 𑄉𑄧𑄢𑄨 𑄃𑄊𑄧𑄌𑄴𑅁 𑄚𑄉𑄧𑄖𑄴, 𑄇𑄚𑄧𑄖𑄴, 𑄖𑄧𑄘𑄖𑄴, 𑄦𑄘𑄧𑄖𑄴, 𑄒𑄬𑄋𑄧𑄘𑄴 𑄥𑄮𑄚 𑄢𑄪𑄝𑄮𑄣𑄭𑄮 𑄞𑄧𑄢𑄧𑄚𑄴𑅁 𑄥𑄎𑄴 𑄇𑄝𑄧𑄢𑄚𑄴 𑄊𑄧𑄋𑄧𑄘 𑄘𑄨 𑄃𑄊𑄧𑄌𑄴𑅁 𑄆𑄇𑄴𑄇 𑄆𑄇𑄴𑄇 𑄟𑄪 𑄌𑄨𑄟𑄬 𑄌𑄨𑄟𑄬 𑄦𑄎𑄧𑄢𑄴𑅁

𑄚𑄨𑄟𑄮𑄚𑄬 𑄆𑄇𑄴 𑄣𑄋𑄬𑄣𑄴 𑄉𑄧𑄢𑄨 𑄇𑄧𑄢𑄴, 𑄚𑄇𑄴𑄧𑄝𑄨 𑄥𑄪𑄚𑄨 𑄃𑄊𑄬𑅁

𑄖𑄧𑄢𑄬 𑄝𑄮 𑄥𑄎𑄬𑄭 𑄉𑄪𑄙𑄨 𑄞𑄨𑄘𑄨𑄢𑄬 𑄗𑄱𑄰𑄠𑄮𑄚𑄴𑅁 𑄖𑄧 𑄙𑄉𑄬–𑄛𑄎𑄢𑄠𑄴 𑄟𑄨𑄣𑄬–𑄟𑄧𑄢𑄧𑄖𑄴 𑄉𑄪𑄢𑄮, 𑄝𑄪𑄢𑄮, 𑄉𑄞𑄪𑄌𑄳𑄠𑄬 𑄃𑄊𑄧𑄚𑄴𑅁 𑄆𑄇𑄴𑄘𑄊𑄨𑄠𑄬 𑄉𑄪𑄙𑄨𑄖𑄴 𑄥𑄪𑄟𑄨 𑄥𑄪𑄟𑄨 𑄖𑄧𑄢𑄬 𑄌𑄬𑄭 𑄡𑄘𑄧𑄚𑄴𑅁 𑄃 𑄆𑄇𑄴𑄘𑄊𑄨𑄠𑄬 𑄌𑄁 𑄌𑄁 𑄉𑄧𑄢𑄨 𑄇𑄱𑄰 𑄖𑄧 𑄟𑄪𑄠𑄮𑄚𑄧𑄖𑄴𑄪𑄚𑄴 𑄥𑄎𑄴 𑄇𑄝𑄧𑄢𑄚𑄴 𑄅𑄣𑄴𑄬 𑄖𑄧𑄢𑄬 𑄌𑄘𑄧𑄚𑄴𑅁 𑄇𑄨𑄠𑄬 𑄇𑄨𑄠𑄬 𑄝𑄄𑄚𑄨 𑄉𑄧𑄖𑄴𑄧𑄚𑄴𑅁 𑄇𑄧𑄙𑄧𑄚𑄴, 𑄥𑄌𑄴𑄍𑄬, 𑄞𑄢𑄨 𑄟𑄚𑄬𑄭𑄠𑄬𑅁 𑄟𑄚𑄴𑄎𑄳𑄠𑄧 𑄥𑄬𑄢𑄬 𑄥𑄬𑄢𑄬 𑄏𑄇𑄴 𑄌𑄨𑄢𑄨 𑄌𑄨𑄢𑄨 𑄟𑄪𑄭–𑄃𑄮 𑄖𑄧𑄢𑄬 𑄌 𑄡𑄬𑄭𑄠𑄧𑄁𑅁 𑄟𑄪𑄭 𑄖𑄧𑄢𑄬 𑄆𑄇𑄴 𑄢𑄨𑄚𑄨 𑄉𑄧𑄢𑄨 𑄌𑄬𑄭 𑄃𑄊𑄧𑄁 𑄘𑄮𑄢𑄚𑄧𑄖𑄴 𑄒𑄨𑄠𑄬𑄭𑅁 𑄥𑄬𑄇𑄴𑄬 𑄖𑄪𑄭 𑄟𑄧𑄢𑄬 𑄚𑄧 𑄘𑄬𑄊𑄧𑄌𑄴𑅁 𑄖𑄧𑄢𑄬 𑄝𑄮 𑄥𑄎𑄬𑄭𑄠𑄬 𑄟𑄨𑄣𑄬𑄉𑄪𑄚𑄬 𑄣𑄧𑄊𑄬 𑄖𑄪𑄭–𑄃𑄮 𑄦𑄎𑄧𑄢𑄴𑅁 𑄖𑄧 𑄘𑄮𑄣𑄴 𑄦𑄎𑄨𑄝𑄮 𑄟𑄪𑄭 𑄌𑄬𑄭 𑄃𑄊𑄧𑄁 𑄌𑄮𑄈𑄴 𑄚𑄧 𑄜𑄨𑄢𑄬𑄭𑅁 𑄟𑄧 𑄙𑄉𑄧𑄖𑄴𑄪𑄚𑄴 𑄇𑄧𑄚𑄴𑄚 𑄆𑄇𑄴𑄎𑄧𑄚𑄬 𑄖𑄧𑄢𑄬 𑄓𑄇𑄴𑄬𑄉𑄨𑅁 𑄖𑄢𑄬 𑄌𑄘𑄬 𑄟𑄬 𑄘𑄬𑄇𑄴𑄈𑄮𑄌𑄴𑅁 𑄟𑄬 𑄘𑄬𑄊𑄨 𑄖𑄪𑄭 𑄟𑄙 𑄚𑄨𑄉𑄪𑄌𑄴𑄍𑄮𑄌𑄴𑅁 𑄟𑄙 𑄚𑄨𑄉𑄪𑄢𑄨 𑄖𑄢𑄬 𑄇𑄨 𑄇𑄪𑄠𑄮𑄌𑄴 𑄇𑄨𑄎𑄬𑄚𑄨, 𑄈𑄇𑄴𑄧𑄚𑄴 𑄝𑄘𑄬 𑄖𑄧 𑄙𑄉𑄧𑄖𑄴𑄪𑄚𑄴 𑄅𑄇𑄴𑄮 𑄟𑄨𑄣𑄬 𑄆𑄭 𑄇𑄧𑄣𑄧𑄉𑄨 𑄟𑄧𑄢𑄧𑄖𑄴 𑄇𑄨 𑄄𑄠𑄮𑄖𑄴 𑄆𑄙𑄧𑄇𑄴𑄧𑄚𑄴 𑄗𑄚𑅁 𑄚𑄧 𑄣𑄎𑄌𑄴 𑄚𑄬𑅃 𑄡𑄉𑄱𑄰𑅁 𑄥𑄨𑄠𑄧𑄖𑄴𑄪𑄚𑄴 𑄟𑄧𑄢𑄬 𑄙𑄝𑄬𑄭 𑄘𑄮𑄚𑄴𑅁

𑄚𑄨𑄟𑄮𑄚𑄬 𑄇𑄧𑄙𑄬 𑄇𑄧𑄙𑄬 𑄆𑄇𑄴𑄇 𑄟𑄧 𑄦𑄧𑄣𑄧𑅁

𑄇𑄨 𑄇𑄨 𑄞𑄝𑄧𑄌𑄴𑅁 𑄘𑄬𑄊𑄧𑄌𑄴 𑄖𑄬 𑄚𑄚 𑄥𑄧𑄝𑄧𑄚𑄴𑅁 𑄖𑄧 𑄥𑄧𑄝𑄧𑄚𑄚𑄨𑄠𑄬 𑄖𑄧𑄢𑄬 𑄟𑄧𑄖𑄴𑄪𑄚𑄴 𑄘𑄫𑄢𑄧𑄖𑄴 𑄚𑄬𑄡𑄠𑄴𑅁

𑄄𑄠𑄬𑄚𑄴 𑄘𑄧 𑄥𑄧𑄝𑄧𑄚𑄴𑅁 𑄥𑄧𑄝𑄧𑄚𑄬 𑄇𑄨 𑄚𑄧 𑄘𑄬𑄊𑄬𑅁 𑄆𑄇𑄴𑄇𑄚 𑄛𑄧𑄢𑄬𑄘𑄨 𑄟𑄧𑄢𑄴 𑄊𑄪𑄟𑄴 𑄞𑄋𑄨 𑄉𑄬𑄣𑄧𑅁 𑄛𑄭𑄧𑄣𑄬 𑄆𑄇𑄴𑄇 𑄟𑄧𑄚𑄧𑄖𑄴 𑄘𑄪𑄈𑄴 𑄦𑄧𑄣𑄧𑅁 𑄎𑄬𑄢𑄬𑄘𑄨 𑄞𑄝𑄨𑄣𑄪𑄁, 𑄄𑄠𑄬𑄚𑄴 𑄘𑄧 𑄥𑄧𑄝𑄧𑄚𑄴𑅁 𑄄𑄠𑄬𑄚𑄴𑄘𑄱𑄰𑄇𑄨 𑄟𑄧𑄚𑄧𑄖𑄴 𑄘𑄪𑄈𑄴 𑄉𑄧𑄢𑄨 𑄗𑄬𑄟𑄴𑅁 𑄥𑄧𑄝𑄧𑄚𑄴 𑄘𑄧 𑄝𑄬𑄌𑄴𑄞𑄉𑄴 𑄝𑄧𑄎𑄧𑄁 𑄘𑄬𑄊 𑄦𑄧𑄠𑄴𑅁 𑄈𑄣𑄨𑄇𑄴 𑄟𑄧𑄚𑄧𑄖𑄴 𑄘𑄪𑄈𑄴𑄦𑄱𑄰𑄠𑄬𑄘𑄬 𑄆𑄚𑄧𑄖𑄴𑄖𑄬𑄭 𑄟𑄪𑄭 𑄖𑄧 𑄟𑄪𑄠𑄚𑄴 𑄌𑄮𑄊𑄮𑄖𑄴 𑄞𑄎𑄬𑄝𑄢𑄴 𑄌𑄬𑄣𑄪𑄁𑅁 𑄚𑄬𑄭, 𑄌𑄮𑄊𑄮𑄖𑄴 𑄞𑄎𑄨 𑄚𑄧 𑄅𑄙𑄨𑄣𑄧𑅁 𑄈𑄨𑄎𑄬–𑄏𑄨𑄌𑄴𑄍𑄬 𑄉𑄧𑄢𑄨 𑄖𑄧 𑄜𑄧𑄑𑄮𑄝𑄮 𑄚𑄳𑄦𑄨𑄉𑄨𑄣𑄬𑄭 𑄌𑄬𑄣𑄪𑄁, 𑄖𑄪𑄠𑄮 𑄌𑄮𑄊𑄮𑄖𑄴 𑄚𑄧 𑄞𑄎𑄬 𑄖𑄧 𑄟𑄪𑄠𑄮 𑄌𑄬𑄠𑄢𑄉𑄚𑄴𑅁 𑄛𑄨𑄖𑄴𑄗𑄨𑄟𑄨𑄖𑄴 𑄥𑄧𑄠𑄴–𑄥𑄉𑄧𑄌𑄳𑄠 𑄘𑄬𑄊𑄨𑄣𑄪𑄁𑅁 𑄝𑄚𑄳𑄦 𑄖𑄧 𑄟𑄪𑄠𑄮 𑄌𑄬𑄠𑄢𑄉𑄚𑄴 𑄚𑄧 𑄘𑄬𑄣𑄪𑄁𑅁 𑄄𑄠𑄬𑄚𑄴 𑄇𑄨𑄦𑄱𑄰 𑄛𑄢𑄬𑅁 𑄖𑄬 𑄇𑄧𑄚𑄧 𑄛𑄧𑄏𑄛𑄨𑄢𑄬 𑄅𑄝𑄴 𑄉𑄧𑄢𑄨 𑄚𑄧 𑄛𑄢𑄨, 𑄝𑄨𑄘𑄨𑄁–𑄝𑄘𑄁 𑄝𑄮𑄘𑄮𑄖𑄴 𑄅𑄗𑄳𑄁𑄠𑄧𑄉𑄨𑅁

𑄚𑄇𑄴𑄧𑄝𑄨 𑄚𑄨𑄟𑄮𑄚𑄧 𑄟𑄪𑄠𑄮 𑄇𑄨𑄖𑄳𑄠𑄬𑄚𑄴𑄘𑄨 𑄌𑄭𑄘𑄬 𑄚𑄨𑄟𑄮𑄚𑄬 𑄌𑄪𑄙𑄮 𑄟𑄪𑄦𑄱𑄰𑄠𑄬𑅁 𑄃𑄭𑄠𑄬 𑄌𑄪𑄙𑄮 𑄟𑄪 𑄦𑄧𑄣𑄬𑅃 

𑄚𑄨𑄟𑄮𑄚𑄬 𑄛𑄮𑄖𑄴𑄛𑄮𑄖𑄳𑄠 𑄟𑄪 𑄦𑄧𑄝𑄢𑄴 𑄌𑄬𑄣𑄧,𑄦𑄱𑄰 𑄚𑄧 𑄛𑄣𑄳𑄠𑄧𑅁 𑄇𑄚𑄁𑄧 𑄇𑄚𑄁𑄧 𑄉𑄧𑄢𑄨 𑄇𑄧𑄣𑄧, 𑄆𑄭 𑄥𑄧𑄝𑄧𑄚𑄚𑄴 𑄇𑄨𑄖𑄴𑄖𑄬𑄭 𑄘𑄬𑄊𑄨𑄣𑄪𑄁 𑄇𑄱𑄰 𑄛𑄢𑄧𑄌𑄴𑅃 𑄝𑄮𑄘𑄮𑄖𑄴 𑄅𑄙𑄨𑄚𑄬𑄭 𑄇𑄧𑄚𑄧 𑄥𑄧𑄟𑄌𑄳𑄠 𑄣𑄊𑄧𑄖𑄴 𑄚𑄧 𑄛𑄁𑅁 𑄌𑄪𑄝𑄬–𑄌𑄝𑄬 𑄆𑄌𑄴𑄍𑄮𑄁𑅁 𑄖𑄧𑄢𑄬 𑄆𑄙𑄧𑄇𑄴 𑄦𑄨𑄘𑄮𑄖𑄴 𑄖𑄪𑄣𑄳𑄁𑄠𑄧, 𑄖𑄪𑄠𑄮 𑄖𑄧 𑄟𑄪𑄠𑄚𑄴 𑄌𑄮𑄊𑄮𑄖𑄴 𑄚𑄧 𑄞𑄎𑄬𑅁 𑄞𑄝𑄨𑄣𑄪𑄁 𑄥𑄧𑄝𑄧𑄚𑄚𑄴 𑄃𑄏𑄧𑄘𑄬 𑄦𑄧𑄠𑄴 𑄚𑄇𑄨𑅁 𑄖𑄧𑄢𑄬 𑄚𑄪𑄠𑄮 𑄝𑄮 𑄘𑄬𑄊𑄨𑄟𑄴𑄝𑄨 𑄚𑄇𑄨𑅁

𑄚𑄇𑄴𑄧𑄝𑄨 𑄇𑄧𑄣𑄧, 𑄥𑄧𑄝𑄧𑄚𑄴 𑄇𑄨 𑄝𑄬𑄇𑄴𑄇𑄚𑄨 𑄉𑄬𑄌𑄴𑄍𑄬𑄇𑄴 𑄉𑄬𑄌𑄴𑄍𑄬𑄇𑄴 𑄦𑄧𑄠𑄴 𑄚𑄇𑄨𑅁

𑄖𑄪𑄠𑄮 𑄚𑄨𑄟𑄮𑄚𑄧 𑄟𑄪 𑄇𑄣𑄚𑄴 𑄚𑄧 𑄡𑄠𑄴𑅁 𑄥𑄧𑄝𑄧𑄚𑄚𑄴 𑄟𑄨𑄏𑄬, 𑄚𑄇𑄴𑄧𑄝𑄨 𑄖 𑄙𑄉𑄧𑄖𑄴 𑄃𑄊𑄬 𑄞𑄝𑄨 𑄚𑄧 𑄛𑄢𑄬𑄢𑄴𑅁 𑄡𑄬𑄚𑄴 𑄞𑄝𑄨 𑄚𑄧 𑄛𑄢𑄬 𑄥𑄧𑄝𑄧𑄚𑄬 𑄘𑄬𑄊𑄨𑄚𑄬𑄭𑅁

𑄚𑄇𑄴𑄧𑄝𑄨 𑄇𑄧𑄣𑄧, 𑄃 𑄇𑄱𑄰, 𑄚𑄧 𑄇𑄧𑄝𑄬 𑄞𑄨𑄣𑄬𑅁 𑄃 𑄘𑄧 𑄝𑄬𑄇𑄴𑄇𑄚𑄨 𑄇𑄧𑄣𑄬𑅁 

𑄚𑄇𑄴𑄧𑄝𑄨 𑄄𑄠𑄬𑄚𑄴 𑄇𑄱𑄰𑄚𑄬 𑄚𑄨𑄟𑄮𑄚𑄬 𑄦𑄎𑄨𑄣𑄮𑅁 𑄚𑄨𑄟𑄮𑄚𑄧 𑄣𑄧𑄊𑄬 𑄚𑄇𑄴𑄧𑄝𑄨–𑄃𑄮 𑄦𑄎𑄨𑄣𑄮𑅁 𑄦𑄎𑄧𑄘𑄬 𑄦𑄎𑄧𑄘𑄬 𑄚𑄨𑄟𑄮𑄚𑄧𑄖𑄴𑄪𑄚𑄴 𑄆𑄇𑄴 𑄜𑄪𑄘𑄮 𑄌𑄮𑄊𑄮𑄛𑄚𑄨 𑄏𑄧𑄢𑄨 𑄛𑄧𑄌𑄳𑄠𑄘𑄬 𑄥𑄨𑄠𑄬𑄚𑄴 𑄈𑄬𑄠𑄣𑄴 𑄚𑄧 𑄉𑄧𑄢𑄬 𑄚𑄇𑄴𑄧𑄝𑄨𑅁 𑄚𑄇𑄴𑄧𑄝𑄨 𑄇𑄧𑄣𑄧, 𑄊𑄧𑄢𑄧𑄖𑄴 𑄡 𑄘𑄬 𑄛𑄧𑄢𑄨𑄝𑄮𑄘𑄬𑅁

𑄡𑄬𑄝𑄬 𑄃𑄠𑄴𑅁

𑄝𑄂! 𑄊𑄧𑄢𑄧𑄖𑄴 𑄚𑄧 𑄡𑄬𑄟𑄴 𑄚! 

𑄇𑄨𑄖𑄴𑄖𑄬𑄭𑅃

𑄘𑄬𑄢𑄨𑄠𑄬 𑄉𑄬𑄣𑄬 𑄇𑄧𑄙 𑄈𑄬𑄟𑄴𑄝𑄱𑄰𑅁 𑄟𑄣𑄱𑄰 𑄝 𑄇𑄧𑄚𑄧 𑄇𑄨𑄖𑄳𑄠𑄖𑄴 𑄡𑄬𑄝𑄢𑄴 𑄚𑄧 𑄘𑄮𑄚𑄴𑅁 𑄄𑄠𑄬–𑄃𑄮 𑄚𑄮𑄑𑄴𑄑𑄚𑄨 𑄈𑄧𑄎 𑄡𑄬𑄝𑄖𑄴𑄖𑄬𑄭𑅁

𑄖𑄧 𑄟𑄣𑄱𑄰 𑄖𑄧 𑄝𑄝𑄬 𑄘𑄧 𑄆𑄥𑄚𑄳𑄠 𑄚𑄧 𑄆𑄣𑄇𑄴𑅁

𑄛𑄧𑄢𑄨𑄇𑄴𑄈𑄬 𑄝𑄬𑄌𑄴 𑄘𑄬𑄢𑄨 𑄚𑄬𑄭𑅁 𑄦𑄧𑄣𑄬 𑄥𑄬𑄚𑄧𑄖𑄴𑄖𑄬𑄭 𑄛𑄢 𑄛𑄁𑅁

𑄃𑄧𑅁 𑄚𑄇𑄴𑄪, 𑄖𑄪𑄭 𑄘𑄧 𑄘𑄋𑄧𑄢𑄴𑄦𑄱𑄰𑄠𑄧𑄌𑄴𑅁 𑄡𑄨𑄙𑄪𑄛𑄭 𑄡𑄌𑄴𑅁 𑄇𑄧𑄣𑄬𑄎𑄧𑄖𑄴 𑄡𑄌𑄴𑅁 𑄟𑄬𑄣 𑄥𑄚𑄨𑄖𑄴 𑄡𑄌𑄴𑅁 𑄖𑄧𑄢𑄬 𑄟𑄚𑄳𑄠𑄬 𑄇𑄮𑄌𑄴𑄛𑄚 𑄇𑄧𑄙 𑄚𑄧 𑄇𑄧𑄚𑄴𑅃 𑄇𑄮𑄌𑄴𑄛𑄚 𑄌𑄨𑄙𑄨 𑄚𑄧 𑄣𑄬𑄊𑄧𑄚𑄴𑅃

𑄃𑄘𑄬𑄇𑄴𑄬 𑄉𑄧𑄢𑄨 𑄆 𑄇𑄧𑄙! 

𑄟𑄪𑄠𑄮𑄖𑄴𑄪𑄚𑄴 𑄆𑄌𑄳𑄠 𑄇𑄧𑄣𑄪𑄁𑅁

𑄖𑄪𑄭 𑄇𑄨 𑄟𑄧𑄢𑄬 𑄥𑄬𑄙𑄧𑄇𑄳𑄠𑄚𑄴 𑄟𑄧𑄚𑄬 𑄉𑄧𑄢𑄧𑄌𑄴𑅃

𑄚𑄙𑄬𑄭𑅁

𑄃 𑄇𑄧𑄣𑄬 𑄘𑄬𑅁

𑄃𑄧𑄇𑄴𑄖𑄬 𑄃𑄧𑄇𑄴𑄖𑄬 𑄇𑄨 𑄦𑄧𑄠𑄴 𑄇𑄨𑄎𑄬𑄚𑄨𑅁 𑄖𑄧𑄢𑄬 𑄚𑄨𑄚𑄬𑄭 𑄡𑄨𑄠𑄬𑄚𑄴 𑄛𑄠𑄴 𑄇𑄮 𑄆𑄏𑄬𑅁 𑄆𑄚𑄬–𑄃𑄮 𑄟𑄧𑄚𑄬–𑄃𑄮 𑄚𑄧 𑄉𑄧𑄢𑄧𑄁𑅁

𑄖𑄪𑄭 𑄢𑄋𑄟𑄖𑄳𑄠𑄖𑄴 𑄡𑄬𑄝𑄢𑄴 𑄃𑄉𑄬𑄘𑄨 𑄇𑄎𑄧𑄣𑄧𑄁 𑄛𑄢𑄧𑄖𑄴 𑄝𑄧𑄏𑄨 𑄇𑄨 𑄇𑄮𑄠𑄧𑄁 𑄟𑄧𑄚𑄧𑄖𑄴 𑄚𑄬𑄭𑅃

𑄃𑄊𑄬𑅁 𑄥𑄨𑄠𑄬𑄚𑄴 𑄇𑄨 𑄛𑄪𑄢𑄨 𑄜𑄬𑄣𑄬𑄟𑄴𑄝𑄱𑄰 𑄚𑄇𑄨 𑄟𑄪𑄭! 

𑄚𑄇𑄴𑄧𑄝𑄨 𑄟𑄧𑄚𑄧𑄖𑄴 𑄘𑄪𑄈𑄴 𑄛𑄬𑄠𑄳𑄠𑄬 𑄊𑄧𑄎 𑄚𑄳𑄦𑄨𑄉𑄨𑄣𑄬𑄭 𑄇𑄧𑄣𑄧, 𑄖𑄧𑄢𑄴 𑄇𑄨𑄌𑄴𑄪 𑄟𑄧𑄚𑄧𑄖𑄴 𑄚𑄬𑄭𑅁 𑄟𑄧𑄚𑄧𑄖𑄴 𑄗𑄬𑄣𑄬 𑄄𑄠𑄬𑄚𑄴 𑄛𑄪𑄏𑄮𑄢𑄴 𑄚𑄧 𑄉𑄧𑄖𑄴𑄬𑅁 𑄖𑄧 𑄥𑄧𑄝𑄧𑄚𑄚𑄴 𑄚𑄧𑄠𑄴 𑄘𑄬 𑄚𑄧𑄠𑄴, 𑄦𑄧𑄠𑄴𑅁 𑄈𑄉𑄢𑄍𑄧𑄢𑄨𑄖𑄴𑄪𑄚𑄴 𑄅𑄇𑄴𑄇𑄱𑄰 𑄟𑄧𑄢𑄬 𑄝𑄮 𑄌𑄠𑄴𑅁 𑄥𑄨𑄝𑄬 𑄞𑄨𑄣𑄬 𑄓𑄇𑄴𑄖𑄧𑄢𑄴𑅁 𑄥𑄨𑄝𑄬𑄖𑄴𑄖𑄬𑄭 𑄝𑄮 𑄘𑄨𑄝𑄬𑄖𑄴𑄖𑄬𑄭 𑄟𑄣𑄱𑄰 𑄝 𑄘𑄧𑄢𑄧–𑄟𑄧𑄢𑄧𑄦𑄱𑄰𑄠𑄧𑄚𑄴𑅁 𑄟𑄪𑄭 𑄇𑄮𑄠𑄮𑄁𑄉𑄬 𑄃𑄉𑄬 𑄛𑄧𑄢𑄳𑄦𑄣𑄬𑄊, 𑄎𑄬𑄢𑄬𑄘𑄨 𑄖𑄬 𑄝𑄮𑅁 𑄎𑄧𑄚𑄧𑄟𑄧𑄖𑄴 𑄚𑄧 𑄉𑄧𑄝𑄬𑄘𑄬 𑄟𑄚𑄴𑄎𑄳𑄠, 𑄝 𑄟𑄧𑄢𑄬 𑄉𑄧𑄛𑄳𑄠𑄬𑅁 𑄟 𑄃𑄧𑄉𑄧𑄙 𑄇𑄱𑄰𑄠𑄬𑅁 𑄖𑄢𑄢𑄴 𑄚𑄮𑄚𑄬𑄭𑄠𑄬 𑄅𑄇𑄴𑄮 𑄏𑄨 𑄇𑄨𑄚𑄬𑄖𑄴𑄖𑄬𑄭 𑄟𑄬 𑄚𑄧 𑄟𑄢𑄧𑄚𑄴𑅁 𑄦𑄧𑄠𑄴𑄖𑄧 𑄝𑄧𑄣𑄬 𑄝𑄧𑄣𑄬 𑄝𑄮 𑄚𑄧 𑄘𑄮𑄚𑄴𑅁 𑄘𑄨𑄝𑄬–𑄖𑄨𑄚𑄴𑄮 𑄏𑄨 𑄗𑄬𑄘𑄇𑄴, 𑄥𑄬𑄇𑄴𑄬 𑄇𑄨 𑄦𑄧𑄘𑄧𑅁 𑄖𑄧𑄖𑄴𑄖𑄬𑄭 𑄞𑄨𑄣𑄨 𑄟𑄪𑄭 𑄃𑄊𑄧𑄁𑅁 𑄖𑄪𑄭 𑄃𑄧𑄚𑄢𑄴𑄥𑄴 𑄛𑄥𑄴 𑄉𑄧𑄢𑄨𑄝𑄬𑄖𑄴𑄖𑄬𑄭 𑄆𑄉𑄧𑄎 𑄝𑄧𑄢𑄴 𑄟𑄊𑄨 𑄘𑄮𑄁 𑄇𑄨𑄠𑄧𑄋𑄧𑄖𑄴 𑄉𑄬𑄣𑄬 𑄖𑄧𑄢𑄴 𑄃𑄢𑄧 𑄃𑄎𑄬–𑄝𑄎𑄬 𑄥𑄧𑄝𑄧𑄚𑄴𑅁 𑄟𑄪𑄭 𑄝𑄮 𑄥𑄎𑄨 𑄃𑄊𑄧𑄁𑅁 𑄟𑄚𑄴𑄎𑄳𑄠 𑄟𑄧𑄢𑄬 𑄇𑄮𑄌𑄴𑄛𑄚 𑄇𑄧𑄙 𑄇𑄧𑄚𑄴 𑄚𑄇𑄨𑅁

𑄚𑄧𑄠𑄴 𑄘𑄧 𑄟𑄪𑄭 𑄖𑄧𑄢𑄬 𑄥𑄬𑄙𑄧𑄇𑄳𑄠𑄚𑄴 𑄉𑄧𑄢𑄨 𑄇𑄧𑄝𑄢𑄴 𑄚𑄧 𑄌𑄁𑅁 𑄃 𑄥𑄧𑄝𑄧𑄚𑄧 𑄇𑄧𑄙 𑄇𑄢𑄧𑄢𑄬 𑄡𑄧𑄇𑄴𑄬 𑄇𑄱𑄰 𑄚𑄧 𑄛𑄢𑄧𑄋𑄧𑄢𑄴, 𑄖𑄧𑄢𑄬 𑄇𑄮𑄟𑄴 𑄞𑄨𑄣𑄨 𑄞𑄛𑄴𑄛𑄮𑄁𑅁 𑄆𑄭 𑄇𑄧𑄣𑄁𑄪𑄉𑄬𑅁

𑄇𑄧𑄙𑄚𑄴 𑄝𑄬𑄌𑄴 𑄇𑄮 𑄡𑄬𑄠𑄳𑄠𑄬 𑄟𑄧𑄚𑄬 𑄉𑄧𑄢𑄨 𑄚𑄇𑄴𑄧𑄝𑄨 𑄇𑄧𑄣𑄧, 𑄇𑄱𑄰, 𑄟𑄧 𑄜𑄪𑄣𑄴𑄮𑅃

𑄚𑄨𑄟𑄮𑄚𑄬 𑄎𑄬𑄛𑄴𑄮𑄖𑄴 𑄦𑄖𑄴 𑄞𑄮𑄢𑄬𑄭 𑄌𑄭𑄘𑄬 𑄜𑄪𑄣𑄴 𑄚𑄧 𑄃𑄚𑄬𑅁 𑄇𑄧𑄣𑄧, 𑄆𑄭 𑄟𑄧𑄢 𑄟𑄧𑄚𑄚𑄴, 𑄜𑄪𑄣𑄴𑄮 𑄃𑄚𑄨𑄝𑄢𑄴 𑄛𑄪𑄢𑄨 𑄜𑄬𑄣𑄴𑄣𑄮𑄁𑄉𑄱𑄰𑅁

𑄚𑄇𑄴𑄧𑄝𑄨 𑄆𑄇𑄴𑄇 𑄦𑄎𑄨𑄣𑄮𑅁 𑄖 𑄆𑄇𑄴𑄇 𑄦𑄎𑄨𑄣𑄱𑄰 𑄚𑄨𑄟𑄮𑄚𑄧𑄢𑄴 𑄝𑄬𑄇𑄴 𑄟𑄧𑄚𑄧𑄖𑄴 𑄘𑄪𑄈𑄴 𑄇𑄎𑄧𑄣𑄧𑄁 𑄣𑄟𑄧𑄚𑄨 𑄞𑄎𑄨 𑄉𑄬𑄣𑄧𑅁 𑄈𑄪𑄎𑄨𑄠𑄬 𑄞𑄧𑄢𑄨 𑄉𑄬𑄣𑄧 𑄝𑄪𑄇𑄴𑅁 𑄛𑄮𑄖𑄳𑄠 𑄃𑄟𑄧𑄣𑄳𑄠 𑄦𑄝𑄠𑄴 𑄡𑄬𑄚𑄴 𑄇𑄬𑄠𑄳𑄠𑄬 𑄎𑄪𑄢𑄬 𑄚𑄬𑄡𑄠𑄴 𑄛𑄢, 𑄎𑄪𑄢𑄬 𑄉𑄬𑄣𑄧 𑄚𑄨𑄟𑄮𑄚𑄧𑄢𑄴 𑄉𑄮𑄘 𑄇𑄬𑄠𑄳𑄠𑄬𑄚𑄴𑅁 𑄚𑄇𑄴𑄧𑄝𑄨 𑄦𑄎𑄨, 𑄟𑄪 𑄌𑄨𑄟𑄬𑄭 𑄇𑄧𑄣𑄧, 𑄇𑄨, 𑄜𑄪𑄣𑄴 𑄃𑄚𑄴𑄘𑄬 𑄛𑄪𑄢𑄨 𑄜𑄬𑄣𑄴𑄣𑄮𑄌𑄴𑄍𑄱𑄰𑅃 𑄚, 𑄜𑄪𑄣𑄴 𑄉𑄌𑄴𑄍𑄪𑄚𑄴 𑄟𑄧𑄢𑄨 𑄡𑄨𑄠𑄧𑄚𑄴𑅁 𑄖𑄧𑄢𑄬 𑄃𑄢𑄧 𑄜𑄪𑄣𑄴𑄝𑄨𑄎𑄨 𑄘𑄨𑄠𑄬 𑄛𑄧𑄢𑄨𑄝𑄮𑅁

𑄈𑄇𑄴𑄧𑄚𑄴 𑄝𑄘𑄬 𑄛𑄧𑄏𑄨𑄟𑄴 𑄝𑄣𑄪𑄈𑄣𑄩 𑄇𑄨𑄠𑄧𑄋𑄧𑄖𑄴𑄪𑄚𑄴 𑄉𑄧𑄁 𑄉𑄧𑄁 𑄟𑄁𑄧–𑄃𑄧 𑄢𑄧 𑄉𑄪𑄎𑄪𑄢𑄨 𑄅𑄙𑄨𑄣𑄧𑅁 𑄛𑄧𑄏𑄨𑄟𑄴 𑄝𑄣𑄪𑄈𑄣𑄩 𑄟𑄧𑄁–𑄃𑄧 𑄢𑄧 𑄣𑄧𑄊𑄬 𑄣𑄧𑄊𑄬 𑄇𑄖𑄴𑄮𑄣𑄮, 𑄛𑄪𑄉𑄧 𑄝𑄣𑄪𑄈𑄣𑄩, 𑄏𑄧𑄉𑄧𑄢𑄝𑄨𑄣𑄴, 𑄟𑄧𑄉𑄴𑄝𑄚𑄴 𑄥𑄪𑄟𑄪𑄖𑄴𑄮 𑄉𑄮𑄘 𑄇𑄎𑄧𑄣𑄧𑄁 𑄌𑄉𑄣𑄝𑄮 𑄟𑄧𑄁–𑄃𑄧 𑄢𑄧 𑄉𑄪𑄎𑄪𑄢𑄨 𑄅𑄙𑄨𑄣𑄧𑅁 𑄞𑄚𑄴𑄖𑄬𑄉𑄪𑄚𑄬 𑄖𑄧𑄝𑄧𑄚 𑄉𑄧𑄢𑄨𑄝𑄢𑄴 𑄃𑄉𑄬𑄘𑄨 𑄥𑄳𑄢𑄧𑄟𑄧𑄕𑄴𑄉𑄪𑄚𑄬 𑄟𑄧𑄁 𑄝𑄌𑄴𑄍𑄚𑄴𑅁 𑄇𑄧𑄚𑄧 𑄇𑄧𑄚𑄧 𑄥𑄳𑄢𑄧𑄟𑄧𑄕𑄬 𑄟𑄧𑄁 𑄝𑄌𑄴𑄍𑄘𑄬 𑄛𑄌𑄴𑄝𑄢𑄴 𑄝𑄌𑄴𑄍𑄚𑄴𑅁 𑄇𑄧𑄚𑄧 𑄇𑄧𑄚𑄧 𑄥𑄳𑄢𑄧𑄟𑄧𑄕𑄬 𑄚𑄧𑄝𑄢𑄴 𑄝𑄌𑄴𑄍𑄚𑄴, 𑄖𑄨𑄚𑄴𑄝𑄢𑄴 𑄝𑄌𑄴𑄍𑄚𑄴𑅁 𑄖𑄨𑄚𑄴𑄝𑄢𑄴 𑄝𑄌𑄴𑄍𑄚 𑄦𑄧𑄣𑄧𑄘𑄬, 𑄝𑄪𑄘𑄴𑄙𑄧, 𑄙𑄧𑄢𑄴𑄟𑄧, 𑄥𑄧𑄁𑄊𑄧𑅁 𑄚𑄧𑄝𑄢𑄴 𑄝𑄌𑄴𑄍𑄚 𑄦𑄧𑄣𑄧𑄘𑄬, 𑄝𑄪𑄘𑄴𑄙𑄧𑄢𑄴 𑄚𑄧 𑄉𑄪𑄕𑄴, 𑄥𑄧𑄁𑄊𑄧𑄢𑄴 𑄚𑄧 𑄉𑄪𑄕𑄴𑅁 𑄘𑄫𑄢𑄧𑄖𑄴, 𑄢𑄨𑄛𑄴 𑄢𑄨𑄛𑄴 𑄉𑄧𑄢𑄨 𑄥𑄪𑄚 𑄉𑄬𑄣𑄧 𑄞𑄚𑄴𑄖𑄬𑄉𑄪𑄚𑄧𑄢𑄴 𑄖𑄧𑄝𑄧𑄚 𑄉𑄧𑄢𑄚, 𑄚𑄧𑄟𑄮 𑄖𑄧𑄥𑄴𑄥 𑄞𑄧𑄉𑄧𑄝𑄖𑄮 𑄃𑄧𑄢𑄧𑄦𑄧𑄖𑄮 𑄥𑄧𑄟𑄴𑄝𑄥𑄧𑄟𑄴𑄝𑄪𑄘𑄴𑄙𑄥𑄴𑄥𑅁

: 𑄗𑄪𑄟𑄴 :